1 Ajiŋ ayu, nja n’yu fiɛɛ yode lo woŋ wù fɛwe le njɛ le kinchvu ki bamii kì baaŋ, fi wanɛ lɛ,

"Mbɛɛŋsɛ nyûme fɛ Nyo wese le.

Le wu wù bvuuse bamii, le wu wù kɛme bvukugɛ bɛ bvuŋga.

2 Wu suunɛ bansa be wu bii nchiɛɛŋ le bɛ je yì chaaŋ le.

Wu le wu noŋ wa ŋgɛ yi kiŋkfuŋ ki kwɛse wu kinjaŋ wɛɛ le,

wù chi chɛŋe kikwɛɛ ki nshɛŋ bɛ kinche ke ki kinjaŋ.

Wu le wu chvuu wa kichvusɛ yi kwɛse wuyu le,

ki bamii be ba lɛme ba wu gɛ̀ yuuyi le."

3 Bo ka bo kaasɛ bo tu bo wanɛ lɛ,

"Mbɛɛŋsɛ nyûme fɛ Nyo le.

Munjige mù bɛɛne a kilaantɛŋ kinɛ le, lé mu gê mu bɛ̂ɛne segechii mu kâge gɛ."

4 Bachɛ ba mbaanfiɛɛ ncho banɛh baa mo mwɛɛ mu wuŋe mù munɛh mwɛɛ mo mu gwe mu gɛɛŋ fɛkuu mu nya mbɛɛŋsɛ wù baaŋ Nyo le, wù le wu shii yi kala le. Bo tu bo duu lɛ, "Fi nyûme noo. Mbɛɛŋsɛ nyûme fɛ Nyo le."

5 Jɛ yimi mo yi bu fɛ kala le yi duu lɛ,

"Bɛŋ bachii ba le bamii ba lɛme ba Nyo,

bɛŋ bɛ̂ɛŋse Nyo wese besabɛŋ,

bɛŋ bachii ba faane wu kɛnɛ nyu ba shige shige,

kɛnɛ ba baaŋ baaŋ, bɛŋ nyâa mbɛɛŋsɛ wu le."

6 Ŋka nja n’yu fiɛɛ fimi fi nyume njɛ jɛ yi kinchvu ki bamii fi yode njɛ joo yì gwee a kiŋkoŋ le, yi wanɛ njɛ jaŋ yì ŋgbwamɛ bɛ bvuŋga lɛ,

"Mbɛɛŋsɛ nyûme fɛ Nyo le,

nje Tada wese besabɛŋ wù Nyo,

wù Kɛmɛ Bvuŋga Bvuchii wu sage wa.

7 Besabɛŋ lâŋeye, bee sâge, bee nyâa mbɛɛŋsɛ wu le,

nje kife ki bvuguu bvu Mwa Shoŋ le ki to wa,

Kwɛse wù fwɛŋ le wu seesɛ wa kikwɛɛ ke.

8 Ba le ba nya wa nju yì shiŋeshiŋe

yì yuude yi lale wu noŋ ye le."

(Nju yinɛ le gee chì chaaŋ chi bamii ba le ba Nyo.)

9 Nchɛndaa wu Nyo wuyu ka wu jɛmɛ mɛne lɛ, "Sâŋ finɛ fì le lɛ, ‘Kinlaŋye kì baaŋ le ki bamii ba ba le ba be bo lɛ bo to fɛ ŋka wu bvuguu bvu Mwa Shoŋ le.’" Wu ka wu jɛmɛ mɛne lɛ, "Banjɛmɛ banɛ le ba nchiɛɛŋ, nyu banjɛmɛ ba Nyo." 10 Mɛ mo nja ŋgwe bikaa bie le ki nnya ŋgvunɛ wù baaŋ nchɛndaa wu Nyo wunɛ le. Wu jɛmɛ mɛne lɛ, "Keefɛ wo gê noo gɛ. Nle gɛh tɛ muh wu lɛme njɛ wo mo booŋ ba bwoo ba lɛme yi fiɛɛ fì ba jɛme kune Jiso le. Wo nyâa ŋgvunɛ wù baaŋ nyume Nyo le. Fiɛɛ fì ba jɛme kune Jiso finɛ *19:10 Kɛnɛ lɛ, "fiɛɛ fì Jiso jɛme finɛ…". le gɛh fi kibɛɛ fì bamii ba ntuŋ wu Nyo gɛ̀ jɛme."

11 Nja n’yɛŋ fɛwe gwenyɛ, nyambala yimi yì baaŋ lɛme fo. Muh nyume yu ba tɛŋe lɛ Muh wù Lɛme yi Jɛ ye le bɛ Muh wù Nchiɛɛŋ, wu to wu suunɛ bansa be kɛnɛ wu tune jɛŋ yì chaaŋ. 12 Ajii awe gɛ̀ bee njɛ lɛmɛ chi ŋgu, bifo bi bvunfoŋ nyu a wu fwa wesee. Wu gɛ̀ kɛme jee ba saŋ yi ye ye le gɛ muh mu gɛ nyume yu wù kɛɛ chi, fuge wu sɛŋ gɛ. 13 Wu gɛ̀ bee wu susɛ ye ye bɛ kikuŋ kì ndefe ba leesɛ a bilɛmɛ le. Jee chì ba gɛ̀ tɛŋe wu yu le lɛ Jɛ yi Nyo. 14 Bamii ba jɛŋ ba le woŋ wù fɛwe le bo bii a wu jiŋ bo bɛɛŋ nyámbala yì baaŋ bo jii njú yi shiŋeshiŋe, yi yuude yi baaŋ nɛ bvuuu. 15 Nyo yi jɛŋ yì koode gɛ̀ bude a wu mu nyume yi yì wu lé wu gê wu sô bituŋ yu wu mo wu sâge bi bɛ bvuŋga bvù baaŋ. Wu lé wu gê wu bvûsɛ shɛ́ŋ yi Nyo wù Kɛme Bvuŋga Bvuchii wu dunyɛ bamii le. Shɛ́ŋ yi Nyo yinɛ yì bɛɛne baaŋ le njɛ kiso kì ba soone muntaŋ fo mbvuuŋ bude. 16 Yi kikuŋ ke le bɛ yi yɛŋ le ba gɛ̀ saŋ jee che lɛ, "Nfoŋ banfoŋ, mo Tada wu batada."

17 Ŋka nja n’yɛŋ nchɛndaa wu Nyo wumu le wu lɛme antɛnɛɛ a juu. Wu gɛ̀ lɛme noo wu jaŋe munyii munchii mù fuune we wu duu lɛ, "Bɛŋ tô bɛŋ tâashɛ fɛ ŋka wù baaŋ wu Nyo ge le. 18 Bɛŋ lé bɛŋ jî agvuŋ a banfoŋ bɛ a bachiji bikwɛɛ bi bamii ba jɛŋ, mo a bamii ba kɛme bvuŋga, bɛ agvuŋ a nyambala, bɛ a bamii ba bɛɛne yu, mo a bamii bachii ba le nfa, bɛ a ba le gɛ nfa gɛ, mo a bamii ba shige shige, bɛ a ba baaŋ baaŋ." 19 Mɛ mo n’yɛŋ nyaŋ yì kuufe ye bɛ banfoŋ ba yi nshɛŋ le mo bamii baboo ba jɛŋ bo taashɛ ki bo tûŋ jɛŋ bɛ muh wù gɛ̀ shilɛ yi nyambala le mo bɛ bamii be ba jɛŋ. 20 Lɛ jɛŋ kɛ, wu koo nyaŋ yì kuufe ye yɛɛ bɛ muh wù gɛ̀ mbiane lɛ wu le muh wu ntuŋ wu Nyo. Muh wunɛ le wu to wu shee fwe a nyaŋ yiyu, wu gee mwɛɛ mu jwe wù yunɛ. Mwɛɛ munɛ le mù wu gɛ̀ lɛɛde bɛ bamii ba kɛme njiŋɛ wu nyaŋ yì kuufe ye yiyu ye yiboo le, bo nyaa mbɛɛŋsɛ wù baaŋ fimooso fi nyaŋ yì kuufe ye yiyu le. Wu gɛ̀ noŋ bo bafɛɛ banɛ bo nyume ba wuŋe a mamasi wù fiee nyu ŋgu bɛ muŋkaŋ yo. 21 Wu wù gɛ̀ shilɛ yi nyambala yɛɛ le mo wu gwoojɛ kimbɛge ki bamii bɛ nyo yi jɛŋ yì gɛ̀ bude a wu mu, munyii munchii ji ye yi bamii bayu mu tu mu ŋɛɛnɛ lo.