1 Ŋka nja n’yɛŋ ŋwa wumu le a kibo kinchiɛɛŋ ki muh wù gɛ̀ shilɛ yi kala wɛɛ le, ba saŋ antɛŋ bɛ akfuuŋ ba kɛbɛ lo, ba laaŋ manjuu le bvusooshwi bɛ kila. 2 Nja n’yɛŋ tɛ nchɛndaa wu Nyo wumu wù tɛɛme le wu wane fɛwɛɛwe wu biide lɛ, "Le yɛɛŋ wuyu wù le wu kojɛ ki wu bwɛ̂ɛyɛ bila binɛ, wu faanyɛ ŋwa wunɛ?" 3 Gɛ muh gɛ̀ bee yu fɛwe kɛnɛ yi nshɛŋ le kɛnɛ a nshɛŋ kuu, wù taŋlo wu faanyɛ ŋwa wuyu kɛnɛ wu jiŋɛ antɛŋ a ŋwa wuyu gɛ. 4 Mbee kwe baaŋ lɛ gɛ muh gɛ̀ bee yu wù le wu kojɛ wù taŋlo wu gwenyɛ ŋwa wuyu kɛnɛ wu bijɛ antɛŋ a yu gɛ. 5 Muh mu ŋgoo yi bachɛ baa le jɛmɛ mɛne lɛ, "Keefɛ wo bêede gɛ. Yêgɛ yû, muh wù ba tɛŋe lɛ Bvule wù a kfuu chi Juda le ba ka tɛŋe tɛ lɛ Bia yì bu a kfuu chi Nfoŋ Dabi le wu so wa, le wu wù taŋlo wu bwɛɛyɛ bila bì bvusooshwi biyu wu faanyɛ ŋwa wuyu."*5:5 Muh wunɛ wù ba tɛŋe lɛ Bvule wu a kfuu chi Juda le mo Bia yi bu a kfuu chi Nfoŋ Dabi le, le Mbvusɛ wù Nyo gɛ̀ ka.

6 Nja n’yɛŋ Mwa Shoŋ le wu lɛme antɛnɛɛ a kala bɛ mwɛɛ mu wuŋe mu munɛh mwɛɛ mo bachɛ baa, wu nyume njɛ ba le ba sɛɛ. Wu kɛme bitoŋ bvusooshwi bɛ ajii bvusooshwi. Ajii ayu nyu biyo bi Nyo bi bvusooshwi bì wu le wu tuŋ bi bu bi gɛɛŋ yi kikwɛɛ ki nshɛŋ le kichii. 7 Mwa Shoŋ wuyu mo wu gɛɛŋ wu fi ŋwa wɛɛ a kibo kinchiɛɛŋ ki muh wɛɛ wù gɛ̀ shilɛ yi kala le. 8 No wu fi ŋwa wuyu noo, mwɛɛ mu wuŋe mu munɛh mwɛɛ bɛ bachɛ ba mbaanfiɛɛ ncho banɛh mo bo gwe bo gɛɛŋ fɛkuu a Mwa Shoŋ wuyu fwe. Muh wu mumwaa wu mumwaa bo le gɛ̀ kɛme kome bɛ kintee kì ba fɛ bɛ kichwa ki bige kì yɛɛde, jiiŋ nyu chi yisɛ yo. Jiiŋ chinɛ le buunɛ chi bamii ba le ba Nyo. 9 Mwɛɛ mwɛɛ bɛ bachɛ baa mo bo yɛɛŋ ŋkee wumu wù fwɛŋ wu jɛme lɛ,

"Le wo wù le wo kojɛ ki wo fî ŋwa wuyu wo bwɛ̂ɛyɛ bila biyu,

nje ba gɛ̀ sɛɛ wo, kilɛmɛ kuŋ suuŋ bamii,

chiaaŋ yi kimbefɛ le wo nya bo Nyo le.

Bamii banɛ bu chikfuu le chichii, bɛ jɛ́ yichii,

chikfuu chi bamii lɛ chichii mo bituŋ bichii.

10 Wo le wo nya bo bvunfoŋ,

wo ge bo tu bo nyu bachiji kintanyɛ ba Nyo wese besabɛŋ.

Bo nyu bo ge bo sage yi nshɛŋ le."

11 Ndoo ŋka n’jiŋɛ, nja n’yu jɛ yi banchɛndaa ba Nyo ba nyu lo banchvuge le banchvuge le bɛ bamala le bamala le. Bo gɛ̀ bee bo lɛme bo kɛnɛ kala bɛ mwɛɛ mu wuŋe mwɛɛ mo bachɛ baa. 12 Bo gɛ̀ yɛɛne fɛwɛɛwe bo duu lɛ,

"Mwa Shoŋ wù ba gɛ̀ sɛlɛ,

le wu wù le wu kojɛ ki wu kɛ̂me bvuŋga,

bɛ kwa mo bvufee bvù baaŋ,

mo jee chi kuge mo ŋgvunɛ mo bvukugɛ mo mbɛɛŋsɛ."

13 Nja n’yu mwɛɛ munchii mù Nyo gɛ̀ fɛ mu le fɛwe mo yi nshɛŋ le mo mu a nshɛŋ kuu mo a joo yì baaŋ le, mo mwɛɛ munchii mù le manjuu manɛ le, mu yɛɛne lɛ,

"Mbɛɛŋsɛ bɛ ŋgvunɛ mo bvukugɛ mo bvuŋga,

kɛ̂mɛ wɛɛ wù le wu shii yi kala le,

mo Mwa Shoŋ wunɛ le segechii wu kage gɛ!"

14 No mu yɛɛne noo, mwɛɛ mu wuŋe mù munɛh mwɛɛ bɛɛŋ lɛ, "Fi nyûme noo!" Bachɛ baa gwe bo gɛɛŋ fɛkuu bo nya mbɛɛŋsɛ wù baaŋ.