1 Kikwɛɛ ki fiɛɛ fì besabɛŋ jɛme kune fi le gɛh lɛ, besabɛŋ kɛme kfuu chi kikwɛɛ ki bachiji kintanyɛ nyu muh wù le wu shii a kibo kinchiɛɛŋ ki kala wu Nyo wu Bvukugɛ le fɛwe. 2 Wu le muh wu lɛme wu Nyo, wu lɛne kinche ki Nyo kì ajiŋ kì nyu nchiɛɛŋ nchiɛɛŋ chuŋ yi wu wù Nyo, kɛnyi gɛ bamii gɛ. Kɛnyi wu wù Tada Nyo chuŋ yiyu. 3 Kikwɛɛ ki bachiji kintanyɛ kichii Nyo to wu baa, wu gɛɛ lɛ wu nyâa nnya wu ka gee bintanyɛ fɛ Nyo le. Noo, tu fi le fiɛɛ fi shaŋ fɛ wunɛ chiji kintanyɛ le ki wu kɛ̂me tɛ fiɛɛ fì taŋlo wu nyâ Nyo le. 4 Nɛ wu bee fɛkuu fɛnɛ, wu gɛ nyu lo chiji kintanyɛ gɛ, nje bachiji kintanyɛ le wa yu bò nyaa nnya bo bii no nchi wu Musɛ goone. 5 Lɛme chi bo lɛne fɛkuu fɛnɛ le gɛh lo nfiɛɛnɛ bɛ kinjiinyi ki kinche ki Nyo kì ajiŋ ki fɛwe. Le fiɛɛ fì gɛ̀ bee sege Musɛ gɛ̀ bee ki wu kɛ̂nyɛ chuŋ yi Nyo fɛkuu fɛnɛ, Nyo teefɛ wu, wu du lɛ,

"Wo yɛ̂nɛ lɛ wo le wo kɛ̂nyɛ fiɛɛ fichii fi nyû yɛɛŋyɛɛŋ

njɛ fi ŋgɛ̀ ndunyɛ wo le yi mbegɛ le."

6 Geenɛ, Jiso le ba nya lɛme wu le chi kuge chi fede chi bachiji kintanyɛ ba fweele, gɛh yɛɛŋyɛɛŋ no maŋkaŋ mà wu lɛme fwe yo antɛnɛɛ a Nyo bɛ muh wu wuŋ ma kuge tɛ ma fede mà kege. Mo fede nje mo manɛ bii nyu baŋka ba fede ba fweele le. 7 Nɛ maŋkaŋ ma fweele gɛ̀ kɛme gɛ jialɛ gɛ, tu gɛ ntaŋ wu mamu baaŋ yu gɛ. 8 Nyo gɛ̀ yɛŋ lɛ bamii kɛme jialɛ, wu mo wu jɛmɛ lɛ,

"Mɛ wù Tada njɛme lɛ juu too lo,

chì nlé ŋgê ŋgwô maŋkaŋ mà manfɛŋ,

besa yeh yi Ishwala mo yeh yi Juda.

9 Gɛ maŋkaŋ manɛ nyu njɛ mà ŋgɛ̀ ŋgwo besa bachiji chiji bo,

juu chì ŋgɛ̀ jijɛ bo le yi kibo le,

njo mbu bɛ bo woŋ wu Ijib le gɛ.

Maŋkaŋ mayu manɛ bo gɛ̀ baaŋ mɛ gɛ bo lɛme yi mo le gɛ.

Noo, mɛ mo mbaa jiŋ bo le. Finɛ jɛme mɛ wù Tada.

10 Mɛ wù Tada ŋka njɛme lɛ, kife lé ki tô ki kôjɛ,

mɛ mo ŋgwô mamu maŋkaŋ besa yeh yi Ishwala.

Mo lé mo nyû lɛ, nlé ŋgê nlêesɛ lo banchi baŋ,

a baŋkwajɛ baboo le,

nsâŋ nyu a muntele muboo le.

Nlé ŋgê nyû Nyo wuboo, bo nyûme bamii baŋ.

11 Gɛ muh baaŋ wu ka wu yɛyi lo muh we wu woŋ wumu,

kɛnɛ mwa bwee wu duu lɛ wu kêe Tada Nyo gɛ,

nje muh wuchii lé wu gê wu kêe mɛ,

kɛge yi muh wu shige le gɛɛne bude yi wù kuge le.

12 Nlé ŋgê ŋkôo yii fɛ bo le,

nlɛ̂ɛshɛ mwɛɛ muboo mù mbefe.

Gɛ mbaaŋ ŋka ŋkwâji bimbefɛ biboo gɛ."

13 No Nyo gɛ̀ jɛmɛ lɛ maŋkaŋ ma manfɛŋ lé mo nyûme, tu wu jode lɛ ma fweele maa le fiɛɛ fì kege. Fiɛɛ nɛ le fi kege kɛnɛ fi juŋ wa, tu shɛgɛ wa shige, fi lɛsɛ a bamii jii.