1 Booŋ ba bwɛɛŋ, no Nyo le wu koo wa yii fɛ besabɛŋ le, mɛ mo ŋkude chiaaŋ lɛ bɛŋ nyâ bikwɛɛ biɛna Nyo le njɛ mwɛɛ mu kintanyɛ mù baaŋ yu mù yuude Nyo bɛɛŋ. Finɛ fiɛɛ le je yì kooji fɛ bɛŋ le ki bɛŋ bûune Nyo yu. 2 Keefɛ bɛŋ bîi mwɛɛ mù bamii ba yi nshɛŋ le fɛnɛ gee gɛ. Bɛŋ chînɛ Nyo nyâa bɛŋ bɛ baŋkwajɛ bafɛŋ, bo kuse bɛŋ. Nɛ bɛŋ gee noo, bɛŋ mo bɛŋ kɛ̂ɛ ki bɛŋ tâa bɛŋ kêe fiɛɛ fì Nyo goone, nyu fi fì joŋe, Nyo nyu wu bɛɛŋ fi le, fi joŋe wu le fi gɛɛne fi mɛɛsɛ.

3 Mɛ njɛ muh wù Nyo le wu baa, no nduu bɛŋ bachii le lɛ, keefɛ muh kwâji kune kikwɛɛ ke lɛ wu le fiɛɛ fimi fede no wu le gɛ. Muh kwâji kune kikwɛɛ ke a je yì chuule le. Muh kwâji wu bîi nfe wù Nyo le wu nya wu le. 4 Besabɛŋ kêe lɛ ye yi muh le yimimia, yi kɛme bimbe yeye yeye, bimbe biyu kɛme lɛme yeye yeye. 5 Le gɛh yɛɛŋyɛɛŋ no besabɛŋ le. Mo no besabɛŋ le nɛ wesee, besabɛŋ le ye yimimia yi Kletu le. Gɛ muh nyu fɛ kikwɛɛ ke le wu maa gɛ. 6 Besabɛŋ kɛme nnya yeye yeye bii je yì Nyo le wu nya besabɛŋ le. Besabɛŋ mo be lɛ̂ne bɛ nnya yiyu. Nnya yi muh le ki wu têede ntuŋ wu Nyo, wu teede wu bii fie mbɛmɛ wù Nyo nya wu le. 7 Nnya yi muh le ki wu lɛ̂ne fɛ bamii le, wu mo wu lɛ̂ne fɛ bo le. Nɛ yi muh le ki wu yɛ̂yi bamii, wu mo wu yɛ̂yi. 8 Nɛ nnya yi muh le ki wu yûfe muntele mu bamii, wu mo wu yûfe. Nɛ le lɛ, yi muh nnya le ki wu nyâa mwɛɛ bamii le, wu gwênyɛ chiaaŋ ye. Nɛ le lɛ, yi muh le ki wu jîiŋe fɛ bamii le, wu mo wu jîiŋe fɛ bo le bɛ fitele fie fichii. Nɛ muh le, ye nnya nyu ki wu kôode yii fɛ bamii le, wu mo wu kôode wu yuge njoŋ.

9 Kiŋkoŋɛ kena kɛme ki ki nyûme kì nchiɛɛŋ. Bɛŋ bâne fiɛɛ fì befe, bɛŋ lɛ̂me gɛh nyume yi fiɛɛ fì joŋe le. 10 Bɛŋ kôŋe bikwɛɛ biɛna bɛ fitele fichii njɛ booŋ ba bwe mwa. *Bɛŋ nyâa ŋgvunɛ bamii bamu le fede lo no bɛŋ ŋgvuune bikwɛɛ biɛna. 11 Keefɛ bɛŋ wɛ̂ɛyi yi fiɛɛ le gɛ. Bɛŋ lɛ̂ne lɛme chi Nyo segechii bɛ muntele mwɛna mù yufe. 12 Bɛŋ lâŋeye yi fiɛɛ fì bɛŋ jiiŋe fwe yi fi le bɛŋ kee lɛ bɛŋ lé bɛŋ gê bɛŋ kɛ̂mɛ. Bɛŋ kâane shɛ́ŋ yi baŋgɛ le. Bɛŋ nyûme yi buunɛ le segechii. 13 Bɛŋ fîih bamii ba le ba Nyo ba fuude. Bɛŋ fîih bantolo yéh yene le bɛŋ jiiŋe fɛ bo le chuule.

14 Bɛŋ lɛ̂ge lɛ Nyo noŋ gɛh nyu kimbonɛ yi bamii ba boone bikaa a bɛŋ jiŋ le. Bɛŋ lɛ̂ge nyu kimbonɛ fɛ bo le. Keefɛ bɛŋ lɛ̂ge lɛ to nyume loŋ fɛ bo le gɛ. 15 Bɛŋ lâŋeye bɛ bamii ba laŋeye, bɛŋ bêede bɛ bamii ba beede. 16 Bɛŋ chêe yi fiɛɛ le fimimia. Keefɛ bɛŋ chîaase ye gɛ. Bɛŋ kôode nsáŋ bɛ bamii ba nchɛ nchɛ. Keefɛ bɛŋ jôde lɛ bɛŋ kee mwɛɛ bɛŋ fede no bɛŋ kee gɛ.

17 Keefɛ bɛŋ chvûse kimbefɛ bɛ kimbefɛ gɛ. Bɛŋ kɛ̂me ŋkwajɛ ki bɛŋ gêe nyu mwɛɛ mù bamii bachii yɛde lɛ le mù njoŋe. 18 Nɛ je le yu, no bɛŋ yɛde, bɛŋ mo bɛŋ mône ki bɛŋ chêe yi nyiɛgee le bɛ bamii bachii. 19 Nsáa yaŋ yi shɛ́ŋ, keefɛ bɛŋ mône lo ki bɛŋ chvûse kichvusɛ gɛ. Bɛŋ chinɛ Nyo lé wu gê wu dûnyɛ shɛ́ŋ ye yi bɛɛne, bo le. Le fiɛɛ fì ba le ba saŋ lɛ,

"Kichvusɛ kɛme mɛ ki nchvûu.

Le mɛ wù le ŋge nlâŋɛ bo.

Finɛ fiɛɛ duu Tada Nyo."

20 Fì taŋlo bɛŋ gêe le finɛ fì ba saŋ a Ŋwa wu Nyo le lɛ, "Nɛ jɛŋ yuu muh wo wu kimbanɛ, wo nyâ wu bɛ fiɛɛ wu ji. Kindoŋ nɛ yune wu, wo nyâ wu bɛ fiɛɛ wu mu. Nɛ wo ge noo, bvuya nyû a wu fwa." 21 Keefɛ bɛŋ chînɛ kimbefɛ ya bɛŋ gɛ. Bɛŋ yâge lo kimbefɛ bɛ mwɛɛ mù njoŋe.