Romanos 9

Nyo gɛ̀ cha bamii ba Ishwala lɛ bo nyûme bamii be

1 Fiɛɛ finɛ fì njɛme le nchiɛɛŋ njɛ muh wu Kletu. Gɛ mbiane lo gɛ. Shɛŋ yaŋ toone mɛ fede yi Kiyo ki Yuude le lɛ gɛ mbiane lo gɛ. 2 Fi le lɛ ŋkɛme yii baaŋ bɛ nsaasɛ wù kage gɛ fɛ fitele fiaŋ le, 3 nje booŋ ba bwɛɛŋ ba woŋ ba besa bo le kilɛmɛ kimimia. Taŋlo ŋgoone baaŋ lɛ loŋ tô fɛ mɛne ŋgâsɛ lo besa Kletu gɛh nje bo. 4 Bamii banɛ le bamii ba Ishwala, Nyo gɛ̀ jo bo wu ge lɛ bo nyûme booŋ be, wu dunyɛ bvukugɛ bwe bo le, wu gwo maŋkaŋ bɛ bo, wu nya banchi be chiaaŋ yiboo le, wu dunyɛ bo no bo bûune Nyo, wu ge ŋka bɛ bo. 5 Le bamii ba bachiji baboo ba gɛ̀ sanɛ kfuu chiboo le, nyu bamii ba Nyo ba bo kee bo, Mbvusɛ wù Nyo gɛ̀ ka gɛ̀ doo wu to njɛ muh wu wuŋ, ba boo wù nyu a kfuu chi bamii banɛ le. Besabɛŋ nyâa mbɛɛŋsɛ segechii wù kage gɛ. Mbvusɛ wunɛ le Nyo wù kɛme bvuŋga awe a mwɛɛ munchii. Fi nyûme noo.

6 Gɛ fi nyume lɛ fiɛɛ fì Nyo gɛ̀ ka wa le fi lɛsɛ achiji gɛ, nje gɛ bamii bachii ba Ishwala, mo nyume booŋ ba nchiɛɛŋ ba le ba Ishwala gɛ. 7 Gɛ nyu tɛ booŋ ba bu yi Ablaham le bachii bo nyume booŋ be gɛ. Geenɛ fi le no Nyo gɛ̀ jɛmɛ wa Ablaham le lɛ,

"Le Asik wù lé wu gê wu bôo booŋ bò lé bo gɛ̂ɛ jee chuŋ."

8 Finɛ fiɛɛ duunyi lɛ gɛ nyume booŋ ba bu yi Ablaham le bachii ba nyume booŋ ba Nyo gɛ. Le booŋ ba Nyo gɛ̀ ka Ablaham yu ba bo jode lɛ le booŋ ba Ablaham. 9 Nyo gɛ̀ doo wu ge ŋka wunɛ wu jɛmɛ lɛ,

"Lé ge doo nyume njɛ mɛɛse kiluŋ kì too le,

ŋka ŋkâase ntô, Sɛla kɛ̂me mwa wù jwɛŋsɛ."

10 Gɛ mɛ gɛh finɛ fiɛɛ gɛ. Fiɛɛ njɛ finɛ gɛ̀ kooshɛ tɛ bɛ Lɛbɛka, wu chiji booŋ be gɛ mɛ gɛh Asik, wu chiji bachiji besa. 11,12 Mo fɛ bo ge bo boo amaŋ kanɛ, fɛ bo ge fiɛɛ fì joŋe kɛnɛ fì befe, Nyo gɛ̀ jɛmɛ bwe bo le lɛ,

"Ŋgamu lé wu gê wu lɛ̂ne mwa wù shige le."

Nyo gɛ̀ jɛme noo ki wu dûnyɛ lɛ wu chage muh wu bii ncha wu we le. Gɛ wu chage nje lɛme chimi chì muh le wu ge gɛ. Wu chage wu bii nyu no wu wù Nyo goone. 13 Le gɛh no ba saŋ lɛ,

"Ŋkoŋe Yakob, mbanɛ Esawu."

Nyo to wu gee fiɛɛ nyu fì wu koŋe

14 No fi le noo, taŋlo besabɛŋ ka be jɛmɛ lɛ la? Fi fɛnɛ le lɛ gɛ Nyo gee gee chì kooji gɛ? Gɛ nyu noo gɛ! 15 Nyo gɛ̀ bee wu jɛmɛ Musɛ le lɛ,

"Nlé ŋgê ŋkɛ̂me yii fɛ muh wu ŋkoŋe le,

ŋkôo yii fɛ muh wu ŋkoŋe le."

16 Noo gɛ Nyo chage muh wu bii no muh wu wuŋ koŋe gɛ, kɛnɛ yi lɛme chì muh lɛne le gɛ. Wu chage nyume nje wù kɛme yii fɛ bamii le. 17 Finɛ le gɛh no ba saŋ a Ŋwa wu Nyo le, no Nyo jɛme Falawu Nfoŋ wu Ijib le lɛ,

"Ŋgɛ̀ mbɛɛŋse wo njɛ Nfoŋ,

ki ntô ndûnyɛ bvuŋga bwaŋ ye yo le,

bamii gɛ̂ɛŋ bɛ jee chaŋ yi kikwɛɛ ki nshɛŋ le kichii."

18 Finɛ mo fi duunyi lɛ Nyo koode yii fɛ muh wù wu koŋe lɛ wu koo yii fɛ wu le, wu nyaa kikwɛɛ kì tɛmɛ muh wù wu koŋe lɛ wu tɛɛme kikwɛɛ le.

19 Muh taŋlo wu mo wu bii mɛne lɛ, "Nɛ finɛ le no fi nyume, Nyo ka wu sâge bamii nje la? Muh wù taŋlo wu faŋ fiɛɛ fì Nyo koŋe lɛ fi nyûme, le yɛɛŋ?" 20 Keefɛ muh bîide noo gɛ. Le muh wu wuŋ wu la wu taŋlo wu bêge mbe bɛ Nyo? Taŋlo muh ma fiɛɛ fì ba ma fi kaasɛ fi biih wu le lɛ, "Wo ma mɛ nɛ nje la?" 21 Muh wù maa shíaaŋ kɛme bvuŋga ki wu jô chimɛ chimimia wu ma mwɛɛ yu yeye yeye, fimi nyu fi kɛme lɛme chi kuge, fimi kɛme lɛme chi achiji. 22 Le gɛh yɛɛŋyɛɛŋ no Nyo gee. Wu gɛ̀ goone ki wu dûnyɛ shɛ́ŋ ye yì bɛɛne bɛ bamii, ka wu ge bamii kɛɛ bvuŋga bwe. Geenɛ wu kaaŋ lo shɛ́ŋ wesee bɛ bamii baa bò gɛ̀ gee shɛ́ŋ bɛɛne wu ba wu gɛ̀ bee ki wu gê wu lɛ̂ɛshɛ lo bo. 23 Wu gɛ̀ ge noo ki wu dûnyɛ bvukugɛ bwe bvù baaŋ fɛ bamii ba wu koode yii fɛ bo le. Bamii banɛ le ba wu gɛ̀ seesɛ wa baaŋ lo lɛ bo lé bo gê bo kɛ̂mɛ bvukugɛ bvuyu. 24 Le besabɛŋ bamii bayu ba wu le wu tɛɛŋ. Gɛ ka gɛ ba le Bajuu maa. Bamii ba le gɛ Bajuu gɛ, nyu tɛ fo. 25 Le gɛh fi kibɛɛ, fì Nyo jɛme a ŋwa wù muh wu ntuŋ we wù Osia le lɛ,

"Bamii ba chi bee gɛ bamii baŋ gɛ,

nlé ŋgê ntɛ̂ŋe bo lɛ ‘Bamii baŋ.’

Baa ba nchi ŋkoŋe gɛ,

nlé ntɛ̂ŋe bo lɛ ‘Fitele fiaŋ.’"

26 "Fɛ kijusɛ kɛɛ kì Nyo chi too wu jɛme bamii bayu le lɛ,

‘Gɛ bɛŋ nyume bamii baŋ gɛ’,

ba lé ba gê ba tɛ̂ŋe wa bo lɛ,

‘Booŋ ba Nyo wù kɛme kinche.’"

27 Yosaya wù muh wu ntuŋ wu Nyo gɛ̀ beede tɛ kune bamii ba Ishwala wu duu lɛ,

"Mo nyu no bamii ba Ishwala duude nɛ,

mo bo nyu njɛ munshɛɛŋ mu a joo yì baaŋ le,

bo nyume bo gê bo bônɛ gɛh nɛ shige.

28 Fi le lɛ Nyo lé wu gê wu jâ gɛh nɛ wu noŋ ŋgɛ yi kikwɛɛ ki nshɛŋ le kichii kimimia,

wu mɛsɛ lo fiɛɛ fichii."

29 Wu wù Yosaya gɛ̀ yu wa wu jɛmɛ lɛ,

"Nɛ fi gɛ̀ baaŋ nyu gɛ lɛ Tada Nyo wù kɛme bvuŋga bvuchii,

wu bajɛ booŋ a kfuu chesa besebɛŋ le gɛ,

tu besabɛŋ bee be tu wa gɛh njɛ kilaantɛŋ kì Sodom,

mo njɛ kì Gomola."

Bamii ba Ishwala faŋ je yì bamii kɛme ki bo bii yi le ki bo nyume chaaŋ a Nyo jii

30 No fi le noo, bee ka be du lɛ la? Taŋlo bee du lɛ bamii ba le gɛ Bajuu gɛ, ba gɛ̀ baaŋ bo mone ki bo nyû chaaŋ a Nyo jii, bo le wa mɛɛse chaaŋ a Nyo jii, nje fitele fì bo leese yi ye ye le. 31 Geenɛ, bamii ba Ishwala ba gɛ̀ mone ki bo nyume chaaŋ a Nyo jii, bo bii a je yì banchi goone le, ajiŋ ayu bo gɛ̀ baaŋ jiɛnyɛ gɛ bo nyu chaaŋ a wu jii gɛ. 32 Gɛ̀ bee njɛ la? Gɛ̀ bee nje gɛ bo gɛ̀ mone ki bo bii je yì le lɛ bo leesɛ fitele nyume yi Nyo le gɛ. Bo gɛ̀ kwaji lɛ fiɛɛ fì gee fɛ muh nyume chaaŋ a Nyo jii le lɛme chimi chì mwɛdɛ gee. Bo ge noo bo mo bo baŋsɛ yi tɛdɛ chì bamii baŋse yu le. 33 Tɛdɛ chinɛ le chì ba gɛ̀ saŋ kune chi lɛ,

"Bɛŋ jîŋɛ bɛŋ yɛ̂ŋ, ŋgɛɛde tɛdɛ a kilaantɛŋ kì Sayoŋ le,

nyume tɛdɛ chì bamii lé bo gê bo bâŋse yi chi le.

Le kimbaaŋ kì bamii lé bo gê bo baŋse yi ki le.

Geenɛ, nɛ muh le wu leesɛ fitele yi ye ye le, wu gɛ to wu kɛmɛ bvuya gɛ."