12 Yumwi vandu vaki Chapanga, mweni avatamili na kuvashawula. Topi muvi na ndima ya lusungu na usangi na vanakunyekwa na ushisha moyu na uwunilifu. 13 Muyiwunishili na kuyipomela mwaveni na pala yumu pakamvifya muyaki. Muyipomeli mwaveni ngimu Bambu avapomelili yumwi. 14 Pamugola afi fyosi muyongeshi utami weni ndi wukukunga kila chindu. 15 Na kusika yitupokela kufuma kwa Kilistu yivalongoshi mundima shenu, nongwa muusangi ayi Chapanga avakemili yumwi muvi mvili wumu. Kandi muvi mukulumba! 16 Chilongu cha Kilistu kiyikali mugati yenu pamu na ulundamali waki wosi. Muwula na mulangushi vamonga kwa luhunja lwosi. Musomoli sabuli na misambu ya mundima, mumsomuleli Chapanga pamu na kumlumba mundima shyenu. 17 Kila chindu chimugola kwa kudeta awu kwa kugola, mugoli kwa litawa lya Bambu Yesu ngimu wumumlumbili mweni Tati Chapanga.
Ndambu ya kwikala muunofu wa shonu
18 Vehi muvapikani valumi venu, ngimu wadayila Bambu. 19 Valumi, muvatami vehi venu na mukotoo kuva na maya nawu.
20 Vana, muvapikani valeli venu majuva vosi nongwa ayi yikumunowesha Bambu.
21 Yumwi valeli, mukotoo kuva na maya na vana venu, davalepusiwi.