15 Hammanyize kugamba imili yenyu ni vilungo vo umwili wa Kilisito, togoleni, neniviguhe vilungo vo umwili wa Kilisito no kuvilunganya na pamp’he? Bule! 16 Hegu hammanyize kugamba, mnt’hu alunganywe umwili wakwe na pambe, yehe na pamp’he wanda mwili umwenga? Mawandiko Akukile wagamba, "Waidi awa nawande mwili umwenga." 17 Mna akelunganye na Zumbe, anda yumwenga na yehe kimuye.

18 Unyilikeni uhabwasi. Wavu wowose mtuhu akuutenda mnt’hu hauku ulumiza umwili wakwe, mna akutenda uhabwasi, aulumiza umwili wakwe. 19 Togoleni, hammanyize kugamba imili yenyu ni nyumba ya Muye ywa Mnungu akwikala mwenyu, yudya mwink’higwe ni Mnungu? Ugima wenyu hiyo yenyu, ila ni wa Mnungu, 20 nakawagulani kwa utana utendese. Ivo idamanyileni imili yenyu kwa kumtogola Mnungu.