36 Umwo wandile wakagenda hasi mwe sila, wabulaga hant’hu hana mazi, niyo mkulu yudya agamba, "Aha hana mazi, nafingizwa nii nisekubatizwa?" 37 Filipo niyo amgamba, "Wadaha kubatizwa uneva wahuwila kwo umoyo wako wose." Yudya mnt’hu niyo ahitula, "Nahuwila, nahuwila kugamba Yesu Kilisito ni Mwana ywa Mnungu."

38 Yudya mkulu niyo asigiila ditololi dikimale, niyo Filipo hamwenga na yudya Mkulu waseela hasi mwa mazi, niyo Filipo ambatiza. 39 Umwo weze wafose mwa mazi, Muye ywa Mnungu niyo amguha Filipo, niyo ahalawa ha meso ya yudya mkulu. Yudya mkulu hamuwone naho, mna nakagendeela no utafi wakwe amemigwe ni kinyemi.