1 Mɛ̃ wu ɔ̃kuul, mɛ̃ nswɛn ɔ̃nkaan wu ola yɛ wu ɔ̃kaal wu ésueel Nziã*1.1 Ɛ̃nkaan mikyɛ ɛ̃yɛɛn ndiri ɔ̃kaal ondɛ esuo Ebvɔɔn lɛn baan a ndɛ ali baal a lɔ. bvool ola baan a yɛ, bɛn mɛ̃ ndyam nzii onse otaa-taa. Wu odzii bɔ k’eli kɛn a myam wɛ, baal bueel b’ayɛɛ otaa-taa hɛ̃ adzii bɔ. 2 Bee edzii byɛ, me ndɔɔ yɛn otaa-taa obekal onse bia-byɛ bvool òkal ye bia-byɛ kɛn okal. 3 Nziã wu Taal, ye Yeso Mãsia wu Muaan a Taal àsio bia-byɛ nyiĩ, àyoo bia-byɛ ãwua, bvool àwa bia-byɛ opi, kwɛn bia-byɛ ekal onse otaa-taa bvool onse dzii.

4 Mɛ̃ ndi y’esɛ ngamfɛn ŋ’emwɛn mɛ̃ kwɛn baan a yɛ bakyɛ abekal onse otaa-taa onge b’etam Taal bia-byɛ osa. 5 Bvool meba, yɛ wu ɔ̃kaal wu, tal b’esɔɔ mɛ̃ ola yɛ: Bia-byɛ edzii bakyɛ. K’eli ngel yi nyiɔɔn yi nswɛn mɛ̃ yɛ wɛ, eli ngel yi éyɔɔ bia-byɛ fa obɛɛn. 6 Dzii emã? Eli ŋ’edzuu bia-byɛ m’emfa ki etam ãngel ã Nziã. Oyɔ ngel yɛn ebvaan byɛ edzuu onse yɔ, onge b’éyoo byɛ yɔ fa obɛɛn.

7 Ke ngwel wɛ, baal a mfya bibi apal m’ɔ̃kiri. Bɔ abebee k’akiool ndiri taa-taa Yeso Mãsia áyi m’emfa ki ombuul. Okyɛ emfa ki eli nga-mfya y’ɔ̃taal a Mãsia. 8 Oŋɔ̃ ekal y’onkyab me byam kwɛn byɛ ebee furu li ɔ̃sal a bia-byɛ oywɛn, kɛn a byɛ èbɔɔ ebvakab e byɛ kieel. 9 Mbuul wueel wu oyɛn me pyɛ, bvool k’akal onse ãtee ã Mãsia wɛ, k’ali ye Nziã wɛ. Mbuul wu akal onse ãtee omɔ̃, oli ye Tal ye Muaan. 10 Ŋɛn mbuul oyetal byɛ, k’ayi y’ãtee mã wɛ, ebee ndɛ ola byɛ oyɔɔ, ebee onkyam k’ebio ndɛ. 11 Mbuul wu abio ndɛ ŋ’ali ɔ̃nguo ngɔmɔ̃ ye ndɛ onse ɛ̃sal ɛ̃ ndɛ mi ɛ̃bi-ɛ̃bi.

12 Mɛ̃ ndi y’ãndɔɔ bibi m’eswɛn byɛ, kɛn a mɛ̃ ke nzii k’eswɛn byɛ mɔ̃ m’oswɛn wɛ. Mɛ̃ ndi ye kaã li eya ola byɛ, me ndɔɔ yɛn mɛ̃ ngyɛɛn ye byɛ nsɔ̃-a-nsɔ̃, kwɛn esɛ e bia-byɛ ekal ɔ̃koo. 13 Baan a muaan-ngoo a yɛ wu ɔ̃kaal, wu ésueel Nziã, abio yɛ.