Lucas 18

Te tama e ppuni ana karamata e haia Jesus no kite

35 Te saaita Jesus ni saaita atu ki te matakaaina Jericho raa, teelaa se tanata e ppuni ana karamata e noho i te vasi te ara raa ka kainnoo mane ki naa tama e sassare. 36 Te saaita te tanata naa ni lono i naa nattaa naa vae naa tama e llaka raa, a ia ki vasiri, "Teelaa ko ai?"

37 Naa tama raa ki mee ake, "Jesus, te tama i Nazareth raa ku laka."

38 Teenaa ki tanitani varo atu te tanata e ppuni ana karamata raa peelaa, "Jesus, te mokopuna David! Aroha iaa nau!"

39 Naa tama e sassare vaamua raa ni ffuri atu no nutua te tanata naa ki ppui tana pukua. Tevana iaa te tanata naa ni huri no kannaa maaroo iaa, "Te mokopuna David! Aroha iaa nau!"

40 Teenaa ttuki iloo Jesus no vanaake ki naa tama raa ki taakina ake te tanata raa kiaa Ia. Te saaita te tanata raa ni taupiri ake raa, Jesus ki vasiri ake kiaa ia, 41 "Koe e hiihai maa koe ki haia a nau peehea?"

Teenaa ki mee ake te tanata naa, "TeAriki, nau e hiihai maa nau ki kite hoki."

42 Jesus ki mee ake, "Aa ttoka! Koe naa ku kite iaa koe ku lotu maaoni."

43 Te tanata ni ppuni ana karamata naa ni kite i te saaita naa lokoi, teenaa sare hakanau iloo ia i TeAtua ka tautari atu vaamuri Jesus.