1 मसी यीशुन प्रेरित पौलुसान उगे रेन जो आमरो सुटकारो केरनार बोगवान, एने आमरी आसान आदार मसी यीशुन उकुमान गेत, 2 ✝तीमुथीयुस ने नाव जो बोरहा माय मारो खीरलो बिटोख हे:

बोगवान आबोख, एने आमरा मसी यीशुन उगे रेन तुवाह गीण एने सान्ती एने किव जुड़ते रेय।

3 जिहकेरीन मी मकादुनिया माय जाणेन बुखेत तुवाह सोमजाड़ेल ईतो, काय इफिसुस माय रेन थोड़ाक माणहाह उकुम आप काय जुठी हिकवोण बोंद केरी। 4 ताह तुमू इहकेरीन किवो काय जुठी वार्ता एने जेलेम ने वंसावली पोर मोन नाय लागाड़े, जाकेरीन बोलाचाल एतेह एने बोगवानान ती योजनान गेत नाह, जो बोरहा पोर आदारीत हे। 5 उकुम केणेन उद्देश ज्यो हे काय चोखालो मोन एने हाजो मोन बिना कोपेट बोरहा से मोंग पायदा एय। 6 थोड़ाक माणहे ते जी वातु से बोटकीन फालतुक वातु माय फोस जायेल हेते। 7 ता नियमान मास्तेर्‍या बोणने ते होद्तेह, पुण ज्‍यु वातु केतेह ताह एने नाह त्यु वातुह सोमेजतेह, जाह ता ईमोत हेऱ्या बोलतेह।

8 पुण आमु जाणतेह काय केदी एगदो नियमाह हास केरीन उपयोग केरी ते नेम हाजो हे। 9 आमु ज्यो बी जाणतेह काय कायदो देरमी जाणान केरता नाह, पुण एदेरमी, मोन मोरजी माय जीवणारे, विणबोकत्या, पापी, बिगेर चोखालो एने एठा माणहा, आईख आबाख मारनारे, खुनी, 10 सिनालो केरनारे, एदम्या हेऱ्यो सिनालो केरनारे, गुलामाह वेचणारे, जुठ बोलनारे, एने जुठी गोवाय देणारे, एने दिहऱ्यु सोब वातुन केरता बाणायेल हे जो ती खेरली हिकवोणान विरोद माय हेते। 11 ज्योस बोरकेतवाला बोगवानान बोड़ाय ने ती हाजाली खोबरीन गेत हे, जो माहु होपेल हे।

12 मी आपणा मालीक यीशु मसीन दन्यवाद केरथु जो माहु ताकेत आपेल हे, काहाकाय तो माहु बोरहावालो सोमजीन तान सेवा केरनेन केरता माहु निवाड़ लिदो। 13 ✝मी ते पेल तान चिहटा केरनार, एने सेतावणार, एने बुराय केरनार एदमी ईतो, तीबी माहु पोर गीण एनी, काहाकाय मी अविश्वासीन देशा माय बिगेर सोमजीन ज्यो काम किरेल ईतो। 14 एने आमरा बोगवानान गीण ता बोरहा एने मोंगा हेऱ्यो मसी यीशु माय हे, जुलूम जुड़नो। 15 ज्यी वात खेरीच एने आखी बातीन माणनेन बाराबोर हे काय मसी यीशु पापी माणहान सुटकारो केरनेन केरता दुनिया माय आयेल, एने ता माय रेन आखा पापीह रेन बी खाराब पापी मी हे, 16 पुण माहु पोर ज्यानकेरता गीण एनी काय मी आखाम रेन मोटला पापी पोर मसी यीशु तान आखी सहनशीलता देखाड़ी, काय जा माणहे यीशु पोर पासाण रेन बुरहो केरती एने ता जेलेमक्यो जीवाय सापड़ावती तान केरता मी एक आदर्श बोणु। 17 जो कायेम ने राजा हे, एने कायेम खेतेम एण्यो नाह सोतो, एने नाह दिखेल ता एकुच बोगवानान मान एने बोड़ाय कायेम ने कायेम एती रेय। आमेन।

18 एय मारा सोरा तीमुथीयुस, जा वचनान तार बाराम जाणाव पेलुस ईयेल एती, मी ज्यो उकुम होपथु काय तु तान आथ्‍यारान गेत वापेर केरीन हाजाली लेड़ाय लेड़ते रे। 19 बोरहाह एने ता हाजा मोनाह होमालीन मेल, काहाकाय ज्याह सेटो केरनेन कारेण कोलाक माणहान बोरहान डोंडह्यो बुड़ गीयोह। 20 ता माय रेन हुमीनयुस एने आलेकजांडर न्या हेते, जाह मी सैतानाह होप दियेल हे काय ता हिके काय दिहरान चिहटा केरने बोंद केरी।