1 ज्‍यीस कारेण मी पौलुस जो तुमू बिगेर यहुदिन केरता मसी यीशुन बोंदी हे, बोगवाना से विन्ता केरथु। 2 खेरीच तुमू ज्यो होमलेल एती काय बोगवानान तान गीणीन द्‍वारा माहु ज्यो काम आपेल हे जो माहु तुमरे हाजान केरता आपायेल एतो। 3 जिहकेरीन माहु उजालान द्‍वारे खेरलान मालमात जाणीव केरीन आपेल एतो, मी तो पेल थोड़ाक माय लिखेल ईतो। 4 ✝3:4 कुलीसियो 1:26,27जेवी तुमू ताह वाचहो, तेवी मसीन खेरला मालमातान बाराम मी किहीक सोमेजथु तुमू जाणहो। 5 तो गीया टेमा माय माणहान सोराह ओहलो नाह कियेल ईतो, जिहकेरीन काय जीवान द्‍वारे एवी तान चोखाला प्रेरिताह एने जाणकारा पोर देखाड़ेल हे। 6 मतलब ज्यो काय मसी यीशु माय हाजाली खोबरीन द्‍वारे बिगेर यहुदि माणहे विरासत माय बागी, एने एकुस सेरीरान एने वायदान बागी हेते।

7 मी बोगवानान ती गीणीन गेत, जो तान ताकेतीन प्रबावान गेत माहु आपाय गीयो, ती हाजाली खोबरीन पावोर बोणनो। 8 माहु पोर जो आखा चोखाला माणहा माय रेन आत्याम रेन बी आत्यो हे, ज्यी गीण आप्यो काय मी बिगेर यहुदिह मसीन जेलेमकी देनान हाजाली खुबेर होमलावु। 9 एने आखाह ज्यी वात देखाडु काय तो मालमातान प्रबन्द काय हे, जो आखाह बाणावणार बोगवान माय सुरवात रेन लिकायेल हे। 10 काय एवी मोंडलीन द्‍वारे बोगवानान बाती बातीन इकेल, ता मुखी एने आदिकारी पोर, जो हेरगा माय हे देखाड़ी। 11 ज्यो तो जेलेमक्या उद्देशान गेत एनो, तो आमरा मालीक मसी यीशु माय किरेल ईतो। 12 मसी माय एक एणेन नाते एने ता पोर बुरहो केरने से आमुह दिलासो एने बोरहाम आहने आवणेन आदिकार जुड़नो। 13 तानकेरता मी विन्ता केरथु काय जो दुख तुमरे केरता माहु एणे बाजरिनोह, ईमोत मा सोड़ो; काहाकाय ता माय तुमरो फायदो हे।

14 ज्यास ने वोजेसे मी आबाख ने ओंगाण गुटण्या टेकथु। 15 जा माय हेरोग एने देरती पोर, आखा गेराणान नाव मेलाय जाथे, 16 मी विन्ता केरथु काय ती बोड़ायीन ताकेत आपी एने तान देनान गेत तान जीवान द्‍वारा तुमरे माय व्यक्तित्वाह मोजबुत केरी, 17 एने बोरहान द्‍वारे मसी तुमरा मोना माय बोही काय तुमू मोंग माय मोजबुत एने पाको एन, 18 तुमू आखा चोखाला बोगवानान माणहा हेऱ्या मसीन मोंगान लाम्बाय, चोवड़ाय, उचाय एने उंडाय सोमेज सीको। 19 एने मसीन तो मोंग जाण सीको, जो एकलीह रेन बाहेर हे काय तुमू बोगवानान सोबाव से पुरा एय जावो।

20 एवी ता बोगवानान केरता जी तान ती ताकेत से जी आमु माय काम किरेह, जोलोक आमु मांग सेकतेह एने जोलोक सोच सेकतेह ताह रेन जुलूम वोदार केर सिकेह। 21 ती मोंडली माय एने मसी यीशु माय बोगवानान बोड़ाय पिढीन पिढी वोर जेलेम एते रेय। आमेन।