1 मी ज्यो केथु काय वारीस जाह वोर सोरो हे, पुण आखी चिजीन मालीक हे, तीबी ता माय एने गुलाम माय काय फारेक नाह रेणे। 2 पुण आबोख ठेरायेल टेम वोर तो राखवाली केरनारे एने कारबारीन ताबाम रीथे। 3 तिहेच केरीन आपु बी, जेवी सोरा एता, ते दुनियान पेल हिकवोणान काबाम एन गुलाम बोण रियेल एता। 4 पुण जेवी टेम पुरो एनो, ते बोगवान तान बेटाख मोकल्यो जो बायकु से पायदा ईनो, एने तो नेमान काबाम जीवतालो, 5 ✝काहाकाय जा माणहे नेमान काबाम हेते ताह सोड़वे जाकेरीन आपु बोगवानान सोरा बोण सिके। 6 *एने तुमू जा सोरा हेते, तानकेरता बोगवान तान बेटाख ने जीवाह, जा "एय आबा, एय आबा केयीन आयेड़तेह," आपणे मोना माय मोकलेल हे। 7 केरीन तु एवी रेन गुलाम नाह, पुण बिटोख हे; एने बिटोख हे, ताहार बोगवानान द्‍वारा वारीस बी हे।

8 पुण पेल ते तुमू बोगवानाह नाह ओलेखताला एने ता बोगवानान गुलाम एता जो खेरीच बोगवान नाह सोतो, 9 पुण एवी जा तुमू बोगवानाह ओलखी लियेल हेते एने बोगवान तुमूह ओलख्यो, ते ती कोमजोर एने बिगेर कामान पेल्‍ली हिकवोणान वातुन उगे काहा फिरतेह, जान तुमू पोशा गुलाम बोणने होदतेह? 10 तुमू खास दिह्याह, एने मोयनाह, मोसमाह एने वोरह्याह मानतेह। 11 मी तुमरे बाराम बिथु, इही नाय एय काय जी मेहनेत मी तुमरे केरता किरेल हे ती बिगेर कामान ठेराय।

12 एय बाय बोणहा, मी तुमूह विन्ता केरथु, तुमू मार गेत एय जावो; काहाकाय मी बी तुमरे गेत एय जायेल हे; तुमू मारो काय नुकसान केऱ्या नाह। 13 पुण तुमू जाणतेह काय पेल्‍ली वार मी सेरीरान कोमजोरीन वोजेसे तुमूह हाजाली खुबेर होमलाड्यो। 14 एने तुमू मारी सारिरीक देशाह जी तुमरी पारेख ने कारेण एती, खाराब नाह जाण्यो; नाह ताह सीट केऱ्या; पुण तुमू माहु बोगवानान हेरोगदुत खुद यीशु मसीन गेत माहु स्वीकार केऱ्या। 15 ते ती तुमरी खुसी मोणावणो काहरी गीयो? मी तुमरो गोवा हे काय केदी एय सेकतो ते तुमू तुमरा डोला बी निकालीन माहु आप देता। 16 ताहार काय तुमूह खेरी बोलनेन वोजेसे मी तुमरो दुसमोन बोण जायेल हे? 17 ता तुमूह दोस्ती बाणावणे ते होदतेह, पुण हाजाला उद्देश केरीन नाह; ता तुमूह माहु रेन आंगे केरने होदतेह काय तुमू ताहास दोस्ती बाणाव लिवो। 18 पुण ज्यो बी हाजो हे काय हाजाली वाती माय आखी टेम दोस्ती बाणावणेन कोसीत केराय जाय, फोक्‍तो तीस टेम नाह जेवी मी तुमरे हिऱ्यो रेथु। 19 एय मारा सोरा, जाह वोर तुमरे माय मसीन रूप नाय बोण जाय, ताह वोर मी तुमरी केरता पोशो प्रसवान गेत पिड़ा वेठथु। 20 मोरजी ते ज्यी ईथे काय एवी तुमरी फाय आवीन उंजु हास केरीन बोलु, काहाकाय मी तुमरी केरता दुविदा माय हे।

21 तुमू जा नेमान काबाम एणे होदतेह, माहु किवो, काय तुमू नेमान नाह होमेलते? 22 ज्यो लिखेल हे काय अब्राहाम ने दुय सोरा एना; एक पावेरनी केरीन एने एक स्वतंत्र बायकु केरीन। 23 पुण जो सोरो पावेरनी केरीन पायदा एनो तो सारिरीक रिती केरीन पायदा एनो, एने जो सोरो स्वतंत्र बायकु केरीन एनो तो वायदान गेत पायदा एनो। 24 न्या माय एक किस्सो हे: ज्‍यु बायकु दुय वायदो हेत्यु, एक ते सिनाय बोयड़ान जी केरीन फोक्‍तो गुलामुस पायदा एतेह एने ती हाजीरा हे। 25 *एने हाजीरा अरब ने सिनाय बुयड़ो हे, जो एवीवालो यरूशलेमान गेत हे, काहाकाय तो तान सोरा बेल गुलाम माय हे। 26 पुण उपेर वालो यरूशलेम स्वतंत्र हे, एने ती आपणी आहख हे। 27 काहाकाय पुस्तेक माय लिखेल हे:

"एय वांज! तु जी नाह जिणेत मालीक माय खुसी मोणाम!

तु जी प्रसव पिड़ा नाह जाणेत, गिलो काड़ीन जय जयकार केर!

काहाकाय जीन एदमी हे तीन सोराह रेन

आसा सोड़ेल बायकुन सोरा जादा हेते।"

28 एय बाय बोणहा, आपु इसहाक ने गेत वायदान सोरा हेते। 29 एने जिहकेरीन ती टेम सेरीरान गेत पायदा ईयेल जीवान गेत पायदा ईयेलाह वेला केरावतालो, तिहेस केरीन एवी बी ईथे। 30 पुण चोखाली पुस्तेक माय काय लिखेल हे? "पावेरनी एने तीन सोराह निकाल दिवो, काहाकाय पावेरनीन सोरो स्वतंत्र बायकुन सोरा हेऱ्यो वारीस नाय एय।" 31 तानकेरता एय बाय बोणहा, आपु पावेरनीन नाह पुण स्वतंत्र बायकुन सोरा हेते।