1 काहाकाय कायदो ज्या माय आवणार हाजी वोस्तुन दिवो हे; पुण तान हासलीन वेह नाह, तानकेरीन ता एकुस बातीन बोलीन द्‍वारे जो एकेक वोरीह बिगेर चुकी चेड़ावतेह, आहने आवणाराह केदी बी खेरो नाह केर सिकेत। 2 नाहते तान बोली चेड़ावणो बोंद काह नाह एय जात? ज्यानकेरीन जेवी सेवा केरनारे एकुस वार चोखा एय जाता, ते उंजु तान मोन ताह पापी नाय ठेरावतो। 3 पुण तान द्‍वारे एकेक वोरीह पापान एर केऱ्या केरनो। 4 काहाकाय ज्यो नाह एण्यो हे काय बोयलान एने बोकड्यान लुय पापाह सेटो केरी।

5 तानकेरीन मसी दुनिया माय आवणे बुखेत किथे:

"बोली एने बेट तु नाह हुदेत,

पुण मार केरता एक सेरीर तियार किरेल।

6 होम बोली एने पाप बोली केरीन तु खुस नाह ईनो।

7 तेवी मी कियेल, ‘जिहकेरीन पुस्तेक माय लिखेल हे, देख, मी न्या हे,’

एय मारा बोगवान, मी तारी मोरजी पुरी केरने आयेल हे।"

8 उपेर ते तु किथे, "नाह तु बोली एने बेट एने होम बोल्यीह एने पाप बोल्यीह हुद्यो, एने नाह ताकेरीन खुस ईनो," ज्यी बोल्यी ते कायदा माय चेड़ावणो। 9 पुशो ज्य बी किथे, "हुमेल, मी आव लागेल हे काय तारी आसा पुरी केरू," तु पेल्लाह उठाड़ दिथे काय दिहराह बोणावी। 10 तीस आसा माय आपु यीशु मसीन सेरीरान एकुस वार बोली चेड़नेन द्‍वारे चोखा एय जायेल हेते। वेदी पोर बोली

11 एकेक चाकर्‍यो ते उबरीन दाड़ीन दिह सेवा किरेह, एने एकुस बातीन बोलीह जो पापाह केदी बी सेटो नाह केर सिकेत, तालताल चेड़ावतेह। 12 पुण ज्यो एदमी ते पापान बोदले एकुस बोली जेलेम ने केरता चेड़ावीन बोगवानान जीवड़े जाय बुहेल हे। 13 एने तुलबूखे रेन ज्यो वाट जुवीह, काय तान दुसमोन तान पाया बुंदेन चोवकी बोणी। 14 काहाकाय तो एकुस बोलीन द्‍वारे ताह जा चोखा एय जातेह, कायेम ने केरता खेरा केर दियेल हे।

15 एने चोखालो जीव बी आपुह ज्‍यीस गोवाय किथे; काहाकाय तु पेल कियेल ईतो,

16 "मालीक किथे काय जो वायदो मी ता दिह्यान पासाण

ता हिऱ्यो केरूह तो ज्यो हे काय

मी मारा कायदाह ताह मोना पोर लेखुह

एने मी तान विवेक माय टाकुह।"*

17 पुशो तो ज्य किथे, "मी तान पापाह एने तान एदेरमान कामाह पुशो केदी एर नाय केरू।" 18 एने जेवी तान माफी एय जायेल हे, ते उंजु पापान बोली नाह रेनी।

19 ज्यानकेरीन एय बाय बोणहा, जेवी आपुह यीशुन लुय ने द्‍वारे ता नोवाली एने जिवताली वाटी केरीन चोखाला जागा माय रिगणेन ईमोत एय जायेल हे, 20 जो तो पोड़दान द्‍वारे मतलब तान खुद ने सेरीर ने द्‍वारा एन नोवालो एने जीवताली वाटीन माद्यम उगाड़ दियेल हे। 21 एने ज्यानकेरीन काय आपणो उहलो मुठलो चाकर्‍यो हे, जो बोगवानान गेरान आदिकारी हे, 22 ते आवो, आपु खेरला मोना केरीन एने आखा बोरहा हेऱ्या, एने मोनान दोस ने बावना चोखो केरनेन केरता मोना पोर लुय हितड़ीन, एने सेरीराह चोखाला पाण्या केरीन दोवीन बोगवानान आहने जाता। 23 आवो आपु आपणी आसान अंगीकाराह मोजबुती माय देरीन रेता, काहाकाय जो वायदो किरेल हे, तो खिरो हे; 24 एने मोंग, एने हाजाला कामा माय उहरावणेन केरता आपु एका दिहरान चिन्ता केऱ्या केरता, 25 एने एका दिहरा हेऱ्या एकठा एणेन नाय सोड़ी, जिहकेरीन काय कोलाक ने रिती हे, पुण एका दिहराह उत्साहित केरती रिवो; एने जीहे जीहे ता दिह्याह आहने आवतालो दिखहो तिहे तिहे उंजु बी ज्यो केऱ्या किरो।

26 काहाकाय खेरायीन ओलखात सापड़ावणेन पासाण केदी आपु जाण बुजीन पाप किरते रेहु, ते पापान केरता उंजु काल्लीस बोली बाकी नाह सोती। 27 होव, डेंड ने एक बिय एने वाट जोवणो एने आक्‍ठान जिर बाकी हे जो विरोद केरनाराह खेतेम केर देय। 28 जेवी मुसान कायदाह नाह माणनारे, दुय नाहते तीन जाणान गोवाय पोर, बिगेर गीण केरीन माराय जातालो। 29 ते विचार केर लिवो काय तो कोलोक बारो डेंडान लायेक ठेराय, जो बोगवानान बेटाख पाया केरीन चेदेल एने वायदान लुयीह, जी केरीन तो चोखालो ठेरायेल ईतो, एठो किरेल हे, एने गीण ने जीवान अपमान किरेल हे। 30 काहाकाय आपु ताह जाणतेह, जो कियेल, "बुदलो लेणेन मारो काम हे, मीच बुदलो आपुह।" एने पोशो ज्य काय "मालीक तान माणहान नियाव केरी।" 31 जीवताला बोगवानान आथा माय पोड़ने बिय आवी ओहली वात हे।

32 पुण ता पासाणल्या दिह्याह एर किरो, जा माय उजेड़ सापड़ावीन दुखान मोटली वेला माय थोबीन रेना। 33 केदी केदी ते ज्य काय तुमू चिहटा एने सेताव वेठतेन तामाशो बोणना, एने केदी ज्य काय तुमू तान हाती बोणना जान वेला पुड़ेल एती। 34 काहाकाय तुमू ता पोर बी गीण केऱ्या जा जेली माय एता, एने तुमरो मालदेन बी खुसी माय चोराणे देना; ज्यो सोमजीन काय तुमू फाय एक उंजु बी हाजो एने जेलेमक्योस थोबणार मालदेन हे। 35 केरीन ईमोत मा सोड़ो काहाकाय तान फोल मोटलो हे। 36 काहाकाय तुमूह दिर खाणो जोरवरी हे, काहाकाय बोगवानान आसाह पुरी केरीन तुमू वायदान फोल सापड़ावहो। 37 काहाकाय पुस्तेक किथे:

"एवी जुलूम कोम टेम रेय जायेल हे,

जेवी काय आवणार आवी;

एने वार नाय लागाड़ी।

38 पुण मारो देरमी जाण बोरहा केरीन जीवतालो रेय;

एने केदी तो पासाण एय जाय,

ते मारो मोन ता पोर खुस नाय एय।"

39 पुण आपु सेटा एणारे नाह सोता काय खेतेम एय जाहु, पुण बुरहो केरनारे हेते काय जीवाह वोचाड़ी।