चेतुर कारबारी
1 ओवतो यीशु चेलाह केयो, "काल्ला कारबारीन एक पावोर ईतो। एने माणहे तान सोमोर ता पोर ज्यो गुनो लागाड्या काय ज्यो तारो आखो मालदेन उड़ाव दिथे, 2 तो ताह हादिन केयो, ‘ज्यी काय वात हे जी मी तारे बाराम होमेलथु? आपणे कारबारीन ईसाब आप, काहाकाय एवी तु कारबारी नाह रेय सिकेत।’ 3 तेवी कारबारी सोचणे बाज गीयो, ‘एवी मी काय केरू? काहाकाय मारो मालीक एवी कारबारीन काम माहु फाय रेन सांडाड़ ने बाजरिनोह। मार माय ताकेत नाह सोती काय माटड्यो खोदु; एने बिख मांगणेन माहु लाज आवीह। 4 मी सोमजी गीयो काय केरूह, काहाकाय जेवी मी कारबारीन कामा पोर रेन सुट जाह ते माणहे माहु तान गेरा माय लेय लेती।’
5 "एक एक केरीन हाद्यो एने पेल्लाह फुशो, ‘तुवा पोर मार मालीक ने कोलोक केरजो हे?’ 6 तो केयो, ‘होव मोण तेल,’ तेवी तो ताह केयो, ‘तारा खाताम पाचाह लेख दे।’ 7 ओवतो तो दिहराह फुशो, ‘तुवा पोर कोलोक केरजो हे?’ तो केयो, ‘होव मोण गोव,’ तेवी तो ताह केयो, ‘तारा खाताम आठ होव लेख दे।’
8 "मालीक ता अन्याय केरनारा कारबारी नावल्यो काय तो चेतराएच काम किरेल हे; काहाकाय ज्यी दुनियान माणहे तान कालान टेम ने माणहा हिऱ्यो रित वेवारा माय उजालान माणहाह रेन जुलूम चेतुर हेते।"
9 एने यीशु ताह केयो, "अन्याय केरीन दुनियान मालदेन से तुमरे केरता जोड़ीदार बाणाव लिवो, काहाकाय जेवी तो निवरी जाय, ते ता तुमूह जेलेमक्यो खेतेम नाह एणे ता माय लेय लेती। 10 जो जुलूम आतीस वातु माय ईमानदार हे; तो होवटा माय बी ईमानदार हे। 11 केदी तुमू दुनियान मालदेन माय ईमानदार नाह रेना, ते खेरलो मालदेन तुमूह कुण होपी? 12 केदी तुमू जो दिहरान हे ईमानदार नाय रिहो ते जो तुमरो खुद ने हे, ताह तुमूह कुण आपी?
13 16:13 मत्ती 6:24 "काल्लो बी पावोर दुय मालक्यान चाकरी नाह केर सिकेत; काहाकाय तो एका हिऱ्यो ईमानदार, एने दिहराह मोंग केरी, नाहते उवतो एका हिऱ्यो मिलीन रेय एने दिहराह काईच नाय सोमजी। तुमू बोगवानान एने मालदेनान दुयान चाकरी नाह केर सेकते।"
यीशुन थोड़ीक हिकवोण
(मत्ती 11:12,13; 5:31,32; मरकुस 10:11,12)