Lucas 16

मालदार माणुह एने गेरीब लाजर

19 एक मालदार माणुह एतो, जो मोंगाला फाड़का पेरतालो एने दाड़ीन हुकेह रेतालो। 20 ता लाजर नावान एक गेरीब एदमी रेतालो, तान सेरीर चांदा केरीन बोराय रियेल एतो, एने दाड़ीन दिह लाजराह मालदार माणहान बायणा हेऱ्यो लावीन बोहाड़ देतालो, 21 तो मालदारान पाटला पोर वालो पुड़ेल उसटालो खाणो खाईन तान पेट बोरने होदतालो; एने ता चिता आवीन तान गायाह चाटताला।

22 एक दिह गेरीब लाजर मोर गीयो, एने हेरोगदुत ताह लेन अब्राहाम फाय पोचाड़ देना। ओवतो मालदार बी मोर गीयो एने गाड़ देना, 23 *16:23 आंदारकेली; मुरेल माणहान दुनिया।पुण तो आंदारकेली आक्‍ठान पिड़ाम पोड़नो, एने तो ता रेन नेजेर टाक्‍यो, ते अब्राहाम जुलूम सीटे नेजेर पोड़नो ते लाजर ता हिऱ्यो बोह रियेल ईतो दिख्यो। 24 तेवी तो आयड़ीन केयो, "एय आबा अब्राहाम, मार पोर गीण केरीन लाजराह मोकली दे काय तो तान आंगलीन सेवटो पाण्या माय बिजवीन मारी जिबीह हेली केरी, काहाकाय मी ज्या आक्‍ठो माय वेला केरने बाजरिनोह!"

25 पुण अब्राहाम केयो, "एय बेटा, एर केर काय तु तारे जीवाय माय मोंज किऱ्यो, पुण लाजर वेला किरेल ईतो। पुण एवी तो न्या हुक हुदेरनोह, एने तु वेला केरने बाजरिनोह। 26 ओलोच नाह पुण आमरे एने तारे विचीम जुलूम मुठो खाडो ठेराव मिल्योह, काय जो न्या रेन तार फाय जाणे होदि, तो नाय जाय सेकी; एने जो ता रेन न्या आवणे होदि, तो नाय आव सेकी।" 27 मालदार एदमी केयो, "ते एय आबा, अब्राहाम मी तुवाह विन्ता केरथु काय तु लाजराह मारा आबाख ने गेर मोकली दे, 28 काहाकाय मारा पाच बाहख हेते; लाजर तान सामने ज्यी वातीन चेतावणी देय, काय ओहलो नाय एय काय ज्यी पिड़ान जागाम नाय आवी।" 29 अब्राहाम ताह केयो, तारा बायह्या फाय मुसान एने जाणकारान पुस्तेक हेते, ता तान होमले। 30 मालदार एदमी केयो, नाह एय आबा अब्राहाम; केदी मुरेल माय रेन जीवतालो एन ता फाय जाय, ते ता पाप केरने सोड़ीन मोन बोदेलती। 31 अब्राहाम ताह केयो, ता मुसान एने जाणकारान नेम नाह होमेलते, ते केदी मुरेल माय रेन बी एगदो जीवतालो एयीन ता फाय जाय तीबी तान नाय होमेलती।