1 जेवी ता यरूशलेम ने आहने, जेतुन नावान बोयड़ा पोर बेथफगे एने बेतनिया गावान आहने आवा। ते यीशु तान चेला माय रेन दुय जाणाह ज्य सोमजाड़ीन मुकेल दिनो, 2 "तुमू सोमोरल्या गावा माय जावो, एने ता पोचताच तुमूह एक गेदड़ान पिलो बांद मिलेन जुड़ी, ता पोर एवी वोर कुणूस बुहील नाह सोतो। ताह सोड़ीन मार फाय लीयावज्यो। 3 *केदी तुमूह ईखेह फुसी, ज्याह काहा सोड़तेह? ताहार तुमू ताह ज्य किज्यो, मालीकाह ज्यान गिरेज हे, एने तो चालोच ज्याह न्या लीयावणे देय।"

4 केरीन चेला जाईन गेदड़ान पिलाह बाहेर बायणा हेऱ्या खोली माय बांदिल देख्या, एने चेला ताह सोड़ने बाज गीया। 5 ताहरी उबरियेल थोड़ाक माणहे ज्य देखीन फुशा, "ज्या गेदड़ान पिलाह काहा सोड़तेह?"

6 जिहकेरीन यीशु कियेल ईतो, चेला तिहेच केरीन ताह केय देना, तेवी माणहे पिलाह ली जाणे देना। 7 चेला गेदड़ान पिलाह यीशु फाय लीयावा, ता पोर तान फाड़का टाक देना, एने यीशु ता पोर बोह गीयो। 8 तेवी जुलूम होवटा माणहे तान फाड़का वाटे आथरी देना, एने थोड़ाक माणहे खेताम रेन जाड़ान डालख्यु काटीन वाटी पोर पोसराव देना। 9 आखा माणहे जा यीशुन ओंगाण ओंगाण एने पासाण पासाण चालताला ता आयेड़ने बाज गीया, "बोगवानान बोड़ाय किरो! बोगवान ताह बोरकेत आपी जो मालीक ने नाव लेन आवीह! 10 बोगवान आमरो आबोख! दाऊद ने आवणार राजाह बोरकेत आपी, बोगवानान बोड़ाय एय!"

11 यीशु यरूशलेम माय पोचनो एने मोंदिर माय आवो, एने ताहरी कावदेन आखा सोमानाह हास केरीन दिख्यो। पुण हांज एय जायेल एती केरीन बारा चेला हिऱ्यो बेतनिया गावाम जात रिनो।

12 दिहरे दिह जेवी ता बेतनिया माय रेन वोलना, तेवी यीशुह बुख लागी। 13 यीशु सिटोच रेन अंजीरान एक निलोगार जाड़ देखीन आहने आवो काय काह जुड़ जाय। पुण पाला सावाय कायच नाह जुड़नो, काहाकाय फोल लागणेन टेम नाह एतो।

14 तेवी यीशु जाड़ाह केयो, "एवी रेन कुणीच बी तारो फोल केदीच नाय खाय!"

एने तान चेला ज्य होमेलने बाजरियेल एता।

15 जेवी ता यरूशलेम माय आवा, यीशु मोंदिर माय जाईन ता आखा माणहाह बाहेर काड़ने बाज गीयो जा लेन देन केरताला। तो पोयशा बोदेलनारान एने पेरवा वेचणारान पाटलाह उलटाव दिनो, 16 एने कुणीह बी मोंदिर माय रेन सोमान लेन आवणे जाणे नाह दिनो। 17 तो माणहाह हिकाड़तेन केयो, "वचन माय ज्य नाह लिखेल सोतो, ‘मार मोंदिर आखी जातीन माणहान केरता विन्तान गेर रेय।’ पुण तुमू ज्याह डाकुन पाड़ावो बाणाव मेल्याह!"

18 ज्य होमलीन बोगवानान मुखी चाकऱ्या एने देरेमगुरू यीशुह मारनेन टेम होदणे बाज गीया। ता यीशुह बिताला, काहाकाय आखा माणहे यीशुन हिकवोण होमलीन बोंगलाय जाताला।

19 जेवी हांज एनी, यीशु एने तान चेला हेयराम रेन बाहेर जात रेना।

20 उठ्यान वेगाच, जेवी ता ता रेन आवणे बाजरियेल एता, तेवी चेला अंजीरान जाड़ाह उपेर रेन ते मुलाम वोर हुकेल देख्या। 21 पतरसाह ती वात एर आवी, एने तो यीशुह केयो, "एय गुरू, देख! ज्यो अंजीरान जाड़ जाह तु हाराप दियेल ईतो, हुक जायेल हे!"

22 यीशु ताह जापाप आप्यो, "बोगवाना पोर बुरहो मीलो। 23 ✝मी तुमूह खेरीच केथु काय जो कुण बिगेर सेंका माय ज्या बोयड़ाह केय, तु उखील जा, एने देरीया माय जाय पोड़, पुण जो आपणा मोना माय बुरहो केरी एय जाय, ताहार तान केरता तो एय जाय। 24 केरीन मी तुमूह केथु, ‘जेवी तुमू विन्ता केरतेह एने काह मांगतेह, बुरहो किर लिवो काय तुमूह तो जुड़ जायेल हे, एने जो बी तुमू मांगतेह, तो तुमरी केरता एय जाय। 25 ✝एने जेवी तुमू उबरीन विन्ता किरहो ते केदी तुमरे मोना माय एगदान बाराम काह खोट एय ते माफ किरो, तानकेरता काय तुमरो हेरगावालो आबोख बोगवान बी तुमरो गुनो माफ केरी। 26 एने केदी तुमू माप नाय किरहो, ते तुमरो आबोख बी जो हेरगा माय हे, तुमरो गुनो माफ नाय केरी।’"*

27 ता यरूशलेम माय पोशा एक वारीन आवा। जेवी यीशु मोंदिर माय फिरने बाजरियेल ईतो, तेवी मुखी चाकर्‍यो, देरेमगुरू, एने डायला यीशु फाय आवा, 28 एने फुसणे बाज गीया, "तुवाह ज्य काम केरनेन काय आदिकार हे? ज्यो आदिकार तुवाह कुण आपेल हे?"

29 यीशु ताह जापाप आप्यो, "मी बी तुमूह एक सावाल फुसथो, माहु जापाप आप सिकहो, ते मी तुमूह केय देह काय ज्यो काम काल्ला आदिकार माय केरथु। 30 योहानाह बपतीस्मा केरनेन आदिकार कुणी उगे रेन एतो: बोगवानान उगे रेन काय माणहान उगे रेन एतो? माहु जापाप आपो।"

31 ता आपसाम विचार केरने बाज गीया: "आपु काय केहु? केदी आपु केहु, ‘बोगवानान उगे रेन एतो, ताहार केय, तुमू योहान पोर बुरहो काहा नाह केऱ्या?’ 32 केदी आपु ज्य केहु, ‘माणहान उगे रेन एतो।’" ता माणहाह बिताला, काहाकाय माणहाह मालुम एतो काय योहान खेरीच जाणकार हे।

33 ता यीशुह जापाप आप्या, "आमुह नाह मालुम,"

यीशु ताह केयो, "मी बी तुमूह नाह केत काय ज्य काम मी काल्ला आदिकार माय केरथु।"