मत्ती 14

पाच एजार माणहाह खावड़ावणे

13 जेवी यीशु योहानान मोतीन बाराम होमल्यो, ते डोंडह्या माय बोहीन एखालोच हुनाला जागाम जात रिनो, एने माणहे ज्य होमलीन हेयरा हेयरा रेन पायेच ता फाय गीया। 14 जेवी यीशु डोंडह्या माय रेन उतरीन दिड़े आवो, ते ता माणहे जुलूम टुलो एय रियेल दिख्यो, एने यीशु ता पोर किव किऱ्यो एने तान बेमारीह हुदार दिनो।

15 जेवी हांज एनी ते चेला यीशुन आहने आवीन केया, "ज्यो हुनालो जागो हे, एने दिह जुलूम डेल जायेल हे। न्या माणहाह मुकेल दे, काय ता गावा माय जाईन तान केरता खाणो वेचातो लेती।"

16 पुण यीशु ताह जापाप आप्यो, "न्याह जाणेन जोरवुत नाह सोती, तुमूच न्याह खाणेन आपो।"

17 चेला ताह केया, "न्या आमु फाय पाच रोटा एने दुय मासाह सोड़ीन दिहरो कायच नाह सोतो।"

18 यीशु ताह केयो, "ताह मार फाय लावो।" 19 तेवी यीशु माणहाह खेड़ा पोर बोहणेन उकुम आप्यो; एने ता पाच रोटाह एने दुय मासाह लिदो एने हेरगान उगे देखीन बोगवानान दन्यवाद किऱ्यो। एने रोटा मुड़ मुड़ीन चेलाह आप्यो, एने चेला माणहाह आप्या। 20 जेवी आखा माणहे खाईन आफरी गीया। तेवी चेला वोचेल रोटान टुकड़ा बारा टोपला बोरीन विशा। 21 एने रोटा खाणारे बायकु एने सोराह सोड़ीन पाच एजार एदमीच एता।