1 ✝होमालीन रिज्यो! तुमू माणहाह देखाड़नेन केरता तुमरा देरमान काम मा किरहो, नाह ते तुमरा हेरगावाला आबाख फाय रेन तुमूह कायच बी फोल नाय जुड़ी।

2 तानकेरता जेवी तु दान किरहे, जिहकेरीन कोपटी माणहे मिटींग माय, एने गेल्ली माय पावली वाजाड़तेह तान गेत मा किरहे, काहाकाय माणहे तान बोड़ाय केरी केरीन ताह ओहलो केरनु, पुण मी तुमूह खेरीच केथु काय ताह तान फोल जुड़ गीयो। 3 पुण जेवी तु दान किरहे, ते जो तारो जीवड्यो आथ किरेह, तो डाखऱ्यो आथ जाणने नाय जुवे। 4 काहाकाय तार दान लिकेल* रेय, तेवी तार आबोख जो आठावे दिखेह, तुवाह बोरकेत आपी।

5 ✝जेवी तु विन्ता किरहे, ते कोपट्यान गेत मा किरहे, काहाकाय ता माणहाह देखाड़नेन केरीन बोक्ती केरन्या गेराम, एने सेड़क्यु पोर उबरीन विन्ता केरनेन ताह हाजो लागणे। मी तुमूह खेरीच केथु काय ताह तान बोरकेत जुड़ गीयो। 6 पुण जेवी तु विन्ता किरहे, ते तारा गेरा माय जा, एने बायणो बोंद केरीन तार बोगवान आबोख जो आठावे हे विन्ता केर। तेवी तार आबोख जो आठावे हे, दिखेह, एने तुवाह बोरकेत आपी।

7 विन्ता केरनेन बुखेत बिगेर यहुदि माणहान गेत च्‍याव च्‍याव मा किरहो, काहाकाय ता सोमेजणु काय तान जास्ती बोलना माय तान होमलाय जाय। 8 तानकेरता तान गेत मा बुणहो, काहाकाय तुमरो आबोख तुमूह मांगणेन पेल जाणेह काय तुमरी काय काय जोरवुत हे। 9 ओवता तुमू इहकेरीन विन्ता किरज्‍यो:

"एय आमरा आबा तु जो हेरगा माय हे,

तारो नाव चोखालो मानाय जाय;

10 तारो राज आवी;

एने तारी मोरजी जिहकेरीन हेरगा माय पुरी ईथे, तिहेस केरीन देरती पोर बी एय।

11 आमरो दाड़ीन दिह ने खाणो आज आमुह आप।*

12 एने जिहकेरीन आमु आमरा गुनेगाराह माफ केऱ्याह,

तिहेच केरीन तु बी आमरा गुनाह माफ केर।

13 एने आमुह पारेख माय मा पाड़हे,

पुण खाराबाह रेन वोचाड़, काहाकाय राज एने ताकेत एने बोड़ाय कायेम तारीस हे, आमेन।"*

14 ✝केदी तुमू माणहान गुनाह माफ किरहो, ते तुमरो हेरगावालो आबोख बी तुमरा गुनाह माफ केरी। 15 एने केदी तुमू माणहान गुनाह माफ नाय किरहो, ते तुमरो आबोख बी तुमरा गुनाह माफ नाय केरी।

16 जेवी तुमू उपास किरहो, ते कोपट्यान गेत मुया पोर कोमजोरी नाय देखाणे जुवे, काहाकाय तान मुय ता ओहलो बाणाव लेणु, काय माणहे ताह उपासी जाणे। मी तुमूह खेरीच केथु काय ताह तान बोरकेत जुड़ गीयो। 17 पुण जेवी तु उपास किरहे, ते मुंडा पोर तेल लागाड़ एने मुय दोवजे, 18 तान केरता माणहे नाह पुण तार बोगवान आबोख जो आठावे हे, तुवाह उपासी जाणे। एने तार आबोख जो आठावे हे, दिखेह, एने तुवाह बोरकेत आपी।

19 ✝तुमरी केरता देरती पोर मालदेन एकठा मा किरहो, जाहरी ओदाय एने जेंग बिगाड़ ने, एने चोर गेर तोड़ीन चोरी केर लेणे। 20 पुण तुमरी केरता हेरगा माय मालदेन टुलो किरो, ताहरी नाह ते ओदाय एने नाह ते जेंग बिगाड़ ने, एने ताहरी नाह ते चोर गेर तोड़ी एने नाह ते चोरी केरी। 21 काहाकाय जाहरी तुमरो मालदेन हे, ताहरीस तुमरो मोन बी लाग रेय।

22 सेरीरान दिवो डुलो हे। केदी तार डुलो निर्दोस हे, ते तारो आखो सेरीर बी उजालो रेय। 23 एने केदी तार डुलो खाराब हे, ते तारो आखो सेरीर बी आंदारलो रेय; ज्यानकेरता काय तो उजालो जो तार माय हे केदी आंदारलो एय, ते तो आंदारलो कोलोक मोठो एय।

24 काल्लो बी पावोर दुय मालक्यान चाकरी नाह केर सिकेत, काहाकाय तो एका हिऱ्यो ईमानदार, एने दिहराह मोंग केरी, नाहते ओवतो एका हिऱ्यो मिलीन रेय एने दिहराह कायच नाय सोमजी। तुमू बोगवानान एने मालदेनान दुयान चाकरी नाह केर सेकते।

25 ज्यानकेरता मी तुमूह केथु काय आपणा जीवान कालजी मा किरहो, काय आमु काय खाहु एने काय पिहु; एने नाह आपणा सेरीरान केरता काय काय पेरहु। काय जीव रोटाह रेन; एने सेरीर फाड़काह रेन वोदार नाह सोतो काय? 26 चीड़ाह दिखो, ता नाह ते पेरते नाह ते काटतेह, एने नाह ते मोटक्या माय एकठो केरतेह; तीबी तुमरो हेरगावालो आबोख ताह खावड़ावेह, काय तुमू ताह रेन होवटा किमतीन नाह सोता? 27 *तुमरे माय कुण ओहलो हे, जो चिन्ता केरीन तान जीवाय आथ बोर वोदाड़ सेकी?

28 एने फाड़कान केरीन काहा चिन्ता केरतेह? जेंगला मायवाला फुलाह दिखो! ता किहेक मोठा एतेह; ता नाह ते मेहनेत केरते, एने नाह ते हुकतेह। 29 तीबी मी तुमूह केथु, काय सुलेमान राजा बी तान आखा राज ने काल माय ताम रेन एकान गेत बी नाह फाड़का पेरेल इतो।✝ 30 तानकेरता एय अविश्वासी! जेवी बोगवान जेंगला मायवाला खेड़ाह, जो आज हे एने काल आक्‍ठा माय हेलगी जाथे, ओहलाह तो फाड़का पेरावेह, ते काय तुमूह न्याह रेन वोदार नाय पेरावी।

31 तानकेरीन तुमू चिन्ता केरीन ज्य मा किहो काय आमु काय खाहु, एने काय पिहु, एने काय पेरहु। 32 काहाकाय ज्यी दुनियान माणहे ज्यी आखी वोस्तुह होदते रेतेह, पुण तुमरो हेरगावालो आबोख जाणेह काय तुमूह ज्‍यु आखी वोस्तुन गिरेज हे। 33 पुण पेल तुमू बोगवानान राज एने तान देरमाह हुदो, ते ज्‍यु आखी वोस्तु बी तुमूह जुड़ जाती। 34 तानकेरीन हेकालेन चिन्ता मा किरहो, काहाकाय हेकालेन दिह तान चिन्ता तोच केर लेय; आजीन केरीन आजुच ने दुख जुलूम हे।