1 ✝ହେ ପାଦ୍‌ନା ଚେଲାହିର୍‌ ଜିସୁ କଚଣ୍‌ ୱାଜ଼ି ୱେନ୍‍ବାତାର୍, ତେବେ "ସାର୍ଗେ ରାଜିତ ଇନେର୍‌ ଗାଜା ?"

2 ଜିସୁ ର ହିରୁ ହିମ୍‌ଣାଂ ଲାଗେ କୁକ୍‌ଚି ହେୱାର୍‌ ବିତ୍ରେ ନିଲି କିଜ଼ି ଇଚାନ୍‌, 3 "ଆନ୍‌ ମିଙ୍ଗେଙ୍ଗ୍‌ ହାତ୍‌ପା ଇଞ୍ଜ୍‌ନାଙ୍ଗା, ଏପେଙ୍ଗ୍‌ ବାଦ୍‌ଲାୱିତିସ୍‌ ହିରୁ ହିମ୍‌ଣା ଲାକେ ଆୱିତିସ୍‌ ଇନେସ୍‌ କିତିସ୍‌ପା ସାର୍ଗେ ରାଜିତ ହଣ୍ଡେଙ୍ଗ୍‌ ଆଡୁଦେର୍‌ । 4 ଲାଗିଂ, ଇନେର୍‌କି ଇ ହିରୁ ହିମ୍‌ଣା ଲାକେ ଜାର୍‌ତିଂ ହାଦ୍‌ଦାର୍ମି କିନାନ୍‌, ହେୱେନ୍‌ ସାର୍ଗେ ରାଜିତ ଗାଜାକାନ୍‌ । 5 ଆରେ, ଇନେର୍‌ ନା ତର୍‌ଦାଂ ଇ ଲାକେ ର ହିରୁ ହିମ୍‌ଣାଂ ମାନ୍‌କିନାନ୍‌, ହେୱେନ୍‌ ନାଙ୍ଗେଙ୍ଗ୍‌ ମାନ୍‌କିଦ୍‍ନାନ୍ ।"

6 ମାତର୍‌ ଇନେର୍‌କି "ନା ତାକେ ପାର୍ତି କିନାକାର୍‌ ଇ ହିରୁହିମ୍‍ଣାଙ୍ଗ୍ ବିତ୍ରେ ରକାନ୍ତି ବାଦା ଇନାକିଦେଂକି ଆନାତ୍‌, ହେଦାଂ ଗାଡେଲ୍‌ତ ର ଗାଜା ଜାତାକାଲ୍‌ ଗାଚ୍‌ଚି ତାଙ୍ଗେଙ୍ଗ୍‌ ହାମ୍‌ଦୁର୍‌ତ ତୁସି ହିନାକା ହାର୍‌ ଆନାତ୍‌ । 7 ମାନାୟାର୍‌ତି ପାର୍ତିତ ବାଦା ଗିଟାୟ୍‌କିଦେଂ ଇଞ୍ଜି, ବେସି ବିସ୍ରେ ମାନାତ୍‌ । ହେଦାଂ କାଜିଂ ଇ ପୁର୍ତିତ ଅବସ୍ତା ଏଚେକ୍‌ ବଇଁକାର୍‌ ସବୁ ଦିନ୍‌ ଇ ଲାକେ ବାଦା ୱାନାତ୍, ମାତର୍‌ ଇନେନ୍‌ ବାଦା ଗିଟାୟ୍‌କିନାନ୍‌, ତା ୱିଜ଼େ କେତେକ୍‌ ହାର୍‌ଦାକା !"

8 "ଜଦି ମି କେଇ କି ପାନା କାଜିଂ ଏପେଙ୍ଗ୍‌ ପାର୍ତି ବାଦା କିନାଦେର୍‌, ଲାଗିଂ ତାଙ୍ଗ୍‌ କାଦ୍‌ଦି ତୁସିହିୟାଟ୍‌ । ରି କେଇ ଆରି ରି ପାନା ମାନ୍‌ଞ୍ଜି ୱିଜ଼୍‌ୱିନାଣିତ ତୁସ୍‌ୟାନି ପାତେକ୍‌ ରକେଇ ଆରେ ର ପାନା ବିନେ ଆଜ଼ି ୱିଜ଼୍‌ୱି ଜିବୁନ୍‌ତ ହଣାକା ମି ପାକ୍ୟାତ ହାର୍‌ ।

9 ଆରେ ମି କାଣ୍‌ଙ୍ଗା ଜଦି ନି ବାଦା ଆନାତ୍‌, ଲାଗିଂ ତାଙ୍ଗ୍‌ ଉନ୍‌ଦି ତୁଇ ହିୟାଟ୍‌; ରିଣ୍ଡାଂ କାଣ୍‌କୁ ଅଜ଼ି ନାଣି ବିତ୍ରେ ନରକ୍‌ ତାକେ କାଡ୍‌ନି ବାଟା ଇଚିସ୍‌ ର କାଣ୍‌ଙ୍ଗା ଅଜ଼ି ଜିବୁନ୍‌ତ ହଣାକା ମି ପାକ୍ୟାତ ହାର୍‌ ।"

10 ଜାଗ୍ରତ୍‌, ଇ ହିରୁକାର୍‌ ବିତ୍ରେ ରକାନିଂ ନେ ଇଣ୍‌ କିମାଟ୍‌, ଇନାକିଦେଂକି ଆନ୍‌ ମିଙ୍ଗେଙ୍ଗ୍‌ ହାତ୍‌ପା ଇଞ୍ଜ୍‌ନାଙ୍ଗା ସାର୍ଗେତ ହେୱାର୍‌ତି ଦୁତ୍‌ତର୍‌ ସବୁ ଦିନ୍‌ ନା ସାଗ୍ରେନି ଆବା ଲାଗାଂ ମାନାର୍‌ ।*

11 ଇନାକିଦେଂକି ଇନାକା ଜାଙ୍ଗ୍‍ତାତ୍‍ନା, ହେଦାଂ ରାକ୍ୟା କିଦେଙ୍ଗ୍‌ ଇଞ୍ଜି ମାନାୟ୍‌ ମାଜ଼ି ୱାତାନ୍‌ନା । 12 "ଏପେଙ୍ଗ୍‌ ଇନାକା ଏତୁ କିନାଦେରା ? ଇମ୍‌ଣି ଲକ୍‌ତି ଜଦି ପାଞ୍ଚ୍‌କଡ଼ି ମେଣ୍ଡାଂ ମାଚିସ୍‌, ଆରେ ହେୱାଙ୍ଗ୍‌ ବିତ୍ରେ ରଞ୍ଜାଙ୍ଗ୍‌ ଜାଙ୍ଗ୍‌ତିସ୍‌, ଲାଗିଂ ଇନାକା ନବେନଗଟାକାଂ ମାଡ଼ିତ ପିସ୍‌ସି ହେୱାନ୍‌ ହାଲ୍‌ଜି ହେ ବାଣାତି ମେଣ୍ଡାତିଂ ଡେକ୍‌କୁନ୍‌ ? 13 ଆରେ ହେୱେନ୍‌ ମେଣ୍ଡା ଗାଟାଆନାନ୍ ତା ଆତିସ୍‌ ଆନ୍‌ ମିଙ୍ଗେଙ୍ଗ୍‌ ହାତ୍‌ପା ଇଞ୍ଜ୍‌ନାଙ୍ଗା, ନବେନଗଟା ବାଣା ଆୱାଦାଂ ମାଚିକ୍‌, ହେୱାଙ୍ଗ୍‌ ବିତ୍ରେ ଇ ରଞ୍ଜାଙ୍ଗ୍‌ କାଜିଂ ହେୱେନ୍‌ ଆଦିକ୍‌ ୱାରି କିନାନ୍‌ । 14 ହେ ଲାକେ ଇ ହିରୁକାରିଂ ବିତ୍ରେ ଜେ ରଞ୍ଜାଙ୍ଗ୍‌ କାରାପ୍‌ ଆନାତ୍‌, ଇଦାଂ ଏପେଙ୍ଗ୍‌ ସାର୍ଗେନି ଆବାତି ମାନ୍‌ ଆକାୟ୍‌ ।"

15 ✝ଲାଗିଂ "ନି ଟଣ୍ଡେନ୍‌ନି ବିରୁଦ୍‌ତ ପାପ୍‌ କିନାନ୍‌, ଲାଗିଂ ହାଲ୍‌ଜି କେବଲ୍‌ ମି ରିୟାରିଂ ବିତ୍ରେ ହେୱାନିଂ ତା ଦସ୍‌ ଚଚାଟ୍‌; ଜଦି ହେୱାନ୍‌ ମି କାତା ୱେନାନ୍, ଲାଗିଂ ଏପେଙ୍ଗ୍‌ ଜାର୍‌ ଟଣ୍ଡେନିଂ ପାୟା ଆତାୟ୍‌ । 16 ମାତର୍‌ ଜଦି ହେୱାନ୍‌ ୱେନୁର୍, ରକାନ୍‌ କି ରିୟାରିଂ ଅଜ଼ି ହାଲାଟ୍‌ । ଇନେସ୍‌ ରିୟାର୍‌ କି ତିନ୍‌ଜାଣ୍‌ ସାକିରିଙ୍ଗ୍‌ ମୁମ୍‌ଦ ୱିଜ଼ୁ ଦାବା କାତା ତିର୍‌ କିୟାନାତ୍‌ ।" 17 ଜଦି ହେୱାନ୍‌ ହେୱାର୍‌ କାତା ମାନିକିଉନ୍‌, ଲାଗିଂ ମଣ୍ଡ୍‌ଲିତିଂ ଇନାଟ୍‌, ଆରେ ଜଦି ହେୱାନ୍‌ ମଣ୍ଡ୍‌ଲି କାତା ପା ମାନିକିୱିତିସ୍, ଲାଗିଂ ହେୱାନ୍‌ ମି କାଣ୍‍ଗାତ ପାର୍ତିକିୱି ଜିହୁଦିର୍‌ ଆରି ସିସ୍ତୁଏନ୍‌ନାକାର୍‌ ଲାକେ ଆଏନ୍‌ ।

18 ✝ଆନ୍‌ "ମିଙ୍ଗେଙ୍ଗ୍‌ ହାତ୍‌ପା ଇଞ୍ଜ୍‌ନାଙ୍ଗା, ଏପେଙ୍ଗ୍‌ ପୁର୍ତିତ ଇନାକାପା ବନ୍ଦ୍‌ କିନାଦେର୍‌, ସାର୍ଗେତ ହେୱିଜ଼ୁ ବନ୍ଦ୍‌ ମାନ୍‌ଗାନାତ୍‌, ଆରି ପୁର୍ତିତ ଇନାକା ୱିଜ଼ୁ ଜେନାଦେର୍‌, ସାର୍ଗେତ ହେୱିଜ଼ୁ ଜେନାଦେର୍‌ ।"

19 ଆରି, ଆନ୍‌ ମିଙ୍ଗେଙ୍ଗ୍‌ ହାତ୍‌ପା ଇଞ୍ଜ୍‌ନାଙ୍ଗା, ପୁର୍ତିତ ମି ବିତ୍ରେପା ରିୟାର୍‌ ଇନେସ୍‌ ବାର୍ତି ବିସ୍ରେ ର ମାନ୍‌ତାଂ ଆଜ଼ି ଇନାକା ଏନ୍‌ନାଦେର୍‌, ହେଦାଂ ନା ସାର୍ଗେନି ଆବାତି ଇଚା ହେୱାର୍‌ କାଜିଂ ଗିଟା ଆନାତ୍‌ ।

20 "ଇନାକିଦେଂକି ଇମ୍‌ଣି ବାହାତ ରିୟାର୍‌ କି ତିନ୍‌ ଜାଣ୍‌ ନା ତର୍‌ଦାଂ ରୁଣ୍ଡା ଆନାର୍‌, ହେ ବାହାତ ଆନ୍‌ ହେୱାର୍‌ ବିତ୍ରେ ମାନ୍‌ଗାନାଂ ।"

21 ✝ହେ ପାଦ୍‌ନା ପିତର୍‌ ଜିସୁ କଚଣ୍‌ ୱାଜ଼ି ୱେନ୍‌ବାତାନ୍‌, "ଏ ମାପ୍ରୁ, ଏଚେକ୍‌ ହଟ୍‌ ନା ଟଣ୍ଡେନ୍‌ ନା ବିରୁତ୍‌ତାଂ ପାପ୍‌ କିତିସ୍‌ ଆନ୍‌ ଏଚେକାଡ଼୍‌ଦ କେମା କିନାଙ୍ଗ୍‌ ? ଇନାକା ସାତ୍‌ ହଟ୍‌ ?"

22 ଜିସୁ ତାଙ୍ଗେଙ୍ଗ୍‌ ଇଚାନ୍‌, "ନିଙ୍ଗେଙ୍ଗ୍‌ କେବଲ୍‌ ସାତ୍‌ ହଟ୍‌ ପାତେକ୍‌ ଇଞ୍ଜୁଙ୍ଗା, ମତର୍‌ ସତୁରି ଗୁଣ୍‌ ସାତ୍‌ ହଟ୍‌ ପାତେକ୍‌ । 23 ଇଚିସ୍‌ ସାର୍ଗେ ରାଜି ଜାର୍‌ ଆଡ଼ିୟାର୍‌ ଲାହାଙ୍ଗ୍‌ ଇସାବ୍‌ କିଦେଙ୍ଗ୍‌ ଇଚାକିନି ରୱାନ୍‌ ରାଜା ଲାକେ । 24 ହେୱେନ୍‌ ଇସାବ୍‌ ଆରମ୍‌ କିତିଲେ, ଲାକେ ଟାକାଂ ରୁଣ୍‌ କିଜ଼ି ମାଚି ର ହେବାକାରି ରାଜା ଲାଗାଂ ତାହିୱାତାର୍‌ । 25 ମାତର୍‌ ତା ହୁଜାଆଦେଂ ଇନାକା ହିଲ୍‌ୱିତିଲେ ତା ମାପ୍ରୁ ତାଙ୍ଗ୍‌ ଆରି ତା ଡକ୍ରିଙ୍ଗ୍, ହିମ୍‍ଣାୱାକ୍‍ଡ଼ା ଆରି ୱିଜ଼ୁ ପ୍ରସି କର୍ଚ ଅଦେଂ ରାଜା ବଲ୍‌ ହିତାନ୍‌ । 26 ଲାଗିଂ ହେ ହଲ୍ୟା ତାଙ୍ଗେଙ୍ଗ୍‌ ପାନା ତାରେନ୍‌ ଜୁୱାର୍‌ କିଜ଼ି ଇଞ୍ଜେଙ୍ଗ୍‌ ଲାଗାତାନ୍‌, ଏନ୍‌ ନା ବିସ୍ରେ ବାଡ଼୍‌କାସ୍‌ଆ, ଆନ୍‌ ନିଗେଙ୍ଗ୍ ୱିଜ଼ୁ ହୁଜା ଆଜ଼ି ହିଦ୍‌ନାଂ ।" 27 ହେବେତାଂ ହେ ହଲ୍ୟାତିଂ ମାପ୍ରୁ କାର୍ମା ଆଜ଼ି ତାଙ୍ଗେଙ୍ଗ୍‌ ପିସ୍ତି ହିତାନ୍‌ ଆରି ରାଜା ରୁଣ୍‌ କେମା କିତାନ୍‌ ।

28 ମାତର୍‌ "ହେ ହଲ୍ୟା ହସି ହାଲ୍‌ଜି ତାବେଣ୍ଡାଂ ପଚାସ୍‌ ଟାକା ରୁଣ୍‌ କିଜ଼ି ମାନି ର ହାଙ୍ଗ୍‌ଦାକାନ୍‌ ଚଞ୍ଜ୍‌ୟା ଆଜ଼ି ହେୱାନିଂ ଆଜ଼ି ତା ଗାଡେଲ୍ ମ୍ଡିଞ୍ଜି ଇଞ୍ଜେଙ୍ଗ୍‌ ଲାଗାତାନ୍‌, ଏନ୍‌ ଇନାକା ଆସ୍ତାୟ୍‌ନା ହୁଜାଆଦା ।"

29 ଲାଗିଂ "ତା ହାଙ୍ଗ୍‌ଦାକାନ୍‌ କାଲ୍‌ ତାରେନ୍‌ ଆଜ଼ି ହେୱାନିଂ ଗୱାରି କିଜ଼ି ଇଞ୍ଜେଙ୍ଗ୍‌ ଲାଗାତାନ୍‌, ଏନ୍‌ ନା ବିସ୍ରେ ବାଡ଼୍‌କାସ୍‌ଆ, ଆନ୍‌ ନିଙ୍ଗେଙ୍ଗ୍‌ ହୁଜା ଆଜ଼ି ହିଦ୍‌ନାଂ ।"

30 "ମତର୍‌ ହେୱେନ୍‌ ରାଜି ଆୱାତାନ୍‌, ମାତର୍‌ ହାଲ୍‌ଜି ରୁଣ୍‌ ହୁଜାଆୱି ପାତେକ୍‌ ତାଙ୍ଗ୍‌ ଜଇଲ୍‌ତ ପ୍ରତ୍‌ତାର୍‌ । 31 ଲାଗିଂ ତା ହାଙ୍ଗ୍‌ଦାକାର୍‌ ଇ ଗଟ୍‌ନା ହୁଡ଼୍‌ଜି ବେସି ଦୁକ୍‌ ଆତାର୍‌ ଆରି ହାଲ୍‌ଜି ହେୱାର୍‌ ମାପ୍ରୁ ଲାଗାଂ ୱିଜ଼ୁ ଗଟ୍‍ଣାଗିଟା ଆଜ଼ି ମାଚାତ୍‌ ୱେଚ୍‍ଚାର୍ ।" 32 ହେବେତାଂ ତା ମାପ୍ରୁ ତାଙ୍ଗ୍‌ ଲାଗେ କୁକି କିଜ଼ି ଇଚାନ୍‌, "ଏଡ଼େ ଉତ୍‌ପାତ୍ୟା ହଲ୍ୟା, ଏନ୍‌ ନାଙ୍ଗେଙ୍ଗ୍‌ ଗୱାରି କିତ୍‍ତିଲେ ଆନ୍‌ ନି ହେ ୱିଜ଼ୁ ରୁଣ୍‌ କେମା କିତାଙ୍ଗ୍‌; 33 ଆନ୍‌ ଇନେସ୍‌ ଲାକେ ନିଙ୍ଗେଙ୍ଗ୍‌ ଦୟା କିତ୍‍ତାଙ୍ଗ୍, ହେ ଲାକେ ପା ଜାର୍‌ ହାଙ୍ଗ୍‌ଦାକାର୍‌ ଦୟା କିନାକା କି ନି କାମାୟ୍‌ ହିଲ୍‌ୱାତାତ୍‌ ?" 34 ଆରେ, ତା "ମାପ୍ରୁ ରିସା ଆଜ଼ି ୱିଜ଼ୁ ରୁଣ୍‌ ହୁଜାଆୱି ତାଙ୍ଗ୍‌ ପାତେକ୍‌ ବାଦା ହିନି ମାନାୟାର୍‌ କେଇଦ ସର୍‌ପି କିତାର୍‌ ।"

35 ଜିସୁ ଇନାକା ୱିସ୍ତି "ହେୱାରିଂ ଇଚାନ୍‌ ଜଦି ୱାସ୍କିତାଂ ଜାର୍‌ ଜାର୍‌ ଟଣ୍ଡାରିଂ କେମା କିୱିତିସ୍‌, ତାଆତିସ୍‌ ନା ସାର୍ଗେନି ଆବା ପା ମି କାଜିଂ ହେ ଲାକେ କିଦ୍‌ନାନ୍‌ ।"