1 मंडड़ीइ डायाअहें रोत– देवे निवड़ीइल्यी बाय आन तियीइ पोऱ्याआं नावसे– जियांपोअ आंय खोरो मेर कोअहो, फक्त आंय एतुज नाहां, पोन जें सत्याहा जांअतेहे तें बी मेर कोअतेहे; 2 जों सत्य आपामेहें रोहे तों सादाज आपाअरी रोय.
3 देव बाह्हू आन तियाआ बेटुह्हू ईसु ख्रिस्त यापोअ रोत मेरवानी, दया, शांती एं सत्याम आन मेरेम आपाअरी रोअहूं जोवे.
सत्य आन मेर
4 ताआ थोड़ेक पोऱ्ये देव बाह्हाअ गोठीइ पुरमाणे सत्यापोअ सालत्ले देखीत माहूं जास्ती खुसी ओयी. 5 ताहां ए बाय, आंय ताहूं विनंती कोअहो के आपू आखे एकमेकापोअ मेर कोअहूं जोवे. ओ आंय ताहूं कोड्लू नोवू आदेश नाहां लेखतू, पोन जो पेल रोतुज आपापोअ होय तोज आदेश लेखोहो. 6 आन आपू देवोअ आपल्या आदेशोअ पुरमाणे सालीइलोअ एज ते मेर होय; जे तुमू वेगे रोत उनाअयेहे आन तेहेंज कोइत सालुहूं बी जोवे.
7 काहाके, जाअखीलेहे ठोगनारे दुन्यामेहें उठीत पोड़्येहे,आन ईसु ख्रिस्त एक माहुंउं जल्म लेत यी दुन्यामेहें आयु एहें कोत जो नाहां मानतु तोंज ठोगनारु आन ख्रिस्ताआ दुस्मोन होय. 8 सोताआ बाप्तिमेहें सांबालित रोवा, आमू कोअयिही ते मेहेंनत मा जाअहूं देहा, पोन तियाआ पुरो फल जोड़ुहूं जोवे कोत कालजी ल्या.
9 ख्रिस्ताआ हिकवोण सोड़ीत कोइत जो कोडो आगाड़ी-आगाड़ी जाहे तियाहा देव नाहां जोड़्यू; जो कोडो तियाआ हिकवोण मानित सालेहे तियाहा बाह्हून बेटुह्हू बेनू जोड़्याहा. 10 ताहां एज हिकवोण ने आपनारो एखु तुमाआं जागे आयो, ताहां तियाहा तुमाआं कोअमेहें बी मा हादहा आन तियाहा सलाम बी मा कोअहा. 11 काहाके, जो कोडो एहेला माहुंहूं हादेहे, तों तियाआ खाराब कामोमेहें भागिदार बोणेहे.
सेलवाऱ्येए शब्दे
12 माहूं तुमुहूं जाअखीलीही गोठी लेखीइली होय, पोन कागल आन सहीवाईं नाहां, माआं आशा होय के आंय सोताहा तुमाअ जागे आविहीं आन एकमेकाअरी सामने मिलीत गोठी मिकहूं, ताहां आपाआ खुसी पुरी ओत जाय.
13 देवोअ निवड़ीइल्यी ताआ बोअह्हींइं पोऱ्ये ताहूं सलाम कोतेहे.