1 देवोअ निवड़ीइल्या माअहोंअ विश्वासोअ काजे आन भक्तीमान जिवनोअ परमाणे तिया सत्य ज्ञानोअ काजे नेमल्या ईसु ख्रिस्ताआ प्रेशित पौलुस देवोअ सेवक याआ तरफ से: 2 तियी हादाफल्यीइ जिवनोअ आशा पोअ जियीइ आथवसन देवे वेगो रोत आप्योतो. 3 पोन बोराबर वेलेपोअ तियाआ वसनोहों तिया संदेशोवाअहीं देखाड़्यो, जो आपाअ तारनारु देव तियाआ आदेशोअ अनुसार माहूं होप्योहो. 4 तितुसोअ नाव से जो विश्वासोअ संगतीइ विसारोवाअहीं माआं खोरु पोर्‍यू होय:

देव बाह्हू आन आपाअ तारनारु ख्रिस्त ईसु याआ तरफ से ताहूं मेरवानी आन शांती मिलती रोअहूं जोवे.

5 आंय याअकाजे ताहूं क्रेतेमेहें टाकी देत आयुतो के तु बाकी गोठीहीं हुदारुहूं जोवे, माआं गोठीइ परमाणे मंडड़ीइ डायहांहां एकेक होयरोम नेमी देअहूं जोवे. 6 जिया डायाहा नेमीहीं तो निर्दुस आन एकुज लाडीइ माटी जोवे, तियाआ पोर्‍ये विश्वासी जोवे आन तियांपोअ लुसड़ायीइ आन उजाड़्ये रोअलोअ आरोप ने जोवे. 7 काहाके सेवकोहो देवोअ कामोअ कारभारी होय तिहींवाअहीं निर्दुस रोअहूं जोवे; ने वोडार्‍यु, ने जोराखु, ने होराअ पिनारु, ने सुलाअनारु, आन ने सुकीवाअहीं कामावनारु जोवे. 8 पोन पावणाय कोअनारु, हाजी गोठीइ इश्शा कोअनारु, सोताआ मोन ताबाम मिकनारु, धर्मी, पवित्र, वारुहूं रोनारु जोवे; 9 तिये आपल्या खोरा शिक्शणोअ परमाणे मजबुत रोनारु जोवे. एहेंकोइत तो हाजी शिक्शणो वाअहीं बिहीराहा खुस कोइत सेकेहे आन विरोध कोअनाराआ सोब बोंद कोइत सेकेहे.

10 काहाके जाअखीलेहे मांअहें उजाड़्ये आन कोकलीइनारे, आन ठोगनारे एहलेहे होय; खास कोइत खतनावालाहां कोहो. 11 यांआं सोबी बोंद कोअहूं जोवे; एं माहें सुकीइ वाटे कामाय कोइलोअ काजे खाराब गोठी सिकाड़ीत आखे कोएं बिगाड़ी देतेहे. 12 तियांजमेहें रोत एके भविश्यवक्ते कोयोहो, "क्रेतेवाले माहें सादाज लबाड़, जोराखे जनवारे, आन आलह्ये डोडल रोतेहे." 13 ए साक्शी खोरी होय, तियाहा काजे तें विश्वासोम पाक्के रोअहूं जोवे कोत तियांहां ताबलीइतु रोजी. 14 आन यहुद्याआं काईंइं वोल आन तियां माअहोंअ गोठीइ वोल दिहान मा लागाड़ही जें सत्याहा नाकारतेहे. 15 सोका माअहुंउं काजे आखी वस्तू सोकीज होय; पोन जें विट्लीइल्ये आन विश्वास नाहां कोअते तियांआं काजेहे किज बी सोको कायनाहां, पोन तियांआं बुद्दी आन मोन बेनु एठे होय. 16 तें कोतेहे के, "आमू देवोहो ओलखीइतेहे," पोन तियांआं कामोवाअहीं तें तियाहा नाकारतेहें; काहाके तें सोगद्ये आन नियम तोड़नारे होय, आन कोड्लोज हाजो काम कोअहूं जोगेहे कायनाहां.