Marcos 11

အောင်ပွဲခံယွေ့ ယေရုရှလင်မြို့ဟို ဝင်ခြင်း

1 သူလို့ဟ ယေရုရှလင်မြို့သို့ ရောက်သောအခါ၊ ဗက်ဖာဂေမြို့နဲ့ ဗေသနိရွာအနီးဆိ သံလွင်တောင်ဟို သူလို့ ချဉ်းကပ်လာကြအယ်။ ယေရှုဟ သူရဲ့ တဘဲ့နေယောက်ဟို အဆေ့ဟို စေလွှတ်ယွေ့၊ 2 ဟေ ညွှန်ကြားချက်များဖြင့် "နင်လို့ ဆေ့တွင်ဆိသော ရွာဟို သွားကြလော့။ နင်အဲဒီဟို ရောက်တာနဲ့၊ စသူမှ မစီးဖူးသေးသော မြည်းသငယ်တကောင်ဟို လံထားတာဟို နင်မျော်လိမ့်မယ်။ အေးဒါဟို ဖြေပင်း ဟေဟို ယူလာပါ။ 3 ပင်းရင် တယောက်ယောက်ဟ နင်ပစာလို့ အေးလိုလုပ်လဲလို့ မေးရင်၊ အဲအရာဟို သခင်*၁၁.၃ သခင်၊ အဲဟာမဟုတ်ရင် ၎င်းရဲ့ ပိုင်ဆှင်။အလိုဆိအယ်၊ အဲပင်း တခါထဲ တန်းပြန်ပို့ပေးပါလိမ့်မယ်" ဟု ပြောလော့။

4 အဲကျောန့် သူလို့ဟ သွားယွေ့ နေအိုင်တအိုင်ရဲ့ ထင်ခါးမှာ လံထားသော လမ်းနှိုက် မြည်းသငယ်ဟို မျော်အယ်။ သူလို့ဟ အေးကြိုးဟို ဖြေနေအယ်၊ 5 ဖေးမှ ရပ်ကျေ့နေသောသူ အချို့ဟ သူလို့ဟို "မြည်းကြိုးဟို ဖြေယွေ့၊ နင်လို့ ပစာလုပ်နေလုန်း" ဟု မေးကြအယ်။

6 သူလို့ဟ ယေရှု မှာလိုက်ခဲ့လဲ့အတိုင်း ဖြေကြသဖြင့်၊ ရပ်ကျေ့နေသောသူလို့ဟ သူလို့ဟို သွားခွင့်ပြုကြအယ်။ 7 သူလို့ဟ မြည်းသငယ်ဟို ယေရှုဆေသို့ ခေါ်ခဲ့ပင်းရင်၊ သူလို့ရဲ့ ဝတ်လုံများဟို မြည်းကျောပေါ်သို့ လွှားတင်ကြပင်း၊ ယေရှုဟ မြည်းဟို စီးလေအယ်။ 8 ရမ်းဆာ့သော လူလို့ဟ မိမိလို့ရဲ့ ဝတ်လုံများဟို လမ်းပေါ်မှာ ဖြန့်ခင်းကြအယ်၊ အခြားသူများဟ လယ်ကွင်းများထဲမှ သစ်ကိုင်းများဟို ခုတ်ယွေ့ သူလို့ဟ လမ်းမှာ ဖြန့်ခင်းကြအယ်။ 9 ဆေ့မှသွားသော လူများနဲ့ နောက်မှ လိုက်တဲ့ လူတွေဟ စတင်ပင်း အော်ကြအယ်၊ "ဘုရားဟို ချီးမွန်းကြလော့၊ သခင်ဘုရားရဲ့ နာမနဲ့ ကြွလာသောသူဟို ဘုရားသခင် ကောင်းချီးပေးပါစေ၊ 10 လာမဲ့ ဘုရင်ဒါဝိဒ်ရဲ့ နိုင်ငံတော်ဟို ဘုရားသခင် ကောင်းချီးပေးပါစေ၊ ငါလို့ အဖ၊ ဘုရားသခင်ဟို ချီးမွန်းကြလော့၊"

11 ယေရှုဟ ယေရုရှလင်မြို့ဟို ဝင်ယွေ့၊ ဗိမာန်တော်သို့ သွားကြအယ်၊ အေးပင်း အရာအားလုံးဟို လှည့်ပတ်ကျေ့အယ်။ အဲလိုလဲ အေးနေ့ဟ နောက်ကျနေသောကျောန့်၊ ကိုယ်တော်ဟ တဘဲ့တော် တဆယ့်နေဦးနဲ့အတူ ဗေသနိရွာဟို ထွက်သွားလေအယ်။