1 သိပ်မကြာခင် တခြား လူအုပ်ကြီး စုဆုံလာကြအယ်။ လူလို့နှိုက် စားဖို့ မကျန်သောအခါ၊ ယေရှုဟ တဘဲ့တော်လို့ဟို သူဆေဟို ခေါ်ယွေ့၊ 2 "ဟေလူတွေအတွက် ငါ သနားအယ်၊ ပစာကို့ သူလို့ဟ သုံးရက်လုံးလုံး ငါနဲ့တူတူ ဆိကြပီမို့ အခု သူလို့မှာ စားစရာမဆိ။ 3 တချို့သော သူများဟ အဝေးမှ လာကြသောကျောန့်၊ သူလို့ဟို မကျွေးမွေးဘဲ ငါဟ နေအိုင်ဟို ပြန်လွှတ်ရင်၊ သူလို့ဟ လမ်းနှိုက် မူးမေ့သွားလိမ့်မယ်" ဟု မိန့်အယ်။

4 သူရဲ့ တဘဲ့တော်လို့ဟ "ဟေလူသူကင်းမဲ့သော နေရာမှာ စသူကမှ အေးလူအားလုံးဟို ကျွေးဖို့ လုံလောက်တဲ့ အစားအစာဟို စသူဆှာနိန်လုန်း" ဟု သူ့ဟို မေးကြအယ်။

5 ယေရှုဟ "နင်မှာ မုန့်စလောက် ဆိလုန်း" ဟု မေးလေအယ်။

သူလို့ဟ "မုန့်ခုနေလုံး ဆိပါအယ်" ဟု ဖြေကြအယ်။

6 ကိုယ်တော်ဟ လူအပေါင်းလို့ဟို မြေပေါ်တွင် ထိန်စေရန် အမိန့်ပေးအယ်။ အဲပင်းရင် မုန့်ခုနေလုံးဟို ယူပင်း၊ ဘုရားသခင်ရဲ့ ကျေးဇူးတော်ဟို ချီးမွန်းယွေ့၊ မုန့်ဟိုဖဲ့ကာ လူအုပ်လို့အား ဝေပေးရန် သူရဲ့ တဘဲ့တော်လို့ဟို ပေးအယ်၊ အဲပင်း တဘဲ့တော်လို့ဟလည်း လူအုပ်အား ဝေပေးကြအယ်။ 7 သူလို့နှိုက် ငါးကတစ်လည်း ဆိအယ်။ ယေရှုဟ အဲအတွက် ကျေးဇူးတော်ဟို ချီးမွန်းယွေ့ သူလို့အား ဝေပေးရန် တဘဲ့တော်လို့ဟို ပြောအယ်။ 8,9 လူတိုင်းဟ လုံလောက်စွာ စားရပင်း အဲမှာ လူ , လောက် ဆိလေအယ်။ အဲပင်းရင် တဘဲ့တော်လို့ဟ ကျန်တာဟို ကောက်သိမ်းယွေ့ ခုနေတောင်း အကျိုးအပဲ့များ အပြေ့ရကြအယ်။ ယေရှုဟ လူလို့ဟို အဝေးဟို ထွက်ခွာစေပင်း၊ 10 သူရဲ့ တဘဲ့တော်လို့နဲ့အတူ လှေပေါ်ဟို ခုတုံးတက်ယွေ့ ဒါလမနုသ နယ်များသို့ သွားလေအယ်။

11 ✝ဖာရိရှဲအချို့လို့ဟ ယေရှုဆေဟို လာယွေ့ ကိုယ်တော်နဲ့ စတင်ပင်း ငြင်းခုံကြအယ်။ သူလို့ဟ ကိုယ်တော်ဟို ထောင်ချောက်ဆင်ချင်ကြအယ်၊ အဲလိုမို့ သူလို့ဟ ကိုယ်တော်ဟို ဘုရားသခင် နှစ်သက်ကျောန်း ပြသရန် နိမိတ်လက္ခဏာ ပြုလုပ်ရန် သူ့ဟို တောင်းဆိုကြအယ်။ 12 ✝အဲလိုလဲ ယေရှုဟ သက်ပြင်းချပင်းတော့ "ဟေနေ့ခေတ် လူများဟ နိမိတ်လက္ခဏာဟို ပစာကျောန့် တောင်းကြလုန်း၊ ငါ နင့်ဟို ပြောတာဟ၊ ဒီလိုလူတွေဟ သက်သေဟို ပေးလိမ့်မယ် မဟုတ်" ဟု ပြောလေအယ်။

13 ကိုယ်တော်ဟ သူလို့ ဆေမှ ထွက်ယွေ့၊ လှေထဲဟို ပြန်လာပင်း အိန်တဖက်သို့ စတင်ပင်း ကူးလေအယ်။

14 တဘဲ့တော်လို့ဟ မုန့်အလုံအလောက် ယူလာရန် မေ့သွားပင်း လှေပေါ်တွင် သူလို့နဲ့အတူ မုန့်တလုံးသာ ဆိအယ်။ 15 ✝ယေရှုဟ "ဂရုစိုက်မန့်" ဟု သူလို့အား သတိပေးအယ်၊ "နင်လို့ဟာ ဖာရိရှဲများရဲ့ တဆေးနဲ့ ဟေရုဒ်ရဲ့ တဆေးဟို သတိနဲ့ ဆှောင်ကြလော့" ဟု မိန့်အယ်။

16 သူလို့ဟ စတင်ပင်း သူလို့အချင်းချင်း ဆွေးနွေးကြတာဟ "ငါလို့မှာ ပစာမုန့်မှ မဆိသောကျောန့် သူဟ ဟေလို့ ပြောအယ်။"

17 သူလို့ ပစာပြောဆိုနေတာဟို ယေရှု သိသောကျောန့် ကိုယ်တော်ဟ သူလို့အား "နင်လို့ မုန့်မပါတဲ့အကျောန်းဟို ပစာကို့ ဆွေးနွေးကြလုန်း၊ နင်လို့ မသိသေးသလော အဲဟာမဟုတ်ရင် နားမလည်ကြဝူးလော၊ နင်လို့ရဲ့ စိတ်နေလုံးဟ မာကျောနေသေးသလော။ 18 ✝နင်လို့မှာ မျက်စေ့ဆိလျက် မမျော်နိန်ကြ၊ နင်လို့မှာ နားဆိလျက် မကြားနိန်ကြ၊ မမှတ်မိကြဝူးလော၊ 19 မုန့်ငါးလုံးဟို လူ , အတွက် ငါ ချိုးဖဲ့သောအခါ၊ အကျိုးအပဲ့များဟို တောင်းအပြေ့ စမတောင်း ကောက်သိမ်းခဲ့ကြလုန်း" ဟု မေးအယ်။

သူလို့ဟ "ဆယ့်နေတောင်း" ဟု ဖြေကြအယ်။

20 "ငါဟ လူ , အတွက် မုန့်ခုနစ်လုံးဟို ဖဲ့ခဲ့စဉ်၊ မုန့်အကျိုးအပဲ့များဟို စမတောင်းအပြေ့ ကောက်သိမ်းရကြလုန်း" ဟု ကိုယ်တော်ဟ မေးလေအယ်။

သူလို့ဟ "ခုနေတောင်း ကောက်သိမ်းကြပါအယ်" ဟု ဖြေကြအယ်။

21 ကိုယ်တော်ဟ "နင်လို့ဟ နားမလည်ကြသေးဝူးလော" ဟု သူလို့အား မေးလေအယ်။

22 သူလို့ဟ ဗက်ဇဲဒမြို့သို့ လာကြအယ်၊ လူအချို့လို့ဟ မျက်စေ့မမျော်လဲ့ တယောက်အား ယေရှုဆေဟို ခေါ်လာယွေ့ အဲသူအား တို့ထိပေးရန် တောင်းပန်ကြအယ်။ 23 ယေရှုဟ မျက်စေ့မမျော်သောသူအား လက်ဆွဲကာ ရွာအပြင်ဟို ခေါ်သွားအယ်။ သူရဲ့ မျက်စေ့များဟို ဆံထွေး ထွေးယွေ့ ကိုယ်တော်ဟ သူရဲ့ အပေါ်မှာ လက်ဟို တင်ပင်း၊ "နင်ဟ တစုံတခုဟို မျော်ပီလော" ဟု သူ့အား မေးလေအယ်။

24 သူဟ မျော်ကျေ့ပင်း ပြောတာဟ၊ "ငါဟ လူလို့ဟို မျော်နိန်ပေမဲ့ သူလို့ဟ လမ်းဆှောက်နေလဲ့ သစ်ပင်တွေနဲ့ တူအယ်" ဟု ပြောအယ်။

25 ယေရှုဟ အဲသူရဲ့ မျက်စေ့ပေါ်တွင် လက်ဟို နောက်တခါ တင်လေအယ်။ ဒီတခါတော့ အဲသူဟ စူးစူးစိုက်စိုက် ကျေ့ရာ၊ သူ့မျက်စေ့ မျော်လာပင်း အရာအားလုံးဟို ဆှင်းဆှင်းလင်းလင်း မျော်လေအယ်။ 26 ယေရှုဟ သူ့အား နေအိုင်ဟို ပြန်ဖို့ အမိန့်ပေးယွေ့၊ "ရွာထဲဟို မပြန်နဲ့" ဟု ပြောလေအယ်။

27 အဲပင်းရင် ယေရှုနဲ့ သူရဲ့ တဘဲ့တော်လို့ဟ ကဲသရိ ဖိလိပ္ပု ကျေးရွာများ အနီးသို့ သွားကြအယ်။ လမ်းတွင် ကိုယ်တော်ဟ "ငါ့ဟို ပြောမန့်၊ လူလို့ဟ ငါ့ဟို စသူလို့ ပြောသလော" ဟု သူလို့အား မေးလေအယ်။

28 ✝သူလို့ဟ "အချို့ဟ နှစ်ခြင်းယောဟန်ဟု ပြောအယ်၊ အချို့ဟ ဧလိယဟု ပြောပင်း၊ အချို့ဟ ပရောဖက်တပါးပါး ဖြစ်အယ်ဟု ပြောကြအယ်" ဟု ပြန်ပြောကြအယ်။

29 ✝ ကိုယ်တော်ဟ "နင်လို့ဟရော ငါ့ဟို စသူဖြစ်အယ်ဟု ဆိုကြလုန်း" ဟု သူလို့အား မေးလေအယ်။

ပေတရုဟ "ကိုယ်တော်ဟ မေဆှိယ ဖြစ်အယ်" ဟု ဖြေလေအယ်။

30 အဲပင်းရင် ယေရှုဟ "ငါ့အကျောန်း စသူဟိုမှ မပြောနဲ့" ဟု သူလို့အား မိန့်မှာခဲ့အယ်။

31 အဲပင်းရင် ယေရှုဟ "လူသားဟ ရမ်းဆာ့သော ဒုက္ခဝေဒနာ ခံစားလျက် အသက်ကြီးသူများ၊ ယဇ်ပုရောဟိတ်ကြီးများ၊ ကျမ်းတတ်ဆရာများရဲ့ ငြင်းပယ်ခြင်းဟို ခံရမယ်။ သူဟ အသတ်ခံရလိမ့်မယ်၊ အဲလိုလဲ နောက်သုံးရက်အကြာတွင် သူဟ ထမြောက်လိမ့်မယ်" ဟု သူရဲ့ တဘဲ့တော်လို့အား စတင် သွန်သင်လေအယ်။ 32 သူဟ အဲအကျောန်းဟို သူလို့အား ဆှင်းဆှင်းလင်းလင်း ဖြစ်စေအယ်။ အဲလိုမို့ ပေတရုဟ ကိုယ်တော့်ဟို ဘေးဖက်ဟို ခေါ်ပင်း သူ့ဟို အပစ်တင်စကား စတင်ပြောလေအယ်။ 33 အဲလိုလဲ ယေရှုဟ လှည့်ကျေ့လျက်၊ တဘဲ့တော်လို့ဟို ကျေ့ပင်း ပေတရုဟို ဆုံးမလေအယ်။ "စာတန်၊ ငါ့ဆေမှ ထွက်သွားလော့၊ နင်ရဲ့ အတွေးတွေဟ ဘုရားသခင်ဆေမှ လာတာမဟုတ်ပေမဲ့ လူ့ သဘောသဘာဝဘဲ" ဟု ပြောလေအယ်။

34 ✝အဲပင်းရင် ယေရှုဟ သူရဲ့ တဘဲ့တော်လို့နဲ့တကွ လူအုပ်ဟို ခေါ်ပင်း ပြောတာဟ၊ "ငါ့တဘဲ့ဖြစ်လို သူတိုင်းဟ ကိုယ့်ကိုယ်ဟို ငြင်းပယ်ပင်း သူလို့ရဲ့ လက်ဝါးကပ်တိုင်ဟို ထမ်းယွေ့ ငါ့နောက်ဟို လိုက်ရမယ်။ 35 ✝အကျောန်းမှာ သူလို့ရဲ့ အသက်ဟို ကယ်တင်လိုသောသူဟ အသက် ဆုံးရှုံးရလိမ့်မယ်၊ အဲလိုလဲ ငါ့အတွက် သူလို့ရဲ့ အသက်နဲ့ ဧဝံဂေလိတရားအတွက် အသက်ဆုံးရှုံးသောသူဟ ကယ်တင်လိမ့်မယ်။ 36 တစုံတယောက်သောသူဟ ကမ္ဘာလောကတခုလုံးဟို ရယူသော်လည်း သူလို့ရဲ့ စိတ်ဝိညာဉ်ဆုံးရှုံးရင် ပစာအကျိုးဆိမှာမို့လုန်း။ 37 အဲဟာမဟုတ်ရင် စသူ့ဟိုမျှ သူလို့ရဲ့ စိတ်ဝိညာဉ်အတွက် ပစာအရာနဲ့ ရွေးနိန်လုန်း။ 38 ဟေဘုရားတရားမဲ့နဲ့ ဆိုးသွမ်းသောနေ့နှိုက် နင်ဟ ငါနဲ့ ငါ့သွန်သင်ချက်ဟို ဆှက်ရင်၊ သန့်ဆှင်းသော ခေါန်းခင်တမန်လို့နဲ့အတူ ခမည်းတော်ဟ ဘုန်းတန်ခိုးနဲ့ ကြွလာသောအခါ လူသားဟ နင်လို့ဟို ဆှက်လိမ့်မယ်။"