1 အဲပင်းရင် ယေရုရှလင်မြို့မှ ဖာရိရှဲတချို့နဲ့ ကျမ်းတတ်ဆရာများဟ ယေရှုဆေဟို မေးဖို့ ရောက်လာကြအယ်။ 2 "ကိုယ်တော်ရဲ့ တဘဲ့များဟ မစာကျောန့် ဆေ့လူကြီးလို့ရဲ့ သင်ကြားမှုများဟို မလိုက်နာကြလုန်း။ သူလို့ဟ နည်းမန်အတိုင်း လက်မဆေးဘဲ စားသောက်ကြအယ်" ဟု ဆှောက်ထားကြအယ်။

3 ယေရှုဟ "နင်လို့သည် မစာကျောန့် ဘုရားသခင်ရဲ့ ပညတ်တော်လို့ဟို နာမခံဘဲ မိမိလို့ရဲ့ သွန်သင်ချက်များဟို လိုက်နာကြလုန်း။ 4 အကျောန်းမှာ ဘုရားသခင်ဟ ‘နင့်ရဲ့ မိဘဟို ရိုသေစွာပြုလော့။ မိဘဟို ကျိန်ဆဲသောသူဟ သေဒဏ်ခံစေ။’ 5 အဲလိုလဲ နင်လို့ သင်ကြတာဟ လူတယောက်နှိုက် အဖ အဲဟာမဟုတ်ရင် အမေ့အား ကူညီရန် ပစ္စည်းတစုံတခု ဆိသော်လည်း အေးပစ္စည်းဟို ‘ဘုရားသခင်ပိုင်လဲ့ ပစ္စည်းဖြစ်အယ်’ ဟု ဆိုရင်၊ 6 သူဟ မိမိရဲ့အဖအား* ဂုဏ်ပြုရန် မလို။ အေးနည်းလမ်းဖြင့် နင်လို့ဟ မိမိလို့ရဲ့ ထုံးတမ်းစဉ်လာများဟို လိုက်နာရန် ဘုရားသခင်ရဲ့ ပညတ်ဟို ပစ်ပယ်ကြအယ်။ 7 သူတော်ကောင်းဟန်ဆောင်တတ်သောသူလို့၊ ဟေရှာယဟ နင်လို့ဟို ရည်မှတ်ယွေ့ ဟေသို့ ဟောတာဟ၊

8 " ‘ဟေလူမျိုးဟ ငါ့ဟို စလောင်အားဖြင့် ဂုဏ်ပြုကြအယ်၊

အဲလိုလဲ သူလို့ရဲ့ စိတ်နေလုံးမှာ ငါနဲ့ ဝေးအယ်။

9 ငါ့ဟို ကိုးကွယ်သောသူလို့နှိုက် အကျိုးမဆိ၊

ပစာကို့ သူလို့ဟ ငါရဲ့ပညတ်တွေလိုဘဲ လူ့စည်းမျဉ်းတွေဟို သင်ပေးအယ်’ ဟု မိန့်အယ်။"

10 အေးနောက် ယေရှုဟ လူအုပ်လို့အား အထံတော်ဟို ခေါ်ပင်း သူလို့အား "နားထောင်ပင်း နားလည်ကြလော့၊ 11 လူဟို စုတ်ပဲ့စေလဲ့အရာဟ စလောင်ထဲဟို ဝင်သည့်အရာ မဟုတ်၊ စလောင်ထဲမှ ထွက်လဲ့အရာ သာလျှင် လူဟို စုတ်ပဲ့စေအယ်" ဟု မိန့်အယ်။

12 အဲပင်းရင် တဘဲ့တော်လို့ဟ အထံတော်ဟို လာယွေ့ "ကိုယ်တော်မိန့်သော စကားကျောန့် ဖာရိရှဲလို့ ခံစားကြတာဟို သိသလော" ဟု မေးကြအယ်။

13 ယေရှုဟ "ခေါန်းခင်ဘုံဆှင် ငါရဲ့ အဖ စိုက်ပျိုးတော်မမူလဲ့ အပင်ဆိသမျှဟ အမြစ်ပါမကျန် နုတ်လောခြင်းဟို ခံရလိမ့်မယ်။ 14 ✝သူလို့အတွက် စိတ်မပူကြနဲ့၊ သူလို့ဟ မျက်မမြင်များဟို လမ်းပြလဲ့ မျက်မမြင်များ ဖြစ်ကြအယ်။ မျက်မမြင်တယောက်ဟ တခြားမျက်မမြင်တယောက်အား လမ်းပြသောအခါ သူလို့ နေယောက်စလုံးပင် တွင်းထဲဟို ကျလိမ့်မယ်" ဟု မိန့်အယ်။

15 ပေတရုဟ "အဲပုံဥပမာဟို ငါလို့အား ဆှင်းပြမန့်" ဟု ဆှောက်ကြအယ်။

16 ယေရှုဟ "နင်လို့ဟလည်း သူများလို့ထက် ခုတိုင်အောန် အသိဉာဏ်ကင်းမဲ့လျက် ဆိနေကြသေးသလော။ 17 စလောင်ထဲဟို ဝင်သောအရာဟူသမျှဟ အစာအိမ်ဟို ရောက်ပင်းနောက် အိုင်သာတွင် စွန့်ပစ်တာဟို နင်လို့ နားမလည်သလော။ 18 ✝အဲလိုလဲ စလောင်ထဲဟ ထွက်လဲ့အရာဟတော့ စိတ်နေလုံးထဲမှ ထွက်လာသောအရာဖြစ်ပင်း အဲအရာများဟ လူဟို စုတ်ပဲ့စေအယ်။ 19 အကျောန်းမှာ မကောင်းသော တွေးတောကြံစည်မှုများ၊ လူ့အသက်ဟို သတ်ခြင်း၊ အိုင်ထောင်ရေး ဖောက်ပြန်ခြင်း၊ ကာမဂုဏ်လိုက်စားခြင်း၊ သူ့ဥစ္စာဟို ခိုးခြင်း၊ လိမ်လည်ခြင်း၊ သူ့အသရေဟို ဖျက်ခြင်း အစဆိသည့် စုတ်ပဲ့လဲ့ အကြံအစည်များဟ စိတ်နေလုံးထဲမှ ထွက်လာအယ်။ 20 ဟေအရာများဟ လူဟို စုတ်ပဲ့စေကြအယ်။ အဲလိုလဲ လက်မဆေးဘဲ အစားအစာ စားခြင်းဟ လူဟို စုတ်ပဲ့စေတာ မဟုတ်" ဟု မိန့်အယ်။

21 ယေရှုဟ အဲအရပ်မှ ထွက်ခွာယွေ့ တုရုနဲ့ ဇိဒုန်မြို့လို့ရဲ့ နယ်များဟို ကြွအယ်။ 22 အဲဒေသတွင် နေထိန်သူ ခါနာန် အမျိုးသမီးတယောက်ဟ ကိုယ်တော်ဆေဟို လာယွေ့ "ဆရာ၊ ဒါဝိဒ်ရဲ့သားတော်၊ ကျွန်မဟို သနားမန့်။ ကျွန်မရဲ့ သမီးဟ နတ်ဆိုးစွဲသဖြင့် ရမ်းဆာ့ ဝေဒနာခံလျက် နေအယ်" ဟု ဆှောက်အယ်။

23 အဲလိုလဲ ယေရှုဟ သူဟို တခွန်းမှ ဖြေကြားတော်မမူ။ တဘဲ့တော်လို့ဟ ယေရှု ဆေဟို လာယွေ့ တောင်းပန်ပင်း "ဟေမိန်းမဟ ငါလို့ရဲ့ နောက်လိုက်ပင်း အော်နေအယ်၊ သူ့အား မောင်းထုတ်မန့်" ဟု ဆှောက်ကြအယ်။

24 အဲပင်းရင် ယေရှုဟ "ငါသည် ဣသရေလအမျိုးသားများ ပျောက်နေသော သိုးများဆေသို့သာ စေလွှတ်ခြင်း ခံရအယ်" ဟု ဖြေကြားအယ်။

25 အဲအခါ အေးမိန်းမဟ ခြေတော်ရင်းနှိုက် လာရောက် ပျပ်ဝပ်လျက် "ဆရာ၊ ကျွန်မဟို ကူညီမန့်" ဟု ဆှောက်အယ်။

26 ယေရှုဟ "လူပဲ့သငယ်လို့ရဲ့ ကောင်းသော အစာဟို ယူယွေ့ ခွေးလို့အား မကျွေးအပ်" ဟု မိန့်အယ်။

27 အဲမိန်းမဟ "မန်ပါအယ် ဆရာ၊ အဲလိုလဲ ခွေးများပင်လျှင် မိမိလို့ သခင်ရဲ့ စားပွဲမှကျသည့် စားကြွင်းစားကျန်များဟို စားရကြအယ်" ဟု ဆှောက်အယ်။

28 အဲလို့မို့ ယေရှုဟ၊ "အချင်း မိန်းမ၊ နင်ရဲ့ယုံကြည်ခြင်းသည် အားကြီးအယ်။ နင်အလိုဆိသည့်အတိုင်း ဖြစ်စေ" ဟု မိန့်အယ်။ အဲအချိန်မှ စယွေ့ အဲမိန်းမရဲ့ သမီးဟ ရောဂါပျောက်လေအယ်။

29 ယေရှုဟ အဲအရပ်မှ ထွက်ခွာယွေ့ ဂါလိလဲ အိန်နားတဆှောက် ကြွလေအယ်။ ကိုယ်တော်ဟ တောင်ကုန်းတခုပေါ်ဟို တက်ယွေ့ ထိန်အယ်။ 30 လူအုပ်ကြီးဟ ခြေမစွမ်းမသန်သူများ၊ မျက်မမြင်များ၊ ကိုယ်အင်္ဂါချို့တဲ့သူများ၊ ဆွံ့အသူများနဲ့ အခြားရောဂါသည်များဟို ခေါ်လာကာ ယေရှုရဲ့ ခြေတော်ရင်းတွင် ချထားကြအယ်။ ယေရှုဟ အဲလူနာလို့ရဲ့ ရောဂါများဟို ပျောက်ကင်းစေအယ်။ 31 ဆွံ့အသူများ စကားပြောကြတာဟို လည်းကောင်း၊ ကိုယ်အင်္ဂါချို့တဲ့သူများ အကောင်းတိုင်းတိုင်း ဖြစ်လာတာဟို လည်းကောင်း၊ ခြေမစွမ်းသူများ လမ်းဆှောက်ကြတာဟို လည်းကောင်း၊ မျက်မမြင်များ မျက်စေ့မျော်ကြတာဟို လည်းကောင်း တွေ့မျော်သောအခါ လူအုပ်လို့ဟ ရမ်းဆာ့အံ့ဩယွေ့ ဣသရေလအမျိုးသားလို့ရဲ့ ဘုရားသခင်ဟို ချီးမွန်းကြအယ်။

32 ယေရှုဟ တဘဲ့တော်လို့အား အထံတော်ဟို ခေါ်ပင်းရင် "ဟေလူအပေါင်းဟို ငါသနားအယ်။ ပစာကို့ သူလို့ဟ ငါနဲ့အတူ သုံးရက်တိုင်တိုင် နေခဲ့ကြပင်း သူလို့မှာ ပစာမှ စားဖို့မဆိ။ သူလို့အား အစားအစာမကျွေးဘဲ နေအိုင်ဟို ငါ မပြန်စေလို၊ အေးလို့ပြန်ရင် သူလို့ဟ လမ်းတွင် အားပြတ်ကြလိမ့်မယ်" ဟု မိန့်အယ်။

33 တဘဲ့တော်လို့ဟ "ဟေမျှ များပြားလဲ့ လူအုပ်ကြီး စားလောက်အောန် အစားအစာများဟို ငါလို့ဟ ဟေတောကန္တာရတွင် စနားမှာ ရနိန်မလုန်း" ဟု ဆှောက်ကြအယ်။

34 ယေရှုဟ "နင်လို့တွင် မုန့်စလောက် ဆိလုန်း" ဟု မေးသော်၊

"မုန့်ခုနေလုံးနဲ့ ငါးကတစ် ဆိမန့်အယ်" ဟု ပြန်ဆှောက်ကြအယ်။

35 အဲလိုမို့ ယေရှုဟ လူအုပ်ဟို မြေပေါ်တွင် ထိန်ရန် အမိန့်ပေးအယ်။ 36 အဲပင်းရင် ကိုယ်တော်ဟ မုန့်ခုနေလုံးနဲ့ ငါးဟို ယူယွေ့ ဘုရားသခင်ရဲ့ ကျေးဇူးတော်ဟို ချီးမွန်းအယ်။ မုန့်နဲ့ ငါးဟို ဖဲ့ယွေ့ တဘဲ့တော်လို့အား ပေးအယ်။ သူလို့ဟလည်း လူအုပ်လို့အား ပေးဝေအယ်။ 37 သူလို့အားလုံးဟ ဝစွာ စားရကြအယ်။ အဲပင်းရင် တဘဲ့တော်များဟ စားကြွင်းစားကျန်များဟို တောင်း ခုနေတောင်းပြေ့ ကောက်သိမ်းကြရအယ်။ 38 မုန့်စားသူ ဦးရေမှာ အမျိုးသမီးနဲ့ လူပဲ့များမှ လွဲရင် ယောက်ျား , ဆိအယ်။

39 အဲပင်းရင် ယေရှုဟ လူလို့အား ပြန်စေပင်း လှေပေါ်ဟို တက်ယွေ့ မာဂဒလမြို့ အရပ်ဒေသသို့ ကြွလေအယ်။