1 မနက်စောစောနှိုက် ယဇ်ပုရောဟိတ်ကြီးများနဲ့ အသက်ကြီးသူများဟ ယေရှုဟို သေဒဏ်ချရန် တိုင်ပင်ကြပင်း 2 ယေရှုဟို တုတ်ချေကာ ခေါ်ဆောင်ယွေ့ ရောမဘုရင်ခံ ပိလတ်မင်းဆေ အပ်လိုက်ကြအယ်။

3 ✝ကိုယ်တော်အား သစ္စာဖောက်ခဲ့သူ ယုဒဟ ယေရှုဟို စီရင်ပေးရမယ့်အကျောန်းဟို သိမြော်သောအခါ နောင်တရလျက် ငွေသုံးဆယ်ဟို ယဇ်ပုရောဟိတ်ကြီးများနဲ့ အသက်ကြီးသူများဆေဟို ပြန်ယွေ့ ပေးခဲ့ပင်းရင် 4 "ငါဟ အပစ်မဆိသောသူရဲ့ အသွေးဟို အပ်မိပါပီ" ဟု ဆိုအယ်။

အဲလိုလဲ အေးသူလို့ဟ "ငါလို့နဲ့ ဟေကိစ္စဟ စလိုဆိုင်လုန်း၊ နင်ရဲ့ တာဝန်သာ ဖြစ်အယ်" ဟု ပြန်ပြောကြအယ်။

5 အေးအခါ ယုဒဟ ငွေဒင်္ဂါးဟို ဗိမာန်တော်တွင် လောချပင်း ထွက်ပြေးသွားအယ်။ အေးနောက် တခြားဟို သွားပင်းရင် ကြိုးဆွဲချယွေ့ သေလေအယ်။

6 ယဇ်ပုရောဟိတ်ကြီးဟ အေးငွေဒင်္ဂါးဟို ကောက်ယူယွေ့ "ဟေငွေဒင်္ဂါးဟ အသွေးရဲ့ အခဖြစ်သောကျောန့် ငါလို့ရဲ့ဥပဒေအရ ဘဏ္ဍာတိုက်ထဲဟို မသွင်းယူသင့်" ဟု ဆိုကြအယ်။ 7 သူလို့ဟ ဆွေးနွေးတိုင်ပင်ကြပင်းရင် အေးငွေဒင်္ဂါးနဲ့ အိုးထိန်းသည်ရဲ့ လယ်မြေဟို လူမျိုးခြားလို့ရဲ့ လုတ်တိုင်းအဖြစ် အသုံးပြုရန် ဝယ်ယူကြအယ်။ 8 အဲကျောန့် အေးလယ်ဟ ခုနေ့တိုင်အောန် "အသွေးမြေ" ဟူယွေ့ ခေါ်တွင်အယ်။

9 အဲအခါ ပရောဖက် ယေရမိဟ "သူလို့သည် အေးသူရဲ့တန်ဖိုးအဖြစ် ဣသရေလအမျိုးသားလို့ အကဲဖြတ်ပေးလဲ့ ငွေဒင်္ဂါးသုံးဆယ်ဟို ယူပင်းရင် 10 ဘုရားသခင် ငါ့အား မှာကြားလဲ့အတိုင်း အိုးထိန်းသည်ရဲ့ လယ်မြေဟို အဲငွေဒင်္ဂါးနဲ့ ဝယ်ယူကြအယ်" ဟု ဟောကြားခဲ့လဲ့အရာဟ ပြေ့စုံလာအယ်။

11 ရောမဘုရင်ခံမင်းရဲ့ ဆေ့ဟို ယေရှု ရပ်ရာ ဘုရင်ခံမင်းဟ "နင်သည် ယုဒ ဘုရင်ပေလော" ဟု မေးအယ်။

ယေရှုဟ "နင်ပြောလဲ့တိုင်းတိုင်း ဖြစ်အယ်" ဟု မိန့်အယ်။ 12 အဲလိုလဲ ယဇ်ပုရောဟိတ်ကြီးများနဲ့ အသက်ကြီးသူများ အပစ်တင် စွပ်စွဲချက်များဟို ယေရှုဟ စလိုမှ ဖြေကြားတော်မမူ။

13 အဲအခါ ပိလတ်မင်းဟ "နင့်အား အေးသူလို့ဟ စလောက် အပစ်တင် စွပ်စွဲယွေ့ သက်သေခံလျက် ဆိတာဟို နင်မကြားသလော" ဟု ဆိုအယ်။

14 အဲလိုလဲ ယေရှုဟ စကားတခွန်းဟိုမှ ပြန်ပင်း မမိန့်ဘဲနေသဖြင့် ဘုရင်ခံဟ ရမ်းဆာ့အံ့ဩလေအယ်။

15 ရောမဘုရင်ခံမင်းဟ ပသခါပွဲအခါကျတိုင်း လူအုပ်လို့တောင်းလဲ့ အကျဉ်းသား တယောက်ဟို လွတ်ငြိမ်းချမ်းသာခွင့် ပေးလဲ့ စလေ့ဆိအယ်။ 16 အေးအချိန်နှိုက် ယေရှု ဗာရဗ္ဗဟု ခေါ်လဲ့ နာမယ်ဆိုးနဲ့ အကျဉ်းသား တယောက် ဆိအယ်။ 17 အဲလိုမို့ လူလို့ စုရုံးလာကြသောအခါ ပိလတ်မင်းဟ "နင်လို့အတွက် စသူအား လွတ်ငြိမ်းချမ်းသာခွင့် ပေးစေလိုသလော။ ယေရှု ဗာရဗ္ဗလော အဲဟာမဟုတ်ရင် ယေရှုဆိုသူ မေဆှိယလော" ဟု မေးအယ်။ 18 အေးသူလို့ မနာလိုယွေ့ ယေရှုအား မိမိလက်နှိုက် အပ်နှံကြကျောန်းဟို ပိလတ်မင်း သိသောကျောန့် ဖြစ်အယ်။

19 ပိလတ်မင်းဟ တရားစီရင်ခြင်း ထိန်ခုံတွင် ထိန်နေခါ သူရဲ့ပေါင်အိုမဟ လူဟို စေလွှတ်ယွေ့ "အေးဖြောင့်မတ်သောသူနဲ့ ပတ်သက်ယွေ့ ပစာအရာဟိုမျှ မလုပ်ပါနဲ့။ ပစာကို့ ငါဟ မနေ့ည အိပ်မက်တွင် သူ့အတွက် စိတ်ဒုက္ခများစွာ ရောက်ရပါအယ်" ဟု ပြောစေအယ်။

20 ယဇ်ပုရောဟိတ်ကြီးများနဲ့ အသက်ကြီးသူများဟ ဗာရဗ္ဗအား လွတ်ငြိမ်းချမ်းသာခွင့်ပေးမန့်၊ ယေရှုဟို သတ်မန့် ဟု ပိလတ်မင်းဆေ တောင်းဆိုရန် လူအုပ်လို့အား စည်းရုံးသိမ်းသွင်းကြအယ်။ 21 အဲလိုလဲ ပိလတ်မင်းဟ "ဟေသူနေယောက်လို့တွင် နင်လို့အတွက် စသူဟို လွတ်ငြိမ်းချမ်းသာခွင့် ပေးစေလိုလုန်း" ဟု မေးအယ်။

လူလို့ဟ "ဗာရဗ္ဗဟို လွှတ်ပေးမန့်" ဟု ဆိုကြအယ်။

22 ပိလတ်မင်းဟ "သို့ဖြစ်ရင် မေဆှိယ ဟုခေါ်သော ယေရှုဟို စလို လုပ်ရမလုန်း" ဟု မေးအယ်။

အေးသူအပေါင်းလို့ဟ "သူအား လက်ဝါးကပ်တိုင်တွင် တင်ယွေ့သတ်ပါ" ဟု ဆိုကြအယ်။

23 အဲလိုလဲ ပိလတ်မင်းဟ "သူသည် ပစာအပစ်ဟို ကျူးလွန်လုန်း" ဟု မေးအယ်။

အဲပင်းရင် အေးသူလို့ဟ "သူအား လက်ဝါးကပ်တိုင်တွင် တင်ယွေ့သတ်ပါ" ဟု အသံကုန်အော်ကြအယ်။

24 ပိလတ်မင်းဟ စလိုအကျိုးမှ မဆိဘဲ ရုန်းရင်းဆန်ခတ်ဖြစ်မယ့် အရိပ်အရောင်ဟိုသာ သိမျော်လာသဖြင့် လူထုဆေ့တွင် ယေဟို ယူယွေ့ "ဟေသူရဲ့ အသွေးနဲ့ ငါဟ ကင်းဆှင်းအယ်။ နင်လို့ရဲ့ တာဝန်သာ ဖြစ်အယ်" ဟု ဆိုကာ မိမိရဲ့လက်ဟို ဆေးအယ်။

25 လူအပေါင်းလို့ဟ "အေးသူရဲ့ အသွေးဟ ငါလို့နဲ့ ငါလို့သားမြေးများရဲ့ တာဝန်ဖြစ်ပါစေ" ဟု ဆိုကြအယ်။

26 အေးအခါ ပိလတ်မင်းဟ ဗာရဗ္ဗဟို လွတ်ငြိမ်းချမ်းသာခွင့် ပေးယွေ့ ယေရှုဟို ကြိမ်ဒဏ်ခတ်စေပင်းရင် လက်ဝါးကပ်တိုင်တွင် တင်ယွေ့သတ်ရန် အပ်လိုက်အယ်။

27 အေးနောက် ပိလတ်မင်းရဲ့ စစ်သားများဟ ယေရှုအား ဘုရင်ခံမင်းရဲ့ အိုင်တော်ဟို ခေါ်ဆောင်သွားကြပင်း တပ်ဖွဲ့တတပ်လုံးဟ ယေရှု ပတ်လည် စုရုံးလာကြအယ်။ 28 သူလို့ဟ ကိုယ်တော်အား အဝတ်ဟို ချွတ်ယွေ့ နီသော ဝတ်လုံဟို ခြုံပေးကြအယ်။ 29 အေးနောက် ဆူးခက်ဖြင့် ရက်လဲ့ သရဖူဟို ဦးခေါင်းပေါ်မှာ ဆောင်းပေးကြယွေ့ ကျူရိုးတချောင်းဟို လက်ယာလက်တွင် ထည့်ပေးကြပင်းနောက် အဆေ့တွင် ဒူးထောက်လျက် "ယုဒဆှင်ဘုရင်၊ သက်တော်ဆှည်ပါစေသော" ဟု ပြောင်ကြအယ်။ 30 ကိုယ်တော်ဟို ဆံထွေးနဲ့ထွေးယွေ့ ကျူရိုးဟို ယူပင်း ခေါင်းဟို အကြိမ်ကြိမ် ရိုက်ကြအယ်။ 31 သူလို့ ပြောင်ကြပင်းရင် ဝတ်လုံနီဟို ချွတ်ယွေ့ ကိုယ်တော်ရဲ့ အဝတ်ဟို ပြန်ဝတ်ပေးကြအယ်။ အေးနောက် လက်ဝါးကပ်တိုင်တွင် တင်ယွေ့သတ်ရန် ကိုယ်တော်ဟို ခေါ်ဆောင်သွားကြအယ်။

32 သူလို့ဟ ထွက်လာကြသောအခါ ရှိမုန် နာမယ်ဆိသူ ကုရေနေပြေသား တယောက်ဟို မျော်သဖြင့် အေးသူအား အတင်းအကြပ် ခေါ်ယွေ့ ယေရှုရဲ့လက်ဝါးကပ်တိုင်ဟို ထမ်းစေကြအယ်။ 33 "ဦးခေါင်းခွံအရပ်" ဟု အဓိပ္ပာယ်ဆိသော ဂေါလဂေါသ နာမယ်တွင်လဲ့အရပ်ဟို ရောက်ရင် 34 သူလို့ဟ ဆေးခါးနဲ့ ရောစပ်ထားသော စပျစ်ယေဟို ယေရှုအား တိုက်ကြပေမဲ့ ယေရှုဟ မြည်းကျေ့ပင်းရင် မသောက်ဘဲနေအယ်။

35 အေးနောက် သူလို့ဟ ယေရှုဟို လက်ဝါးကပ်တိုင်တွင် တင်ယွေ့သတ်ကြပင်း အဝတ်တော်များဟို မဲချယွေ့ ခွဲဝေကြအယ်။ 36 အေးနောက် အဲနေရာတွင် ထိန်ယွေ့ ယေရှုဟို စောင့်ကျေ့နေကြအယ်။ 37 ယေရှုရဲ့ ခေါင်းထက်တွင် "ဟေသူဟ ယုဒဆှင်ဘုရင် ယေရှု ဖြစ်အယ်" ဟု ရေးထားလဲ့ ကိုယ်တော်အပေါ် တင်သောစွဲချက်ဟို တပ်ထားကြအယ်။ 38 အေးအချိန်နှိုက် ထားမြနေယောက်ဟိုလည်း ယေရှုနဲ့အတူ လက်ယာဘက်တွင် တယောက်၊ လက်ဝဲဘက်တွင် တယောက်၊ လက်ဝါးကပ်တိုင်တွင် တင်ယွေ့သတ်ကြအယ်။

39 လမ်းသွားလမ်းလာများဟ မိမိရဲ့ခေါင်းဟို ခါယွေ့ ယေရှုအား ကဲ့ရဲ့လျက် 40 ✝"ဗိမာန်တော်ဟို ဖြိုဖျက်ယွေ့ သုံးရက်အတွင်း ပြန်လည်တည်ဆောက်မယ့်သူ နင်ဟ ဘုရားသခင်ရဲ့ သားတော်မန်ရင် တတ်တိုင်း ကယ်တင်ပင်း လက်ဝါးကပ်တိုင်ပေါ်မှ ဆင်းခဲ့လော့" ဟု ပြောဆိုကြအယ်။

41 အေးနည်းတူစွာ ယဇ်ပုရောဟိတ်ကြီးများ၊ ကျမ်းတတ်ဆရာများနဲ့ အသက်ကြီးသူများဟလည်း ကိုယ်တော်ဟို ပြောင်ကြယွေ့ 42 "ဟေသူဟ သူတပါးဟို ကယ်တင်ပေမဲ့ မိမိတတ်တိန်း မကယ်တင်နိန်တာ ဟုတ်မောင့်လဲ့၊ သူဟ ဣသရေလဘုရင် မဟုတ်လော၊ လက်ဝါးကပ်တိုင်မှ အခုဆင်းလာရင် ငါလို့ သူ့ဟို ယုံကြည်ကြမယ်။ 43 သူဟ ဘုရားသခင်ဟို ယုံကြည်ကိုးစားအယ်။ ‘ငါဟ ဘုရားသခင်ရဲ့ သားတော်ဖြစ်အယ်’ ဟု ဆိုအယ်။ အဲလိုမို့ ဘုရားသခင်ဟ သူဟို အလိုတော်ဆိရင် အခုပင် ကယ်တင်ပါစေ" ဟု ဆိုကြအယ်။

44 ကိုယ်တော်နဲ့အတူ လက်ဝါးကပ်တိုင်တွင် အသတ်ခံရသူ ထားမြများကပင်လျှင် အေးနည်းတူ ကိုယ်တော်ဟို ကဲ့ရဲ့ပစ်တင်ကြအယ်။

45 မွန်းတည့်ချိန်မှစယွေ့ မွန်းလွဲသုံးနာရီတိုင်အောန် မြေတပြင်လုံးတွင် မိုက်လေအယ်။ 46 မွန်းလွဲသုံးနာရီ အချိန်နှိုက် ယေရှုဟ "ဧလိ၊ ဧလိ၊ လာမာ ရှာဗခသာနိ" ဟု ကျယ်သောအသံနဲ့ အော်ဟစ်အယ်။ ဆိုလိုလဲ့အနက်ဟ "ငါ့ ဘုရား၊ ငါ့ ဘုရား၊ ပစာကျောန့် ငါ့ဟို စွန့်ပစ်လုန်း။"

47 အဲရပ်နှိုက် ရပ်နေသူ လူတချို့လို့ဟ အေးစကားဟို ကြားရင် "သူဟ ဧလိယဟို ခေါ်နေအယ်" ဟု ဆိုကြအယ်။ 48 အေးသူလို့အနက် လူတယောက်ဟ ချက်ချင်းပြေးယွေ့ ယေမြှုပ်ဟိုယူကာ စပျစ်ယေချဉ်နဲ့ပြေ့စေပင်း အေးဟာဟို ကျူရိုးဖျားတွင် ပတ်ယွေ့ ကိုယ်တော်သောက်ရန် ပေးအယ်။

49 အဲလိုလဲ အခြားသောသူလို့ဟ "ဆိစေတော့၊ သူဟိုကယ်ရန် ဧလိယ လာမလာဟို ငါလို့ကျေ့ကြကုန်အံ့" ဟု ဆိုကြအယ်။

50 ယေရှုဟ တဖန်ကျယ်စွာ အော်ပင်းလျှင် အသက်ချုပ်အယ်။

51 အေးအခါ ဗိမာန်တော်ကန့်လန့်ကာဟ အထက်စွန်းမှ အောက်စွန်းတိုင်အောန် နေခြမ်း ကွဲလေအယ်၊ မြေငလျင်လှုပ်ယွေ့ ကျောက်ဆောင်များ ပြိုကွဲကြအယ်။ 52 လုတ်တိုင်းဂူများ ပွင့်သဖြင့် သေလွန်ပင်းသူ သန့်ဆှင်းသောသူလို့ရဲ့ ရုပ်အလောင်းများစွာလို့ဟ အသက်ပြန်ဆှင်လာကြအယ်။ 53 ယေရှု ဆှင်ပြန်ထမြောက်ပင်းနောက် အေးသူလို့ဟ လုတ်တိုင်းထဲမှ ထွက်လာကာ သန့်ဆှင်းသောမြို့တော်ဟို ဝင်သွားကြသဖြင့် လူအများပင် သူလို့ဟို တွေ့မျော်ကြအယ်။

54 တပ်မှူးနဲ့တကွ ယေရှုဟို စောင့်ကျေ့နေကြသော စစ်သားများဟ မြေငလျင်လှုပ်ခြင်းနဲ့ အခြားအဖြစ်အပျက်များဟိုလည်းကောင်း တွေ့မျော်ကြသောအခါ ရမ်းဆာ့ကြောက်လန့်ကြယွေ့ "ဟေသူဟ အမန်ပင် ဘုရားသခင်ရဲ့သားတော် ဖြစ်အယ်" ဟု ဆိုကြအယ်။

55 ✝အေးအရပ်တွင် အဝေးဟရပ်လျက် ကျေ့နေသော အမျိူးသမီးများဆိပင်း ဂါလိလဲပြေမှ ယေရှုရဲ့ နောက်တော်ဟို လိုက်ယွေ့ လုပ်ကျွေးသမှု ပြုကြသူများ ဖြစ်အယ်။ 56 အေးသူလို့အထဲတွင် မာဂဒလမြို့သူ မာရိ၊ ယာကုပ်နဲ့ ယောသပ်လို့ရဲ့ အမေ့ဖြစ်သူ မာရိနဲ့ ဇေဗေဒဲရဲ့ပေါင်အိုမလို့ ပါကြအယ်။

57 ညခင်းအချိန်ရောက်သောအခါ အရိမဿဲမြို့မှ ယောသပ် နာမယ်ဆိသော သူဌေးတယောက် ရောက်လာအယ်။ သူဟ ယေရှုရဲ့ တဘဲ့တော်တယောက် ဖြစ်အယ်။ 58 သူဟ ပိလတ်မင်းဆေဟို ဝင်ပင်းရင် ယေရှုရဲ့ ရုပ်အလောင်းဟို တောင်းပင်း ပိလတ်မင်းဟ ယောသပ်အား ပေးရန် အမိန့်ချမှတ်လိုက်အယ်။ 59 ယောသပ်ဟ ရုပ်အလောင်းဟို ယူယွေ့ ဖြူစင်သော ပိတ်ချောဖြင့် ပတ်အယ်။ 60 အေးနောက် ကျောက်ဆောင်နှိုက် အသစ်ထွင်းထားလဲ့ မိမိလုတ်တိုင်းဂူတွင် သွင်းထားပင်းနောက် ဂူဝဟို ကြီးမားလဲ့ ကျောက်တုံးတခုလှိမ့်ယွေ့ ပိတ်ထားလိုက်ပင်းနောက် ပြန်သွားလေအယ်။ 61 လုတ်တိုင်းဆေ့တွင် မာဂဒလမြို့သူ မာရိနဲ့ တခြားမာရိလို့ဟ ထိန်လျက် ဆိနေကြအယ်။

62 နောက်တနေ့ ကုန်လွန်ယွေ့ ဥပုသ်နေ့ရောက်သော် ယဇ်ပုရောဟိတ်ကြီးများနဲ့ ဖာရိရှဲများဟ ပိလတ်မင်း ဆေဟို သွားပင်းရင် 63 ✝"ဆရာ၊ အေးလူလိမ် အသက်ဆှင်စဉ်အခါဟ ‘ငါသည် သုံးရက်ကြာရင် သေခြင်းမှ ထမြောက်မယ်’ ဟု ဟောခဲ့တာဟို ငါလို့ မှတ်မိအယ်။ 64 သို့ဖြစ်ယွေ့ သုံးရက်မြောက်သောနေ့အထိ လုတ်တိုင်းဂူဟို လုံခြုံစွာ ပိတ်ယွေ့ စောင့်ကြပ်စေရန် အမိန့်ပေးမန့်။ အဲလိုမဟုတ်ရင် သူရဲ့တဘဲ့များဟ လာယွေ့ ရုပ်အလောင်းဟို ခိုးယူကာ သူဟ သေခြင်းမှ ထမြောက်လေပီ ဟု လူလို့အား ပြောကြလိမ့်မယ်။ အေးအခါ နောက်ဆုံးလှည့်စားချက်ဟ ပထမလှည့်စားချက်ထက် ပိုယွေ့ ဆိုးပါလိမ့်မယ်" ဟု ဆှောက်ထားကြအယ်။

65 ပိလတ်မင်းဟ "အစောင့်တပ် တတပ်ဟို ခေါ်ပင်း လုတ်တိုင်းဂူဟို သွားယွေ့ အတတ်နိန်ဆုံး စောင့်ကျေ့စေလော့" ဟု ဆိုအယ်။

66 သို့ဖြစ်ယွေ့ အေးသူလို့ဟ လုတ်တိုင်းဂူသို့ သွားပင်းရင် ကျောက်တုံးဟို တံဆိပ်ခတ်နှိပ်ကာ အစောင့်တပ်များဟို ချထားကြအယ်။