1 ခရစ်တော်ဟှာ ကိုယ်ခန္ဓာတော်နှိုက် နို့လေတွပ် ခံတော်မူဟှူကြောန့် နန်းနို့လေလည်း အယ်မျိုးသဘောဟှို လတ်နတ်ဖြစ် သောင်းစွဲဂေ့ပါ။ ဖြားဖြစ်ကြောန့်နူးဆိုဟှာ ကိုယ်ခန္ဓာနှိုက် ဝေဒနာခံဟှူသူဟှာ ပြစ်နပြတ်စဲဟှားဘီ ဖြစ်ဟှယ်။ 2 အယ်ဇာဟှ ကိုယ်ခန္ဓာနှိုက် သတ်ရှင်ရမယ့် ကျန်နေဟှူ ခီကာလဟှို လူလေရဲ့ တပ်မတ်ရှင်းအားဖြင့် မှုဘဲန ဘုရားသခင်ရဲ့ လိုတော်အားဖြင့် သတ်ရှင်နိုင်ဟှို့တွပ် ဖြစ်ဟှယ်။ 3 လူမျိုးခြားလေရဲ့ လိုဟှိုလိုက်ဘီး ညစ်ညူးဟှူ ကာမလိုက်စားရှင်းလေ၊ တတ်မတ်ရှင်းလေ၊ ယစ်မောရှင်းလေ၊ ပျော်လွန်ကျူရှင်းလေ၊ သော့-က်စားကြူးရှင်းလေ၊ အဓမ္မရောက်ထုဟှို ကိုးကွယ်ရှင်းလေဟှို ကျင်လည်ဘီးဟှူ ပီးဟှားဟှူ ခီကာလဟှာ နန်းနို့လေတွပ် တော်လောက်ပါဟှယ်။ 4 ခုခီမာ နန်းနို့လေဟှာ သူးနို့လေနတူးဒူ ဆစ်ဆံဘဲန၊ ကာမဂေါင်မာ လွန်ကြူးညစ်ညူးမှု ပြုဘဲန နေဇာဟှို သူးနို့လေဟှာ အံ့သြဘီး ကဲ့ရဲ့တတ်ဂေ့ဟှယ်။ 5 အယ်မျိုးလောက်ဟှူကြောန့် သူးနို့လေဟှာ သတ်ရှင်ဟှူ သူလေန သေဟှူသူလေဟှို တရားစီရင်ဟှို့တွပ် သင့်ရှိတော်မူဟှူ ဘုရားသခင်နားမာ စစ်ဆေးစီရင်ရှင်းဟှို ခံရဂေ့လေ့မယ်။ 6 အယ်ကြောန်းကြောန့် အယ်သူလေဟှာ ကိုယ်ခန္ဓာန စပ်လျဉ်းဘီး လူ့စံနှုံးတိုင်း တရားစီရင်ရှင်းဟှို ခံရဟှူလည်းဘဲ့ ဘုရားသခင်ရဲ့ ရှေ့တော်မာ စိဝိညာဉ်အားဖြင့် သတ်ရှင်ရဟှို့တွပ်၊ သေဟှားဟှူသူလေဟှာ ဒန်းကောန်းဟှို ကြားရဂေ့ဟှယ်။

7 ရှိမျှဂူလောင်းဟှာ ဆောင်းဟှို ရော့-က်ခါနီးဘီ ဖြစ်ဟှူကြောန့် ဆုတောန်းရှင်းမှုဟှို ပြုနိုင်ဟှို့တွပ် တည်ငြီမှန်ကန်ဟှူစိန သမ္မာဒိ ရှိဂေ့ပါ။ 8 ရှစ်ရှင်းမြစ်တာဟှာ ရရာတိုင်းများဟှူ ပြစ်လေဟှို ဖောင်းအောက်ပေးတတ်ဟှူကြောန့် ရှိမျှဂူလောင်းထတ် ရှင်းရှင်းကြားမာ ခိုင်မြဲဟှူ ရှစ်ရှင်းမြစ်တာန ရှစ်ဂေ့ပါ။ 9 ညည်းညူမှု မှေ့ဘဲန ရှင်းရှင်း ဧည့်သည်ဝတ်ဟှို ပြုဂေ့ပါ။ 10 နန်းနို့ ယော့-က်စီတိုင်းဟှာ ကိုယ်ခံစားရရှိဟှူ ဆုကျေးဇူးရှိဟှူတိုင်း ဘုရားသခင်ရဲ့ မျိုးမျိုးရှိဟှူ ကျေးဇူးတော်နဆိုင်ဟှူ ကောင်းဟှူဘဏ္ဍာထီးမျိုး အယ်ဆုကျေးဇူးအားဖြင့် ရှင်းရှင်း ကူညီဝီငှပေးဂေ့ပါ။ 11 ဟောပြောမားဟှာ ဘုရားသခင်ရဲ့ စကားတော်တိုင်း ဟောပြောစေ။ စေခံဟှူသူဟှာ ဘုရားသခင် ပေးတော်မူဟှူ စွမ်းသတ်တိတိုင်း လောက်ဆောန်စေ။ အယ်ဆိုဟှာ လောက်ဆောန်ဇာလေဟှာ ယေရှုခရစ်အားဖြင့် ဘုရားသခင်ရဲ့ ဖောင်းသရေတော် ထွန်းလန်းလေ့မယ်။ သခင်ယေရှုခရစ်ဟှာ ကမ္ဘာဆစ်ဆစ် ဖောင်းကီးတော်မူပါစေ။ အာမင်။

12 ရှစ်ရဟှူသူလေ၊ နန်းနို့လေရဲ့ ယောင်ကြည်ရှင်းဟှို စစ်ဆေးဟှို့တွပ် နန်းနို့ ခုခံရဟှူ ပြင်းပြဟှူ စောင်ဇမ်းနှော့-က်ယှစ်ရှင်းလေ ခံနေရဇာဟှို အံ့သြဇာဖြစ်ဟှယ် ဆိုဘီး ထန်မှတ်ဟှူ အယ် မှုရာလေဟှို အံ့သြဂေ့န။ 13 နန်းနို့လေဟှာ ခရစ်တော်ရဲ့ ဒေါက်ခဝေဒနာလေဟှို ဆစ်ဆံခွမ့် ရဟှူကြောန့် ဝန်းသာဂေ့ပါ။ အယ်ဇာဟှာ ဖောင်းသရေတော် ထန်ရှားပေါ်ထွပ်ဟှူ ခီမာ နန်းနို့လေဟှာ ရရာတိုင်း ဝန်းသာရဟှို့ကြောန်း ဖြစ်ဟှယ်။ 14 နန်းနို့လေဟှာ ခရစ်တော်ရဲ့ နာမကြောန့် ကဲ့ရဲ့ပြစ်တန်ဇာဟှို ခံရဟှယ် ဆိုဟှာ မင်္ဂလာရှိပါဟှယ်။ ဖြားဖြစ်ကြောန့်နူးဆိုဟှာ ဖောင်းသရေတော်န ပ္လဲ့ဇောင်တော်မူဟှူ ဘုရားသခင်ရဲ့ ဝိညာဉ်တော်ဟှာ နန်းနို့ထတ်မာ ကိန်းဝပ်တော်မူဟှူကြောန့် ဖြစ်ဟှယ်။ 15 နန်းနို့လေဟှာ လူသတ်ဟှူမှု၊ ခိုးဟှူမှု၊ ရာဇဝတ်မှု၊ သူများကိစလေမာ ဝမ်စွက်ဖက်ဟှူမှုအားဖြင့် ယော့-က်လည်း ပြစ်ဒန်ခံရစေန။ 16 အယ်ဘေမဲ့ ခရစ်ယာန်ဖြစ်ဟှူကြောန့် ခံရဟှယ် ဆိုဟှာ ယှစ်ကြော့-က်ရှင်း ရှိဂေ့န။ ခရစ်တော်ရဲ့ နာမကြောန့် ခံရဟှယ် ဆိုဟှာ ဘုရားသခင်ရဲ့ နာမတော်ဟှို ချီးမွမ်းပါစေ။

17 ဘုရားသခင်ရဲ့ အီတော်သားလေဟှို ရင်ဦးဆောင်း စစ်ကြောစီရင်ရဟှူခီ ရှိဘီး နို့လေဟှို ရင်ဦးဆောင်း စစ်ကြောစီရင်ဟှယ် ဆိုဟှာ ဘုရားသခင်ရဲ့ ဒန်းကောန်း တရားစကားဟှို နားထောန်ဘဲဟှူ သူလေရဲ့မှုဟှာ ဖယ်မျိုး ပီးလေ့မယ်နူး။ 18 အယ်မျိုးဘဲ့

ဖြောန့်မတ်ဟှူသူဟှာ ခဲခဲယဉ်းယဉ်းန ကယ်တန်ရှင်း ခံရဟှယ် ဆိုဟှာ

ဘုရားသခင်ဟှို ကိုးကွယ်ဘဲဟှူ သူန ပြစ်ကျူးလွန်ဟှူ သူလေဟှာ ဖယ်မျိုးဖြစ်လေ့မယ်နူး။

19 အယ်ကြောန့် ဘုရားသခင်ရဲ့ လိုတော်တိုင်း ဆင်းရဲဒေါက်ခခံရဟှူ သူလေဟှာ ကောန်းဟှူကျင့်ဟှို ကျင့်ဘီး ကိုယ့်ဟှို ဖန်ဆင်းတော်မူဟှူရှင်၊ သစ်စာတည်တော်မူဟှူ ရှင်ရဲ့ လတ်တော်ဟှို ကိုယ့်စိဝိညာဉ်ဟှို အပ်ဂေ့စေ။