1 ညီကို မောန်နှမလေ အယ်မူမှုရာလေ ဖြစ်ပျစ်လာမယ့် ခီကာလကြောန်းဟှို နန်းနို့လေဟှို ရေးဘီးပေးလိုက်ဇာကြောန်းမှေ့ဟှ။ 2 ✝ဖြားဖြစ်ကြောန့်နူးဆိုဟှာ ခိုးဟှာ ညဉ့်ဖတ်ဟှို လာတတ်ဟှူမျိုး သခင်ဘုရားရဲ့ နေ့ရစ်ဟှာ လာလေ့မယ် ဆိုဇာဟှို နန်းနို့ ကောန်းကောန်းသိဂေ့ဟှယ်။ 3 လူလေဟှာ "ငြီးချမ်းဟှားဘီ၊ လောင်ခြောင်ဟှားဘီ" ဆိုဘီး ပြောနေဟှူ ခီမာဘဲ့ ဗိုက်ပိုက်နေဟှူမီးမမာ သားမွီးဟှူဝေဒနာ က္လရော့-က်လာဟှူမျိုး သူးနို့ထတ်မာ ရရာတိုင်း ဗြန်ဟှူပျစ်စီးမှုဟှာ ရောက်တရစ် က္လရော့-က်လာဟှူကြောန့် သူးနို့လေဟှာ လောင်းဝလွတ်နိုင်ဟှို့ မှုဟှ။ 4 အယ်ဘေမဲ့ ညီကို မောန်နှမလေ နန်းနို့လေဟှာ မှောန်မိုက်ထဲမာရှိနေဇာမှုဘဲကြောန့် အယ်နေ့ရစ်ဟှာ ခိုးလာဟှူမျိုး နန်းနို့နားဟှို ရော့-က်လာဟှို့ကြောန်း မှေ့ဟှ။ 5 ဖြားဖြစ်ကြောန့်နူးဆိုဟှာ နန်းနို့ဂူလောင်းဟှာ လန်းရောန်ရဲ့ သားလေ၊ နေ့ရဲ့ သားလေ ဖြစ်ဂေ့ဟှယ်။ ညဉ့်ရဲ့ သားလေ၊ မှောန်မိုက်ရဲ့ သားလေ မှုဟှ။ 6 အယ်ကြောန့် တခြားသူလေ အိမွိနေဂေ့ဟှူမျိုး နို့လေအိမွိဘဲ နိုးနိုးကြားကြားန သမ္မာဒိရှိရှိ စောန့်နေဂေ့ဇို့။ 7 ဖြားဖြစ်ကြောန့်နူးဆိုဟှာ အိမွိဟှူ သူလေဟှာ ညဉ့်ဖတ်မာဘဲ့ အိမွိတတ်ဂေ့ဟှယ်။ ယစ်မော သော့-က်စားသူလေလည်း ညဉ့်ဖတ်မာဘဲ့ ယစ်မောတတ်ဂေ့ဟှယ်။ 8 ✝ အယ်ကြောန့် နို့လေဟှာ နေ့ရဲ့ သားလေဖြစ်ဟှူကြောန့် ယောင်ကြည်မှုန ရှစ်ရှင်းမြစ်တာဖြစ်ဟှူ ရင်ဖတ်ကာဟှို ဝတ်ဆင်ဘီးဟှာ ကယ်တန်ရှင်းဟှို ရော့-က်ဟှို့တွပ် မျှော်လင့်ရှင်းဖြစ်ဟှူ သံခမှော့-က်လောင်းဟှို ဝတ်ဆင်ဘီး သမ္မာဒိရှိရှိန နေဂေ့ဇို့။ 9 ဖြားဖြစ်ကြောန့်နူးဆိုဟှာ မျစ်တော်ဟှို ခံရဟှို့တွပ် ဘုရားသခင်ဟှာ နို့လေဟှို ဝီးကော့-က်ဟှားဇာ မှုဟှ။ နို့လေဟှာ သခင်ယေရှု ခရစ်တော်အားဖြင့် ကယ်တန်ရှင်းဟှို ပိုင်ရဟှို့တွပ် ဝီးကော့-က်ခံရဇာဖြစ်ဟှယ်။ 10 နို့လေဟှာ နိုးနေဟှူခီဖြစ်ဖြစ်၊ အိမွိနေဟှူခီဘဲဖြစ်ဖြစ် ကိုယ်တော်နတူးဒူ သတ်ရှင်ဟှို့တွပ် ကိုယ်တော်ဟှာ နို့လေတွပ် သေခံတော်မူဘီ။ 11 အယ်မျိုးဖြစ်ကြောန့် နန်းနို့လေဟှာ ခုပြုနေဟှူမျိုး ယော့-က်နယော့-က် တိုက်တွန်းဘီး အားပေးတည်ဆော့-က်ဂေ့ပါ။

12 ညီကို မောန်နှမလေ နန်းနို့လေထဲမာ မှုတော်ဟှိုလောက်ဆောန်ဘီး လမ်းပြသွန်သန်ဟှို့တွပ် သခင်ဘုရားခန့်ဟှားဟှူသူလေဟှို ကြည်ညိုလေစားဂေ့ဟှို့တွပ်န၊ 13 သူးနို့ပြုဟှူမှုဟှိုထော့-က်ဘီး သူးနို့လေဟှို မြစ်တာစိန ရှစ်ခင်ရိုသေဂေ့ဟှို့တွပ် နို့လေတောန်းဗန်ပါဟှယ်။ နန်းနို့လေရှင်းရှင်း သင့်သင့်မြတ်မြတ်နေဂေ့ပါ။

14 ညီကို မောန်နှမလေ နန်းနို့လေဟှို ငါတိုက်တွန်းနှိုးဆော်ရှင်ဟှူဇာဟှ တရားဘဲလောက်ဟှူလူလေဟှို ဒိပေးဆောင်းမဂေ့ပါ။ စိအားငယ်သူလေဟှို အားပေးဂေ့ပါ။ အားနဲဟှူသူလေဟှို ထော့-က်မပေးဂေ့ပါ။ လူလေ ဂူလောင်းဟှို စိရှယ်သီးခံဂေ့ပါ။ 15 ဖယ်သူလေဟှိုမှလည်း ဆိုးဟှိုဆိုးန တုံ့ပ္လန်ဘဲနေဟှို့တွပ် ဒိထားဂေ့ပါ။ ရှင်းရှင်းလေန လူလေ ဂူလောင်းဟှို ကောန်းကျိုးပြုဟှို့တွပ် ခီတိုင်းကြိုးစားအားထုဂေ့ပါ။

16 မြဲဒမ်း ဝန်းသာရွှင်လန်းဂေ့ပါ။ 17 ခီတိုင်းမာ ဆုတောန်းဂေ့ပါ။ 18 ရာရာမာ ကျေးဇူးတော်ဟှို ချီးမွမ်းဂေ့ပါ။ ဖြားဖြစ်ကြောန့်နူးဆိုဟှာ နန်းနို့လေဟှာ အယ်မျိုးကျင့်ဂေ့ဟှို့တွပ် ယေရှုခရစ်နှိုက် ဘုရားသခင်လိုတော်ရှိဟှယ်။

19 ဝိညာဉ်တော်ရဲ့ရှီဟှို ငြီးဟှားစေဂေ့န။ 20 ပရောဖက်ပြုဇာဟှို ထီမဲ့မြင်ပြုဂေ့န။ 21 အယ်ဘေမဲ့ ရှိမျှဂူလောင်းဟှို စစ်ကြောစောင်ဇမ်းဘီး ကောင်းဟှူဇာလေဟှို မြဲဒမ်းခံယူကိုင်စွဲဂေ့ပါ။ 22 ကောန်းဘဲဟှူဇာ မျိုးမျိုးလေဟှို ရှောန်ဂေ့ပါ။

23 ငြီသတ်ရှင်းရဲ့ရှင် ဘုရားသခင်ကိုယ်တိုင် နန်းနို့လေဟှို ကူစင်အောန် သန့်ရှင်းစေတော်မူပါစေ။ နို့လေရဲ့ သခင်ယေရှုခရစ် ကြွလာဟှူ ခီမာ နန်းနို့လေရဲ့ ဝိညာဉ်၊ စိ၊ ကိုယ်ခန္ဓာဟှို ပြစ်တန်ခွမ့်နလွတ်ကင်းအောန် စောန့်မတော်မူပါစေ။ 24 နန်းနို့လေဟှို ခေါ်တော်မူဟှူသူဟှာ သစ်စာန ပ္လဲ့ဇောင်တော်မူဟှူကြောန့် အယ်မျိုး ပြုတော်မူလေ့မယ်။

25 ညီကို မောန်နှမလေ၊ နို့လေတွပ်လည်း ဆုတောန်းပေးဂေ့ပါ။

26 ညီကို မောန်နှမလေ ဂူလောင်းဟှို သန့်ရှင်းဟှူနမ်းန နှောက်ဆစ်ဂေ့ပါ။

27 အယ်မူစာဟှို သန့်ရှင်းဟှူ ညီကိုမောန်နှလေ ဂူလောင်းဟှို ဖတ်စေဟှို့တွပ် သခင်ဘုရားဟှို တိုင်တည်ဘီးဟှာ နန်းနို့လေဟှို လေးလေးနတ်နတ်ဟှား တိုက်တွန်းရှင်ပါဟှယ်။

28 နို့လေသခင်ယေရှုခရစ်တော်ရဲ့ ကျေးဇူးတော်ဟှာ နန်းနို့လေနတူးဒူ ရှိပါစေ။