၂ ကောရိန္သု 5

ခရစ်တော်အားဖြင့် ဘုရားသခင်န မိဖွဲ့ရကြောန်း

11 နို့လေဟှာ ဖြားဖြစ်ကြောန့် သခင်ဘုရားဟှို ကြော့-က်ရဟှယ် ဆိုဇာဟှို သိဟှူကြောန့် လူလေဟှို စည်းရောင်းဘီး နှိုးဆော်ဟှယ်။ နို့လေရဲ့ ကြောန်းဟှိုလည်း ဘုရားသခင်ဟှ ဂူလောင်း သိဟှယ်။ နန်းနို့ရဲ့ သိစိထဲဟှနေ ငါ့ကြောန်းဟှိုလည်း ကောန်းကောန်းသိဂေ့မယ် ဆိုဇာဟှို ငါမျှော်လင့်ဟှယ်။ 12 အယ်မျိုးပြောဇာဟှာ နို့လေဟှာ နော့-က်တခါ ကိုယ့်ကိုယ်ကိုယ် ဂေါင်ဖော်ရှင်ကြောန့် မှုဟှ။ နို့လေဟှို နန်းနို့ဟှ ဝါကြွားနိုင်ဟှို့ခွမ့်ဟှို ရရှိဂေ့ဟှို့တွပ် ဖြစ်ဟှယ်။ အယ်မျိုးဖြစ်မှဘဲ့ လူလေရဲ့ စိနှလောင်းဟှို ကေ့ဘဲန ပ္လန်ဟှဆင်းသဏ္ဍာန်ဟှိုဘဲ့ ကေ့ဘီး ဝါကြွားတတ်ဟှူ လူလေရဲ့ စကားဟှို နန်းနို့ဟှာ ပ္လန်ဘီးဟှာ ချေပနိုင်မယ်။ 13 နို့လေဟှာ ရူးဟှာဘီလော။ နို့လေဟှာရူးမယ် ဆိုဟှာ ဘုရားသခင်တွပ်ဘဲ့ ဖြစ်ဟှယ်။ နို့လေဟှာ ရူးဟှ ဆိုဟှာ နန်းနို့တွပ်ဘဲ့ ဖြစ်ဟှယ်။ 14 ယော့-က်ယော့-က်ဟှ လူလေ ဂူလောင်းတွပ် သေခံကြောန့် လူလေ ဂူလောင်းဟှာ အယ်လူနတူးဒူ သေခံဂေ့ကြောန်းဟှို နို့လေဟှာ ဆောင်းဖြတ်ဟှူကြောန့် နို့လေဟှို ခရစ်တော်ရဲ့ မြစ်တာတော်ဟှာ အောက်စိုးလိုက်ဟှယ်။ 15 ကိုယ်တော်ဟှာ လူလေတွပ် သေခံဇာဟှ လူလေဟှာ သတ်ရှင်ဟှူ ခီမာ ကိုယ်ကျိုးတွပ် ဆစ်ဘီးဟှာ သတ်ရှင်ဂေ့ဘဲန သူးနို့တွပ် သတ်စွန့်ဘီးန သေဘီးဟှာ ရှင်ပ္လန်ထမြော့-က်ဟှူ သခင်တွပ် သတ်ရှင်ဂေ့ဟှို့တွပ် ဖြစ်ဟှယ်။

16 အယ်ကြောန့် နို့လေဟှာ ခုဟှစဘီး ဖယ်သူဟှို့လည်း လူရဲ့သွီးသား ဇာတိသဘောန ဆောင်းဖြတ်ဂေ့ဟှ။ ရင်ဟှ ခရစ်တော်ဟှို လူလေရဲ့သွီးသား ဇာတိသဘောန နို့လေဟှ ဆောင်းဖြတ်လာဂေ့ဘေမဲ့ ခုဟှ အယ်မျိုးလောက်ဟှမ်း။ 17 ခရစ်တော်နှိုက် တလောင်းတဝဒဲ ရှိဟှူလူဟှာ သတ္တဝါသစ် ဖြစ်ဟှယ်။ သူဟှာ ဘဝဟောန်းဟှို စွန့်ဘီးဟှာ ဘဝသစ်ဟှို ဝမ်စားဟှယ်။ 18 အယ်မှုလေဟှာ ဘုရားသခင်ရဲ့ တဂိုးကြောန့် ဖြစ်ဟှယ်။ ဘုရားသခင်ဟှာ နို့လေဟှို သူ့ရဲ့ ရန်သူဟှနေဘီးဟှာ ခရစ်တော်အားဖြင့် မိဆွေဖြစ်ဟှို့တွပ် ပ္လောန်းလဲပေးဘီး ကိုယ်တော်န ပ္လန်ဘီးဟှာ သင့်မြတ်စေဟှယ်။ အယ် သင့်မြတ်ဇာနဆိုင်ဟှူ မှုဆောန်ဟှိုတွပ် တာဝန်ဟှို နို့လေဟှို ပေးအပ်လေဟှယ်။ 19 ဘုရားသခင်ဟှာ ခရစ်တော်အားဖြင့် လောကသား ဂူလောင်းဟှို သူ့ရဲ့ မိဆွေလေ ဖြစ်စေရှင်းဟှာ နို့လေရဲ့ တရားဖြစ်ဟှယ်။*၅.၁၉ ဘုရားသခင်ဟှာ ခရစ်တော်အားဖြင့် လောကသား ဂူလောင်းဟှို သူ့ရဲ့ မိဆွေလေ ဖြစ်စေရှင်းဟှာ နို့လေရဲ့ တရားဖြစ်ဟှယ်၊ အယ်မျိုးမှုဘဲ့နေဟှာ ဘုရားသခင်ဟှာ ခရစ်တော်အားဖြင့် လူလေ ဂူလောင်းဟှို သူ့ရဲ့ မိဆွေ ဖြစ်စေဟှယ်။ ကိုယ်တော်ဟှာ လူသားလေရဲ့ ပြစ်လေဟှို မှတ်ဟှားဟှ။ လူသားလေဟှို ကိုယ်တော်နပ္လန်ဘီး သင့်မြတ်စေဟှူ တရားဟှို နို့လေဟှို အပ်ပေးဟှားဟှယ်။

20 အယ်ကြောန့် နို့လေဟှာ ခရစ်တော်ရဲ့ သံတမန်ဖြစ်န နန်းနို့လေဟှို မြစ်တာရပ်ခံဟှယ်။ ဘုရားသခင် ကိုယ်တိုင်ဘဲ့ နို့လေဟှနေဘီးတဆင့် နန်းနို့ဟှို မြစ်တာရပ်ခံမျိုးဘဲ့ မြစ်တာရပ်ခံဟှယ်။ နန်းနို့ဟှာ ဘုရားသခင်ရဲ့ရန်သူ ဖြစ်နေဇာဟှနေဘီး မိဆွေဖြစ်န ပ္လောန်းလဲဂေ့ပါ ဆိုဘီး ခရစ်တော်ရဲ့ ကိုယ်စား နို့လေဟှာ တောန်းဗန်ဟှယ်။ 21 ဘုရားသခင်ဟှာ ပြစ်မှေ့ဘဲဟှူ သခင်ဟှို နို့လေတွပ်ကြောန့် ပြစ်ရှိဟှူသူ ဖြစ်ဟှားဟှယ်။ ဖြားဖြစ်ကြောန့်နူးဆိုဟှာ နို့လေဟှာ အယ်လူအားဖြင့် ဘုရားသခင်ရှေ့မာ ဖြောန့်မတ်သူ ဖြစ်ဟှို့တွပ် ဖြစ်ဟှယ်။