1 ရှစ်ရဟှူသူလေ ခု အယ်စာဟှို ဒုတိယကြီ ငါရေးဘီးပေးလိုက်ပါဟှယ်။ ငါဟှာ အယ်စာနှေ့စောန်လောင်းမာ နန်းနို့လေရဲ့ ဖ္လူစင်ဟှူ စိဝိညာဉ်လေဟှို ဒိပေးနှိုးဆော်ဟှားပါဟှယ်။ 2 သန့်ရှင်းဟှူ ပရောဖက်လေဟှာ ကြိုတန်ဘီး ပြောဟှားဟှူ စကားလေန နန်းနို့ရဲ့ တမန်တော်လေဟှနေတဆင့် ပေးအပ်ဟှားဟှူ ကယ်တန်ရှင် သခင်ဘုရားရဲ့ ပညတ်တော်လေဟှို နန်းနို့လေ ပ္လန်ဘီး ဒိရစေဟှို့တွပ် ဖြစ်ဟှယ်။ 3 ✝နန်းနို့လေ ရင်ဦးဆောင်း သိဟှားရဟှို့ချစ်မာ နော့-က်ဆောင်းဟှူကာလမာ ပြစ်ရယ်ပြုတတ်ဟှူ လူလေဟှာ ကိုယ့်ရဲ့ တတ်မတ်မှုတိုင်း ကျင့်နေဘီး၊ 4 "သခင်ဘုရား ကြွလာမယ်ဆိုဟှူ ဂဒိတော်ဟှာ ဖယ်မာရှိဟှိကြောန့်နူး။ နို့ဘိုးဘေးလေ သေဟှားဘီးဟှူ ခီဟှနေစဘီး ရှိမျှဂူလောင်းဟှာ ဖန်းဆင်းစဟှတိုင်းဘဲ့ ဆစ်ဘီးရှိနေဟှယ်" ဆိုဘီး ပြောဆိုဂေ့လေ့မယ်။ 5 ဖြားဖြစ်ကြောန့်နူးဆိုဟှာ ဘုရားသခင်ဟှာ ရှေးကာလမာ ကောန်းဂန်န ရေထဲဟှထွပ်ဘီး ရေအားဖြင့်တည်ဟှူ မ္လေဂီးဟှို စကားတော်အားဖြင့် ဖန်ဆင်းဟှူကြောန်းန၊ 6 ရှေးကမ္ဘာမ္လေဂီးဟှာ ရေလွှမ်းမိုးခံရဘီး ရေအားဖြင့် ဖျစ်ဆီးခံရဟှူကြောန်းဟှို သူးနို့လေဟှာ တမင်သတ်သတ် မေ့ဟှားဂေ့ဟှယ်။ 7 ခုရှိနေဟှူ ကောန်းဂန်န မ္လေဂီးဟှာ အဓမ္မလူလေဟှို တရားစီရင်ဘီး ဖျစ်ဆီးဟှူ နေ့ရစ်ထိ အယ် စကားတော်အားဖြင့် သိုဟှားဘီး မီးရှို့ဟှို့တွပ် ထီးသီးဟှားလေဟှယ်။

8 အယ်ဘေမဲ့ ရှစ်ရဟှူသူလေ၊ ဘုရားသခင်တွပ် နေ့ရစ်တရစ်ဟှာ နှစ်တထောန်ဖြစ်ဟှူမျိုး နှစ်တထောန်ဟှာ နေ့ရစ်တရစ်ဟှူမျိုး ဖြစ်ဟှယ် ဆိုဇာဟှို မေ့ဂေ့န။ 9 နှေးဟှယ် ဆိုဘီး တချို့လူလေ ထန်မှတ်နေဘေမဲ့ ဘုရားသခင်ဟှာ ဂဒိတော်ရာမာ နှေးတော်မူဟှ။ ဖယ်သူလည်း ပျစ်စီးဘဲန လူတိုင်းနောန်ဒရဟှို့တွပ် လိုတော်ရှိဟှူကြောန့် နန်းနို့လေဟှို သီးခံတော်မူလေဟှယ်။

10 ✝ခိုးဟှာ ညဉ့်ဖတ်မာလာတတ်ဟှူမျိုး သခင်ဘုရားရဲ့ နေ့ရစ်ဟှာ လာလေ့မယ်။ အယ်နေ့ရစ်မာ ကောန်းဂန်ဟှာ ရရာတိုင်း က္လယ်ဟှူသံနတူးဒူ ပျော့-က်ဟှားလေ့မယ်။* လောကဓာတ်လေဟှာ ရရာတိုင်းပူအာကီးဟှူကြောန့် ပျစ်စီးဟှားလေ့မယ်။ မ္လေဂီးဟှနေစဘီး မ္လေဂီးထတ်မာရှိဟှူဇာလေ ဂူလောင်းဟှာ လောန်ကျွမ်းကူလေ့မယ်။ 11 အယ်ဇာလေ ဂူလောင်းဟှာ အယ်မျိုး ပျစ်စီးဟှားမယ် ဖြစ်ဟှူကြောန့် နန်းနို့လေဟှာ ဖယ်မျိုးဟှူသူလေ ဖြစ်ဟှို့သင့်ဟှယ်နူး။ နန်းနို့လေဟှာ သန့်ရှင်းဟှူကျင့်ဟှို ကျင့်ဘီး ဘုရားဝတ်န မွေ့လျော်ရှင်းအားဖြင့် 12 ဘုရားသခင်ရဲ့ နေ့ရစ်ဟှို စောန့်မျှော်ဘီး အယ်နေ့ရစ် ဗြန်းဗြန်းရော့-က်လာဟှို့ မျှော်လင့်သင့်ဟှယ်။ အယ်နေ့မာ ကောန်းဂန်ဟှာ မီးလောန်ကျွမ်းဘီး ပျစ်စီးဟှားလေ့မယ်။ လောကဓာတ်လေလည်း ရရာတိုင်း ပြင်းထန်ဟှူ ပူရှီအားဖြင့် ရယ်ပျော်ဟှားဂေ့လေ့မယ်။ 13 ✝အယ်ဘေမဲ့ နို့လေဟှာ ဘုရားသခင် ဂဒိထားတော်မူဟှူ ဖြောန့်မတ်ရှင်းတရားရဲ့ တည်ဟှူနေရာ ကောန်းဂန်သစ်န မ္လေဂီးသစ်ဟှို စောန့်မျှော်နေဂေ့ဟှယ်။

14 အယ်မျိုးဖြစ်ကြောန့် ရှစ်ရဟှူသူလေ၊ အယ်နေ့ရစ်ဟှို စောန့်မျှော်နေဂေ့ဟှူကြောန့် ပြစ်ကင်းဘီး ဖြားစွန်းထင်းလည်းမှေ့ဘဲဟှူ သူဖြစ်န ကိုယ်တော်ရဲ့ ရှေ့တော်ဟှို ငြီးငြီဝပ်ဝပ် ရော့-က်နိုင်ဟှို့တွပ် ကြိုးစားအားထုဂေ့ပါ။ 15 နို့လေရှစ်ရဟှူ ညီကိုပေါလုဟှာ ဘုရားသခင်ပေးဟှူ ဉာဏ်ပညာအားဖြင့် နန်းနို့လေဟှို ရေးဘီးပေးလိုက်ဟှူတိုင်း နို့လေရဲ့ သခင်ဘုရား သီးခံတော်မူရှင်းဟှာ နန်းနို့လေ ကယ်တန်ရှင်းခံရဟှို့တွပ် ခွမ့်ရေးပေးရှင်း ဖြစ်ဟှယ် ဆိုဇာဟှို မှတ်ယူဂေ့ပါ။ 16 သူဟှာ အယ်ကြောန်းရာလေန ပတ်သတ်ဘီး စီရင်ရေးဟှားဟှူ စာစောန်လေမာ နားလည်ရ ခတ်ခဲမှုလေ ရှိဟှယ်။ သိပညာမှေ့ဘဲဟှူ၊ တည်ကြည်မှုမှေ့ဘဲဟှူ သူလေဟှာ အယ်စာစောန်ဟှနေစဘီး ကျန်ဟှူ ကျမ်းစာလေရဲ့ နတ်ဓိပါယ်ဟှို မှော့-က်လှန်ဘီး ကိုယ့်ကိုယ်ကိုယ် ဖျစ်စီးတတ်ဂေ့ဟှယ်။

17 အယ်ကြောန့် ရှစ်ရဟှူသူလေ အယ်ကြောန်းရာလေဟှို နန်းနို့သိဟှားပီးဘီ ဖြစ်ဟှူကြောန့် တရားဘဲဟှူသူလေရဲ့ ပရိယာယ်အားဖြင့် သွီးဆောန်ရှင်းနော့-က်ဟှို လိုက်ပါဟှားဘီး နန်းနို့လေရဲ့ တည်ကြည်မှုဟှို ဆောင်းရှောန်းဘဲ နေဟှို့တွပ် ကိုယ့်ကိုယ်ကိုယ် စောန့်ရှော့က်ဂေ့ပါ။ 18 နို့လေရဲ့သခင်န ကယ်တန်ရှင် ဖြစ်တော်မူဟှူ ယေရှုခရစ်တော်ရဲ့ ကျေးဇူးတော်နရော၊ ကိုယ်တော့်ဟှို သိကျွမ်းဟှူ ပညာနရော ကီးထွားဂေ့ပါ။ အယ်သခင်ဟှာ ခုဟှနေစဘီး ထာဝရ ကာလပတ်လောင်း ဖောင်းသရေတော်ရှိပါစေ! အာမင်။