Atos 15

ယေရုရှလင်ဗြို့ဟှ စည်းဝေးကြောန်း

1 လူတချို့ဟှာ ယုဒပြည်ဟှနေ အန္တိအုတ်ဗြို့ဟှို သွားဘီးဟှာ ညီကို မောန်နှမလေဟှို "နန်းနို့ဟှာ မောရှေရဲ့ ပညတ်တရားတိုင်း ရေဖျားလှီးဇာဟှို ခံဟှဆိုဟှာ ကယ်တန်ရှင်းရနိုင်ဟှ" ဆိုဘီး သွန်သန်ဂေ့ဟှယ်။ 2 ပေါလုန ဗာနဗလေဟှာ အယ်လူလေန ပြင်းပြင်းထန်းထန်ဟှား ဂြင်းခူဂေ့ဟှယ်။ အယ်ကြောန့် ပေါလု၊ ဗာနဗန ယောင်ကြည်သူတချို့ဟှို အယ်ပြဿနာ ဆွေးနွီးဟှို့တွပ် ယေရုရှလင်ဗြို့ဟှ တမန်တော်လေန သင်းလူဂီးလေနားဟှို စေလွှတ်ဟှို့တွပ် ဆောင်းဖြတ်လိုက်ဂေ့ဟှယ်။

3 သူးနို့ဟှာ သင်းတော်ရဲ့ ပို့ဆောန်ပေးရှင်းအားဖြင့် ဖိနိတ်ပြည်န ရှမာရိပြည်လေဟှို ဖြတ်သွားနေဟှူ ခီမာ လူမျိုးခြားလေဟှာ ဘုရားသခင်ဖတ်ဟှို ပ္လောန်းလဲလာဂေ့ကြောန်းဟှို ပြောပြဂေ့ဟှူကြောန့် ညီကိုလေဟှာ ရရာတိုင်း ဝန်းသာဂေ့ဟှယ်။ 4 သူးနို့လေဟှာ ယေရုရှလင်ဗြို့ဟှို ရော့-က်ဟှားဂေ့ဟှူ ခီမာ သင်းတော်၊ တမန်တော်လေန သင်းလူဂီးလေဟှ သူးနို့ဟှို ကြိုဆိုဂေ့ဟှယ်။ သူးနို့ဟှို ဘုရားသခင်ဟှ ဖယ်မျှလော့-က် သောင်းပြုဟှယ် ဆိုဇာဟှို ဂူလောင်းဟှို ပ္လန်ပြောပြဂေ့ဟှယ်။ 5 အယ်ဘေမဲ့ ဖာရိရှဲဖွဲ့ဝမ်လေန ယောင်ကြည်သူ တချို့လေဟှာ ထဘီးဟှာ "လူမျိုးခြားလေဟှာ ရေဖျားလှီးဇာခံရဘီး မောရှေရဲ့ ပညတ်တရားဟှို စောန့်ထီးရမယ်" ဆိုဘီး ပြောဂေ့ဟှယ်။

6 တမန်တော်လေန သင်းလူဂီးလေဟှာ အယ်ကိစဟှို သောင်းသပ်ဟှို့တွပ် စုဂေ့ဟှယ်။ 7 ✝၁၅.၇ တ ၁၀.၁–၄၃ခီကြာဂီး ဆွေးနွီးဂေ့ဘီးန ပေတရုဟှာ ထဘီးဟှာ "ညီကိုလေ၊ လူမျိုးခြားလေဟှာ ဒန်းကောန်းကြားဘီး ယောင်ကြည်နိုင်ဟှို့တွပ် ရင်းရင်ဂဒဲဟှ ဘုရားသခင်ဟှာ ဒန်းကောန်းဟှို ဟောပြောဟှို့တွပ် ငါ့ဟှို ဦးဆောင်း နန်းနို့ ထဲဟှနေ ဝီးကော့-က်ဟှားဟှယ် ဆိုဇာဟှို နန်းနို့ သိဂေ့ဟှယ်။ 8 ✝၁၅.၈ တ ၁၀.၄၄; တ ၂.၄လူလေရဲ့ စိနှလောင်းဟှိုသိဟှူ ဘုရားသခင်ဟှာ သန့်ရှင်းဟှူဝိညာဉ်တော်ဟှို နို့လေဟှို ပေးမျိုးဘဲ့ လူမျိုးခြားလေဟှိုလည်း ပေးရှင်းအားဖြင့် သူးနို့လေဟှို လတ်ခံကြောန်း သတ်သေဟှို ပြလေဟှယ်။ 9 ကိုယ်တော်ဟှာ သူးနို့လေန နို့လေဟှို ခွဲခြားဟှ။ သူးနို့ဟှာ ကိုယ်တော့်ဟှို ယောင်ကြည်ဟှူကြောန့် သူးနို့ရဲ့ စိနှလောင်းဟှာ သန့်ရှင်းဟှားဘီး သူးနို့ရဲ့ ပြစ်လေလည်း ဖြေလွှတ်ပေးဟှယ်။ 10 အယ်ကြောန့် နန်းနို့ဟှာ ဖြားဖြစ်ကြောန့် ဘုရားသခင်ဟှို စောင်ဇမ်းဂေ့နူး။ နို့လေရဲ့ ဘိုးဘေးလေရော၊ နို့လေကိုယ်တိုင်ဟှာ ထမ်းနိုင်ဘဲဟှူ ဝန်ထောက်လေဟှို ဖြားဖြစ်ကြာန့် တဗဲ့တော်လေဟှို ထမ်းခိုင်းဂေ့နူး။ 11 မှုဟှ! နို့လေဟှလည်း အယ်လူလေမျိုးဘဲ့ သခင်ယေရှုရဲ့ ကျေးဇူးတော်အားဖြင့် ကယ်တန်ခံရဟှယ် ဆိုဇာဟှို ယောင်ကြည်ဂေ့ဟှယ်" ဆိုဘီး ပြောဟှယ်။

12 ဗာနဗန ပေါလုလေဟှာ လူမျိုးခြားလေထဲမာ ဘုရားသခင်လောက်ဟှူ အံ့ဩဘွယ်ရာလေန နိမိတ်လတ်ခဏာကြောန်းဟှို ပြောနေဟှူ ခီမာ စုနေဟှူ လူလေဟှ တိတိဆိဆိဟှား နားထောန်နေဂေ့ဟှယ်။ 13 သူးနို့လေ ပြောဘီးန ယာကုပ်ဟှ "ညီကိုလေ၊ ငါ့စကားဟှို နားထောန်ဂေ့! 14 ဘုရားသခင်ဟှာ သူ့နာမတော်တွပ် လူမျိုးခြားလေထဲဟှ လူတချို့ဟှို သူ့ရဲ့ လူစုဖြစ်ဟှို့တွပ် ဝီးထုဟှူ ခီမာ သူးနို့ဟှို ဂရုစိုက်ကြောန်းဟှို ရှိမုန်ဟှ ရှင်းပြဟှားပီးဘီ။ 15 ပရောဖက်လေရဲ့ စကားလေဟှာ အယ်ကြောန်းရာန ကိုက်ညီဟှယ်။ ကျမ်းစာထဲမာ"

16 " ‘အယ်မူဇာ ပီးဟှားဘီးန ငါပ္လန်လာမယ်၊

အယ်ဘီးဟှာ ပြိုက္လနေဟှူ ဒါဝိဒ်ရဲ့တဲဟှို ငါပ္လန်ဆော့-က်မယ်။

ငါဟှာ ပျစ်စီးနေဟှူ အယ်တဲတော်ဟှို ပ္လန်ဆော့-က်ဘီး

ဒါဝိဒ်ရဲ့တဲဟှို နော့-က်တခါ ပ္လန်ဆော့-က်မယ်။

17 ကျန်ရစ်ဟှူ လူလေန ငါ့နာမအားဖြင့် ခေါ်ရှင်းခံရဟှူ လူမျိုးခြားလေ ဂူလောင်းဟှာ

ဘုရားသခင်ဟှို ရှာဂေ့လေ့မယ်။

18 ရင်းရင်ဂဒဲဟှ အယ်မူဇာဟှို သိစေတော်မူဟှူ ထာဝရဘုရား မိန့်တော်မူဟှားဟှယ်’ "

ဆိုဘီး ရေးဟှားဟှယ်။

19 ယာကုပ်ဟှ ဆစ်ဘီးဟှာ "အယ်ကြောန့် ဘုရားသခင်နားဟှို ပ္လောန်းလဲလာဂေ့ဟှူ လူမျိုးခြားလေဟှို ဒေါက်ခရော့-က်အောန် နို့လေ စီရင်သင့်ဟှ ဆိုဘီး ငါထန်ဟှယ်။ 20 အယ်ကြောန့် ရောက်ထုလေဟှို ပူဇော်ဟှားဘီး သန့်ရှင်းဘဲဟှူ စားဇာလေဟှို စားရှင်း၊ တရားဘဲဟှူ မေထုန်ပြုရှင်း၊ လည်ဗန်းလှီးဘဲန သတ်ဟှားဟှူ လိဆန်န သွီးလေဟှို စားရှင်းဟှနေ ရှောန်ဂေ့ဟှို့တွပ် စာရေးသင့်ဟှယ် ဆိုဇာ ငါယူဆဟှယ်။ 21 ဖြားဖြစ်ကြောန့်နူးဆိုဟှာ ရင်းရင်ဒူးဟှ မောရှေရဲ့ ပညတ်တရားဟှို ဝါလယ်ဇရပ်မာ ဒန်းနေ့တိုင်းမာ ဖတ်ဟှယ်။ အယ်ဘီးဟှာ သူ့ရဲ့ တရားဟှို ဗြို့တိုင်းမာ ဟောပြောဂေ့ဟှယ်" ဆိုဘီး ပြောဟှယ်။

ယောင်ကြည်သူ လူမျိုးခြားလေဟှို ပေးဟှူစာကြောန်း

22 အယ်ကြောန့် တမန်တော်လေ၊ သင်းလူဂီးလေန သင်းတော်တခုလောင်းဟှာ သူးနို့လေထဲဟှ လူတချို့ဟှို ဝီးကော့-က်ဘီးဟှာ ပေါလုန ဗာနဗလေနတူးဒူ အန္တိအုတ်ဗြို့ဟှို လွှတ်ဟှို့တွပ် ဆောင်းဖြတ်ဂေ့ဟှယ်။ သူးနို့လေဟှာ ညီကိုလေထဲမာ ရရာတိုင်း လေးစားခံရဟှူ ဗာရှဗ ဆိုဘီး ခေါ်ဟှူ ယုဒန သိလလေဟှို ဝီးကော့-က်ဂေ့ဟှယ်။ 23 သူးနို့ဟှနေ တဆင့် ပေးလိုက်ဟှူ စာထဲမာ၊

"နန်းနို့ ညီကိုလေ ဖြစ်ဂေ့ဟှူ တမန်တော်လေန သင်းလူဂီးလေဟှ အန္တိအုတ်ဗြို့၊ ရှုရိပြည်န ကိလိကိပြည်မာနေဟှူ လူမျိုးခြား ညီကိုလေဟှို နှောက်ဆစ်လိုက်ဟှယ်။ 24 နို့လေထဲဟှ လူတချို့ဟှာ နို့လေရဲ့ ခွမ့်ပြုချစ်ရဘဲန နန်းနို့နားဟှို သွားဘီးဟှာ စိနှောက်ယှစ်ဖြစ်စေဟှူ စကားလေဟှို ပြောဘီး နန်းနို့ဟှို ဒေါက်ခပေးကြောန်းဟှို နို့လေသိရဟှယ်။ 25 အယ်ဘေမဲ့ ကျွန်တော့်လေဟှာ စည်းဝေးလောက်ဘီး လူတချို့ဟှို ဝီးကော့-က်ဘီးဟှာ နန်းနို့နားဟှို လွှတ်ဟှို့တွပ် ဂူလောင်း ဘောတူဂေ့ဟှယ်။ အယ်လူလေဟှာ ကျွန်တော့်လေ ရှစ်ဟှူဗာနဗန ပေါလုလေနတူးဒူ လိုက်ဟှားဂေ့လေ့မယ်။ 26 ပေါလုန ဗာနဗလေဟှာ နို့လေရဲ့ သခင်ယေရှုခရစ်တော်ရဲ့ နာမတော်တွပ် မှုတော်ဟှို သတ်စွန့်ဘီး လောက်ဂေ့ဟှယ်။ 27 အယ်ကြောန့် ကျွန်တော့်လေဟှာ သူးနို့နတူးဒူ ယုဒန သိလလေဟှို နန်းနို့နားဟှို လွှတ်လိုက်ဟှယ်။ ကျွန်တော့်လေ ရေးလိုက်ဟှူစာမာ ပြောဟှားဟှူ ကြောန်းရာလေဟှို သူးနို့ ကိုယ်တိုင်လည်း ပြောပြဂေ့လေ့မယ်။ 28 သန့်ရှင်းဟှူဝိညာဉ်တော်န ကျွန်တော့်လေဟှာ လိုက်နာဟှို့ လိုအပ်ချစ်လေမှတပါး တခြားဝန်လေဟှို ထမ်းဘဲဟှို့တွပ် ဘောတူဂေ့ဟှယ်။ 29 ရောက်ထုဟှို ပူဇော်ဟှားဟှူစာဟှို စားန။ သွီးဟှိုလည်း စားန။ လည်ဗန်းလှီးဘဲန သတ်ဟှားဟှူ လိဆန်ဟှိုလည်း စားန။ နန်းနို့ ကိုယ်တိုင်လည်း တရားဘဲဟှူ မေထုန်ဟှို ရှောန်ရမယ်။ အယ်မူဇာလေဟှို ရှောန်မယ် ဆိုဟှာ နန်းနို့တွပ် လောင်လော့-က်ဟှားဘီ။ ကျန်းမာရွှင်လန်းဂေ့ပါစေ" ဆိုဘီး ရေးဟှားဟှယ်။

30 စေတမန်လေဟှို လွှတ်လိုက်ဘီး သူးနို့ဟှာ အန္တိအုတ်ဗြို့ဟှို သွားဘီး ယောင်ကြည်သူလေဟှို စုခိုင်းဘီးဟှာ အယ်ပေးစာဟှို ပေးလိုက်ဂေ့ဟှယ်။ 31 သူးနို့ဟှာ အယ်စာဟှို ဖတ်ပြဂေ့ဟှူ ခီမာ တိုက်တွန်းဟှားဟှူ စကားလေကြောန့် ရရာတိုင်း ဝန်းသာဂေ့ဟှယ်။ 32 ယုဒန သိလလေ ကိုယ်တိုင်ဟှ ပရောဖက်လေ ဖြစ်ဂေ့ဟှူကြောန့် ညီကိုလေဟှို ခီကြာဂီး တိုက်တွန်းအားပေးဘီး ခိုင်ခန့်စေဂေ့ဟှယ်။ 33 သူးနို့ဟှာ အယ်နေရာမာ ရစ်ကြာဂီး နေဘီးန ညီကိုလေဟှို ငြီးငြီးချမ်းချမ်းဟှား ပ္လန်လွှတ်လိုက်ဂေ့ဟှယ်။ 34 *၁၅.၃၄ တချို့ မူရင်းလတ်ရေးမူလေမာ ခန်းငယ် ၁၇ ဟှို၊ အယ်ဘေမဲ့ သိလဟှာ နေရစ်ဟှို့တွပ် ဆောင်းဖြတ်လိုက်ဟှယ်၊ ဆိုဘီး ထပ်ပေါန်းထဲ့ဟှားဟှယ်။

35 ပေါလုန ဗာနဗလေဟှာ အန္တိအုတ်ဗြို့မာနေဘီး သခင်ဘုရားရဲ့ ဒန်းကောန်းဟှို တခြားလူလေနတူးဒူ ဟောပြောသွန်သန်ဂေ့ဟှယ်။

ပေါလုန ဗာနဗ လမ်းခွဲဂေ့ကြောန်း

36 ရစ်နဲနဲကြာဘီးန ပေါလုဟှ ဗာနဗဟှို "သခင်ဘုရားရဲ့ စကားတော်ဟှို နို့လေဟောဟှားဟှူ၊ ဗြို့လေမာရှိဟှူ ညီကိုလေနားဟှို ပ္လန်ဟှားဘီးဟှာ သူးနို့လေရဲ့ ခြေနေလေဟှို လေ့လာဂေ့ဇို့" ဆိုဘီး ပြောဟှယ်။ 37 ဗာနဗဟှာ မာကုနာမယ် ဆိုဘီး ခေါ်ဟှူ ယောဟန်ဟှို ခေါ်ဆောန်ရှင်ဟှယ်။ 38 ✝၁၅.၃၈ တ ၁၃.၁၃အယ်ဘေမဲ့ ပေါလုဟှ ပံဖုလိပြည်မာ သူးနို့နားဟှနေ ထွပ်ဟှားဘီး သာသနာခရီးဟှို ဆောင်းထိလိုက်ဘဲဟှူ သူဟှို ခေါ်ဆောန်ဟှို့ သင့်ဟှ ဆိုဘီး ယူဆဟှယ်။ 39 သူးနို့ဟှာ ပြင်းပြင်းထန်းထန်ဟှား ဂြင်းခူဂေ့ဘီး လမ်းခွဲဂေ့ဟှယ်။ ဗာနဗဟှာ မာကုဟှို ခေါ်ဘီးဟှာ ကုပရုကျွန်းဟှို သန်းဖောန သွားလိုက်ဟှယ်။ 40 ပေါလုဟှ သိလဟှို ဝီးကော့-က်ဘီးဟှာ ထွပ်ဟှားဟှယ်။ ညီကိုလေဟှာ ပေါလုဟှို သခင်ဘုရားရဲ့ ကျေးဇူးတော်န အပ်လိုက်ဂေ့ဟှယ်။ 41 ပေါလုဟှာ အယ်နေရာဟှနေ ရှုရိပြည်န ကိလိကိပြည်ဟှို သွားဘီးဟှာ သင်းတော်လေဟှို ခိုင်ခန့်စေဟှယ်။