Atos 18

ကောရိန့်ဗြို့မာ မှုတော်ဆောန်ဟှူကြောန်း

1 အယ်ဘီးန ပေါလုဟှာ အာသင်ဗြို့ဟှ ထွပ်ဟှားဘီး ကောရိန့်ဗြို့ဟှို ရော့-က်ဟှားဟှယ်။ 2 အယ်ဗြို့မာ ပုန္တုပြည်သား အာကုလ နာမယ်ရှိဟှူ ယုဒလူမျိုးတယော့-က်န သူ့မယား ပြစ်ကိလလေဟှို တွိဟှားဟှယ်။ ယုဒလူမျိုးလေဟှ ရောမဗြို့ဟှနေ ထွပ်ဟှားဟှို့တွပ် ကလောဒိမန်းဂီးဟှ မိန့်ထုဟှားဟှူကြောန့် သူးနို့ဟှာ ကြာသေးခန်ဟှ ဣတလိပြည်ဟှနေ ထွပ်လာဂေ့ဟှူ လူလေဖြစ်ဟှယ်။ 3 အယ်လူလေဟှာ ပေါလုမျိုးဘဲ တဲရှင်ချောက်ဘီး သတ်မွီးနေဟှူ တဲရှင်ချောက်မားလေ ဖြစ်ဂေ့ဟှယ်။ အယ်ကြောန့် ပေါလုဟှာ သူးနို့လေနားဟှို သွားဘီးဟှာ သူးနို့နတူးဒူ လောက်ဂေ့ဟှယ်။ 4 ယုဒလူမျိုးန ဟေလသလူမျိုးလေဟှို သွီးဆောန်ဟှို့တွပ် သူဟှာ ဒန်းနေ့တိုင်း ဝါလယ်ဇရပ်မာ ဆွေးနွီးဂေ့ဟှယ်။

5 သိလန တိမောသေလေဟှာ မာကေဒေါနိပြည်ဟှနေ ရော့-က်လာဂေ့ဟှူ ခီမာ ပေါလုဟှာ ယုဒလူမျိုးလေဟှို တခီလောင်း တရားဟောပြောဘီးန ယေရှုဟှာ မေရှိယဖြစ်ဟှယ် ဆိုဘီး သတ်သေခံလေဟှယ်။ 6 ယုဒလူမျိုးလေဟှာ သူ့ဟှို စော်ကားဘီး ပြောနေဟှူ ခီမာ ပေါလုဟှာ သူ့အန်းဂီဟှနေ ဖောင်လေဟှို ခါခ္လဘီးဟှာ "နန်းနို့ရဲ့ သွီးဟှာ နန်းနို့ ခေါန်းထတ်မာ ရှိပါစေ! ငါ့တာဝန် မှုဟှ။ ခုဟှစဘီး ငါဟှာ လူမျိုးခြားလေနားဟှို သွားမယ်" ဆိုဘီး ပြောဟှယ်။ 7 အယ်ဘီးန အယ်လူလေနားဟှ ထွပ်ဟှားဘီးဟှာ ဘုရားသခင်ဟှို ကိုးကွယ်ဟှူ တိတုယုတ္တု နာမယ်ရှိဟှူ လူမျိုးခြားရဲ့ အီဟှို သွားဘီးဟှာ နေလေဟှယ်။ သူ့အီဟှာ ဝါလယ်ဇရပ်န ကပ်နေဟှယ်။ 8 ဝါလယ်ဇရပ်မှူးဖြစ်ဟှူ ကရိပ္ပုန သူ့မိသားစုဂူလောင်းဟှာ သခင်ဘုရားဟှို ယောင်ကြည်ဟှူသူလေ ဖြစ်လာဂေ့ဟှယ်။ တခြား ကောရိန္သုဗြို့သား ဘောင်ဂီးဟှလည်း တရားတော်ဟှို ကြားရဟှူ ခီမာ ယောင်ကြည်ဘီးဟှာ ဗတ္တိဇံခံဂေ့ဟှယ်။

9 တညဉ့်မာ ပေါလုဟှာ ရူပါရောင်ဟှို ဗြင်ရဟှယ်။ ရူပါရောင်ထဲမာ သခင်ဘုရားဟှ "ကြော့-က်န။ ဆစ်ဘီးဟောပါ။ လတ်ရှော့န။ 10 ဖြားဖြစ်ကြောန့်နူးဆိုဟှာ ငါဟှာ နန့်နတူးဒူ ရှိဟှယ်။ ဖယ်သူဟှလည်း နန့်ဟှို ဘေးပြုနိုင်ဟှ။ အယ်ဗြို့မာရှိဟှူ လူဘောင်ဂီးဟှ ငါ့လူလေ ဖြစ်ဂေ့ဟှယ်" ဆိုဘီး ပြောဟှယ်။ 11 ပေါလုဟှာ အယ်ဗြို့မာ တနှစ်နခြော့-က်လ နေဘီးဟှာ ဘုရားသခင်ရဲ့ စကားတော်ဟှို သွန်သန်လေဟှယ်။

12 ဂါလျုန်ဟှာ အခါယပြည်ရဲ့ ဗြို့ဝန်မန်း ဖြစ်နေဟှူ ခီမာ ယုဒလူမျိုးလေဟှာ စုဘီး ပေါလုဟှို ဖမ်းဘီးဟှာ တရားပလ္လင်ရှေ့ဟှို ခေါ်ဆောန်လာဂေ့ဟှယ်။ 13 သူးနို့ဟှ "အယ်လူဟှာ ပညတ်တရားဟှို ဆန့်ကျင်ဘီး ဘုရားသခင်ဟှို ကိုးကွယ်ဂေ့ဟှို့တွပ် လူလေဟှို သွီးဆောန်နေဟှယ်" ဆိုဘီး လျှော့-က်ဂေ့ဟှယ်။

14 ပေါလုဟှာ စကားပြောဟှို့ လောက်နေဒူးမာ ဂါလျုန်ဟှ "ယုဒလူမျိုးလေ၊ အယ်မှုဟှာ ကောန်းဘဲဟှူမှု၊ တရားဘဲဟှူမှုဖြစ်ဟှယ် ဆိုဟှာ ငါဟှာ နန်းနို့ရဲ့ စွပ်စွဲချစ်လေဟှို စိရှယ်လတ်ရှယ်န နားထောန်နိုင်ဟှယ်။ 15 အယ်ဘေမဲ့ အယ်မူဇာဟှာ စကားလေ၊ နာမယ်လေန ပညတ်တရားနဆိုင်ဟှယ် ဆိုဟှာ နန်းနို့ ကိုယ်တိုင်ဘဲ့ ဆောင်းဖြတ်ဂေ့။ အယ်မှုဟှို ငါစီရင်ဟှ" ဆိုဘီး ပြောဟှယ်။ 16 ယုဒလူမျိုးလေဟှို တရားပလ္လင်ရှေ့ဟှနေ နှန်ထုလိုက်ဟှယ်။ 17 အယ်လူလေဟှာ ဝါလယ်ဇရပ်မှူး သုဿင်ဟှို ဖမ်းဘီးဟှာ တရားပလ္လင်ရှေ့မာ ရိုက်ဂေ့ဟှယ်။ အယ်ဘေမဲ့ ဂါလျုန်ဟှာ အယ်မှုဟှို လောင်းဝ ဂရုစိုက်ဘဲနေဟှယ်။

အန္တိအုတ်ဗြို့ဟှို ပေါလု ပ္လန်ရော့-က်လာဟှူကြောန်း

18 ပေါလုဟှာ ကောရိန္သုဗြို့မာ ကြာဂီးနေဟှယ်။ အယ်ဘီးန ညီကို မောန်နှမလေဟှို နှောက်ဆစ်ဘီး ပြစ်ကိလ၊ အာကုလလေနတူးဒူ ရှုရိပြည်ဟှို သန်းဖောန သွားဂေ့ဟှယ်။ ကင်ခြေဗြို့ဟှနေ သန်းဖောန ထွပ်ခန်မာ သူဟှာ ဘုရားသခင်ဟှို သစ်စာဂဒိ ပြုဟှားဟှူကြောန့်*၁၈.၁၈ သစ်စာဂဒိ ပြုဟှားဟှူကြောန့်၊ ယုဒလူမျိုးရဲ့ ထောင်းဒန်းဓလေ့မာ ခေါန်းရိဇာဟှာ သစ်စာဂဒိပြုဟှူ လတ်ခဏာဖြစ်ဟှယ် ဆိုဇာဟှို ရည်ညွန်းဟှယ်။ သူ့ခေါန်းဟှို ရိလိုက်ဟှယ်။ 19 ဧဖက်ဗြို့ဟှို ရော့-က်ဟှားဟှူ ခီမာ ပေါလုဟှာ ပြစ်ကိလန အာကုလလေဟှို ဗြို့မာထားရစ်ဟှယ်။ သူဟှာ ဝါလယ်ဇရပ်ဟှို ဝမ်ဘီးဟှာ ယုဒလူမျိုးလေန ဆွေးနွီးဟှယ်။ 20 လူလေဟှာ သူးနို့နတူးဒူ ကြာဂီးနေဟှို့တွပ် တိုက်တွန်းဂေ့ဘေမဲ့လည်း ပေါလုဟှာ လတ်ခံဟှ။ 21 အယ်မျိုးပြောမယ့်စား "ဘုရားသခင်ဟှ လိုတော်ရှိမယ် ဆိုဟှာ နန်းနို့နားဟှို ပ္လန်လာမယ်" ဆိုဘီး ဧဖက်ဗြို့ဟှနေ သန်းဖောန ထွပ်ဟှားလေဟှယ်။

22 သူဟှာ ကဲသရိဗြို့ဟှို ရော့-က်ဟှားဟှူ ခီမာ ယေရုရှလင်ဗြို့ဟှို တတ်ဟှားဘီး သင်းတော်ဟှို နှောက်ဆစ်ဘီး အန္တိအုတ်ဗြို့ဟှို သွားလေဟှယ်။ 23 အယ်ဗြို့မာ ကြာဂီးနေဘီးန ပ္လန်ထွပ်ဟှားဘီး၊ ဂလာတိပြည်န ဖြူဂိပြည်ဟှို လှည့်လည်ဘီး တဗဲ့တော်လေဟှို ခိုင်ခန့်မြဲမြံ စေလေဟှယ်။

အာပေါလုဟှာ ဧဖက်ဗြို့န ကောရိန္သုဗြို့လေမာ တရားဟောဟှူကြောန်း

24 အယ်ခီမာ အာလေဇန္ဒြိဗြို့သား အာပေါလု နာမယ်ရှိဟှူ ယုဒလူမျိုးတယော့-က်ဟှာ ဧဖက်ဗြို့ဟှို ရော့-က်လာဟှယ်။ သူဟှာ ကျမ်းစာဟှို ကျွမ်းကျင်ဘီး ဟောပြောကောန်းဟှူ လူဖြစ်ဟှယ်။ 25 သူဟှာ သခင်ဘုရားရဲ့ လမ်းစဉ်ဟှို သေးသေချားချာဟှား သွန်သန်ခံဟှားရဟှူလူ ဖြစ်ဟှယ်။ သူဟှာ စိအားထတ်သန်ဘီး ယေရှုန ဆိုင်ဟှူဇာလေဟှို မှန်းမှန်ကန်းကန်ဟှား သွန်သန်နေဟှယ်။ အယ်ဘေမဲ့ သူဟှာ ယောဟန်ရဲ့ ဗတ္တိဇံဟှိုဘဲ့ သိဟှယ်။ 26 သူဟှာ ဝါလယ်ဇရပ်မာ စဘီးဟှာ ရဲရဲရင့်ရင့်ဟှား ဟောနေဟှယ်။ သူ့ဟောပြောချစ်လေဟှို ကြားရဟှူ ပြစ်ကိလန အာကုလလေဟှာ သူ့ဟှို အီဟှို ခေါ်ဘီးဟှာ ဘုရားသခင်ရဲ့ လမ်းစဉ်ဟှို သေးသေချားချာဟှား ရှင်းပြပေးဂေ့ဟှယ်။ 27 အယ်ဘီးန သူဟှာ အခါယပြည်ဟှို သွားဟှို့ ဆောင်းဖြတ်လိုက်ဟှယ်။ အယ်ကြောန့် ဧဖက်ဗြို့ဟှ ယောင်ကြည်သူလေဟှာ သူ့ဟှို လတ်ခံဟှို့တွပ် အခါယပြည်ဟှ ယောင်ကြည်သူလေနားဟှို စာရေးပေးရှင်းအားဖြင့် ကူညီပေးဂေ့ဟှယ်။ သူဟှာ အခါယပြည်ဟှို ရော့-က်ဟှူ ခီမာ ဘုရားသခင်ရဲ့ ကျေးဇူးတော်အားဖြင့် ယောင်ကြည်လာဟှူ လူလေဟှို ဘောင်ဂီး ကူညီပေးဟှယ်။ 28 ဖြားဖြစ်ကြောန့်နူးဆိုဟှာ သူဟှာ ကျမ်းစာအားဖြင့် ယေရှုဟှာ မေရှိယ ဖြစ်ဟှူကြောန်းဟှို ထော့-က်ပြဘီး လူလေရှေ့မာ ယုဒလူမျိုးလေဟှို ပိုင်းပိုင်ဟှား ချေပလေဟှယ်။