1 အဂြိပ္ပမန်းဂီးဟှ "နန်ဟှာ ခုပြောနိုင်ဟှယ်" ဆိုဘီး ပေါလုဟှို ပြောဟှူ ခီမာ ပေါလုဟှာ လတ်ဟှို ပြဘီးဟှာ၊

2 "အဂြိပ္ပမန်းဂီး၊ ကျွန်တော့်ဟှို ယုဒလူမျိုးလေရဲ့ စွပ်စွဲချစ်န ပတ်သတ်ဘီး သခင်ရဲ့ရှေ့မာ လျှော့-က်ဘီး ပြောရဟှို့ခွမ့်ဟှာ ကျွန်တော့်တွပ်ဟှ မင်္ဂလာရှိဟှူ ခွမ့်ရေးဖြစ်ဟှယ် ဆိုဘီး ယူဆဟှယ်။ 3 သခင်ဟှာ ယုဒလူမျိုးလေရဲ့ ဓလေ့ထောင်းဇံလေန ပြဿနာလေဟှို သိဟှူလူဖြစ်ဟှယ်။ အယ်ကြောန့် လျှော့-က်တန်ဟှူဇာဟှို စိရှယ်ဘီး နားထောန်ပေးပါ။"

4 "ကျွန်တော်ဟှာ လူပျိုရွယ်ဟှစဘီး ကိုယ်မွီးဟှူ ဇာတိပြည်မာရော၊ ယေရုရှလင်ဗြို့မာရော၊ ဖယ်မျိုးနေနူး။ ဆိုဇာဟှို ယုဒလူမျိုးလေဟှာ သိဂေ့ဟှယ်။ 5 ✝၂၆.၅ တ ၂၃.၆; ဖိ ၃.၅ကျွန်တော့်ဟှို သူးနို့ဟှ သိဂေ့ဟှူဇာဟှာ ရရာကြာဟှားဘီ။ ကျွန်တော့်ဟှာ ယုဒဘာသာမာ ရရာတိုင်း ကျဉ်းကျပ်ဟှူ စည်းမျဉ်းလေဟှို လိုက်နာကျင့်သောင်းဟှူ ဖာရိရှဲဖွဲ့ဝမ် တယော့-က်နေနလည်း သတ်ရှင်လာဟှူကြောန်းဟှို အယ်လူလေဟှ သတ်သေခံရှင်ဟှယ် ဆိုဟှာ ခံနိုင်ဂေ့ဟှယ်။ 6 ဘုရားသခင်ဟှာ ကျွန်တော့်လေ ဘိုးဘေးဟှို ထားဟှားဟှူ ဂဒိတော်ဟှို ကျွန်တော်ဟှာ မျှော်လင့်ဘီးဟှာ စောန့်နေဟှို့တွပ်ကြောန့် ခု စစ်ဆေးခံနေရဟှယ် — 7 အယ်ဂဒိတော်ဟှာ ကျွန်တော့်လေ မျိုးနွယ်ဆယ်နှေ့မျိုးဟှာ နေ့ညဉ့်မပြတ် ဘုရားသခင်ဟှို ဝတ်ပြုကိုးကွယ်ဘီး မျှော်လင့်ဘီးဟှာ စောန့်နေဂေ့ဟှူ ဂဒိတော်ဘဲ့ဖြစ်ဟှယ်။ မန်းဂီး၊ အယ်မျိုး မျှော်လင့်ဘီးဟှာ စောန့်နေဇာကြောန့် ကျွန်တော့်ဟှို ယုဒလူမျိုးလေဟှ စွပ်စွဲဘီး ပြောနေဂေ့ဇာ ဖြစ်ဟှယ်။ 8 သေဟှားလူလေဟှို ဘုရားသခင်ဟှ ရှင်ပ္လန်ထမြော့-က်ခိုင်းဟှယ် ဆိုဇာဟှာ ယောင်နိုင်ဇာ မှေ့ဟှ ဆိုဘီး အယ်နေရာမာ ရှိနေဟှူ လူလေဟှာ ဖြားဖြစ်ကြောန့် စီရင်နေဂေ့နူး။

9 ✝ ၂၆.၉–၁၁ တ ၈.၃; ၂၂.၄,၅ "ကျွန်တော်ကိုယ်တိုင်ဘဲ့ နာဇရက်ဗြို့သား ယေရှုရဲ့ နာမတော်န ဆန့်ကျင်ဟှူ မှုလေဟှို လောက်သင့်ဟှယ် ဆိုဇာဟှို ယူဆဟှားဟှယ်။ 10 ယေရုရှလင်ဗြို့မာ အယ်မျိုးလောက်ဟှယ်။ ယဇ်ပုရောဟိတ်မန်းရဲ့ ခွမ့်အာဏာန သန့်ရှင်းသူလေဟှို ထောန်ထဲမာ ကျဉ်းခ္လဟှားဟှယ်။ သူးနို့ဟှို သေဒန်စီရင်ဟှူ ခီမာ ကျွန်တော်ဟှ ဘောတူပေးဟှယ်။ 11 အယ်လူလေဟှာ ဘုရားသခင်ဟှို စော်ကားပြောဆိုအောန် ကျွန်တော်ဟှာ ဝါလယ်ဇရပ်လေမာ သူးနို့ဟှို ကီဒန်ပေးခိုင်းဘီးဟှာ သူးနို့ရဲ့ ယူဝါဒဟှို စွန့်ပစ်ဂေ့ဟှို့တွပ် ကြိုးစားဘီး လောက်ဆောန်ဟှယ်။ သူးနို့လေဟှို ဒေါသစိလေကြောန့် ကျွန်တော်ဟှာ နိုင်ငံရပ်ခြားမာရှိဟှူ ဗြို့လေဟှို သွားဘီးဟှာ သူးနို့လေဟှို ညှဉ်းဆဲလာဟှယ်။

12 "အယ်မျိုး ရည်ရွယ်ချစ်န ကျွန်တော်ဟှာ ယဇ်ပုရောဟိတ်မန်းလေမာ ခွမ့်ပြုချစ်န ခွမ့်အာဏာဟှို ယူဘီးဟှာ ဒမာသက်ဗြို့ဟှို သွားနေဟှူ ခီမာ 13 မွန်းဒဲ့ခီန ကောန်းဂန်ဟှနေ နေထတ်တော့-က်ပဟှူ လန်းရောန်ဟှာ ထွန်းတော့-က်လာဇာဟှို ကျွန်တော်န ကျွန်တော့် ပတ်လည်မာရှိနေဟှူ ကျွန်တော့် ပေါန်းဖော်လေပါ ဗြင်ရဟှယ်။ အဂြိပ္ပမန်းဂီး။ 14 အယ်ခီမာ ကျွန်တော့်လေ ဂူလောင်းဟှာ မ္လေဂီးမာ လဲက္လဂေ့ဟှယ်။ အယ်ဘီးန ယုဒဘာသာ စကားန ‘ရှောလု၊ ရှောလု၊ ဖြားဖြစ်ကြောန့် ငါ့ဟှို ညှဉ်းဆဲနူး။ ဒေါက်ရှောန်ဟှို ခေနကန်မယ် ဆိုဟှာ နန်ဘဲ့နာလေ့မယ်’ ဆိုဘီး သံတော်ဟှို ကျွန်တော်ကြားရဟှယ်။ 15 အယ်ခီမာ ကျွန်တော်ဟှ ‘သခင်၊ ကိုယ်တော်ဟှ ဖယ်သူနူး’ ဆိုဘီး မေးလျှော့-က်လိုက်ဟှယ်။ အယ်သခင်ဟှ ‘ငါဟှာ နန်ညှဉ်းဆဲနေဟှူ ယေရှုဘဲ့ ဖြစ်ဟှယ်။ 16 အယ်ဘေမဲ့ ထဘီးဟှာ မတ်တတ်ရပ်လိုက်။ နန့်ဟှို ငါ့ရဲ့*၂၆.၁၆ တချို့ မူရင်းလတ်ရေးမူလေမာငါ့ရဲ့၊ ဆိုဇာဟှာ မှေ့ဟှ။ မှုတော်ဆောန်နေန ခန့်ဟှို့တွပ် နန့်နားဟှို ငါဟှ ကြွလာဇာဖြစ်ဟှယ်။ အယ်နေ့ နန့်ဗြင်ရဟှူ ဗျာဒိတ်ရူပါရောင်ကြောန်းန နော့-က်ခါမာလည်း ငါဖော်ပြဟှူ ကြောန်းရာလေဟှို နန်ဟှာ တခြားသူလေဟှို သတ်သေခံရမယ်။ 17 ငါဟှာ နန့်ဟှို ဣသရေလလူမျိုးလေ လတ်ဟှနေရော၊ လူမျိုးခြားလေ လတ်ဟှနေရော၊ ကယ်တန်မယ်။ 18 နန်ဟှာ ခုဗြင်ရဟှူဇာလေ၊ နော့-က်မှ ငါဟှာ နန့်ဟှို ထန်ရှားဟှားဟှူ ကြောန်းရာလေ၊ မှုတော်ဆောန်ဟှူသူ၊ သတ်သေခံဟှူသူ့နေန နန့်ဟှို ခန့်ဟှားဟှို့တွပ် ငါဟှာ နန့်ဟှို ထန်ရှားဟှယ်။ လူမျိုးခြားလေဟှာ မှောန်ထဲဟှနေ လန်းရောန်ထဲဟှို ရော့-က်လာဘီး စာတန်ရဲ့ ခွမ့်အာဏာထဲဟှနေဘီး ဘုရားသခင်နားဟှို ပ္လောန်းလဲလာဘီးဟှာ ပြစ်လွှတ်ခံရဟှို့ကြောန်း၊ ငါ့ဟှို ယောင်ကြည်လိုက်ဟှူန သန့်ရှင်းဇာရဟှားဟှူ လူလေန မွေခံရဟှူကြောန်း သူးနို့လေရဲ့ မျစ်စိဟှို ဖွမ့်ပေးဟှို့တွပ် သူးနို့နားဟှို ငါ နန့်ဟှိုလွှတ်မယ် ဆိုဘီး မိန့်တော်မူလေဟှယ်။

19 "အယ်ကြောန့် အဂြိပ္ပမန်းဂီး၊ ကျွန်တော်ဟှာ ကောန်းဂန်ဘောင်ဟှနေရဟှူ ဗျာဒိတ်ရူပါရောင်ဟှို လွန်ဆန်နိုင်ဟှ။ 20 ✝၂၆.၂၀ တ ၉.၂၀,၂၈,၂၉‘လူလေဟှာ နောန်ဒရဘီး ဘုရားသခင်နားဟှို ပ္လောန်းလဲရဂေ့မယ်။ နောန်ဒနတန်ဟှူ ကျင့်ဟှိုလည်း ကျင့်ရမယ်’ ဆိုဘီး ဦးဆောင်း ဒမာသက်ဗြို့၊ အယ်ဘီးန ယေရုရှလင်ဗြို့ဟှနေ စဘီး ယုဒပြည် တပြည်လောင်းမာရှိဟှူ လူလေဟှိုရော၊ လူမျိုးခြားလေဟှိုရော၊ ကျွန်တော် ဟောပြောဟှယ်။ 21 အယ်ကြောန့် ယုဒလူမျိုးလေဟှာ ကျွန်တော့်ဟှို ဗိမာန်တော်ထဲမာ ဖမ်းဘီးဟှာ သတ်ဟှို့တွပ် ကြိုးစာဂေ့ဟှယ်။ 22,23 ✝၂၆.၂၂–၂၃ ၁ ကော ၁၅.၂၀အယ်ဘေမဲ့ ဘုရားသခင်ရဲ့ ကျေးဇူးတော်ဟှို ကျွန်တော်ခံရဟှူကြောန့် ခုထတ်ထိရှိနေဟှယ်။ မေရှိယဟှာ သေခံရမယ် ဆိုဇာဟှိုရော၊ သေဘီးဟှာ ဦးဆောင်း ရှင်ပ္လန်ထမြော့-က်ဘီးဟှာ ဣသရေလလူမျိုးလေန၊ လူမျိုးခြားလေဟှို ကယ်တန်ဇာနဆိုင်ဟှူ လန်းတရားဟှို ကြေညာလေ့မယ် ဆိုဇာဟှိုရော မောရှေဟှစဘီး ပရောဖက်လေဟှ ဟောဘီး ဒိပေးရစ်ဟှူတိုင်းဘဲ့ ကျွန်တော်ဟှာ လူဂီးလူငယ်လေဟှို သတ်သေခံဘီး နေဟှယ်" ဆိုဘီး ပ္လန်လျှော့-က်လိုက်ဟှယ်။

24 အယ်မျိုး လျှော့-က်ဟှူ ခီမာ ဖေတ္တုမန်းဟှ "ပေါလု၊ နန်ဟှာ ရူးဟှားဘီ။ တတ်လွန်ဘီးဟှာ ရူးဟှားဘီ!" ဆိုဘီး အော်ပြောလိုက်ဟှယ်။

25 ပေါလုဟှ "ဖေတ္တုမန်း၊ ကျွန်တော်ဟှာ ရူးနေဇာ မှုဟှ။ သခင်ဟှို လေးလေးနတ်နတ်န သမ္မာတရားဟှို ပြောနေဇာဖြစ်ဟှယ်။ 26 အဂြိပ္ပမန်းဂီး၊ အယ်မူဇာလေကြောန်းဟှို သခင်ဟှာ သိဟှူကြောန့် ကျွန်တော်ဟှာ သခင်ရဲ့ ရှေ့မာ ရဲရဲရင့်ရင့်ဟှား လျှော့-က်ဟှားရှင်း ဖြစ်ဟှယ်။ အယ်မူဇာလေဟှာ ခ္လောန်းကြိုခ္လောန်းကြားလေမာ ဖြစ်လာဇာ မှုဟှ။ အယ်ကြောန်းရာလေ ဂူလောင်းဟှို သခင် သိဟှယ် ဆိုဇာဟှို ကျွန်တော် လတ်ခံယောင်ကြည်ဟှယ်။ 27 အဂြိပ္ပမန်းဂီး၊ သခင်ဟှာ ပရောဖက်လေဟှို ယောင်ကြည်ဘဲ့လော။ သခင်ဟှ ယောင်ကြည်ဟှယ် ဆိုဇာဟှို ကျွန်တော်သိဟှယ်!" ဆိုဘီး လျှော့-က်လိုက်ဟှယ်။

28 အဂြိပ္ပမန်းဂီးဟှ "နန်ဟှာ ငါဟှို ရှစ်ဟှားဒဲန ခရစ်ယာန်ဖြစ်အောန် သွီးဆောန်နိုင်မယ် ဆိုဘီး ထန်နေလော" ဆိုဘီး ပေါလုဟှို ပြောဟှယ်။

29 ပေါလုဟှ "ခီဗြန်ဇာလေ၊ ခီကြာဇာလေဟှာ ဓိကမှုဟှ။ သခင်နတူးဒူ အယ်နေ့ ကျွန်တော်ပြောဇာဟှို နားထောန်နေဟှူ လူလေဟှာ အယ်မျိုး တောက်နှောန်ခံရဟှူ မှုဟှလွဲဘီး ကျွန်တော်မျိုး ဖြစ်လာဂေ့ဟှို့တွပ် ဘုရားသခင်ဟှို ကျွန်တော်ဟှာ ဆုတောန်းဟှယ်" ဆိုဘီး လျှော့-က်လိုက်ဟှယ်။

30 အယ်ခီမာ မန်းဂီးန ဖေတ္တုမန်းလေဟှာ မိဖုရား ဗေရနိတ်န ဖွဲ့ဝမ်လေဟှာ ထိုင်နေဟှူနေရာဟှ ထဟှားဂေ့ဟှယ်။ 31 သူးနို့ဟှာ အယ်နေရာဟှ ထွပ်ဟှားဘီးန "အယ်လူဟှာ သေဒန် အယ်မျိုးမှုဘဲနေဟှာ တောက်နှောန်ခံရဟှူပြစ်လေ ခုလည်း ကျူးလွန်ဟှ" ဆိုဘီး ရှင်းရှင်း ပြောဂေ့ဟှယ်။ 32 အဂြိပ္ပမန်းဂီးဟှ "အယ်လူဟှာ ကဲသာမန်းဂီးနားဟှို ယူခံဝမ်ဟှို့တွပ် တောန်းခံဘဲနေဟှာ သူ့ဟှို လွှတ်ပေးနိုင်ဟှယ်" ဆိုဘီး ဖေတ္တုမန်းဟှို ပြောဟှယ်။