18 တမန်တော်လေ လတ်တန်ဟှူ ခီမာ သန့်ရှင်းဟှူဝိညာဉ်တော်ဟှို အယ်ယောင်ကြည်သူလေ ရရှိဟှားဟှယ် ဆိုဇာဟှို ရှိမုန်ဟှ ဗြင်ဟှားဟှူကြောန့် ကပ်ဟှို ယူလာဘီးဟှာ၊ 19 "ကျွန်တော် လတ်တန်လိုက်ဟှူ လူတိုင်းဟှာ သန့်ရှင်းဟှူဝိညာဉ်တော်ဟှို ရဟှို့တွပ် တဂိုးအာဏာဟှို ကျွန်တော်ဟှိုလည်း ပေးပါ" ဆိုဘီး တောန်းလိုက်ဟှယ်။
20 ပေတရုဟှ "နန်ဟှာ ဘုရားသခင်ရဲ့ ဆုကျေးဇူးဟှို ကပ်န ဝယ်နိုင်ဟှယ် ဆိုဘီး ထန်မှတ်ဟှူကြောန့် နန့်ရဲ့ ကပ်ဟှာ နန့်နတူးဒူ ပျစ်စီးပါစေ။ 21 ဘုရားသခင်ရှေ့မာ နန့်ရဲ့ စိနှလောင်းဟှာ ဖြောန့်ဘဲဟှူကြောန့် နို့လေရဲ့ လောက်ထဲမာ ပါဝမ်ခွမ့် မှေ့ဟှ။ နန့်ဝီစုလည်း မှေ့ဟှ။ 22 အယ်မျိုး ဆိုးညစ်ဟှူ ကြံစည်ဟှို နောန်ဒရဘီး အယ်မျိုးစိနှလောင်းထဲမာ ကြံစည်မိဟှူဇာဟှို ပြစ်လွှတ်ခံရဟှို့တွပ် သခင်ဘုရားနားမာ ဆုတောန်းပါ။ 23 ဖြားဖြစ်ကြောန့်နူးဆိုဟှာ နန်ဟှာ ရိုးသားဘဲဟှူစိန ပ္လဲ့နေဘီးဟှာ ပြစ်ရဲ့ ချောက်နှောန်ဇာထဲမာ ရှိနေဇာဟှို ငါဗြင်ဟှယ်" ဆိုဘီး ပြောဟှယ်။
24 ရှိမုန်ဟှ "သင်ပြောနေဇာလေ တခုလည်းဖြစ်ဘဲဟှို့တွပ် သခင်ဘုရားဟှို ကျွန်တော်တွပ် ဆုတောန်းပေးဂေ့ပါ" ဆိုဘီး တောန်းဗန်လေဟှယ်။