1 ✝ဆယ့်လေးနှစ်ကြာဘီးန ငါဟှာ တိတုဟှို ခေါ်ဘီး ဗာနဗနတူးဒူ ယေရုရှလင်ဗြို့ဟှို ပ္လန်တတ်ဟှားလိုက်ဟှယ်။ 2 ဖြားဖြစ်ကြောန့်နူးဆိုဟှာ ဘုရားသခင်ဟှ ငါသွားရမယ် ဆိုဘီး ငါ့ဟှို ဖွမ့်ပြကြောန့် သွားလိုက်ဇာဖြစ်ဟှယ်။ ခေါန်းဆောန်လေန သီးသန့်တွိဆောန်ဘီး လူမျိုးခြားလေဟှို ငါဟောပြောဟှူ ဒန်းကောန်းဟှို ရှင်းလန်းပြဟှယ်။ ဖြားဖြစ်ကြောန့်နူးဆိုဟှာ လောက်ဆောန်ဟှားဘီးဟှူဇာလေန ခုလောက်ဆောန်နေဇာလေဟှို ချည်းနှီးဖြစ်ရှင်ဘဲကြောန့် ဖြစ်ဟှယ်။ 3 ငါ့နတူးဒူ ပါလာဟှူ တိတုဟှာ ဂရိလူမျိုးဖြစ်ဘေမဲ့ ငါဟှာ ရေဖျားလှီးဇာဟှို အတင်းခံစေဟှ။ 4 ယေရှုခရစ်တော်နှိုက် နို့လေရရှိဟှူ လွတ်လပ်မှုဟှို စောင်ဇမ်းဟှို့ နို့လေအောက်စုထဲ တိတိဟှားဝမ်လာဟှူ ယောင်ကြည်သူ တုယောန် တချို့ဟှာ အယ်မျိုး ရေဖျားလှီးဇာဟှို လိုရှင်ဂေ့ဟှယ်။ သူးနို့ဟှာ နို့လေဟှို ကျွန်ပ္လန်ဖြစ်စေရှင်ဘေမဲ့၊ 5 မှန်ဟှူ ဧဝံဂေလိတရားဟှာ နန်းနို့ထဲမာ တည်ရှိနေကြောန့် နို့လေဟှာ သူးနို့ဟှို ရှစ်ဟှားမျှ လျှော့ပေးဟှ။

6 ခေါန်းဆောန်လေ ဆိုဘီး ထန်မှတ်ရဟှူ လူလေဟှာ ငါ့ရဲ့ ဟောပြောဇာလေဟှို ထပ်ဘီး ဖြားဇာလည်း ဆွေးနွေးဂေ့ဟှမ်း။ သူးနို့ဟှာ တကယ်ဘဲ့ ခေါန်းဆောန်လေ ဖြစ်ဟှယ်၊ ဖြစ်ဟှ ဆိုဇာ ငါ့တွပ်ရေးကီးဟှ။ ဖြားဖြစ်ကြောန့်နူးဆိုဟှာ ဘုရားသခင်ဟှာ ပြင်ပ လတ်ခဏာလေဟှို ကေ့ဘီး စီရင်တော်မူဘဲကြောန့် ဖြစ်ဟှယ်။ 7 သူးနို့ဟှာ ဆွေးနွေးဟှို့စား ဘုရားသခင်ဟှာ ပေတရုဟှို ရေဖျားလှီးဟှားဟှူ လူလေထံဟှို ဒန်းကောန်းဟောပြောဟှို့ တာဝန်ပေးဟှားဟှယ် ဆိုဘီး ယောင်ကြည်ဂေ့မျိုးဘဲ့ ငါ့ဟှိုလည်း ရေဖျားလှီးဘဲဟှူ လူလေထံဟှို ဒန်းကောန်းဟောပြောဟှို့ တာဝန်ပေးဟှားဟှယ် ဆိုဘီး ဗြင်ဟှားဂေ့ဟှယ်။ 8 ဖြားဖြစ်ကြောန့်နူးဆိုဟှာ ဘုရားသခင်ရဲ့ တဂိုးတော်အားဖြင့် ပေတရုဟှာ ရေဖျားလှီးဟှားဟှူ လူလေတွပ် တမန်တော်ရာနှိုက် မှုတော်ဆောန်ဘီး ငါဟှာ လူမျိုးခြားလေတွပ် တမန်တော်ဖြစ် မှုတော်ဆောန်ဟှို့ဖြစ်ဟှယ်။ 9 မဏ္ဍိုင်မျိုးဖြစ်ဟှူ ယာကုပ်၊ ပေတရု၊ ယောဟန်လေဟှာ ငါ့ရဟှားဟှူ ကျေးဇူးတော်ဟှို သိဂေဟှူကြောန့် မိတ်သဟာယဖွဲဘီး နို့လေဂူလောင်းဟှာ လောက်ဖော်ဆောန်ဖတ်လေ ဖြစ်ဟှယ် ဆိုဇာဟှို လတ်ခဏာတခုဖြစ် သူးနို့ဟှာ ဗာနဗန ငါ့ဟှို လတ်ဆွဲနှုဆစ်ဂေ့ဟှယ်။ ဗာနဗန ငါဟှာ လူမျိုးခြားလေထဲမာ မှုတော်ဆောန်ဘီး သူးနို့ဟှာ ရေဖျားလှီးဟှူ လူလေထဲမာ မှုတော်ဆောန်ဟှို့ ဘောတူဂေ့ဟှယ်။ 10 နို့လေဟှာ ဆင်းရဲသားလေဟှို ကူညီမဇဟှို့တွပ် သူးနို့လိုရှင်ဘီး အယ်မျိုး လောက်ဆောန်ဟှို့တွပ် ငါလည်း စိအားထတ်သန်မှု ရှိဟှယ်။*

11 အန္တိအုတ်ဗြို့ဟှို ပေတရုရော့-က်လာခီမာ သူ့ရဲ့အပြုမှုလေဟှာ မှားနေဇာထန်ရှားကြောန့် ငါဟှာ သူ့ဟှို လူလေရှေ့မာ ပြစ်တန်ဟှယ်။ 12 ယာကုပ်စေလွှတ်လိုက်ဟှူ လူအချို့ ရော့-က်လာခန်မာ ပေတရုဟှာ လူမျိုးခြားလေနတူးဒူ စားနေဂေ့ဟှယ်။ အယ်ဘေမဲ့ ယာကုပ်စေလွှတ်လိုက်ဟှူ လူလေရော့-က်လာဘီးန သူဟှာ လူမျိုးခြားလေနတူးဒူ စားဘဲန ခပ်ခွာခွာဟှား နေဟှယ်။ ဖြားဖြစ်ကြောန့်နူးဆိုဟှာ သူဟှာ ရေဖျားလှီးဟှားဟှူ လူလေဟှို ကြော့-က်ဟှူကြောန့် ဖြစ်ဟှယ်။ 13 တခြားယုဒလူမျိုး ယောင်ကြည်သူလေလည်း ပေတရုမျိုးဘဲ့ ဟန်ဆောန်ဟှူ ပြုမူလေဟှို စဘီး လောက်ဆောန်လာဟှူ ခီမာ သူးနို့ရဲ့ သူရဲဘောကြောန်ဟှူ ပြုမူလေအားဖြင့် ဗာနဗလည်း သူးနို့ဖတ်ဟှို ပါဟှားဟှယ်။ 14 သူးနို့ဟှာ မှန်ဟှူ ဧဝံဂေလိတရားန တည့်တည့်မတ်မတ် သွားဂေ့ဟှ ဆိုဇာဟှို ငါဗြင်ဟှားဟှူ ခီမာ ငါဟှာ ပေတရုဟှို လူလေရဲ့ ရှေ့မာ ပြောလိုက်ဇာဟှ "နန်ဟှာ ယုဒလူမျိုးတယော့-က်ဖြစ်ဘီး ယုဒလူလေမျိုး သတ်ရှင်ဘဲန လူမျိုးခြားတယော့-က်လို သတ်ရှင်ဟှယ်။ အယ်ဘီးဟှာ လူမျိုးခြားလေဟှို ယုဒလူမျိုးလို နေထိုင်ဟှို့ ဖြားဖြစ်ဟှိ ကြိုစားနေနူး"

15 နို့လေဟှာ မွီးဂဒဲဟှ ယုဒလူမျိုးလေဖြစ်ဘီး "လူမျိုးခြား ပြစ်သားလေ" မှုဟှ။ 16 ✝အယ်ဘေမဲ့ လူဟှာ ပညတ်တရားဟှို လိုက်ရှော့-က်ဟှူဇာအားဖြင့် ဖြောန့်မတ်ဟှားဇာမှုဟှ။ ယေရှုခရစ်ဟှို ယောင်ကြည်ရှင်းအားဖြင့်ဘဲ့ ဖြောန့်မတ်ဟှားဟှယ် ဆိုဇာဟှို နို့လေသိဂေ့ဟှယ်။ အယ်ကြောန့် နို့လေလည်း ပညတ်တရားဟှို လိုက်ရှော့-က်ဟှူဇာအားဖြင့်မှုဘဲ ခရစ်တော်ဟှို ယောင်ကြည်ရှင်းအားဖြင့်ဘဲ့ ဖြောန့်မတ်ဟှို့တွပ် ခရစ်တော်ယေရှုဟှို ယောင်ကြည်ဂေ့ဟှယ်။ ဖြားဖြစ်ကြောန့်နူးဆိုဟှာ ပညတ်တရားဟှို လိုက်ရှော့-က်ရှင်းအားဖြင့် ဖယ်သူလည်း ဖြောန့်မတ်မှုဟှို ရနိုင်ဘဲကြောန့်ဖြစ်ဟှယ်။ 17 အယ်ဆိုဟှာ နို့လေဟှာ ခရစ်တော်နှိုက် ဖြောန့်မတ်ဟှို့တွပ် ကြိုးစားနေခီမာ နို့လေလည်း လူမျိုးခြားလေလို ပြစ်သားလေဖြစ်ကြောန်း တွိရှိဟှားမယ် ဆိုဟှာ ခရစ်တော်ဟှာ နို့လေဟှို ပြစ်လောက်ဟှို့ စေခံဟှယ် ဆိုဘီး ဆိုနိုင်လော။ လောင်းဝ ဆိုနိုင်ဟှ။ 18 ငါဖျစ်ဆီးဟှားဟှူဇာဟှို ပ္လန်တည်ဆော့-က်မယ် ဆိုဟှာ ငါဟှာ ပညတ်တရားဟှို ခ္လိုးဖော့-က်မားဖြစ်ဟှယ် ဆိုဇာဟှို ဖော်ပြနေဇာဖြစ်ဟှယ်။ 19 ဖြားဖြစ်ကြောန့်နူးဆိုဟှာ ငါဟှာ ဘုရားသခင်နှိုက် သတ်ရှင်နိုင်ဟှို့တွပ် ပညတ်တရားအားဖြင့် ပညတ်တရားနှိုက် သေဟှားပီးဘီး။ ငါဟှာ ခရစ်တော်နတူးဒူ လတ်ဝါးကပ်တိုင်မာ သေခံဘီ။ 20 အယ်ဘေမဲ့ သတ်ရှင်သေးဟှယ်။ အယ်မျိုးဆိုဟှာ ငါဟှာ ကိုယ်တိုင်ရှင်ဇာမှုဟှ ခရစ်တော်ဟှာ ငါနှိုက်ရှင်ဟှူ ဇာဖြစ်ဟှယ်။ ကိုယ်ခန္ဓာနှိုက် ခု ငါရှင်နေဟှူ သတ်ဟှာ ဘုရားသခင်ရဲ့ သားတော်ဟှို ယောင်ကြည်ဇာအားဖြင့် ရှင်နေဟှူ သတ်ဖြစ်ဟှယ်။ သားတော်ဟှာ ငါ့ဟှို ရှစ်ဟှူကြောန့် ငါ့တွပ် သတ်ဟှို စွန့်ပေးတော်မူဟှယ်။ 21 ဘုရားသခင်ရဲ့ ကျေးဇူးတော်ဟှို ငါပယ်ဟှ။ ဖြားဖြစ်ကြောန့်နူးဆိုဟှာ ပညတ်တရားအားဖြင့် ဖြောန့်မတ်နိုင်မယ် ဆိုဟှာ ခရစ်တော်ဟှာ ချည်းနှီး သေခံတော်မူဘီ။