1 ပသခါပွဲတော်တိုင်ခန် ခြော့-က်ရစ်ဘဲ့လိုဟှူ ခီမာ သေဘီးန ပ္လန်ရှင်လာဟှူ လာဇရုနေထိုင်ဟှူ ဗေသနိဝါဟှို ယေရှုဟှာ ကြွတော်မူလေဟှယ်။ 2 သူးနို့ဟှာ ကိုယ်တော်တွပ် ညဉ့်ခန်းဇာဟှို ပြင်ဆင်ဘီးန မာသဟှ လောက်ကျွေးပြုလေဟှယ်။ ယေရှုနတူးဒူ ဗွဲမာထိုင်နေဟှူ လူလေထဲမာ လာဇရုလည်း ရှိနေလေဟှယ်။ 3 ✝၁၂.၃ လု ၇.၃၇,၃၈အယ်ခီမာ မာရိဟှာ ရာရတိုင်း ဖိုးကီးဟှူ နာဒုဆီမွှီးစစ်စစ် ဖူးဝပ်ဟှို ယူဘီး ယေရှုရဲ့ ခေတော်ထတ်ဟှို လောန်းခ္လဘီးန သူ့ရဲ့ ဆားဗန်န သုပေးလေဟှယ်။ အယ်ဆီမွှီးရဲ့ နံ့ဟှာ တအီလောင်းဟှို မွှီးကြိုင်ဟှားလေဟှယ်။ 4 ယေရှုရဲ့ တဗဲ့တော်တပါးဖြစ်ဟှူ ကိုယ်တော့်ဟှို သစ်စာဖော့-က်မယ့်လူဖြစ်ဟှူ ယုဒရှကာရုတ်ဟှ 5 "ဖြားဖြစ်ကြောန့် အယ်ဆီမွှီးဟှို ငွေဒန်းဂါး*၁၂.၅ ငွေဒန်းဂါး၊ ရှု ၆.၇။ န ရောန်းလိုက်ဘီးဟှား ဆင်းရဲသားလေဟှို ပေးဘဲ့နေရနူး" ဆိုဘီး မေးလေဟှယ်။ 6 သူဟှာ အယ်မျိုးပြောနေဇာဟှ ဆင်းရဲသားလေဟှို သနားကြောန့်မှုဘဲန သူခိုးတယော့-က် ဖြစ်ကြောန့်ဖြစ်ဟှယ်။ သူဟှာ ကပ်အိဟှို လွယ်ရသူဖြစ်ဘီး ကပ်လေဟှို နှိုက်ယူတတ်ဟှယ်။

7 အယ်ဘေမဲ့ ယေရှုဟှ "အယ်မီးမဟှို နှော့-က်ယှစ်ဂေ့န! သူဟှာ ငါ့ဟှို သင်္ဂြိုဟ်မယ့်နေ့တွပ် အယ်ဆီမွှီးဟှို သီးဟှားဇာဖြစ်ဟှယ်။ 8 ဆင်းရဲသားလေဟှာ နန်းနို့နတူးဒူ မြဲဒမ်း ရှိဂေ့ဟှယ်။ ငါဟှ နန်းနို့နတူးဒူ မြဲဒမ်း ရှိနေဟှို့ မှုဟှ" ဆိုဘီး မိန့်တော်မူလေဟှယ်။

9 ဗေသနိဝါမာ ယေရှုရှိတော်မူဟှယ် ဆိုဇာဟှို ကြားလိုက်ဟှူ ယုဒလူလေဘောင်ဂီးဟှာ အယ်ဝါဟှို လိုက်ဟှားဂေ့ဟှယ်။ သူးနို့ဟှာ ယေရှုဟှို တွိရှင်ရောင်မျှမက သေရာဟှနေ ပ္လန်ရှင်လာဟှူ လာဇရုဟှိုလည်း တွိရှင်ဂေ့ဟှယ်။ 10 အယ်ကြောန့် ယဇ်ပုရောဟိတ်ဂီးလေဟှာ လာဇရုဟှိုလည်း သတ်ဟှို့တွပ် ကြံစည်ဂေ့ဟှယ်။ 11 ဖြားဖြစ်ကြောန့်နူးဆိုဟှာ ယုဒလူဘောင်ဂီးဟှာ လာဇရုကြောန့် သူးနို့ဟှို ငြင်းပယ်ဘီး ယေရှုဟှို ယောင်ကြည်လာဂေ့ဟှယ်။

12 နော့-က်နေ့မာ ပသခါပွဲတော်ဟှို လာဟှူ လူအောက်ဂီးဟှာ ယေရုရှလင်ဗြို့ဟှို ယေရှုကြွလာတော်မူကြောန်းဟှို ကြားလိုက်ဟှယ်။ 13 အယ်ကြောန့် သူးနို့ဟှာ စွန်ပလွံခတ်လေဟှို ယူဘီး ကိုယ်တော့်ဟှို ကြိုဆိုဟှို့သွားဂေ့ဘီး "ဟောရှဏ္ဏ! ဘုရားသခင်ရဲ့ နာမန ကြွလာဟှူ သခင်ဟှာ မင်္ဂလာရှိတော်မူဟှယ်! ဣသရေလမန်းဂီးဟှာ မင်္ဂလာရှိတော်မူဟှယ်!" ဆိုဘီး ကြွေးကြော်ဂေ့လေဟှယ်။

14 ယေရှုဟှာ မြည်းသားဂန်းဟှို တွိဟှားဘီး စီးတော်မူလေဟှယ်။

15 အယ်မူဇာဟှ "ဇိအုန်ဗြို့ စိုးရိမ်န!

နန်းနို့ရဲ့ မန်းဂီးဟှာ

မြည်းသားဂန်းဟှားဟှို စီးဘီးဟှာ ကြွလာတော်မူဘီ" ဆိုဘီး ကျမ်းစာမာ အယ်မျိုး ပြောဟှားလေဟှယ်။

16 တဗဲ့တော်လေဟှာ အယ်ခီဒူးဟှ အယ်ကျမ်းစာဟှို နားလည်ဂေ့ဟှ။ အယ်ဘေမဲ့ ယေရှုဟှာ ဖောင်းသရေတော်တွပ် ပ္လန်ရှင်လာဟှူ ခီမာ အယ်ကျမ်းစာဟှ ကိုယ်တော်ကြောန်းဟှို ရေးဟှားဇာဖြစ်ဟှယ် ဆိုဇာန ကိုယ်တော့်ဟှို အယ်မျိုး လောက်ဇာဖြစ်ဟှယ် ဆိုဇာလေဟှို ပ္လန်အော့-က်မေ့လာဂေ့ဟှယ်။

17 ယေရှုနတူးဒူရှိနေဟှူ လူလေဟှာ လာဇရုဟှို သန်းခ္လိုင်းဂူဟှနေ ခေါ်ထုလိုက်ဘီး သေရာဟှနေ ပ္လန်ရှင်စေဟှူကြောန်းဟှို သတ်သေခံဂေ့ဟှယ်။ 18 ဖြားကြောန့်ဟှိ လူအောက်ဟှာ ကိုယ်တော့်ဟှို ကြိုဆိုဂေ့ဇာဟှာ သူးနို့ဟှာ အယ်မျိုး နိမိတ်လတ်ခဏာလေဟှို ပြတော်မူကြောန်းဟှို ကြားဟှားဂေ့ဟှယ်။ 19 အယ်ကြောန့် ဖာရိရှဲလေဟှာ "နို့လေဟှာ လောက်ဝ အောန်မြင်နိုင်ဟှ! ကေ့ကေ့။ တလောကလောင်းဟှာ အယ်လူနော့-က်ဟှို လိုက်ဟှားဂေ့ဘီ!" ဆိုဘီး သူးနို့ရှင်းရှင်း ပြောနေဂေ့ဟှယ်။

20 ပွဲတော်မာ ကိုးကွယ်ဟှို့တွပ် ယေရုရှလင်ဗြို့ဟှို ရော့-က်လာဟှူ လူလေထဲမာ လူမျိုးခြားတချို့လည်းပါဟှယ်။ 21 သူးနို့ဟှာ ဂါလိလဲနယ် ဗက်ဇဲဒဗြို့သားဖြစ်ဟှူ ဖိလိပ္ပုနားဟှို သွားဘီး "ဆရာ၊ ကျွန်တော့်ဟှားလေ ယေရှုဟှို ဗြင်ရှင်ဟှယ်" ဆိုဘီး တောန်းလျှော့-က်ဂေ့ဟှယ်။

22 ဖိလိပ္ပုဟှာ အန္ဒြေနားဟှို သွားပြောပြဘီးဟှာ သူးနို့နှေ့ယော့-က်ဟှာ ယေရှုနားဟှို သွားဘီး လျှော့-က်ဂေ့ဟှယ်။ 23 ယေရှုဟှာ သူးနို့ဟှို "လူ့ရဲ့သားဟှာ ရရာတိုင်း ကီးမားဟှူ ဖောင်းသရေတော်ဟှို လတ်ခံဟှို့ ခီဟှာ ခုဘဲ့ရော့-က်နေဘီ။ 24 နန်းနို့ဟှို ငါ မှန်တိုင်းပြောမယ်၊ ဂျောင်စေ့တစေ့ဟှာ မ္လေဂီးထဲဟှို က္လဘီး ပျစ်စီးဟှ ဆိုဟှာ တစေ့ဒဲဘဲ ရှိနေလေ့မယ်။ အယ်စေ့ဟှာ ပျစ်စီးဟှားမယ် ဆိုဟှာ သီးလေ ဘောင်ဂီး ဖြစ်ဟှားဟှယ်။ 25 ✝၁၂.၂၅ မ ၁၀.၃၉; ၁၆.၂၅; မာ ၈.၃၅; လု ၉.၂၄; ၁၇.၃၃ကိုယ့်သတ်ဟှို ရှစ်ဟှူ လူလေဟှာ သတ်ဆောင်းရှောင်း လေ့မယ်။ အယ်လောကမာ ကိုယ့်သတ်ဟှို မူးဟှူ လူလေဟှာ ကိုယ့်သတ်ဟှို ထာဝရ စောန့်ရှော့-က်ရလေ့မယ်။ 26 ငါ့မှုတော်ဟှို လောက်ဆောန်ဟှူ လူတိုင်းဟှာ ငါ့နော့-က်ဟှို လိုက်ရမယ်။ အယ်ဆိုဟှာ ငါရှိဟှူ နေရာမာ ငါ့မှုဆောန်ဟှာ ငါ့နတူးဒူရှိ လေ့မယ်။ ငါ့ဖဟှလည်း ငါ့ရဲ့ မှုဆောန်ဟှို ချီးမြှော့-က်လေ့မယ်။

27 "ခု ငါ့ရဲ့ စိနှလောင်း ပူလောန်နေဟှယ်။ ငါ ဖယ်မျိုး ပြောရဟှို့နူး။ ငါဟှ ‘ဖ၊ ကျွန်တော်ထတ်ဟှို က္လရော့-က်လာမယ့် အယ်ခီနာရီဟှနေ ကယ်မပါ’ ဆိုဘီး ပြောရဟှို့လော။ အယ်ဘေမဲ့ ငါဟှာ အယ်ဒေါက်ခဝေဒနာခံဟှို့တွပ်ဘဲ့ ရော့-က်လာဟှယ်။ 28 ဖ၊ ဖရဲ့နာမတော်ဟှာ ဖောင်းသရေတော် ထန်ရှားစေတော်မူပါ!" ဆိုဘီး မိန့်တော်မူလေဟှယ်။

အယ်ဘီးန ကောန်းဂန်ထတ်ဟှနေ သံတော်ဟှ "ငါဟှာ ဖောင်းသရေတော် ထန်ရှားစေပီးဘီ။ နော့-က်တခါလည်း ထန်ရှားစေအူးမယ်" ဆိုဘီး မိန့်တော်မူလေဟှယ်။

29 အယ်နေရာမာ ရပ်နေဂေ့ဟှူ လူအောက်ဟှာ သံတော်ဟှို ကြားလိုက်ရဘီး သူးနို့ထဲဟှ တချို့ဟှ မိုးကြိုးသံဖြစ်ဟှယ် ဆိုဘီး ပြောဂေ့ဟှယ်။ တချို့ဟှ "ကောန်းဂန်တမန်ဟှာ ကိုယ်တော့်ဟှို စကားပြောဟှယ်!" ဆိုဘီး ပြောဂေ့ဟှယ်။

30 အယ်ဘေမဲ့ ယေရှုဟှာ သူးနို့ဟှို "အယ်သံတော်ဟှာ ငါ့တွပ် မှုဟှ။ နန်းနို့တွပ် ဖြစ်ဟှယ်။ 31 အယ်လောကဟှာ ခုဘဲ့ တရားစီရင်ခံရမယ်။ အယ်လောကဟှို အောက်ချောက်မားဟှာ ခုဘဲ့ နှန်ထုဇာခံရလေ့မယ်။ 32 ငါဟှာ မ္လေဂီးဟှနေ မ္လော့-က်ဟှားဇာဟှို ခံရဟှူ ခီမာ လူတိုင်းဟှို ငါနားဟှို ဆွဲခေါ်မယ်" ဆိုဘီး မိန့်တော်မူလေဟှယ်။ 33 အယ်မျိုးမိန့်တော်မူဇာဟှ ကိုယ်တော်ဟှာ ဖယ်မျိုးသေနည်းန သေခံတော်မူရမယ် ဆိုဇာဟှို ဖော်ပြဇာဖြစ်ဟှယ်။

34 လူအောက်ဂီးဟှ "မေရှိယဟှာ ထာဝရသတ်ရှင်လေ့မယ် ဆိုဘီး ကျွန်တော့်ဟှားလေရဲ့ ပညတ်တော်မာ ပြောဟှားဟှယ်။ အယ်ဆိုဟှာ လူ့ရဲ့သားဟှာ မ္လေဂီးဟှနေ မ္လော့-က်ဟှားခံရမယ် ဆိုဘီး ဖြားဖြစ်ကြောန့် ပြောနိုင်နူး။ အယ်လူ့ရဲ့သားဟှ ဖယ်လူနူး" ဆိုဘီး မေးဂေ့ဟှယ်။

35 ယေရှုဟှ "လန်းရောန်ဟှာ နန်းနို့ထဲမာ ရှစ်ဟှားဘဲ့ ရှိနေလေ့မယ်။ အယ်ကြောန့် နန်းနို့ဟှို မှောန်ဖောင်းခန် လန်းရောန်ရှိနေဒူးမာ သွားလာဂေ့။ ဖြားဖြစ်ကြောန့်နူးဆိုဟှာ မှောန်ထဲမာ သွားလာလူဟှာ ဖယ်နေရာဟှို သွားနေဟှယ် ဆိုဇာဟှို သိဟှ။ 36 အယ်မူကြောန့်ဟှိ လန်းရောန်ဟှာ နန်းနို့နရှိနေဒူးမာ လန်းရောန်ဟှို ယောင်ကြည်ဂေ့။ အယ်ဆိုဟှာ နန်းနို့ဟှာ လန်းရောန်ရဲ့ သားမီးလေ ဖြစ်လေ့မယ်" ဆိုဘီး ပ္လန်ဖြေတော်မူဟှယ်။

ယေရှုဟှာ အယ်မျိုးမိန့်တော်မူဘီးန ထွပ်ကြွဟှားဘီး သူးနို့ဟှို တီးရှောန်ဟှားလေဟှယ်။ 37 ကိုယ်တော်ဟှာ သူးနို့မျစ်စိရှေ့မာ အယ်နိမိတ်လတ်ခဏာလေ ဂူလောင်းဟှို ပြဘေမဲ့ သူးနို့ဟှာ ကိုယ်တော့်ဟှို ယောင်ကြည်ဂေ့ဟှ။ 38 အယ်ကြောန့်

"အို၊ ဘုရားသခင် ကျွန်တော့်ဟှားလေဟောပြောဟှူ အယ်ဒန်းကောန်းဟှို ဖယ်သူလေ ယောင်ကြည်ကြောန့်နူး။

သခင်ဘုရားရဲ့ တဂိုးတော်ဟှာ ဖယ်လူဟှို ထန်ရှားဟှို့နူး။" ဆိုဘီး ပရောဖက်ဟေရှာယ ဟောဟှားဇာဟှာ မှန်ဘဲ့ဖြစ်လာဟှယ်။

39 အယ်ဘီးဟှာ သူးနို့လေ ယောင်ကြည်နိုင်ဘဲကြောန့် ဟေရှာယဟှ

40 "ဘုရားသခင်ဟှာ သူးနို့ရဲ့ မျစ်စိဟှို ကန်းစေဟှားဘီး

သူးနို့ရဲ့ စိနှလောင်းဟှို ပိစေဟှားဟှယ်။

အယ်ကြောန့် သူးနို့ရဲ့ မျစ်စိဟှာ ဗြင်ဂေ့ဟှ။

အယ်ဘီးဟှာ သူးနို့ရဲ့ စိနှလောင်းဟှို မာကျောစေဟှယ်။

အယ်ဘီးဟှာ သူးနို့ဟှာ ငါ့နားဟှို ပ္လန်လာဂေ့ဟှ။

ဖြားဖြစ်ကြောန့်နူးဆိုဟှာ သူးနို့ဟှာ ငါ့နားဟှို ပ္လန်လာမယ် ဆိုဟှာ နာပျော့-က်လေ့မယ်" ဆိုဘီး ဘုရားသခင်ဟှ ပြောဟှားဟှယ်။

41 ဟေရှာယဟှာ ယေရှုရဲ့ ဖောင်းသရေတော်ဟှို ဗြင်ဟှားဟှူကြောန့် အယ်မျိုးပြောဆိုဘီး ကိုယ်တော်ကြောန်းဟှို ပြောနေလေဟှယ်။

42 ဖယ်မျိုးဘဲ့ဖြစ်ဖြစ် ယုဒအာဏာပိုင်လေ ဘောင်ဂီးဟှာ ယေရှုဟှို ယောင်ကြည်လာဂေ့ဟှယ်။ အယ်ဘေမဲ့ သူးနို့ဟှာ ဖာရိရှဲလေကြောန့် ဝါလယ်ဇရပ်ဟှနေ နှန်ထုခံရမာဟှို စိုးရိမ်ဘီး ပွမ့်ပွမ့်လန်းလန်းဟှား ပြောဂေ့ဟှ။ 43 သူးနို့ဟှာ ဘုရားသခင်ရဲ့ ချီးမွမ်းဇာထတ် လူလေရဲ့ ချီးမွမ်းဇာဟှို နှစ်သက်ဂေ့ဟှယ်။

44 ယေရှုဟှာ "ငါ့ဟှို ယောင်ကြည်ဟှူလူဟှာ ငါ့ဟှိုဘဲ့ ယောင်ကြည်ဇာ မှုဟှ။ ငါ့ဟှို စေလွှတ်တော်မူဟှူ သခင်ဟှိုလည်း ယောင်ကြည်ဟှယ်။ 45 ငါ့ဟှို ဗြင်ဟှူလူဟှာ ငါ့ဟှို စေလွှတ်တော်မူဟှူ သခင်ဟှိုလည်း ဗြင်ဟှယ်။ 46 ငါဟှာ လန်းရောန်ဖြစ်န လောကထဲဟှို ကြွလာဟှယ်။ အယ်ကြောန့် ငါ့ဟှို ယောင်ကြည်ဟှူ လူတိုင်းဟှာ မှောန်ထဲမာ နေရဟှမ်း။ 47 လူလေဟှာ ငါ့ရဲ့စကားဟှို ကြားဘီး နာခံဟှ ဆိုဟှာ သူးနို့ဟှို ငါစီရင်လေ့မယ် မှုဟှ။ ဖြားဖြစ်ကြောန့်နူးဆိုဟှာ ငါလာဇာဟှ အယ်လောကဟှို စီရင်ဟှို့လာဇာ မှုဟှ။ အယ်လောကဟှို ကယ်တန်ဟှို့လာဟှယ်။ 48 ငါ့စကားဟှို လတ်ခံဘဲန ငြင်းပယ်ဟှူ လူလေဟှို စီရင်မယ့်သူရှိဟှယ်။ ငါပြောဟှူ စကားလေဟှဘဲ့ နော့-က်ဆောင်းဟှူ နေ့မာ အယ်လူလေဟှို စီရင်လေ့မယ်! 49 အယ်စကားဟှာ သမ္မာတရား ဖြစ်ဟှယ်။ ဖြားဖြစ်ကြောန့်နူးဆိုဟှာ ငါဟှာ ကိုယ်ပိုင် ခွမ့်အာဏာန ပြောနေဇာ မှုဟှ။ အယ်ဘေမဲ့ ငါ့ဟှို စေလွှတ်တော်မူဟှူ ဖဟှာ ဖယ်မျိုးပြောရမယ် ဆိုဇာဟှို ငါ့ဟှို ညွှန်ကြားတော်မူဘီ။ 50 အယ်ဘီးဟှာ ဖရဲ့မိန့်တော်ဟှာ ထာဝရသတ် ဖြစ်ဟှယ် ဆိုဇာဟှို ငါသိဟှယ်။ ငါပြောနေဇာလေဟှာ ဖဟှ ငါ့ဟှို စေခိုင်းတော်မူဟှားတိုင်း ငါဟောပြောဟှယ်" ဆိုဘီး သံက္လယ်ဂီးန မိန့်တော်မူလေဟှယ်။