1 အယ်ကြောန့် ပိလတ်ဟှာ ယေရှုဟှို ခေါ်ဆောန်ဟှားစေဘီး ကီဒန်ပေးစေဟှယ်။ 2 စစ်သားလေဟှာ ဆူးခတ်လေန လောက်ဟှားဟှူ သရဖူဟှို ကိုယ်တော့်ခေါန်းထတ်မာ ဆောန်းပေးဘီးဟှာ ခရမ်းရောန်ဝတ်ရောင်ဟှို ဝတ်ပေးဘီး 3 ကိုယ်တော်နားဟှို လာဂေ့ဘီး "ယုဒမန်းဂီး သတ်တော် ရာကျော်ရှယ်ပါစေ!" ဆိုဘီး ပြောဂေ့ဟှယ်။ အယ်ဘီးန ကိုယ်တော့်ဟှို ပါးရိုက်ဂေ့ဟှယ်။

4 ပိလတ်ဟှာ နော့-က်ထပ်တခါ ပ္လန်ဟှို ထွပ်လာဘီးဟှာ "အယ်လူဟှို ပြစ်စီရင်ဟှို့ဇာ ဖြားလည်းတွိဟှ။ အယ်ကြောန့် နန်းနို့ဗြင်စေဟှို့ သူ့ဟှို နန်းနို့နားဟှို ငါခေါ်လာမယ်" ဆိုဘီး လူအောက်ဂီးဟှို ပြောလေဟှယ်။ 5 အယ်ဘီးန ယေရှုဟှာ ဆူးသရဖူန ခရမ်းရောန်ဝတ်ရောင်ဟှို ဝတ်ဟှားဘီး ပ္လန်ဟှို ထွပ်ကြွတော်မူလေဟှယ်။ ပိလတ်ဟှာ "ကေ့ကေ့! အယ်လူဘဲ့ဖြစ်ဟှယ်!" ဆိုဘီး သူနို့ဟှို ပြောလေဟှယ်။

6 ယဇ်ပုရောဟိတ်ဂီးလေန စောန့်လေဟှာ ကိုယ်တော့်ဟှို ဗြင်လိုက်ဟှူ ခီမာ "အယ်လူဟှို ကားစင်တန်ပါ! အယ်လူဟှို ကားစင်တန်ပါ!" ဆိုဘီး သူးနို့ဟှာ အော်ဟစ်ဂေ့ဟှယ်။

ပိလတ်ဟှာ "အယ်ဆိုဟှာ နန်းနို့ဟှာ အယ်လူဟှို ခေါ်ဆောန်ဟှားဘီး ကားစင်တန်ဂေ့။ ငါဟှာ သူ့ဟှို ပြစ်စီရင်ဟှို့ဇာ ဖြားလည်းတွိဟှ" ဆိုဘီး သူးနို့ဟှို ပြောလေဟှယ်။

7 ယုဒလူခေါန်းဆောန်လေဟှာ "အယ်လူဟှာ သူ့ကိုယ်သူ ဘုရားသခင်ရဲ့ သားတော် ဆိုဘီး ကြေညာဟှူကြောန့် သေထိုက်ကြောန်း ကျွန်တော့်ဟှားလေရဲ့ ပညတ်တရားမာ ပြောဟှားဟှယ်" ဆိုဘီး ဖြေဂေ့ဟှယ်။

8 ပိလတ်ဟှာ အယ်စကားဟှို ကြားရဟှူ ခီမာ ပိုဘီး ကြော့-က်လန့်ဟှားဟှယ်။ 9 သူဟှာ နန်းတော်ထဲဟှို ပ္လန်ဝမ်ဟှားဘီးဟှာ ယေရှုဟှို "သင်ဟှာ ဖယ်နေရာဟှနေ လာဟှယ်နူး" ဆိုဘီး မေးလေဟှယ်။

အယ်ဘေမဲ့ ယေရှုဟှာ ခွန်းလည်း ပ္လန်ဖြေဟှ။ 10 ပိလတ်ဟှာ ကိုယ်တော့်ဟှို "သင်ဟှာ ငါ့ဟှို စကားပြောနိုဘီလော။ ငါဟှာ သင့်ဟှို လွှတ်ဟှို့တွပ် ခွမ့်အာဏာလည်းရှိဘီး ကားစင်တန်ဟှို့တွပ် ခွမ့်အာဏာလည်းရှိဟှယ် ဆိုဇာဟှို သိဟှလော" ဆိုဘီး မေးလေဟှယ်။

11 ယေရှုဟှ "သင့်ဟှို ဘုရားသခင်ဟှ ပေးအပ်ဟှားဟှူကြောန့် အယ်မျိုးခွမ့်အာဏာဟှို ရဟှားဟှယ်။ အယ်ကြောန့် ငါ့ဟှို သင့်လတ်ထဲအပ်ဟှူ လူဟှာ ပြစ်ပိုကီးဟှယ်" ဆိုဘီး ဖြေလေဟှယ်။

12 ပိလတ်ဟှာ အယ်မျိုးကြားရဟှူ ခီမာ ယေရှုဟှို လွှတ်ပေးဟှို့တွပ် နည်းလမ်းရှာဟှို့ ကြိုးစားလေဟှယ်။ အယ်ဘေမဲ့ ယုဒလူခေါန်းဆောန်လေဟှာ "အယ်လူဟှို လွှတ်ပေးမယ် ဆိုဟှာ သင်ဟှာ ကဲသာမန်းဂီးရဲ့ မိဆွေ မှုဟှ! ဖယ်လူဘဲ့ဖြစ်ဖြစ် ကိုယ့်ကိုယ်ကိုယ် မန်းဂီးဆိုဘီး ကြေညာဟှူလူဟှာ ကဲသာမန်းဂီးဟှို ပူကန်ဇာဖြစ်ဟှယ်!" ဆိုဘီး အော်ဂေ့ဟှယ်။

13 ပိလတ်ဟှာ အယ်စကားလေဟှို ကြားဟှူ ခီမာ ယေရှုဟှို ပ္လန်ဟှို ခေါ်ထုဟှားဘီး က္လော့-က်ပ္လားစင်္ကြံ ဆိုဘီး ခေါ်ဟှူ တရားပလ္လင်ထတ်မာ ထိုင်လေဟှယ်။ အယ်စင်္ကြံဟှို ဟေဗြဲစကားန ဂဗ္ဗသ ဆိုဘီး ခေါ်ဟှယ်။ 14 အယ်နေ့ဟှာ ပသခါပွဲတိုင်ခန် နေဒန်ဇာဖြစ်ဟှယ်။ ပိလတ်ဟှာ "နန်းနို့မန်းဂီးဘဲ့ ဖြစ်ဟှယ်!" ဆိုဘီး ယုဒလူလေဟှို ပြောလေဟှယ်။

15 သူးနို့ဟှာ "အယ်လူဟှို သတ်ပါ! အယ်လူဟှို သတ်ပါ! အယ်လူဟှို ကားစင်တန်ပါ!" ဆိုဘီး ပ္လန်အော်ဂေ့ဟှယ်။

ပိလတ်ဟှာ "နန်းနို့မန်းဂီးဟှို ကားစင်တန်ရဟှို့လော" ဆိုဘီး သူးနို့ဟှို မေးလေဟှယ်။

ယဇ်ပုရောဟိတ်ဂီးလေဟှ "ကဲသာတပါးဒဲဘဲ့ ကျွန်တော်ဟှားလေရဲ့ မန်းဂီးဖြစ်ဟှယ်!" ဆိုဘီး ပ္လန်ဖြေဂေ့ဟှယ်။

16 အယ်ဘီးန ပိလတ်ဟှာ ယေရှုဟှို ကားစင်တန်ဟှို့တွပ် သူးနို့လတ်ထဲဟှို အပ်ပေးလေဟှယ်။

အယ်ကြောန့် သူးနို့ဟှာ ယေရှုဟှို ခေါ်ဆောန်ဟှားဂေ့ဟှယ်။ 17 ကိုယ်တော်ဟှာ "ဦးခေါန်းခွံနေရာ" ဟှို မိမိလတ်ဝါးကပ်တိုင်ဟှို ထမ်းဘီး ကြွတော်မူလေဟှယ်။ အယ်နေရာဟှို ဟေဗြဲစကားန "ဂေါလဂေါသ" ဆိုဘီး ခေါ်ဟှယ်။ 18 သူးနို့ဟှာ အယ်နေရာမာ ကိုယ်တော့်ဟှို တခြားလူနှေ့ယော့-က်နတူးဒူ ကားစင်တန်ဂေ့ဟှယ်။ ယေရှုဟှို လယ်မာထားဘီး အယ်လူနှေ့ယော့-က်ဟှို ညာဖတ်မာ တယော့-က် ဘယ်ဖတ်မာ တယော့-က် ထားဂေ့ဟှယ်။ 19 ပိလတ်ဟှာ "ယုဒမန်းဂီး၊ နာဇရက်ဗြို့သား ယေရှု" ဆိုဘီး ကမ္ပည်းရေးထိုးဘီး လတ်ဝါးကပ်တိုင်ထတ်မာ ကပ်ဟှားဟှယ်။ 20 ယေရှုဟှို ကားစင်တန်ဟှူ နေရာဟှ ဗြို့န နီးဟှူကြောန့် ယုဒလူလေဟှာ အယ်ကမ္ပည်းစာဟှို ဖတ်ဂေ့ဟှယ်။ အယ်ကမ္ပည်းစာဟှို ဟေဗြဲစကား၊ လက်တင်စကား၊ ဟေလသစကားန ရေးဟှားဟှယ်။ 21 ယဇ်ပုရောဟိတ်ဂီးလေဟှာ ပိလတ်ဟှို " ‘ယုဒမန်းဂီး’ ဆိုဘီး ရေးပါန။ ‘အယ်လူဟှ ငါဟှာ ယုဒလူလေရဲ့ မန်းဂီးဖြစ်ဟှယ် ဆိုဘီး ပြောကြောန်းဟှိုဘဲ့ ရေးတော်မူပါ’" ဆိုဘီး ပြောဂေ့ဟှယ်။

22 ပိလတ်ဟှ "ငါရေးဟှားဘီးဇာဘဲ့ တည်ဖြစ်ရမယ်" ဆိုဘီး ပ္လန်ပြောလေဟှယ်။

23 စစ်သားလေဟှာ ယေရှုဟှို ကားစင်တန်ဂေ့ဘီးန ကိုယ်တော်ရဲ့ ဝတ်တော်ဟှို လေးပိုင်းပိုင်းဘီး တယော့-က်တပိုင်းစီ ယူဂေ့ဟှယ်။ သူးနို့ဟှာ ထဲခံအန်းဂီဟှိုလည်း ယူဂေ့ဟှယ်။ အယ်အန်းဂီဟှာ ချောက်ကြောန်းမှေ့ဘဲ့ ရစ်လောက်ဟှားဟှူ အန်းဂီးဖြစ်ဟှယ်။ 24 စစ်သားလေဟှာ "အယ်အန်းဂီးဟှို ဆုဖ္လဲဘဲန ဖယ်လူရမယ် ဆိုဇာဟှို မဲနှိုက်ဂေ့ဇို့" ဆိုဘီး သူးနို့ ရှင်းရှင်း ပြောဂေ့ဟှယ်။ အယ်မျိုးဖြစ်လာဇာဟှ

"သူးနို့ဟှာ ငါ့အန်းဂီးဟှို ခွဲဝီယူဂေ့မယ်

အယ်ဘီးဟှာ ငါ့အန်းဂီဟှို မဲနှိုက်ဘီးဟှာ ယူဂေ့ဟှယ်" ဆိုဘီး ကျမ်းစာမာ ရေးဟှားဇာလေ ပ္လဲ့ဇောင်ဟှို့တွပ် ဖြစ်လေဟှယ်။

အယ်ကြောန့် စစ်သားလေဟှာ အယ်မျိုး လောက်ဂေ့ဟှယ်။

25 ယေရှုရဲ့ လတ်ဝါးကပ်တိုင်နားမာ ကိုယ်တော်ရဲ့မိ၊ ကိုယ်တော့်မိရဲ့ညီမ၊ ကလောဖရဲ့မီးမ မာရိန မာဂဒလဝါသူ မာရိ မတ်တတ်ရပ်နေဂေ့ဟှယ်။ 26 ယေရှုဟှာ နီးမာရပ်နေဟှူ၊ ကိုယ်တော်ရှစ်ဟှူ တဗဲ့တော်န မိဟှို ဗြင်လိုက်ဟှူကြောန့် ကိုယ်တော်ဟှ "နို့မိ၊ နို့မိသားဟှို ကေ့ပါအူး" ဆိုဘီး မိဟှို မိန့်တော်မူဟှယ်။

27 အယ်ဘီးန ကိုယ်တော်ဟှာ "သူဟှာ နန့်ရဲ့ မိဖြစ်ဟှယ်" ဆိုဘီး အယ်တဗဲ့တော်ဟှို မိန့်တော်မူလေဟှယ်။ အယ်ခီဟှနေစဘီး အယ်တဗဲ့တော်ဟှာ မိဟှို သူ့ရဲ့ အီမာ ခေါ်ဟှားလေဟှယ်။

28 အယ်ဘီးန ယေရှုဟှာ မှုအားလောင်း ပီးဟှားဘီဆိုဇာဟှို သိတော်မူဘီး ကျမ်းစာပ္လဲ့ဇောင်ဟှို့တွပ် "ငါရေငတ်ဟှယ်" ဆိုဘီး မိန့်တော်မူလေဟှယ်။

29 အယ်နေရာမာ ဝိုင်ရှင်ပ္လဲ့ထဲ့ဟှားဟှူ အိုးတလောင်းရှိဟှယ်။ အယ်ကြောန့် သူးနို့ဟှာ ရေမ္လုတခုဟှို အယ်ဝိုင်ရှင်ထဲမာ နှစ်လိုက်ဘီးဟှာ ဟုဿုပ်ဗန် ခတ်ဖျားမာတပ်ဘီး ကိုယ်တော်ရဲ့ နှော့-က်ခမ်းနားဟှို ကပ်ပေးလေဟှယ်။ 30 ယေရှုဟှာ ဝိုင်ရှင်ဟှို သော့-က်တော်မူဘီးန "မှုပီးဟှားဘီး!" ဆိုဘီး မိန့်တော်မူလေဟှယ်။

အယ်ဘီးန ကိုယ်တော်ဟှာ ဦးခေါန်းတော်ဟှို အော့-က်ဟှိုစိုက်ခ္လဘီး သတ်တော်ဟှို စွန့်တော်မူလေဟှယ်။

31 ယုဒအာဏာပိုင်လေဟှာ ကားစင်တန်ဟှားဟှူ လူလေရဲ့ ခေလေဟှို ရိုက်ခ္လိုးဘီးဟှာ လောန်းလေဟှို ကားတိုင်ထတ်ဟှနေ အော့-က်ခ္လခွမ့်ပြုဟှို့ ပိလတ်ဟှို တောန်းလျှော့-က်ဂေ့ဟှယ်။ သူးနို့ အယ်မျိုးတောန်းလျှော့-က်ဇာဟှ အယ်နေ့ဟှာ ဖိနေ့ဖြစ်ဘီး ဒန်းနေ့မာ လောန်းလေဟှို လတ်ဝါးကပ်တိုင်ထတ်မာ မှေ့စေရှင်ဟှ။ နတ်ကီးတိုင်ဟှာလည်း ကီးမြတ်ဟှူ ဒန်းနေ့ဖြစ်နေဟှယ်။ 32 အယ်ကြောန့် စစ်သားလေဟှာ လာဘီးန ယေရှုနတူးဒူ ကားစင်တန်ခံရဟှူ ပထမလူရဲ့ ခေလေန ဒုတိယလူရဲ့ ခေလေဟှိုလည်း ရိုက်ခ္လိုးလိုက်ဟှယ်။ 33 အယ်ဘေမဲ့ သူးနို့ဟှာ ယေရှုနားဟှို ရော့-က်လာဟှူ ခီမာ သေနေဘီ ဆိုဇာဟှို တွိဟှားဟှူကြောန့် ကိုယ်တော်ရဲ့ခေလေဟှို ရိုက်ခ္လိုးဟှမ်း။ 34 အယ်ဘေမဲ့လည်း စစ်သားတယော့-က်ဟှာ ယေရှုရဲ့ နံဘေးတော်ဟှို လှံန ထိုးဖော့-က်လိုက်ဟှူ ခီမာ သွီးနရေဟှာ ရှစ်ရှင်းထွပ်လာဟှယ်။ 35 အယ်မျိုးဖြစ်ဇာလေဟှို နန်းနို့လည်း ယောင်ကြည်ဟှို့တွပ်*၁၉.၃၅ ယောင်ကြည်ဟှို့တွပ်၊ တချို့ မူရင်းလတ်ရေးမူလေမာ ဆစ်ဘီး ယောင်ကြည်ဂေ့၊ ဆိုဘီး ပါရှိဟှယ်။ ဗြင်ဟှူလူတယော့-က်ဟှ သတ်သေခံဟှားဟှယ်။ အယ်လူပြောဇာလေဟှာ မှန်ဖြစ်ဘီး အယ်လူဟှာ မှန်းမှန်ကန်းကန်ဟှား ပြောဟှယ် ဆိုဇာဟှို သူကိုယ်တိုင်သိဟှယ်။ 36 အယ်မျိုးဖြစ်ဟှားဇာဟှ "သူ့ရဲ့ ရိုးလေဟှာ တရှောန်းလည်း ကျိုးဂေ့ဟှ" ဆိုဘီး ကျမ်းစာပ္လဲ့ဇောင်ဟှို့တွပ် ဖြစ်ဟှယ်။ 37 ✝၁၉.၃၇ ဗျာ ၁.၇အယ်ဘီးဟှာ တခြားကျမ်းစာမာ "လူလေဟှာ သူးနို့ ထိုးဖော့-က်လိုက်ဟှူ လူဟှို ဗြင်ရဂေ့လေ့မယ်" ဆိုဘီး ရေးဟှားဟှယ်။

38 အယ်ဘီးန အရိမဿဲဗြို့သား ယောသပ်ဟှာ ယေရှုရဲ့ လောန်းတော်ဟှို ယူဟှားခွမ့်ပြုဟှို့တွပ် ပိလတ်နားဟှို သွားဘီး တောန်းလျှော့-က်လေဟှယ်။ ယောသပ်ဟှာ ယုဒအာဏာပိုင်လေဟှို ကြော့-က်ဟှူကြောန့် ထန်းထန်ရှားရှားနေဘဲဟှူ ယေရှုရဲ့ တဗဲ့တော် တယော့-က် ဖြစ်ဟှယ်။ ပိလတ်ရဲ့ခွမ့်ပြုချစ်န ယောသပ်ဟှာ လောန်းတော်ဟှို ယူဟှားလေဟှယ်။ 39 ✝၁၉.၃၉ ယော ၃.၁,၂ရင်းရင်ဒူးဟှ ယေရှုဟှို ညဉ့်ခန်းဖတ်မာ လာတွိဟှူ နိကောဒင်ဟှာ မုရန်န အကျော် ရောနှောဟှားဟှူ နံ့သာ ပိဿာနှေ့ဆယ်ကျော်ဟှို ယူဟှားဘီး ယောသပ်နတူးဒူ လိုက်ဟှားဟှယ်။ 40 အယ်လူနှေ့ယော့-က်ဟှာ ယေရှုရဲ့ လောန်းဟှို ယူဘီး ယုဒလူလေရဲ့ သင်္ဂြိုဟ်ဇာနဆိုင်ဟှူ ထောင်းဒန်းစဉ်လာတိုင်း နံ့သာလေနတူးဒူ လောန်းတော်ဟှို ပိဖ္လူနပတ်လေဟှယ်။ 41 ယေရှုူဟှို လတ်ဝါးကပ်တိုင်မာ တန်ဘီးသတ်ဟှူ နေရာနားမာ ဥယျာဉ်တခုရှိဟှယ်။ အယ်ဥယျာဉ်ထဲမာ ဖယ်လူဟှိုလည်း သင်္ဂြုဟ်ဖူးသေးဘဲဟှူ သန်းခ္လိုင်းဂူသစ်တခု ရှိလေဟှယ်။ 42 အယ်နေ့ဟှာ ယုဒလူလေရဲ့ ဖိနေ့ ဖြစ်ဟှူကြောန့် နီးမာရှိဟှူ သန်းခ္လိုင်းဂူမာ ယေရှုရဲ့ လောန်းတော်ဟှို သင်္ဂြိုဟ်ဟှားလေဟှယ်။