1 အယ်ဘီးန ယုဒလူလေရဲ့ ဘာသာရေးပွဲတော် ရှိဟှူကြောန့် ယေရှုဟှာ ယေရုရှလင်ဗြို့ဟှို သွားလေဟှယ်။ 2 ယေရုရှလင်ဗြို့ သိုးခွဗော့-က်နားမာ မုခ်ဦးဆောန် ငါးဆောန်ရှိဟှူ ရေကန်တကန်ရှိဟှယ်။*၅.၂ ယေရုရှလင်ဗြို့ သိုးခွဗော့-က်နားမာ မုခ်ဦးဆောန် ငါးဆောန်ရှိဟှူ ရေကန်တကန်ရှိဟှယ်၊ အယ်မျိုးမှုဘဲနေဟှာ သိုးရေကန်နားမာ သိုးခွဗော့-က်ရှိဟှယ်။ ဟေဗြဲစကားန ဗေသေဇာသ*၅.၂ ဗေသေဇာသ၊ တချို့ မူရင်းလတ်ရေးမူမာ ဗေသေသဒ၊ ဆိုဘီး ရှိဟှယ်။ ဆိုဘီး ခေါ်ဟှယ်။ 3 အယ်မုခ်ဦးဆောန်လေထဲမာ မျစ်စိကန်းဟှူလူ၊ ခေသန်ဘဲဟှူလူန လေဖြတ်ဟှူလူလေ ဘောင်ဂီးဟှာ လှဲလျောင်းနေဂေ့ဟှယ်။ 4 *၅.၄ တချို့ မူရင်းလတ်ရေးမူမာ ခန်းငယ် ၃ခ–၄ ဟှို၊ သူးနို့ဟှာ ရေလောက်ရှားဇာဟှို စောန့်နေဟှယ်၊ ၄ ဖြားဖြစ်ကြောန့်နူးဆိုဟှာ ဘုရားသခင်ရဲ့ ကောန်းဂန်တမန်ဟှာ တခါတလေမာ ရေကန်ထဲဟှို ဆင်းလာဘီး ရေဟှို မွှီလေဟှယ်။ ရေဟှို မွှီးဟှားဘီးန ရေကန်ထဲဟှို ဦးဆောင်းဆင်းနိုင်ဟှူလူဟှာ ရောဂါပျော့-က်ဟှားဟှယ်၊ ဆိုဘီး ထပ်ပေါန်းထဲ့ဟှားဟှယ်။ 5 အယ်နေရာမာ သောင်းဆယ်ရှစ်နှစ် လောင်းလောင်း နာဇားနေဟှူ လူတယော့-က် ရှိဟှယ်။ 6 လှဲလျောင်းနေဟှူ အယ်လူဟှို ယေရှုဟှ ဗြင်လိုက်ဘီး ခီကြာဂီး နာဇားနေရဟှယ် ဆိုဇာဟှို သိဟှူကြောန့် ကိုယ်တော်ဟှ "နန့်အနာပျော့-က်ရှင်လော" ဆိုဘီး သူ့ဟှို မေးလေဟှယ်။

7 နာဇားနေဟှူလူဟှ "ဆရာ၊ ရေဟှို လာမွှီဟှူ ခီမာ ကျွန်တော့်ဟှို ရေကန်ထဲဟှို ခ္လပေးဟှို့လူ မှေ့ဟှ။ ကျွန်တော်ဟှာ ရေကန်ထဲဟှို ဆင်းဟှို့လောက်နေဒူးမာ တခြားတယော့-က်ဟှ ဦးဆောင်းဆင်းဟှားလေဟှယ်" ဆိုဘီး ဖြေလေဟှယ်။

8 ယေရှုဟှ "ထဒန်၊ နန့်ထမ်းစင်ဟှို ကော့-က်ဘီးဟှာ လမ်းရှော့-က်ဟှားလိုက်" ဆိုဘီး သူ့ဟှို ပြောလေဟှယ်။ 9 အယ်လူဟှာ ရှင်းရှင်းဘဲ့ နာပျော့-က်ဟှားဘီး သူ့အိယာဟှို ကော့-က်ဘီး လမ်းရှော့-က်ဟှားဟှယ်။

အယ်မျိုးဖြစ်ဟှားဟှူ နေ့ဟှာ ဒန်းနေ့ဖြစ်ဟှယ်။ 10 အယ်ကြောန့် ယုဒအာဏာပိုင်လေဟှာ "အယ်နေ့ဟှာ ဒန်းနေ့ဖြစ်ဟှယ်။ နန်ဟှာ နန့်ရဲ့အိယာဟှို ကော့-က်နေဇာဟှာ နို့လေရဲ့ ပညတ်တော်ဟှို ဆန့်ကျင်နေဇာဘဲ့" ဆိုဘီး နာပျော့-က်ဟှားဟှူ လူဟှို ပြောဂေ့ဟှယ်။

11 သူဟှ "ကျွန်တော့်ဟှို ကျန်းမာစေဟှူလူဟှ အိယာကော့-က်ဘီးဟှာ လမ်းရှော့-က်ဟှားလိုက် ဆိုဘီး ကျွန်တော့်ဟှို ပြောဟှယ်" ဆိုဘီး ပ္လန်ဖြေလေဟှယ်။

12 သူးနို့ဟှ "နန့်ဟှို အယ်မျိုးလောက်ဟှို့ ပြောဟှူလူဟှ ဖယ်သူနူး" ဆိုဘီး သူ့ဟှို မေးဂေ့ဟှယ်။

13 အယ်ဘေမဲ့ နာပျော့-က်ဟှားဟှူလူဟှ အယ်မျိုး လောက်ခိုင်းဟှူလူဟှာ ယေရှုဖြစ်ဟှယ် ဆိုဇာဟှို သိဂေ့ဟှ။ အယ်နေရာမာ လူအောက်ဂီးရှိနေဟှူကြောန့် ယေရှုဟှလည်း တိတိဟှား ထွပ်ဟှားလေဟှယ်။

14 အယ်ဘီးန ယေရှုဟှာ သူ့ဟှို ဗိမာန်တော်ထဲမာ တွိဟှူ ခီမာ "နားထောန်၊ နန်ဟှာ ခု နာပျော့-က်ဟှားဘီ အယ်ကြောန့် ပြစ်လောက်ဇာလေဟှို ရပ်လိုက် အယ်မျိုးမှုဘဲနေဟှာ အယ်ထတ်ဆိုးဇာလေဟှာ နန့်မာ ဖြစ်လေ့မယ်" ဆိုဘီး ပြောလေဟှယ်။

15 အယ်ဘီးန အယ်လူဟှာ ထွပ်ဟှားဘီး သူ့ဟှို နာပျော့-က်စေဟှူလူဟှာ ယေရှုဖြစ်ဟှယ် ဆိုဘီး ယုဒအာဏာပိုင်လေဟှို ပြောပြလိုက်ဟှယ်။ 16 အယ်ကြောန့် ဒန်းနေ့မာ အယ်မျိုး နာပျော့-က်အောန် လောက်ပေးကြောန့် ယုဒခေါန်းဆောန်လေဟှာ ယေရှုဟှို စဘီးဟှာ ညှဉ်းဆဲဂေ့ဟှယ်။ 17 ယေရှုဟှာ "ငါ့ဖဟှာ မြဲဒမ်း လောက်လောက်ဟှူကြောန့် ငါလည်း လောက်လောက်ဟှယ်" ဆိုဘီး သူးနို့ဟှို ပ္လန်ဖြေလေဟှယ်။

18 အယ်မျိုးပြောလိုက်ကြောန့် ယုဒအာဏာပိုင်လေ ဂူလောင်းဟှာ ကိုယ်တော့်ဟှို သတ်ဟှို့ ပိုဘီး ကြိုးစားဂေ့ဟှယ်။ ဖြားဖြစ်ကြောန့်နူးဆိုဟှာ ယေရှုဟှာ ဒန်းနေ့ဟှို ခ္လိုးဖော့-က်ဟှယ်။ ဘုရားသခင်ဟှို မိမိရဲ့ဖ ဆိုဘီး ခေါ်ဟှယ်။ သူ့ကိုယ်သူ ဘုရားသခင်န တတန်းဒဲထားဟှယ်။

19 အယ်ကြောန့် ယေရှုဟှ "နန်းနို့ဟှို ငါ မှန်တိုင်းပြောမယ်၊ သားတော်ဟှာ သူ့လိုလို ဖြားလည်းလောက်နိုင်ဟှ။ ဖလောက်ဟှူ ဇာလေဟှို ဗြင်ဟှူအတိုင်းဘဲ့ လောက်ဇာဖြစ်ဟှယ်။ ဖလောက်ဟှူမျိုး သားတော်ဟှလည်း လောက်ဂေ့ဟှယ်။ 20 ဖဟှ သားတော်ဟှို ရှစ်ဟှူကြောန့် ဖကိုယ်တိုင် လောက်နေဇာလေ ဂူလောင်းဟှို သားတော်ဟှို ပြဟှယ်။ အယ်မူဇာထတ် ရရာတိုင်း ကီးဟှူဇာလေဟှို လောက်ဟှို့ ဖဟှ သားတော်ဟှို ပြအူးမယ်။ အယ်ဆိုဟှာ နန်းနို့ဂူလောင်းဟှာ အံ့ဩဟှားလေ့မယ်။ 21 ဖဟှာ လူသေလေဟှို ထမြော့-က်စေဘီး ပ္လန်ရှင်စေမျိုးဘဲ့ သားတော်ဟှာလည်း မိမိလိုရှင်ဟှူ လူလေဟှို ပ္လန်ရှင်စေမယ်။ 22 ဖဟှာ ဖယ်လူဟှိုလည်း တရားစီရင်ဟှ။ ဖဟှာ သားတော်ဟှို တရားစီရင်ခွမ့် ဂူလောင်းဟှို ပေးအပ်ဟှားဟှယ်။ 23 အယ်ကြောန့် လူလေ ဂူလောင်းဟှာ ဖဟှို ရိုသေမျိုးဘဲ့ သားတော်ဟှိုလည်း ရိုသေရမယ်။ သားတော်ဟှို ရိုသေဟှ ဆိုဟှာ သားတော်ဟှို စေလွှတ်ဟှူ ဖဟှိုလည်း ရိုသေဟှ။"

24 "နန်းနို့ဟှို ငါ မှန်တိုင်းပြောမယ်၊ ငါ့စကားတော်လေဟှို ကြားဘီး ငါ့ဟှို စေလွှတ်ဟှူ ဖဟှို ယောင်ကြည်ဟှူလူဟှာ ထာဝရသတ်ရမယ်။ သူးနို့ဟှာ တရားစီရင်ခံရဘဲန သေရာဟှနေ သတ်ရှင်ရာဟှို ကူးဟှားဘီဖြစ်ဟှယ်။ 25 နန်းနို့ဟှို ငါ မှန်တိုင်းပြောမယ်၊ လူသေလေဟှာ ဘုရားသခင်သားတော်ရဲ့ သံဟှို ကြားရဟှို့ခီဟှာ ရော့-က်နေဘီ။ အယ်ခီဟှာ ရော့-က်နေဘီ သားတော်ရဲ့ သံဟှို ကြားရဟှူ လူလေဟှာ သတ်ရှင်ရလေ့မယ်။ 26 ဖကိုယ်တိုင်ဟှာ သတ်ရဲ့ ရင်းမြစ်ဖြစ်ဟှူမျိုးဘဲ့ သားတော်ဟှိုလည်း သတ်ရဲ့ ရင်းမြစ်ဖြစ်စေဟှယ်။ 27 သားတော်ဟှာ လူ့ရဲ့သားဖြစ်ဟှူကြောန့် တရားစီရင်ခွမ့်ဟှို အပ်ပေးလေဟှယ်။ 28 အယ်မူဇာဟှို အံ့ဩဂေ့န။ သန်းခ္လိုင်းထဲဟှ လူသေလေ ဂူလောင်းဟှာ သားတော်ရဲ့ သံဟှို ကြားရဟှို့ ခီရော့-က်လာနေဘီ 29 အယ်ဘီးဟှာ သူးနို့ရဲ့ သန်းခ္လိုင်းထဲဟှ ထွပ်ရမယ်။ ကောန်းဇာလောက်ဟှူ လူလေဟှာ ထမြော့-က်ဘီး သတ်ရှင်လေ့မယ်။ ကောန်းဘဲဇာလောက်ဟှူ လူလေဟှာ ထမြော့-က်ဘီး ပြစ်စီရင်ခံရမယ်။

30 "ငါဟှာ ငါ့ရဲ့ ခွမ့်အာဏာန ဖြားလည်းလောက်နိုင်ဟှ။ ငါဟှာ ဘုရားသခင် ပြောဟှားတိုင်းဘဲ့ တရားစီရင်ဟှယ်။ အယ်ကြောန့် ငါ့ရဲ့ တရားစီရင်ဇာဟှာ မှန်ဟှယ်။ ဖြားဖြစ်ကြောန့်နူးဆိုဟှာ ငါရဲ့ လိုတိုင်းလောက်ဟှ။ ငါ့ဟှို စေလွှတ်ဟှူ ဖရဲ့ လိုတိုင်းဘဲ့ လောက်ဟှယ်။

31 "ငါဟှာ ငါ့ရဲ့ကြောန်းဟှို သတ်သေခံမယ် ဆိုဟှာ ငါ့ရဲ့ သတ်သေခံချစ်ဟှာ မှန်ဖြစ်ဟှို့ မှုဟှ။ 32 အယ်ဘေမဲ့ ငါ့ကြောန်းဟှို သတ်သေခံပေးမယ့် လူတယော့-က် ရှိဟှယ်။ အယ်လူပြောဟှူ ငါ့ကြောန်းဟှာ မှန်ဖြစ်ဟှယ် ဆိုဇာဟှို ငါသိဟှယ်။ 33 ✝၅.၃၃ ယော ၁.၁၉–၂၇; ၃.၂၇–၃၀ နန်းနို့ဟှာ ယောဟန်နားဟှို တမန်လေဟှို စေလွှတ်ဟှယ်။ သူဟှာ သမ္မာတရားဟှို သတ်သေခံဟှယ်။ 34 လူရဲ့သတ်သေခံချစ်ဟှို ငါခံယူဇာ မှုဟှ။ နန်းနို့ကယ်တန်ခံရဟှို့တွပ် အယ်မျိုး ငါပြောဟှယ်။ 35 ယောဟန်ဟှာ တော့-က်လောန်ဘီး လန်းနေဟှူ မီးအီနတူဟှယ်။ နန်းနို့ဟှာ သူ့ရဲ့ လန်းရောန်ထဲမာ ရှစ်ဟှားဘဲ့ ပျော်ဟှို့ ဆန္ဒရှိဂေ့ဟှယ်။ 36 အယ်ဘေမဲ့ ယောဟန်ရဲ့ သတ်သေထတ် ကီးမြတ်ဟှူ သတ်သေဟှာ ငါ့မာရှိဟှယ်။ ငါ့ဖဟှ ငါ့ဟှို ပေးအပ်ဟှူ ဇာလေဟှို ခု ငါပြီးမြော့-က်အောန် လောက်ဆောန်နေဇာဟှာ ငါ့ဟှို ငါ့ဖဟှ စေလွှတ်ဟှယ် ဆိုဇာဟှို သတ်သေခံနေဟှယ်။ 37 ✝၅.၃၇ မ ၃.၁၇; မာ ၁.၁၁; လု ၃.၂၂ငါ့ဟှို စေလွှတ်ဟှူ ဖဟှလည်းဘဲ့ ငါ့ကြောန်းဟှို သတ်သေခံဟှယ်။ နန်းနို့ဟှာ ဖရဲ့ သံတော်ဟှို ကြားဖူးဂေ့ဟှ။ မျစ်နှာတော်ဟှိုလည်း ဗြင်ဖူးဂေ့ဟှ၊ 38 အယ်ဘီးဟှာ ဖစေလွှတ်ဟှူလူဟှို ယောင်ကြည်ဘဲကြောန့် စကားတော်ဟှာ နန်းနို့ရဲ့ စိနှလောင်းထဲမာ မှေ့ဟှ။ 39 နန်းနို့ဟှာ ထာဝရသတ်ဟှို တွိလေ့မယ် ထန်ဘီး ကျမ်းစာလေဟှို လေ့လာဂေ့ဟှယ်။ အယ်ကျမ်းစာလေဟှ ငါ့ကြောန်းဟှို သတ်သေခံဟှားဟှယ်! 40 အယ်ဘေမဲ့ နန်းနို့ဟှာ သတ်ရဟှို့တွပ် ငါ့နားဟှို လာရှင်ဟှူ ဆန္ဒ မှေ့ဟှ။

41 "ငါဟှာ လူလေရဲ့ ချီးမွမ်းဇာဟှို ရှာဟှ။ 42 အယ်ဘေမဲ့ နန်းနို့ဟှာ ဖြားမျိုးလူဇားလေ ဖြစ်ဟှယ် ဆိုဇာဟှို ငါသိဟှယ်။ နန်းနို့မာ ဘုရားသခင်ဟှို ရှစ်ဟှူ နှလောင်းသားမှေ့ဟှ ဆိုဇာဟှိုလည်း ငါသိဟှယ်။ 43 ငါဟှာ ငါ့ဖရဲ့ ခွမ့်အာဏာန ရော့-က်လာဟှယ်။ အယ်ဘေမဲ့ နန်းနို့ဟှ ငါ့ဟှို လတ်ခံဂေ့ဟှ။ အယ်ဘေမဲ့လည်း တခြားလူတယော့-က်ဟှာ သူ့ကိုယ်ပိုင်ခွမ့်အာဏာန ရော့-က်လာမယ် ဆိုဟှာ နန်းနို့လတ်ခံလေ့မယ်။ 44 နန်းနို့ဟှာ ယော့-က်နယော့-က် ချီးမွမ်းခံရဇာဟှို့ဘဲ့ ကြိုက်ဂေ့ဟှယ်။ အယ်ဘေမဲ့ တပါးဒဲရှိဟှူ ဘုရားသခင်နားဟှ ချီးမွမ်းခံရဟှို့ ကြိုးစားဂေ့ဘဲဟှူ နန်းနို့လေဟှာ ငါ့ဟှို ဖယ်မျိုး ယောင်ကြည်နိုင်ဂေ့မယ်နူး။ 45 အယ်ဘီးဟှာ ငါဟှ နန်းနို့ဟှို ငါ့ဖရှေ့မာ စွပ်စွဲလေ့မယ် ဆိုဇာဟှို ထန်ဂေ့န။ နန်းနို့ဟှို စွပ်စွဲမယ့်လူဟှ နန်းနို့ မျှော်လင့်အားကိုးဟှူ မောရှေဘဲ့ဖြစ်ဟှယ်။ 46 မောရှေဟှာ ငါ့ကြောန်းဟှို ရေးဟှားဟှူကြောန့် နန်းနို့ဟှာ မောရှေဟှို ယောင်ကြည်ဟှယ် ဆိုဟှာ ငါ့ဟှိုလည်း ယောင်ကြည်ဂေ့လေ့မယ်။ 47 အယ်ဘေမဲ့ မောရှေရေးဟှားဟှူ ကျမ်းစာလေဟှိုမှ ယောင်ကြည်ဟှ ဆိုဟှာ ငါ့စကားတော်လေဟှိုလည်း ဖယ်မျိုး ယောင်ကြည်နိုင်ဟှို့နူး။"