1 ယေရှုဟှာ သံလွင်တောန်ဟှို ကြွတော်မူဟှားဟှယ်။

2 မိုးလန်းစောစောဂီးမာ ဗိမာန်တော်ဟှို ပ္လန်ကြွဟှားဟှယ်။ လူလေ ဂူလောင်းဟှာ ကိုယ်တော်နားမာ စုနေဂေ့ဟှယ်။ ကိုယ်တော်ဟှာ ထိုင်ဘီး သူးနို့ဟှို သွန်သန်တော်မူလေဟှယ်။ 3 ဖာရိရှဲလေန ကျမ်းတတ်ဆရာလေဟှာ အီထောန်ရေးဖော့-က်ပ္လန်နေဟှူ ခီမာ ဖမ်းဟှားဟှူ မီးမဟှို ခေါ်လာဘီး သူးနို့လေ ဂူလောင်းရှေ့မာ အယ်မီးမဟှို မတ်တတ်ရပ်ခိုင်းဟှားဟှယ်။ 4 သူးနို့လေဟှ ယေရှုဟှို "ဆရာ၊ အယ်မီးမဟှို အီထောန်ရေးဖော့-က်ပ္လန်နေဒူးမာ ဖမ်းမိဟှယ်။ 5 ကျွန်တော့်ဟှားလေရဲ့ ပညတ်တရားမာ မောရှေဟှ အယ်မျိုးမီးမဟှို က္လော့-က်ခဲန သေအောန်ပစ်ရမယ် ဆိုဘီး ပညတ်ဟှားဟှယ်။ အယ်ဆိုဟှာ ဆရာဟှ ဖယ်မျိုးပြောမယ်နူး" ဆိုဘီး မေးဂေ့ဟှယ်။ 6 သူးနို့ဟှာ ယေရှုဟှို စွပ်စွဲရှင်ဟှူကြောန့် ထောန်ချော့-က်ဆင်ဟှို့ အယ်မျိုးပြောဂေ့ဟှယ်။

အယ်ဘေမဲ့ ကိုယ်တော်ဟှာ ခေါန်းငေါက်ဘီး မ္လေဂီးထတ်မာ လတ်ညိုးန ရေးနေတော်မူလေဟှယ်။ 7 သူးနို့ဟှာ အယ်နေရာမာဘဲ့ မတ်တတ်ရပ်နေဘီး မေးခွန်းလေ မေးနေဟှူကြောန့် ကိုယ်တော်ဟှာ မော့ကေ့ဘီး "နန်းနို့ထဲဟှ ပြစ်မှေ့ဘဲလူဟှာ ဦးဆောင်း အယ်မီးမဟှို က္လော့-က်ခဲနပစ်ဂေ့ပါ" ဆိုဘီး မိန့်တော်မူလေဟှယ်။ 8 အယ်ဘီးန ကိုယ်တော်ဟှာ ခေါန်းငေါက်ဘီး မ္လေဂီးထတ်မာ ပ္လန်ဘီးရေးတော်မူလေဟှယ်။

9 သူးနို့ဟှာ အယ်မူစကားကြားရဟှူ ခီမာ သတ်ကီးဟှူ လူလေဟှစဘီး ယော့-က်ဘီးယော့-က် ထွပ်ဟှားဂေ့လေဟှယ်။ ယေရှုတပါးဒဲဘဲ့ အယ်နေရာမာ ရပ်နေဟှူမီးမနတူးဒူ ကျန်ရစ်ဟှယ်။ 10 ယေရှုဟှာ မော့ကေ့ဘီး အယ်မီးမဟှို "သူးနို့ ဖယ်ရော့-က်ဟှားဂေ့နူး။ နန့်ဟှို ပြစ်စီရင်ဟှို့ ယော့-က်လည်းမှေ့ဟှမ်းလော။" ဆိုဘီး မေးတော်မူလေဟှယ်။

11 "ယော့-က်လည်းမှေ့ဟှမ်း။ ဆရာ" ဆိုဘီး အယ်မီးမဟှ ပ္လန်ဖြေလေဟှယ်။

ယေရှုဟှ "ငါလည်း နန့်ဟှို ပြစ်စီရင်ဟှ။ သွားလိုက်။ အယ်ဘေမဲ့ ပ္လန်ဘီးပြစ်လောက်န" ဆိုဘီး မိန့်တော်မူဟှယ်။]*၈.၁၁ မူရင်းလတ်ရေးမူလေ ဘောင်ဂီးန ရှေးဘာသာပ္လန်လေမာ အယ်စာပိုဒ် (၇.၅၃—၈.၁–၁၁) ဟှာ မှေ့ဟှ၊ တချို့ မူရင်းလတ်ရေးမူမာ အယ်စာပိုဒ်ဟှို ယော ၂၁.၂၄ နော့-က်မာရှိဘီး၊ တချို့ မူရင်းလတ်ရေးမူမာ အယ်စာပိုဒ်ဟှို လု ၂၁.၃၈ နော့-က်မာရှိဘီး မူရင်းလတ်ရေးမူ တခုမာဆို အယ်စာပိုဒ်ဟှာ ယော ၇.၃၆ နော့-က်မာရှိဟှယ်။

12 ✝ ၈.၁၂ မ ၅.၁၄; ယော ၉.၅ ယေရှုဟှ ဖာရိရှဲလေဟှို "ငါဟှာ လောကရဲ့ လန်းရောန် ဖြစ်ဟှယ်။ ငါ့ရဲ့ နော့-က်လိုက်လေဟှာ မှောန်ထဲမာ လောင်းဝရှော့-က်ရဘဲ သတ်ရဲ့ လန်းရောန်ဟှို ရရှိမယ်" ဆိုဘီး ပ္လန်မိန့်တော်မူဟှယ်။

13 ✝ ၈.၁၃ ယော ၅.၃၁ ဖာရိရှဲလေဟှ "ခု နန်ဟှာ နန့်ရဲ့ ကြောန်းဟှိုဘဲ့ သတ်သေခံနေဟှယ်။ နန့်ရဲ့ သတ်သေခံချစ်ဟှာ မှန်ဟှ" ဆိုဘီး ပြောဂေ့ဟှယ်။

14 ယေရှုဟှ "ငါ့ကြောန်းဟှို ငါ သတ်သေခံနေဘေမဲ့လည်း ငါပြောနေဇာလေဟှာ တကယ်ဘဲ့ဖြစ်ဟှယ်။ ဖြားဖြစ်ကြောန့်နူးဆိုဟှာ ငါဟှာ ဖယ်နေရာဟှနေလာဘီး ဖယ်နေရာဟှို သွားမယ် ဆိုဇာဟှို ငါသိဟှယ်။ နန်းနို့ဟှ ငါဟှာ ဖယ်နေရာဟှနေလာဘီး ဖယ်နေရာဟှို သွားမယ် ဆိုဇာဟှို သိဂေ့ဟှ။ 15 နန်းနို့ဟှာ လူရဲ့ စံနှုန်းတိုင်း စီရင်ဂေ့ဟှယ်။ ငါဟှာ ဖယ်လူဟှိုလည်း စီရင်ဟှ။ 16 အယ်ဘေမဲ့ ငါစီရင်မယ် ဆိုဟှာလည်း ငါ့စီရင်ချစ်ဟှာ မှန်ဟှယ်။ ဖြားဖြစ်ကြောန့်နူးဆိုဟှာ ငါ့ယော့-က်ဒဲစီရင်ဇာ မှုဟှ။ ငါ့ဟှို စေလွတ်ဟှူ ဖဟှာ ငါ့နတူးဒူရှိနေဟှယ်။ 17 နန်းနို့ပညတ်တရားထဲမာ သတ်သေနှေ့ယော့-က် ဘောတူဟှူ ခီမာ သူးနို့ဖြားဇာဘဲ့ပြောပြော မှန်ဟှယ်။ 18 ငါဟှာ ငါ့ကြောန်းဟှို သတ်သေခံဟှယ်။ ငါ့ဟှို စေလွတ်ဟှူ ဖဟှလည်း ငါ့ကိုယ်စား သတ်သေခံဟှယ်" ဆိုဘီး ပ္လန်ဖြေတော်မူလေဟှယ်။

19 သူးနို့ဟှ "နန့်ဖဟှ ဖယ်မာနူး" ဆိုဘီး ကိုယ်တော့်ဟှို မေးဂေ့ဟှယ်။

ယေရှုဟှ "နန်းနို့ဟှာ ငါ့ဟှို သိဂေ့ဟှမျိုးဘဲ့ ငါ့ဖဟှိုလည်း သိဂေ့ဟှ။ နန်းနို့ဟှာ ငါ့ဟှို သိမယ် ဆိုဟှာ ငါ့ဖဟှိုလည်း သိဂေ့မယ်" ဆိုဘီး ပ္လန်ဖြေဟှယ်။

20 ယေရှုဟှာ ဗိမာန်တော်ထဲမာ သွန်သန်တော်မူဒူးဟှ အယ်စကားလေ ဂူလောင်းဟှို လှူခံသစ်တာနီးမာ မိန့်တော်မူဟှယ်။ ကိုယ်တော်ရဲ့ ခီရော့-က်သေးဘဲဟှူကြောန့် ကိုယ်တော့်ဟှို ဖယ်လူလည်း ဖမ်းဂေ့ဟှ။

21 ယေရှုဟှာ "ငါဝီးဟှို သွားရလေ့မယ်။ နန်းနို့ဟှာ ငါ့ဟှို လိုက်ရှာဂေ့ဘေမဲ့ နန်းနို့ရဲ့ ပြစ်ထဲမာ သေလေ့မယ်။ ငါသွားဟှို့နေရာဟှို နန်းနို့လာနိုင်ဂေ့ဟှ" ဆိုဘီး မိန့်တော်မူလေဟှယ်။

22 အယ်ကြောန့် ယုဒအာဏာပိုင်လေဟှ "သူလာမယ့် နေရာဟှို နန်းနို့လာနိုင်ဂေ့ဟှ ဆိုဘီး သူဟှ ပြောဟှယ်။ အယ်ဓိပါယ်ဟှ သူ့ကိုယ်သူ သတ်သေဟှို့လော" ဆိုဘီး ပြောဂေ့ဟှယ်။

23 ယေရှုဟှ "နန်းနို့ဟှာ အော့-က်ဘောင်သားလေ ဖြစ်ဂေ့ဟှယ်။ ငါဟှ ထတ်ဘောင်ဟှနေ လာဟှယ်။ နန်းနို့ဟှာ အယ်လောကသားလေ ဖြစ်ဂေ့ဟှယ်။ ငါဟှာ အယ်လောကသား မှုဟှ။ 24 အယ်ကြောန့် နန်းနို့ဟှာ နန်းနို့ရဲ့ ပြစ်ထဲမာ သေရလေ့မယ် ဆိုဘီး ငါပြောဟှားဟှယ်။ ‘ငါဖြစ်ဟှူတိုင်း ငါဖြစ်ဟှယ်’ ဆိုဇာဟှို နန်းနို့ ယောင်ကြည်ဟှ ဆိုဟှာ နန်းနို့ဟှာ နန်းနို့ရဲ့ ပြစ်ထဲမာ သေရလေ့မယ်" ဆိုဘီး ဖြေတော်မူဟှယ်။

25 သူးနို့ဟှ "နန်ဟှ ဖယ်သူနူး" ဆိုဘီး ကိုယ်တော့်ဟှို မေးဂေ့ဟှယ်။

ယေရှုဟှ "ငါဖယ်သူဖြစ်ဟှယ် ဆိုဇာ နန်းနို့ဟှို စစဒူးဟှ ငါပြောပီးဘီ။*၈.၂၅ ငါဖယ်သူဖြစ်ဟှယ် ဆိုဇာ နန်းနို့ဟှို စစဒူးဟှ ငါပြောပီးဘီ၊ အယ်မျိုးမှုဘဲနေဟှာ ဖြားဖြစ်ကြောန့် ငါဟှ နန်းနို့ဟှို အားလောင်း ပြောပြရဟှို့နူး။ 26 ငါ့မာ နန်းနို့န ပတ်သတ်ဘီး ပြောဟှို့ရော၊ စီရင်ဟှို့ရော ဘောင်ဂီးရှိဟှယ်။ အယ်ဘေမဲ့ ငါ့ဟှို စေလွှတ်ဟှူသူဟှာ သစ်စာန ပ္လဲ့ဇောင်ဘီး ငါဟှာ သူ့နားဟှနေ ကြားရဇာလေဟှိုဘဲ့ အယ်လောကဟှို ပြောဟှယ်" ဆိုဘီး ဖြေတော်မူလေဟှယ်။

27 ယေရှုဟှ ဖဟှို ရည်ညွန်းဘီး ပြောနေဇာဟှို သူးနို့ဟှ နားလည်ဂေ့ဟှ။ 28 အယ်ကြောန့် ယေရှုဟှ သူးနို့ဟှို "နန်းနို့ဟှ လူ့ရဲ့သားဟှို မ္လော့-က်ဟှားဟှူ ခီမာ ‘ငါဖြစ်ဒဲ့တိုင်း ငါဖြစ်ဟှယ်’ ဆိုဇာဟှိုရော၊ ငါဟှာ ငါ့ကိုယ်ပိုင် ခွမ့်အာဏာန ဖြားလည်းလောက်ဟှ ဆိုဇာဟှိုရော၊ ငါ့ဟှို ဖဟှ ညွန်ကြားဟှားဇာလေဟှိုဘဲ့ ငါပြောဟှယ် ဆိုဇာဟှိုရော နန်းနို့လေ သိလေ့မယ်။ 29 ငါ့ဟှို စေလွှတ်သူဟှာ ငါ့နတူးဒူ ရှိဘီး ငါဟှာ သူကြိုက်ဟှူ ဇာလေဟှို မြဲဒမ်း လောက်နေကြောန့် သူဟှာ ငါ့ဟှို တယော့-က်ဒဲ ပစ်ထားတော်မူဟှ" ဆိုဘီး မိန့်တော်မူလေဟှယ်။

30 အယ်မူဇာလေဟှို ကြားရဟှူ လူလေဟှာ ယေရှုဟှို ယောင်ကြည်ဂေ့ဟှယ်။

31 အယ်ကြောန့် ယေရှုဟှ သူ့ဟှို ယောင်ကြည်ဟှူ ယုဒလူလေဟှို "နန်းနို့ဟှာ ငါ့ရဲ့ တရားစကားဟှို နားထောန်မယ် ဆိုဟှာ နန်းနို့ဟှာ ငါ့ရဲ့ တဗဲ့တော်လေ မှန်ဘဲ့ဖြစ်ဘီး 32 နန်းနို့ဟှာ သမ္မာတရားဟှို သိရဘီးဟှာ အယ်သမ္မာတရားဟှ နန်းနို့ဟှို လွတ်မြော့-က်စေလေ့မယ်" ဆိုဘီး မိန့်တော်မူလေဟှယ်။

33 ✝ ၈.၃၃ မ ၃.၉; လု ၃.၈ သူးနို့ဟှ "နို့လေဟှာ အာဗြဟံရဲ့ မ္လေးမ္လစ်လေဖြစ်ဘီး နို့လေဟှာ ဖယ်လူနားမာလည်း ကျွန်ခံဖူးဟှ။ အယ်ဆိုဟှာ ‘နန်းနို့လေ လွတ်မြော့-က်လေ့မယ်’ ဆိုဘီး နန်ပြောနေဇာဟှ ဖြားဓိပါယ်နူး" ဆိုဘီး မေးဂေ့ဟှယ်။

34 ယေရှုဟှ "နန်းနို့ဟှို ငါ မှန်တိုင်းပြောမယ်၊ ပြစ်လောက်ဟှူ လူတိုင်းဟှာ ပြစ်ရဲ့ကျွန် ဖြစ်ဟှယ်။ 35 ကျွန်ဟှာ အီမာ မြဲဒမ်းနေဇာ မှုဟှ။ အယ်ဘေမဲ့ သားဟှာ မြဲဒမ်း နေဟှယ်။ 36 သားတော်ဟှ နန်းနို့ဟှို လွတ်ပေးမယ် ဆိုဟှာ နန်းနို့ဟှာ မှန်ဘဲ့လွတ်ဂေ့လေ့မယ်။ 37 နန်းနို့ဟှာ အာဗြဟံရဲ့ မ္လေးမ္လစ်ဖြစ်ဟှယ် ဆိုဇာဟှို ငါသိဟှယ်။ နန်းနို့ဟှာ ငါ့ရဲ့ သွန်သန်ချစ်ဟှို လတ်ခံရှင်ဘဲဟှူကြောန့် ငါ့ဟှို သတ်ဟှို့ ကြိုးစားနေဂေ့ဟှယ်။ 38 ငါဟှာ ဖနားဟှ ဗြင်ဟှားဇာလေဟှိုဘဲ့ ပြောဟှယ်။ နန်းနို့ဟှာ နန်းနို့ဖ ပြောဟှားဇာလေဟှို လောက်ဂေ့ဟှယ်" ဆိုဘီး သူးနို့ဟှို မိန့်တော်မူလေဟှယ်။

39 သူးနို့ဟှာ "နို့လေရဲ့ ဖဟှာ အာဗြဟံဖြစ်ဟှယ်" ဆိုဘီး ပ္လန်ဖြေဂေ့ဟှယ်။

ယေရှုဟှ "နန်းနို့ဟှာ အာဗြဟံရဲ့ သားမီးလေ မှန်ဘဲ့ဖြစ်မယ် ဆိုဟှာ အာဗြဟံလောက်မျိုးဘဲ့ လောက်ဂေ့လေ့မယ်။*၈.၃၉ နန်းနို့ဟှာ အာဗြဟံရဲ့ သားမီးလေ မှန်ဘဲ့ဖြစ်မယ် ဆိုဟှာ အာဗြဟံလောက်မျိုးဘဲ့ လောက်ဂေ့လေ့မယ်၊ တချို့ မူရင်းလတ်ရေးမူလေမာ နန်းနို့ဟှာ အာဗြဟံရဲ့ သားမီးလေဖြစ်မယ် ဆိုဟှာ အာဗြဟံလောက်မျိုးဘဲ့ လောက်ဂေ့လေ့မယ်၊ ဆိုဘီး ပါရှိဟှယ်။ 40 ဘုရားသခင်နားဟှနေ ငါကြားဟှားဟှူ သမ္မာတရားဟှို နန်းနို့ဟှို ပြောဘေမဲ့လည်း နန်းနို့ဟှ ငါ့ဟှို သတ်ဟှို့ ကြိုးစားဂေ့ဟှယ်။ အာဗြဟံဟှာ အယ်မျိုးလောက်ဟှ! 41 နန်းနို့ဟှာ နန်းနို့ဖ လောက်ဟှားမျိုး လောက်နေဂေ့ဟှယ်" ဆိုဘီး ပ္လန်မိန့်တော်မူလေဟှယ်။

သူးနို့ဟှ "ဘုရားသခင် ကိုယ်တိုင်ဟှာ နို့လေရဲ့ တပါးဒဲဟှူ ဖဖြစ်ဘီး နို့လေဟှာ မှားယွင်းမှုမှေ့ဘဲဟှူ သားမီးလေဖြစ်ဟှယ်" ဆိုဘီး ဖြေဂေ့ဟှယ်။

42 ယေရှုဟှာ သူးနို့ဟှို "ဘုရားသခင်ဟှ နန်းနို့ဖ မှန်ဘဲ့ဖြစ်ဟှယ် ဆိုဟှာ နန်းနို့ဟှာ ငါ့ဟှို ရှစ်ဂေ့လေ့မယ်။ ဖြားဖြစ်ကြောန့်နူးဆိုဟှာ ငါဟှာ ဘုရားသခင်နားဟှ လာဘီး ခု ငါအယ်မာရှိဟှယ်။ ငါ့ကိုယ်ပိုင် ခွမ့်အာဏာန လာဇာ မှုဟှ။ ကိုယ်တော်ဟှ ငါ့ဟှို စေလွှတ်တော်မူဟှယ်။ 43 နန်းနို့ဟှာ ငါပြောဇာဟှို ဖြားဖြစ်ကြောန့် နားလည်ဂေ့ဟှနူး။ နန်းနို့ဟှာ ငါ့ရဲ့ တရားဟှို နားထောန်နိုင်ဘဲကြောန့် ဖြစ်ဟှယ်။ 44 နန်းနို့ဟှာ နန်းနို့ဖ မာရ်နတ်ရဲ့ သားလေဖြစ်ဘီး နန်းနို့ဖရဲ့ လိုနော့-က်ဟှို လိုက်ရှင်ဂေ့ဟှယ်။ စစဒူးဟှ သူဟှာ လူသတ်မားဖြစ်ဘီး သမ္မာတရား ဖတ်မာ မှေ့ဟှ။ ဖြားဖြစ်ကြောန့်နူးဆိုဟှာ သူ့ထဲမာ သမ္မာတရားလည်း မှေ့ဟှ။ သူဟှာ လီညာသူဖြစ်ဘီး လီညာဇာ ဂူလောင်းရဲ့ ဖလည်းဖြစ်ဟှူကြောန့် သူ့ပင်ကိုစရိုက်တိုင်းဘဲ့ ပြောဆိုဟှယ်။ 45 အယ်ဘေမဲ့ ငါဟှာ သမ္မာတရားဟှို ပြောဟှူကြောန့် နန်းနို့ဟှာ ငါ့ဟှို ယောင်ကြည်ဂေ့ဟှ။ 46 ငါ့မာ ပြစ်ရှိဟှယ် ဆိုဇာဟှို နန်းနို့ထဲဟှ ဖယ်လူတယော့-က် သတ်သေပြနိုင်မယ်နူး။ ငါဟှာ သမ္မာတရားဟှို ပြောဟှယ် ဆိုဟှာ ဖြားဖြစ်ကြောန့် နန်းနို့ဟှာ ငါ့ဟှို ယောင်ကြည်ဂေ့ဟှနူး။ 47 ဘုရားသခင်နားဟှ လာဟှူလူဟှာ ဘုရားသခင်ရဲ့ စကားလေဟှို နားထောန်ဟှယ်။ အယ်ဘေမဲ့လည်း နန်းနို့ဟှ ဘုရားသခင်နားဟှ လာဇာမှုဘဲဟှူကြောန့် နန်းနို့ဟှာ နားထောန်ဂေ့ဟှ" ဆိုဘီး မိန့်တော်မူလေဟှယ်။

48 ယုဒလူလေဟှာ ယေရှုဟှို "နန်ဟှာ ရှမာရိလူ ဖြစ်ဘီးဟှာ နန့်ထဲမာ နတ်ဆိုးရှိဟှယ် ဆိုဘီး နို့လေပြောဇာဟှာ မှန်ဘဲကြောန့်လော" ဆိုဘီး မေးဂေ့ဟှယ်။

49 ယေရှုဟှ "ငါ့မာ နတ်ဆိုး မှေ့ဟှ။ ငါဟှာ ငါ့ဖဟှို ချီးမြှော့-က်ဘေမဲ့ နန်းနို့ဟှာ ငါ့ဟှို ချီးမြော့-က်ဂေ့ဟှ။ 50 ငါဟှာ ငါ့တွပ် ဖောင်းသရေတော်ဟှို ရှာဇာ မှုဟှ။ အယ်ဘေမဲ့ ငါ့ရဲ့ ဖောင်းသရေတော်ဟှို ရှာဘီး ငါ့ဖတ်မာ စီရင်တော်မူဟှူသူ ရှိဟှယ်။ 51 နန်းနို့ဟှို ငါ မှန်တိုင်းပြောမယ်၊ ငါ့စကားဟှို နာခံဟှူ ဖယ်သူဘဲ့ဖြစ်ဖြစ် ကာလစဉ်ဆစ် သေဘေးန ကြောင်ရဟှို့ မှုဟှ" ဆိုဘီး မိန့်တော်မူလေဟှယ်။

52 ယုဒလူလေဟှ ကိုယ်တော့်ဟှို "နန့်မာ နတ်ဆိုးရှိဟှယ် ဆိုဇာဟှို ခု နို့လေ တိက္လသိဟှားဘီ! အာဗြဟံလည်း သေဟှားဘီ။ ပရောဖက်လေလည်း သေဟှားဘီ။ ခုထိ နန်ဟှာ နန့်ရဲ့ စကားဟှို နာခံဟှူ ဖယ်လူဘဲ့ဖြစ်ဖြစ် ကာလစဉ်ဆစ် သေရလေ့မယ် မှုဟှ ဆိုဘီး ပြောဟှယ်။ 53 နန်ဟှာ သေဟှားဟှူ နို့လေရဲ့ဖ အာဗြဟံထတ် ကီးမြတ်လော။ သူဟှာ သေဟှားဘီ။ ပရောဖက်လေလည်း သေဟှားဂေ့ဘီ။ နန့်ကောန်နန် ဖယ်လူဖြစ်ဟှယ် ဆိုဘီး ထန်နေနူး" ဆိုဘီး ပြောဂေ့ဟှယ်။

54 ယေရှုဟှ "ငါဟှာ ငါ့ကိုယ်ငါ ချီးမြှော့-က်မယ် ဆိုဟှာ အယ်မျိုး ချီးမြှော့-က်ဇာဟှာ သောင်းဇားရဟှို့ မှုဟှ။ ငါ့ဟှို ချီးမြှော့-က်ဟှူ သူဟှာ ငါ့ဖ ဖြစ်ဘီး နန်းနို့ပြောနေဟှူ နန်းနို့ရဲ့ ဘုရားသခင် ဖြစ်ဟှယ်။ 55 နန်းနို့ဟှာ သူ့ဟှို လောင်းဝ သိဂေ့ဘေမဲ့ ငါဟှာ သူ့ဟှို သိဟှယ်။ သူ့ဟှို ငါသိဟှ ဆိုဘီး ပြောမယ် ဆိုဟှာ ငါဟှာလည်း နန်းနို့မျိုးဘဲ့ လီညာသူ ဖြစ်ဟှားလေ့မယ်။ အယ်ဘေမဲ့ ငါဟှာ သူ့ဟှို သိဘီး သူ့စကားဟှို နာခံဟှယ်။ 56 နန်းနို့ဖ အာဗြဟံဟှာ ငါလာမယ့် ခီကာလဟှို ဗြင်ရမယ် ဖြစ်ဟှူကြောန့် ပျော်ရွှင်နေဘီး အယ်နေ့ရစ်ဟှို ဗြင်ဟှားဟှူ ခီမာ ဝန်းသာလေဟှယ်" ဆိုဘီး ပ္လန်ဖြေတော်မူလေဟှယ်။

57 ယုဒလူလေဟှာ ကိုယ်တော့်ဟှို "နန်ဟှာ သတ်ငါးဆယ်မျှ ပ္လဲ့သေးဘဲ့န ဖယ်မျိုးလောက်ဘီး အာဗြဟံဟှို ဗြင်ဖူးဟှားဟှယ်နူး"*၈.၅၇ အာဗြဟံဟှို ဗြင်ဖူးဟှားဟှယ်နူး၊ တချို့ မူရင်းလတ်ရေးမူလေမာ အာဗြဟံဟှ နန့်ဟှို ဗြင်ဖူးဘီးဘဲ့လော၊ ဆိုဘီး ပါရှိဟှယ်။ ဆိုဘီး မေးဂေ့ဟှယ်။

58 ယေရှုဟှ "နန်းနို့ဟှို ငါ မှန်တိုင်းပြောမယ်၊ အာဗြဟံ မွီးခန်ဂဒဲဟှ ငါရှိဟှယ်!" ဆိုဘီး ပ္လန်ဖြေဟှယ်။

59 အယ်န သူးနို့ဟှာ ကိုယ်တော့်ဟှို ပစ်ဟှို့ က္လော့-က်ခဲလေဟှို ကော့-က်ဂေ့ဟှယ်။ အယ်ဘေမဲ့ ယေရှုဟှာ ဗိမာန်တော်ဟှနေ ရှောန်ထွပ်ဟှားတော်မူလေဟှယ်။