မာကု 6

ယေရှုဟှာ လူအောက်ဂီးဟှို စားဇာကျွေးဟှူကြောန်း

30 တမန်တော်လေဟှာ ယေရှုနားမာ စုဂေ့ဘီးဟှာ သူးနို့ လောက်ဆောန်ဘီး သွန်သန်ဟှားဟှူဇာ ဂူလောင်းဟှို ကိုယ်တော့်ဟှို လျှော့-က်လေဟှယ်။ 31 အယ်နေရာဟှို လူလေဘောင်ဂီးဟှ သွားလိုက်လာလိုက် လောက်နေဟှူကြောန့် ယေရှုန တဗဲ့တော်လေဟှာ စားဟှို့ ခီဟှိုမှ မှေ့ဟှမ်း။ အယ်ကြောန့် သူဟှ "ငါ့နတူးဒူ တိဆိဟှူ နေရာဟှို သွားဘီးဟှာ ရှစ်ဟှားနားယူ ဂေ့ဇို့" ဆိုဘီး သူးနို့ဟှို မိန့်တော်မူလေဟှယ်။ 32 အယ်ကြောန့် ယေရှုန တဗဲ့တော်လေဟှ တိဆိဟှူ နေရာတခုနားဟှို လှေန ထွပ်ဟှားဂေ့ဟှယ်။

33 သွားလိုက်ဇာဟှို လူလေဟှဗြင်ဟှူ ခီမာ ကိုယ်တော်န တဗဲ့တော်လေဘဲ့ ဆိုဘီး သိဟှားဟှူကြောန့် ဗြို့လေဝါလေဟှ လူလေဟှာ ယေရှုသွားလိုက်ဟှူ နေရာဟှို ဗြန်းဗြန်ဟှား ကူးကြောန်းရှော့-က်ဘီးဟှာ ယေရှုန တဗဲ့တော်လေ ရော့-က်ခန် အယ်နေရာဟှို ရင်ရော့-က်နေဂေ့ဟှယ်။ 34 ✝၆.၃၄ မ ၉.၃၆ယေရှုဟှ လှေဟှနေ ထွပ်ဟှူ ခီမာ ကိုယ်တော်ဟှာ လူအောက်ဂီးဟှို ဗြင်ဟှားဘီး ကိုယ်တော်ဟှာ သူးနို့တွပ် သနားဟှူစိ ဖြစ်ဟှားလေဟှယ်။ ဖြားဖြစ်ကြောန့်နူးဆိုဟှာ သူးနို့ဟှာ သိုးထီးမားမှေ့ဘဲဟှူ သိုးလေမျိုး ဖြစ်နေဟှယ်။ အယ်ကြောန့် ကိုယ်တော်ဟှာ သူးနို့ဟှို ကြောန်းရာလေ ဘောင်ဂီးဟှို စဘီးဟှာ သွန်သန်ဟှယ်။ 35 ညဉ့်မိုက်ခါနီး ရော့-က်လာဟှူ ခီမာ တဗဲ့တော်လေဟှ ယေရှုနားဟှို လာဘီးဟှာ "အယ်နေရာဟှာ တောဖြစ်နေဟှူကြောန့် လူလေလည်း နေဘဲဟှူ နေရာဖြစ်ဟှယ်။ နော့-က်က္လဟှားဘီ။ 36 စားဇာသွားဝယ်ဘီး စားနိုင်ဟှို့တွပ် လူလေဟှို နီးနားမာရှိဟှူ တောဝါလေဟှို လွှတ်လိုက်ပါ" ဆိုဘီး လျှော့-က်ဂေ့ဟှယ်။

37 ယေရှုဟှ "နန်းနို့လေဘဲ့ သူးနို့ဟှို စားဇာတခုခု ကျွေးလိုက်" ဆိုဘီး မိန့်တော်မူလေဟှယ်။

အယ်ခီမာ တဗဲ့တော်လေဟှ "ကျွန်တော့်လေဟှ ငွေဒန်းဂါး*၆.၃၇ ငွေဒန်းဂါး၊ ငွေဒန်းဂါးတပ္လားဟှ တရစ်ဇာလောက်ဟှူ လောက်အားခဖြစ်ဟှယ် (ရှု မ ၂၀.၂)။ ၂၀၀ ဖိုးန စားဇာဝယ်ဘီး အယ်လူလေဟှို ကျွေးရဟှို့လော" ဆိုဘီး လျှော့-က်လေဟှယ်။

38 ယေရှုဟှ "နန်းနို့လေမာ မုဖယ်မျှလော့-က်ရှိနူး။ သွားဘီးဟှာ ကေ့ကေ့" ဆိုဘီး မိန့်တော်မူလေဟှယ်။

သူးနို့လေဟှ ကေ့ဟှူ ခီမာ "မုငါးလောင်းန ငါးနှေ့ကောန်ရှိဟှယ်" ဆိုဘီး လျှော့-က်လေဟှယ်။

39 အယ်ဘီးန ယေရှုဟှ လူလေ ဂူလောင်းဟှို အောက်စုခွဲဘီးဟှာ ဗြစ်ပန်လေထတ်မာ ထိုင်ခိုင်းလိုက် ဆိုဘီး တဗဲ့တော်လေဟှို လောက်ဟှို့တွပ် ပြောလေဟှယ်။ 40 အယ်ကြောန့် လူလေဟှာ တရာတဖွဲ့န ငါးဆယ်တဖွဲ့ တန်းလိုက်ထိုင်ဂေ့ဟှယ်။ 41 အယ်ဘီးန ယေရှုဟှ မုငါးလောင်းန ငါးနှေ့ကောန်ဟှို ယူဘီးဟှာ ကောန်းဂန်ဟှို မျှော်ကေ့ဘီး ဘုရားသခင်ဟှို ကျေးဇူးတော် ချီးမွမ်းလိုက်ဟှယ်။ ကိုယ်တော်ဟှာ မုလေဟှို ဖဲ့ဘီးဟှာ လူလေဟှို ဝီပေးဟှို့တွပ် တဗဲ့တော်လေဟှို မုလေ ပေးလိုက်ဟှယ်။ ကိုယ်တော်ဟှာ ငါးနှေ့ကောန်ဟှိုလည်း သူးနို့လေ ဂူလောင်း ကြားထဲမာ ခွဲဝီပေးလိုက်ဟှယ်။ 42 လူတိုင်းဟှာ စားဘီး ဗိုက်ပ္လဲ့ဟှားဂေ့ဟှယ်။ 43 အယ်ဘီးန တဗဲ့တော်လေဟှ စားဘီး ကျန်နေဟှူ မုနငါးလေရဲ့ က္လိုးပဲ့လေဟှို လိုက်ကော့-က်ဟှူ ခီမာ ဆယ့်နှေ့တောန်းပ္လဲ့ ရဂေ့ဟှယ်။ 44 မုစားဟှူ ယော့-က်ကျား ရေတွပ်ဟှာ ၅,၀၀၀ ရှိလေဟှယ်။