1 ပညတ်တရားဟှိုသိဟှူ ညီကို မောန်နှမလေ နန်းနို့ဟှို ငါပြောရှင်ဇာဟှ ပညတ်တရားဟှာ လူတယော့-က်ဟှို သူသတ်ရှင်နေဟှူကာလပတ်လောင်း ချောက်ကိုင်ဟှားဇာဟှို နန်းနို့သိဂေ့ဟှလော။ 2 ဥပမာ လန်ရှိဟှူ မီးမတယော့-က်ဟှာ ပညတ်တရားတိုင်း သူ့လန် သတ်ရှင်နေဟှူ ကာလပတ်လောင်း လန်ရဲ့ချည်နှောင်မှုဟှို ခံရလေဟှယ်။ လန်သေမှဘဲ့ ပညတ်တရားအရ လန်ရဲ့ ချည်နှောင်မှုဟှနေဘီး လွတ်လေဟှယ်။ 3 အယ်ကြောန့် လန်သတ်ရှင်ရစ်န နော့-က်အီထောန်ပြုဟှယ် ဆိုဟှာ ဖော့-က်ပ္လန်ဟှူမီးမဆိုဘီး ပြောခံရလေ့မယ်။ တကယ်ဟှူကြောန့် လန်သေဟှားကြောန့်ဆိုဟှာ အယ်မူပညတ်တရားဟှ လွတ်ဟှားဘီဖြစ်ဟှူကြောန့် နော့-က်အီထောန်ပြုဟှူလည်းဘဲ့ ဖော့-က်ပ္လန်ဟှူမီးမ ဆိုဘီး ပြောခံရဟှူကြောန်း မှေ့ဟှ။ 4 အယ်မျိုးဘဲ့ ညီကို မောန်နှမလေ နန်းနို့လေဟှာ တခြားသူဖြစ်ဟှူ သေရှင်းဟှထမြော့-က်ဟှူသူရဲ့ မယားဖြစ်ဟှူကြောန့် ဘုရားသခင်ရဲ့လိုတော်တိုင်း တိုးပွားလာဟှို့တွပ် ခရစ်တော်ရဲ့ ကိုယ်ခန္ဓာအားဖြင့် သေဘီးဟှာ ပညတ်တရားန ကွားဟှားဂေ့ဘီ။ 5 နို့လေဟှာ ဇာတိသွီးသားထဲမာ ကျင်လည်နေဟှူခီဟှ ပညတ်တရားရဲ့ နှိုးဆော်ပေးမှုကြောန့် ဖြစ်ပေါ်လာဟှူ ပြစ်လောက်ရှင်ဟှူ စိဆန္ဒလေဟှာ နို့လေရဲ့ ကိုယ်အင်္ဂါလေမာ ထန်ရှားလာဘီး သေရှင်းတရားဟှို ဖြစ်ပေါ်လာစေဟှယ်။ 6 ခုဆို နို့လေဟှာ နို့လေဟှိုချောက်ကိုင်ဟှားဟှူ ပညတ်တရားရဲ့ လတ်ထဲမာ သေပီးဟှာ ပညတ်တရားလတ်ဟှနေ လွတ်မြော့-က်ဂေ့ဘီဖြစ်ဟှူကြောန့် ကျမ်းစာမာပါဟှူ တရားဟောန်းဟှို မှီပြုဘဲန ဝိညာဉ်တော်ရဲ့ တရားလမ်းစဉ်သစ်တိုင်း မှုတော်ဟှို စေခံဂေ့ဟှယ်။

7 အယ်မျိုးဆိုဟှာ ဖယ်မျိုးနူး၊ ပညတ်တရားဟှို ပြစ်ပြောရဟှို့လော။ ပြစ်လုံးဝ ပြောဟှို့မရဟှ! ပညတ်တရားအားဖြင့်ဘဲ့ ပြစ်ရဲ့သဘောတရားဟှို နို့လေသိရဂေ့ဟှယ်။ ဖြားဖြစ်ကြောန့်နူးဆိုဟှာ "တပ်မတ်လိုရှင်စိရှိန" ဆိုဘီး ပညတ်တရားဟှ တားမြစ်ဘဲနေဟှာ လောဘလွန်ကြူးမှုရဲ့ ဆိုးကျိုးဟှို ငါသိဟှို့ မှုဟှ။ 8 ပြစ်တရားဟှာ ပညတ်တရားအားဖြင့် ငါ့ဟှိုချောက်ကိုင်ဘီး လောဘစိ မျိုးမျိုးလေဟှို ဖြစ်ပေါ်စေဟှယ်။ ပညတ်တရားမှေ့ဘဲနေဟှာ ပြစ်တရားလည်းသေ ဖြစ်ဟှယ်။ 9 စဟှ ပညတ်တရားမှေ့ဘဲကြောန့် ငါသတ်ရှင်ဟှယ်။ ပညတ်တရားပေါ်ပေါ့-က်လာဟှူ ခီမာ ပြစ်တရားဟှာ ပ္လန်ရှင်လာဘီး ငါလည်း သေဟှယ်။ 10 ငါ့ဟှို သတ်ရှင်ဟှို့ပေးဟှူ ပညတ်တရားဟှဘဲ့ ငါ့ဟှိုသေစေဇာဟှို တွိရဟှယ်။ 11 ပြစ်တရားဟှာ ပညတ်တရားအားဖြင့် ခွမ့်ရဟှူကြောန့် ငါ့ဟှိုလှည့်ဇားဘီးဟှာ အယ်ပညတ်တော်အားဖြင့် ငါ့ဟှို သတ်လေဟှယ်။

12 အယ်ကြောန့် ပညတ်တရားဟှာ သန့်ရှင်းလေဟှယ်။ ပညတ်တော်လည်းဘဲ့ သန့်ရှင်းရှင်း ဖြောန့်မတ်ရှင်း ကောန်းမြတ်စောင်လင်ရှင်း ရှိလေဟှယ်။ 13 အယ်မျိုးဆိုဟှာ အယ်မူကောန်းမြတ်ဟှူရာဟှာ ငါ့တွပ် သေရဟှူကြောန်းရာ ဖြစ်ဟှူကြောန့်လော။ ဖြစ်နိုင်ဟှ! ငါ့ဟှို သေစေဟှူဇာဟှာ ပြစ်တရားဘဲ့ ဖြစ်ဟှယ်။ ပြစ်တရားဟှာ သူ့ရဲ့ပင်ကိုသဘောဟှို ထန်ရှားစေဟှို့တွပ် ကောန်းမြတ်ဟှူဇာလေအားဖြင့် ငါ့ဟှိုသေစေဟှူဇာ ဖြစ်ဟှယ်။ အယ်ကြောန့် ပြစ်တရားဟှာ တအားဆိုးဝါးဟှူ ပြစ်ဖြစ်ဟှူကြောန်းဟှို ပညတ်တော်အားဖြင့် သိရလေဟှယ်။

14 ပညတ်တရားဟှာ ဝိညာဉ်ရေးရာန ဆိုင်ဟှူကြောန်းဟှို နို့လေသိဂေ့ဟှယ်။ အယ်ဘေမဲ့ ငါဟှာ ဇာတိသွီးသားနှိုက်ရှိဟှူ လူတယော့-က်ဖြစ်ဘီး ပြစ်တရားရဲ့ လတ်အော့-က်မာ ရောန်းဇားခံရဟှူသူ ဖြစ်ဟှယ်။ 15 ✝ငါဟှာ ကိုယ်ဖြစ်နေဇာဟှို ကိုယ်တိုင်နားလည်ဟှ။ ဖြားဖြစ်ကြောန့်နူးဆိုဟှာ ကိုယ်ကျင့်ရှင်ဟှူတိုင်း ကျင့်ဟှိရဘဲန ရွံရှာဟှူ ကျင့်လေဟှို ကျင့်လေဟှယ်။ 16 အယ်မျိုး ငါဟှာ ကိုယ်ပြုရှင်ဘဲန ပြုကျင့်နေရဟှယ် ဆိုဟှာ ပညတ်တရားဟှာ မှန်ကန်ဟှူကြောန်းဟှို ငါဝန်ခံပါဟှယ်။ 17 အယ်မျိုးဆိုဟှာ အယ်မူ ကောန်းဘဲကျင့်ဟှို ငါကိုယ်တိုင် ကျင့်နေဟှူဇာမှုဘဲ ငါ့ထဲမာ ရှိနေဟှူ ပြစ်တရားဟှ ကျင့်စေဟှူဇာဖြစ်ဟှယ်။ 18 ငါ့ရဲ့ ဇာတိသွီးသားထဲမာ ကောန်းဟှူဇာလေ တခုလည်း မှေ့ဘဲဟှူကြောန်းဟှို ငါသိလေဟှယ်။ ဖြားဖြစ်ကြောန့်နူးဆိုဟှာ ငါဟှာ ကောန်းဟှူကျင့်ဟှို ကျင့်ရှင်ဟှူ စိဆန္ဒရှိဟှူလည်းဘဲ့ ကျင့်နိုင်ဟှူခွန်အား ငါ့မာ မှေ့ဟှ။ 19 ငါဟှာ ကောန်းဟှူ ကျင့်လေဟှို ကျင့်ရှင်ဟှူလည်းဘဲ့ ကျင့်ရှင်ဘဲဟှူ ကျင့်ဆိုးလေဟှိုဘဲ့ ငါ့ထဲမာနေဟှူ ပြစ်တရားဟှ ကျင့်နေဟှူဇာ ဖြစ်ဟှယ်။ 20 အယ်မျိုး ကျင့်ရှင်ဘဲဟှူ ကျင့်ဆိုးလေဟှို ငါကျင့်နေရဟှယ် ဆိုဟှာ ငါကိုယ်တိုင် ကျင့်နေဇာမှုဘဲန ငါ့ထဲမာရှိနေဟှူ ပြစ်တရားဟှ ငါ့အားဖြင့် ကျင့်နေဟှူဇာဖြစ်ပါဟှယ်။

21 အယ်မျိုး ကောန်းဟှူကျင့်လေဟှို ကျင့်ရှင်ဟှူငါ့မာ ကောန်းဘဲဟှူ ကျင့်ဆိုးလေဟှိုဘဲ့ ပြုကျင့်စေဟှူ ပညတ်တပါးဟှို ငါတွိရဟှယ်။ 22 ငါဟှာ တွင်းလူအားဖြင့် ဘုရားသခင်ရဲ့ ပညတ်တရားတော်ဟှို ရရာတိုင်း နှစ်သက်ဟှယ်။ 23 အယ်ဘေမဲ့ ငါ့ရဲ့ ကိုယ်အင်္ဂါလေထဲမာ လွှမ်းမိုးချောက်ကိုင်နေဟှူ ပညတ်တပါးဟှာ စိဝိညာဉ်တရားဟှို တိုက်ခိုက်တွန်းလှန်ဘီး ငါ့ကိုယ်အင်္ဂါလေမာရှိဟှူ ပြစ်တရားလတ်ထဲဟှို ငါ့ဟှို ဖမ်းဆီးအပ်လိုက်ဟှူဇာဟှို ငါဗြင်ရဟှယ်။ 24 ငါဟှာ ရရာတိုင်း စိပျစ်ဇာကောန်းဟှူ လူတယော့-က်ဖြစ်ဟှယ်! သေတတ်ဟှူ အယ်မူခန္ဓာ ပေါက်ကောန်ဟှနေဘီး ငါ့ဟှို ဖယ်သူကယ်တန်ပေးမယ်နူး။ 25 နို့လေရဲ့ သခင် ယေရှုခရစ်တော်အားဖြင့် ကယ်လွှတ်ပေးတော်မူဟှူ ဘုရားသခင်ဟှာ ရရာတိုင်းဘဲ့ ကျေးဇူးကီးမားလှပါဟှယ်!

အယ်မျိုး ငါဟှာ ကိုယ့်စိဝိညာဉ်အားဖြင့် ဘုရားသခင်ရဲ့ ပညတ်တော် အော့-က်မာ စေခံဟှူလည်းဘဲ့ ဇာတိသွီးသားအားဖြင့် ပြစ်တရားဟှို စေခံနေရဇာ ဖြစ်ဟှယ်။