1 အယ်ကြောန့် ခုခီမာ ခရစ်တော်ယေရှုနှိုက် ရှိဟှူသူလေဟှာ ပြစ်စီရင်ဇာဟှို ခံရဟန်း။ 2 ဖြားဖြစ်ကြောန့်နူးဆိုဟှာ ခရစ်တော်ယေရှုနှိုက် သတ်ရှင်ဟှို့တွပ် ဝိညာဉ်တော်တရားဟှာ ပြစ်တရားန သေရှင်းတရားဟှနေဘီး ငါ့ဟှို* လွတ်မြော့-က်စေတော်မူဘီ။ 3 ဇာတိပကတိကြောန့် ပညတ်တရားဟှာ အားနဲဘီး တတ်နိုင်ဘဲဟှူမှုဟှို ဘုရားသခင် ပြုတော်မူဟှို့တွပ် ပြစ်နပ္လဲ့ဝဟှူ ဇာတိပကတိရဲ့ သဏ္ဌာန်ဟှို ဆောန်ဟှူ သူ့ရဲ့ သားတော်ဟှို စေလွှတ်ဘီးဟှာ ပြစ်ဖြေဟှို့တွပ် ဇာတိပကတိနှိုက် ပြစ်ဟှို ဒန်ပေးတော်မူလေဟှယ်။ 4 ဖြားဖြစ်ကြောန့်နူးဆိုဟှာ နို့လေဟှာ ဇာတိသွီးသားတိုင်း သတ်ရှင်ဘဲ ဝိညာဉ်တော်အားဖြင့် သတ်ရှင်နေထိုင်ဟှို့တွပ် ပညတ်တော်မာပါဟှူ တရားတော်ဟှို လိုက်နာကျင့်သောင်းဟှို့တွပ် ဖြစ်လေဟှယ်။ 5 ဇာတိသွီးသားရဲ့ လိုဆန္ဒတိုင်း သတ်ရှင်ဟှူသူလေဟှာ ဇာတိသွီးသားန သတ်ဆိုင်ဟှူဇာလေဟှိုဘဲ့ စိစွဲလမ်းဂေ့ဟှယ်။ ဝိညာဉ်တော်ရဲ့ လိုတော်တိုင်း သတ်ရှင်ဟှူ သူလေဟှာ ဝိညာဉ်တော်န သတ်ဆိုင်ဟှူ ဇာလေဟှိုဘဲ့ စိစွဲလမ်းလေဟှယ်။ 6 ဇာတိသွီးသားနဆိုင်ဟှူ ဇာလေဟှို စိစွဲလမ်းဟှူ သူလေဟှာ သတ်ဆောင်းရှောင်းလေ့မယ်။ ဝိညာဉ်တော်န ဆိုင်ဟှူဇာဟှို စိစွဲလမ်းဟှူ သူလေဟှာ သတ်ရှင်ရှင်းန ငြီသတ်ရှင်းဟှို ရလေ့မယ်။ 7 ဖြားဖြစ်ကြောန့်နူးဆိုဟှာ ဇာတိသွီးသားန ဆိုင်ဟှူဇာလေဟှို စိစွဲလမ်းဟှူ သူလေဟှာ ဘုရားသခင်န ဆန့်ကျင်ဖတ်ပြုဟှူသူ ဖြစ်ဟှယ်။ အယ်မျိုး စိစွဲလန်းဟှူ သူလေဟှာ ဘုရားသခင်ရဲ့ ပညတ်တော်ဟှို လိုက်ရှော့-က်တတ်ဟှ။ လိုက်လည်း လိုက်ရှော့-က်နိုင်ဂေ့ဟှ။ 8 အယ်ကြောန့် ဇာတိသွီးသားတိုင်း သတ်ရှင်သူလေဟှာ ဘုရားသခင်ရဲ့ စိတော်န တွိနိုင်ဟှ။

9 အယ်ဘေမဲ့ ဘုရားသခင်ရဲ့ ဝိညာဉ်တော်ဟှာ နန်းနို့ထဲမာ ကိန်းဝပ်တော်မူဟှာ နန်းနို့လေဟှာ ဇာတိပကတိဖတ်မာ မှေ့ဟှ ဝိညာဉ်ပကတိဖတ်မာ ရှိလေဟှယ်။ ခရစ်တော်ရဲ့ ဝိညာဉ်ဟှို ရဘဲသူဟှာ ခရစ်တော်န လောင်းဝ သတ်ဆိုင်ဟှ။ 10 အယ်ဘေမဲ့လည်း ခရစ်တော်ဟှာ နန်းနို့ထဲမာ သတ်ရှင်နေဟှယ် ဆိုဟှာ ကိုယ်ခန္ဓာဟှာ ပြစ်ကြောန့် သေရဟှူလည်းဘဲ့ ဝိညာဉ်ဟှ ဖြောန့်မတ်ရှင်းကြောန့် သတ်ရှင်လေဟှယ်။* 11 ✝အယ်လော့-က်နကဟှ သခင်ယေရှုဟှို သေရှင်းဟှနေဘီး ရှင်ပ္လန်ထမြော့-က်စေဟှူ ဘုရားသခင်ရဲ့ ဝိညာဉ်တော်ဟှာ နန်းနို့ထဲမာ ကိန်းဝပ်ဟှယ် ဆိုဟှာ ခရစ်တော်ဟှို သေရှင်းဟှနေ ရှင်ပ္လန်ထမြော့-က်စေဟှူ သခင်ဟှာ နန်းနို့ထဲမာ ကိန်းဝပ်ဟှူ သူ့ရဲ့ ဝိညာဉ်တော်အားဖြင့် သေတတ်ဟှူ နန်းနို့ ကိုယ်ခန္ဓာဟှိုလည်း ရှင်စေတော်မူလေ့မယ်။

12 အယ်ကြောန့် ညီကို မောန်နှမလေ နို့လေဟှာ ဇာတိလိုတိုင်း သတ်ရှင်ရအောန် ဇာတိရဲ့ ကျွန်ဖြစ်ဂေ့ဟှူဇာ မှုဟှ။ 13 ဖြားဖြစ်ကြောန့်နူးဆိုဟှာ နန်းနို့လေဟှာ လူ့ဇာတိလိုဟှိုလိုက်ဘီး သတ်ရှင်မယ် ဆိုဟှာ သေဂေ့ရလေ့မယ်။ အယ်ဘေမဲ့ ဝိညာဉ်တော်အားဖြင့် နန်းနို့ရဲ့ ကိုယ်ခန္ဓာကျင့်လေဟှို သေစေမယ် ဆိုဟှာ သတ်ရှင်ရလေ့မယ်။ 14 ဘုရားသခင်ရဲ့ ဝိညာဉ်တော် ဆောင်းမပဲ့ပြင်တော်မူရှင်းဟှို ခံရဟှူသူလေဟှာ ဘုရားသခင်ရဲ့ သားမီးလေဖြစ်ဟှယ်။ 15 ✝✝ဖြားဖြစ်ကြောန့်နူးဆိုဟှာ ဘုရားသခင် ပေးတော်မူဟှူ ဝိညာဉ်တော်ဟှာ နန်းနို့ဟှို ကြော့-က်တတ်ဟှူ ကျွန်ရဲ့စိသဘောဟှို ပေးဟှူဇာမှုဘဲန နို့လေဟှို ဘုရားသခင်ရဲ့ သားမီးလေဖြစ်စေဘီးဟှာ ဝိညာဉ်တော်အားဖြင့် "အဗ္ဗ! ဖ!" ဆိုဘီး ခေါ်ရဟှူခွမ့်ဟှို ပေးတော်မူဟှူဇာ ဖြစ်ဟှယ်။ 16 နို့လေဟှာ ဘုရားသခင်ရဲ့ သားမီးလေ ဖြစ်ဟှူကြောန်းဟှို ဝိညာဉ်တော်ကိုယ်တိုင် နို့လေရဲ့ဝိညာဉ်နတူးဒူ သတ်သေခံလေဟှယ်။ 17 နို့လေဟှာ ဘုရားသခင်ရဲ့ သားမီးလေဖြစ်ဟှူကြောန့် မွီစားမွီခံလေဖြစ်ဟှယ်။ ခရစ်တော်နတူးဒူ ချီးမြှော့-က်ဟှူဇာဟှို ခံရဟှို့တွပ် ကိုယ်တော်နတူးဒူ ဆင်းရဲဒေါက်ခဟှို ခံရဟှယ် ဆိုဟှာ ကိုယ်တော်နတူးဒူ ဆစ်နွယ်ဟှူ မွီခံလည်း ဖြစ်လေဟှယ်။

18 ခုမျစ်မှော့-က်ကာလမာ နို့လေခံရဟှူ ဆင်းရဲဒေါက်ခဟှာ နော့-က်တခီမာ ထန်ရှားလာမယ့် ဖောင်းသရေတော်န နှိုင်းယှဉ်မယ် ဆိုဟှာ ပမာဏထားဇာ ကြောန်းမှေ့ဟှ ဆိုဘီး ငါမှတ်ယူဟှယ်။ 19 ဖန်ဆင်းခံလောက တခုလောင်းဟှာ ဘုရားသခင်ရဲ့ သားလေ ထန်ရှားဘီး ပေါ်ထွပ်လာဟှို့တွပ် ရရာတိုင်းဘဲ့ မျှော်လင့်တောန့်တ နေလေဟှယ်။ 20 ဖြားဖြစ်ကြောန့်နူးဆိုဟှာ ဖန်ဆင်းခံလောကဟှာ အနတ္တဖြစ်ဟှို ရော့-က်ဟှူဇာဟှ သူ့ရဲ့ဆန္ဒအားဖြင့်မှုဘဲ ဘုရားသခင်ရဲ့ လိုတော်ကြောန့်ဘဲ့ဖြစ်ဟှယ်။ 21 အယ်ဘေမဲ့ အယ်မျှော်လင့်ချစ်ဟှာ တနေ့တခီမာ ဖန်ဆင်းခံ လောကကိုယ်တိုင် ပျစ်စီးရှင်းကျွန်ဖြစ်ဟှနေ လွှတ်မြော့-က်ဘီး ဘုရားသခင် သားမီးလေရဲ့ ဖောင်းသရေတော်န ပ္လဲ့ဝဟှူ လွှတ်ရှင်းချမ်းသာထဲဟှို ခေါ်ဆောန်ဟှို့တွပ် မျှော်လင့်ရှင်း ရှိဟှူကြောန့်ဖြစ်ဟှယ်။ 22 ဖန်ဆင်းခံ ကမ္ဘာလောက တခုလောင်းဟှာ ခုခီထိ တူးဒူညည်းတွားဘီး သားမွီးဟှူ ဝေဒနာဟှူမျိုး ဒေါက်ခဝေဒနာလေဟှို ခံစားရဇာဟှို နို့လေသိဂေ့ဟှယ်။ 23 ✝အယ်လော့-က်နမကဟှ ဝိညာဉ်တော်ရဲ့ ကျေးဇူးတော်ဟှို ရင်ဦးဆောင်း ခံရဟှူ နို့လေလည်း သားမီးရာဟှို ရဟှူဇာဖြစ်ဟှူ* နို့လေရဲ့ ကိုယ်ခန္ဓာ ဝီးကော့-က်ခံရဟှူ ဇာဟှို စောန့်မျှော်ဘီး စိနှလောင်းထဲဟှ ညီးတွားနေဂေ့ဟှယ်။ 24 ဖြားဖြစ်ကြောန့်နူးဆိုဟှာ နို့လေဟှာ မျှော်လင့်ရှင်းအားဖြင့် ကယ်တန်ရှင်းဟှို ခံရလေဟှယ်။ နို့လေဟှာ ကိုယ်မျှော်လင့်ဟှူ ဇာလေဟှို ဗြင်ရဟှယ် ဆိုဟှာ မျှော်လင့်ဟှို့ကြောန်း မှေ့ဟှ။ တွိဗြင်နေရဟှူ ဇာလေဟှို ဖယ်သူ မျှော်လင့်နေမယ်နူး။ 25 အယ်ဘေမဲ့ နို့လေဗြင်တွိရဘဲဟှူ ဇာလေဟှို မျှော်လင့်ဂေ့ဟှယ် ဆိုဟှာ အယ်ရာလေဟှို စိရှယ်ရှယ်နသီးခံဘီး စောန့်မျှော်ဂေ့ဟှယ်။

26 အယ်ဘေမဲ့ နို့လေတတ်နိုင်ဘဲဟှူ ဇာလေဟှို ဝိညာဉ်တော်ဟှာ မစတော်မူလေဟှယ်။ နို့လေဟှာ ဆုတောန်းသင့်ဟှူတိုင်း ဖယ်မျိုး ဆုတောန်းရမယ် ဆိုဇာဟှို သိဂေ့ဟှ။ အယ်ဘေမဲ့ နို့လေ စကားအားဖြင့် ဖော်ပြဘီးဟှာ ဆုတောန်းတတ်ဘဲန ညည်းတွားနေဟှူရာလေအားဖြင့် ဝိညာဉ်တော်ဟှာ နို့လေကိုယ်စား ဘုရားသခင်နားမာ တောန်းလျှော့-က် သနားခံပေးတော်မူဟှယ်။ 27 လူလေရဲ့ စိသဘောဟှို သိတော်မူဟှူ ဘုရားသခင်ဟှာ ဝိညာဉ်တော်ရဲ့ စိသဘောဟှိုလည်း သိတော်မူလေဟှယ်။ ဖြားဖြစ်ကြောန့်နူးဆိုဟှာ ဝိညာဉ်တော်ဟှာ သန့်ရှင်းသူလေရဲ့ ဆုတောန်းဟှူမှုရာဟှို ဘုရားသခင်ရဲ့ လိုတော်နညီ သနားခံပေးတော်မူလေဟှယ်။

28 ဘုရားသခင်ဟှို ရှစ်ဟှူသူ၊ ကြံစည်တော်တိုင်း ခေါ်တော်မူရှင်းခံရဟှူ သူလေရဲ့ ကောန်းဟှူ ကျိုးလေတွပ် ရှိမျှဂူလောင်းဟှာ တညီတညွတ်ဒဲ ပြုစုဂေ့ဟှယ် ဆိုဇာဟှို နို့လေ သိဂေ့ဟှယ်။* 29 ဘုရားသခင် ဝီးကော့-က်တော်မူဟှူ သူလေဟှာ သူ့ရဲ့သားတော်ရဲ့ ပေါင်သဏ္ဌာန်တော်န တူဟှို့တွပ် ရှေးမဆွဟှနေဘီး ခွဲခန့်မှတ်သားဟှားလေဟှယ်။ အယ်မျိုး ဝီးကော့-က်မှတ်သားဟှူကြောန်းဟှ သားတော်ဟှာ ညီလေဘောင်ဂီးထဲမာ နောန်ဂီးဖြစ်ဟှို့တွပ် ဖြစ်ဟှယ်။ 30 အယ်မျိုး ခွဲခန့်မှတ်သားဟှားဟှူသူလေဟှို ခေါ်တော်မူဘီးဟှာ သန့်ရှင်းဖြောန့်မတ်ဟှူရာမာ တည်စေတော်မူဟှယ်။ အယ်မျိုး တည်စေဟှူသူလေဟှိုလည်း ချီးမြှော့-က်တော်မူဟှယ်။

31 အယ်မျိုးဆိုဟှာ အယ်မူကြောန်းရာလေဟှို ဖယ်မျိုးပြောဇာရှိနူး။ နို့လေဖတ်မာ ဘုရားသခင်ရှိဟှယ် ဆိုဟှာ ဖယ်သူဟှ နို့လေဟှို ဆန့်ကျင်နိုင်မယ်နူး။ 32 နို့လေအားလောင်းတွပ် သူ့ရဲ့သားတော်ရင်းဟှိုမှ ဗြောဘဲန စွန့်တော်မူဟှူရှင်ဟှာ သားတော်နတူးဒူ ရှိမျှဂူလောင်းဟှို ပေးဘဲန ဖယ်မျိုးနေမယ်နူး။ 33 ဖယ်သူဟှ ဘုရားသခင် ဝီးကော့-က်ဟှူ သူလေဟှို ပြစ်စီရင်မယ်နူး။ နို့လေဟှို ဖြောန့်မတ်ဟှူရာမာ တည်စေဟှူရှင်ဟှာ ဘုရားသခင်ဘဲ့ ဖြစ်ဟှယ်။ 34 ပြစ်စီရင်သူဟှာ ဖယ်သူနူး။ နို့လေတွပ် သေခံဟှူမျှနမကဘဲ သေရှင်းဟှနေ ရှင်ပ္လန်ထမြော့-က်ဘီး ဘုရားသခင်ရဲ့ ညာဖတ်ဟှနေ သနားခံ ဆုတောန်းပေးဟှူသူဟှာ ခရစ်တော်ယေရှုဘဲ့ ဖြစ်ဟှယ်! 35 အယ်ကြောန့် ဖယ်သူဟှာ နို့လေဟှို ခရစ်တော်ရဲ့ မြစ်တာတော်န ခွဲခွာစေနိုင်မယ်နူး။ ဆင်းရဲဒေါက်ခ၊ နာကြင်ရှင်းဝေဒနာ၊ ညှဉ်းဆဲရှင်း၊ ငတ်မွတ်ခေါန်းပါးရှင်း၊ ခ္လေးပ္လန်းဗ္လန်းနေရရှင်း၊ သတ်ခံရရှင်းန ဘေးအန္တရာယ်န တွိရှင်းလေဟှာ ခရစ်တော်ရဲ့ မြစ်တာတော်န နို့လေဟှို ကွဲကွာစေနိုင်မယ်လော။ 36 ကျမ်းစာဟှ

"ကျွန်တော်ဟှားလေဟှာ ကိုယ်တော်တွပ် တနေ့လောင်း သေဘေးန ရင်ဆိုင်ဘီး နေရဂေ့ပါဟှယ်။

သတ်ဟှို့ ထားဟှားဟှူ သိုးလေမျိုး သူးနို့လေ ထန်မှတ်ဂေ့ပါဟှယ်" ဆိုဘီး ပြောဟှားလေဟှယ်။

37 အယ်ဘေမဲ့ နို့လေဟှို ရှစ်တော်မူဟှူ သခင်ရဲ့ ကျေးဇူးတော်အားဖြင့် အယ်မူရှိမျှဂူလောင်းဟှို ခံနေရဟှူ ခီမာ ထူးသဖြင့် အောန်မြင်ဂေ့လေဟှယ်! 38 ဖြားဖြစ်ကြောန့်နူးဆိုဟှာ နို့လေယောင်ကြည်ရှင်းဟှာ သေရှင်းတရားဘဲ့ဖြစ်ဖြစ်၊ သတ်ရှင်ရှင်းဘဲ့ဖြစ်ဖြစ်၊ ကောန်းဂန်တမန်ဘဲ့ဖြစ်ဖြစ်၊ ထွဋ်မြတ်ဘဲ့ဖြစ်ဖြစ်၊ အာဏာတဂိုးဘဲ့ဖြစ်ဖြစ်၊ ပစ္စုပ္ပန်ဘဲ့ဖြစ်ဖြစ်၊ နာဂတ်ဘဲ့ဖြစ်ဖြစ်၊ 39 ကောန်းဂန်ထတ်ရာဘဲ့ဖြစ်ဖြစ်၊ မ္လေဂီးအော့-က်ရာဘဲ့ဖြစ်နေပါစေ၊ ဖန်ဆင်းခံဟှားဇာ ဖယ်ဇာမဆို သခင် ယေရှုခရစ်တော်အားဖြင့် ခံစားရဟှူ ဘုရားသခင်ရဲ့ မြစ်တာတော်န နို့လေဟှို ကွာစေနိုင်ဟှူဇာ ခုလည်း မှေ့ဟှ ဆိုဘီး ငါ ယောင်ကြည်စိခ္လဟှယ်။