1 နန်းနို့ဟှာ စင်ကြယ်ဟှူယူဝါဒန ကိုက်ညီရှင်းလေဟှို ဟောပြောရမယ်။ 2 သတ်ကီးဟှူ ယော့-က်ကျားလေဟှာ သမ္မာဒိရှိဟှူလူ၊ တည်ကြည်ဘီးဟှာ သိခါစောန့်ဟှူလူ၊ စစ်မှန်ဟှူ ယောင်ကြည်ရှင်းလေ၊ ရှစ်ရှင်းလေ၊ ခံနိုင်ရည်ရှိဟှူလူလေ ဖြစ်ဟှို့တွပ် သွန်သန်ရမယ်။ 3 အယ်မျိုးဘဲ့ သတ်ကီးဟှူ မီးမဂီးလေဟှာ ဘုရားတရားဟှို ကြည်ညိုဟှူ လူလေဖြစ်ဟှို့တွပ် သွန်သန်ပါ။ သူးနို့ဟှာ တခြားလူလေရဲ့ အသရေဖျစ်ဟှူ လူလေန ယစ်ရဲ့ကျေးကျွန်ဖြစ်စေန။ ကောန်းဟှူ ဇာလေဟှို သန်ပေးဟှူ လူလေ ဖြစ်ရမယ်။ 4 အယ်မျိုးဖြစ်မှ သူးနို့ဟှာ ကိုယ့်ထတ် သတ်ငယ်ဟှူ မီးမလေဟှာ ကိုယ့်ယော့-က်ကျားန သားမီးလေဟှို ရှစ်ဘီးဟှာ၊ 5 ဂေါင်သိခါ စောန့်ဟှူသူ၊ စင်ကြယ်ဟှူသူ၊ ကိုယ့်အီဟှို ပြုစုဟှူသူ၊ ကောန်းဟှူသူ၊ ကိုယ့်ယော့-က်ကျားရဲ့ စကားဟှို နားထောန်ဟှူသူ ဖြစ်ဟှို့တွပ် သတ်ကီးဟှူ မီးမဂီးလေဟှ သန်ပေးရမယ်။ အယ်မျိုးဆိုဟှာ ဘုရားသခင်ရဲ့ တရားတော်ဟှို ကဲ့ရဲ့ဘီး ပြောနေဟှူလူလေ မှေ့ဟှို့မှုဘီ။

6 အယ်မျိုးဘဲ့ ကောန်သား ယော့-က်ကျားလေဟှလည်း ဂေါင်သိခါလေဟှို ထီးနိုင်ဟှို့တွပ် တိုက်တွန်းဂေ့ပါ။ 7 နေရာတိုင်းမာ နန်းနို့ကိုယ်တိုင် ပေါင်သတ်သေဟှို ပြဂေ့ပါ။ ဆောင်းမသွန်သန်ဟှူ ခီမာ သေးသေချားချာဟှား သန်ပေးပါ။ 8 နန်းနို့ ရန်သူလေဟှ နန်းနို့လေဟှို ဖယ်မှုမာလည်း ပြစ်ရှာနိုင်ဘဲန ရှစ်ကွဲဘဲနေအောန် တခြားလူလေရဲ့ရှေ့မာ ပြစ်တန် ဝေဖန်နိုင်ဘဲနေအောန် ကောန်းဟှူ စကားလေဟှို ပြောဂေ့ပါ။

9 ကျွန်လေဟှာ သူ့သခင်လေရဲ့ စကားဟှို နားထောန်ရမယ်။ နေရာတိုင်းမာ သခင်ကြိုက်အောန် လောက်ရမယ်။ 10 သူများပစ်စီးဟှို ခိုးဘဲန သူးနို့ဟှာ မြဲဒမ်းကောန်းဘီး သစ်စာရှိဟှူလူ ဖြစ်ရမယ်။ အယ်နည်းနဘဲ့ သူးနို့ဟှာ ကိုယ်လောက်ဟှူ မှုလေထဲမာ နို့လေရဲ့ ကယ်တန်ရှင် ဘုရားသခင်ရဲ့ တရားတော်ဟှို ပိုဘီး ဟှာ ထန်ရှားစေလေ့မယ်။

11 ဘုရားသခင်ဟှာ လူလေဂူလောင်းဟှို ကယ်တန်ဟှူ သူ့ရဲ့ ကျေးဇူးတော်ဟှို ထန်ရှားစေဟှယ်။ 12 နို့လေဟှာ ဘုရားတရားမှေ့ဘဲန လောက တတ်မတ်ရှင်းလေဟှို ဖယ်ရှားဘီး အယ်လောကမာ ဘုရားဝတ်နှိုက် ပျော်မွေ့ရှင်း၊ တင့်တယ်လျောက်ပတ်ရှင်း၊ ဖြောန့်ဖြောန့်မတ်မတ် သတ်ရှင်ရှင်းန 13 ကီးမြတ်ဟှူ ဘုရားသခင်ဖြစ်ဟှူ နို့လေရဲ့ ကယ်တန်ရှင် ယေရှုခရစ်တော်ရဲ့ ဖောင်းသရေတော် ပေါ်လာရှင်းအားဖြင့် မင်္ဂလာရှိဟှူ မျှော်လင့်ရှင်းဟှို စောန့်နေဘီးဟှာ ဆောင်းမသွန်သန်ဘီး ရှိနေဟှယ်။ 14 ✝နို့လေဟှို ဆိုးညစ်ရှင်းလေ ဂူလောင်းထဲဟှနေဘီး လွတ်မြော့-က်ဟှို့တွပ်န နို့လေဟှာ စိနှလောင်းဖြူစင် သန့်ရှင်းဘီး ကိုယ်တော်ဘဲ့ ပိုင်ဆိုင်ဟှူ လူဖြစ်ဘီး ကောန်းဟှူ ကျင့်လေမာ စိအားထတ်သန်ဂေ့ဟှို့တွပ် ခရစ်တော်ဟှာ နို့လေတွပ် သူ့ကိုယ်သူ စွန့်လိုက်ဟှယ်။

15 နန်ဟှာ အယ်ကြောန်းရာလေဟှို ဟောပြောသွန်သန်ပါ။ တိုက်တွန်းအားပေးဘီး သွန်သန်ဟှူ ခီမာ နန့်မာရှိဟှူ ခွမ့်အာဏာလေဟှို သောင်းပြုပါ။ နန့်ဟှို ဖယ်သူလည်း ထန်သေးစေန။