ယောဟန် 9

မွီးရာပါ မျက်ကန်းတစ်ယောက်ကို ယေသျှုက မျက်စိမြင်စီခြင်း

1 ယေသျှုသည် လမ်း၌ကြွတော်မူစဉ် မွီးရာပါ မျက်ကန်းတစ်ယောက်ကို တွိ့မြင်တော်မူ၏။ 2 တပည့်တော်ရို့က "ဆရာ၊ ဤသူသည် ဇာသူ့အပြစ်ကြောင့် မွီးရာပါ မျက်စိကန်းရသနည်း။ မိမိအပြစ်ကြောင့် ဖြစ်သလော၊ မိဘတိအပြစ်ကြောင့် ဖြစ်သလော" ဟု မိန်းလျှောက်ကြ၏။

3 ယေသျှုက "သူ၏ အပြစ်ကြောင့် မဟုတ်၊ မိဘ အပြစ်ကြောင့်လည်း မဟုတ်။ ဤသူ၌ ဖြစ်သောအရာကား ဘုရားသခင်၏ တန်ခိုးတော်ကို ထင်ရှားစီရန် ဖြစ်၏။ 4 ငါ့ကို စီရွှတ်တော်မူသော အသျှင်၏ အမှုတော်မြတ်ကို နိ့အချိန်ဟိစဉ် ငါရို့ လုပ်ဆောင်ရမည်။ တစ်ယောက်လည်း မလုပ်နိုင်သော ညဉ့်အချိန် ရောက်လာလိမ့်မည်။ 5 ✝၉.၅ မ ၅.၁၄; ယော ၈.၁၂ငါသည် ဤလောကတွင် ဟိနိန်စဉ် လောက၏ အလင်းဖြစ်၏" ဟု မိန့်တော်မူ၏။

6 ဤသို့ မိန့်တော်မူပြီးနောက် ကိုယ်တော်သည် မြီကြီးကို တန်းထွီးဖြင့် ထွီးပြီးလျှင် ကျုတ်လုပ်၍၊ သူ၏မျက်စိကို လူးပီးတော်မူပြီး၊ 7 "သျှိလောင်ရီကန်၌ မျက်နှာသစ်ရန် လားလော" ဟု မိန့်တော်မူ၏။ သျှိလောင်၏ အဓိပ္ပာယ်ကား "ရွှတ်လိုက်သည်" ဟု ဆိုလိုသတည်း။ ထိုသူသည် လား၍ မျက်နှာသစ်ပြီးနောက် မျက်စိမြင်လျက် ပြန်လာလေ၏။

8 သူသည် သူတောင်းစားဖြစ်သဖြင့် အယင်က သူ့ကို မြင်ဖူးသောသူများနှင့် အိမ်နီးချင်းများက "ဤသူသည် ထိုင်၍ တောင်းစားနိန်သူ မဟုတ်ပါလား" ဟု ဆိုကြ၏။

9 လူတချို့က၊ "ဤသူ ဟုတ်ပါ၏" ဟူ၍ လည်းကောင်း၊ တချို့က "ဤသူ မဟုတ်၊ သူနှင့် တူ၏" ဟူ၍ လည်းကောင်း ဆိုကြ၏။ သူကိုယ်တိုင်ကလည်း "ငါက ထိုသူပင် ဖြစ်ပါ၏" ဟု ဆို၏။

10 ထိုသူရို့က "သင်က ဇာပိုင် မျက်စိမြင်လာသနည်း" ဟု မိန်းကြ၏။

11 သူကလည်း "ယေသျှုဟု ခေါ်သော လူတစ်ယောက်က ကျုတ်တစိတ်ကေလုပ်၍ အကျွန့်မျက်စိကို လူးပြီးလျှင် သျှိလောင်ရီကန်သို့လား၍ အကျွန့်ကို မျက်နှာသစ်ခိုင်းပါ၏။ ထို့ကြောင့် အကျွန်သည် လား၍ မျက်နှာသစ်လိုက်သည့်အခါ မျက်စိမြင်လာပါ၏" ဟု ပြန်ပြော၏။

12 ထိုသူရို့ကလည်း၊ "ထိုသူကား ဇာမှာလဲ" ဟု မိန်းကြလျှင်၊

"အကျွန် မသိပါ" ဟု ပြန်ပြောလေ၏။