မဿဲ 18

ခွင့်ရွှတ်ခြင်းမဟိသည့် အခိုင်းအစီ၏ ပုံဥပမာ

21 ✝ ၁၈.၂၁,၂၂ လု ၁၇.၃,၄ ထိုအခါ ပေတရုသည် ယေသျှုပါးသို့ လာပြီးလျှင် "အသျှင်ဘုရား၊ အကျွန့်ကို အပြစ်လုပ်နိန်သော အကျွန်၏ညီအစ်ကို တစ်ယောက်ကို ဇာနှစ်ကြိမ်၊ ဇာနှစ်ခါ ခွင့်ရွှတ်ရပါဖို့လဲ၊ ခုနစ်ကြိမ်လား" ဟု မိန်း၏။

22 "ခုနစ်ကြိမ်မက ခုနစ်ဆယ့်ခုနစ်ကြိမ်*၁၈.၂၂ ခုနစ်ဆယ့်ခုနစ်ကြိမ်၊ သို့မဟုတ် အကြိမ် ခုနစ်ဆယ် ခုနစ်လီ။ ခွင့်ရွှတ်ရမည်" ဟု ယေသျှုက မိန့်တော်မူ၏။ 23 အကြောင်းမှာ၊ ကောင်းကင်နိုင်ငံတော်သည်ကား ဤဥပမာနှင့် တူ၏။ တစ်ခါက မိမိ၏အခိုင်းအစီများနှင့် အကြွီးစာရင်းကို ယှင်းလိုသော သျှင်ဘုရင်တစ်ပါး ဟိ၏။ 24 ထိုသျှင်ဘုရင်သည် အမှုထမ်းအားလုံးထဲက ဖဲသာအများကြီး အကြွီးတင်နိန်သော သူတစ်ယောက်ကို ခေါ်၍ အကြွီးစာရင်းယှင်းသည့်အခါ 25 ထိုသူ၌ အကြွီးဆပ်ရန် ဖဲသာမဟိသောကြောင့် ဘုရင်ကြီးက သူနှင့်တကွ သူ၏မယား၊ သားသမီးမှစ၍ ဟိသမျှအားလုံးကို ရောင်းချပြီးလျှင် ထိုအကြွီးအာလုံးကို ပြန်ပီးရန် အမိန့်ထုတ်လိုက်၏။ 26 ထိုအခါ ထိုအမှုထမ်းသည် မင်းကြီးရှိ့မှာ ပျပ်ဝပ်လျက် "အကျွန့်ကို သည်းခံတော်မူပါ၊ အကြွီးအားလုံးကို အသျှင်အား အကျွန် ပြန်ဆပ်ပါမည်" ဟု တောင်းပန်သောအခါ 27 မင်းကြီးက သူ့အား အလွန် သနားတော်မူသည်ဖြစ်၍ ထိုအခိုင်းအစီ၏ အကြွီးအားလုံးကို ရွှတ်ပီးလိုက်ကာ သူ့ကို ပြန်ခွင့်ပြုလိုက်၏။

28 ထိုသူသည် မင်းကြီးထံပါးမှ ထွက်လာ၍ သူ့ပါးမှာ ဖဲသာ စိတ်ကေချေ အကြွီးတင်နိန်သော သူ၏အမှုထမ်းတစ်ယောက်ကို တွိ့၏။ သူက ထိုသူအား လှမ်းဆွဲကာ လိုင်စိ့ကို ဖျစ်လျက် "မင်း ငါ့ကို ပီးစရာဟိရေ အကြွီးကို ပြန်ပီး" ဟု တောင်းလေ၏။ 29 သူ၏အမှုထမ်းက "အကျွန်ကို သည်းခံပီးပါ။ အကျွန်ပီးစရာဟိသော အကြွီးကို ပြန်ပီးပါ့မယ်" ဟု ပျပ်ဝပ်လျက် တောင်းပန်လေ၏။ 30 သို့သော်လည်း သူသည် လက်မခံဘဲ၊ ထိုသူအား အကြွီးတိကို မပီးမချင်း ထောင်ထဲမှာ ချထားလိုက်၏။ 31 ထိုအဖြစ်အပျက်ကို အခြားအမှုထမ်းတိ မြင်ကြသောအခါ သူရို့သည် အကြီးအကျယ် ဒေါသဖြစ်လျက် အကြောင်းစုံကို အသျှင်မင်းကြီးအား လျှောက်တိုင်ကြ၏။ 32 ထိုအခါ အသျှင်မင်းကြီးသည် ထိုအမှုထမ်းကို ခေါ်ပြီးလျှင် "အသုံးမကျသည့် ကျွန်စုတ် သင်တောင်းပန်သည့်အတိုင်း ငါ့အား ပီးစရာဟိသော အကြွီးအားလုံးကို ငါသည် ခွင့်ရွှတ်ထားခ၏။ 33 ငါသည် သင့်ကို သနားကြင်နာသကဲ့သို့ သင်သည်လည်း သင်၏အခိုင်းအစီတိကို သနားကရုဏာ ထားသင့်ပေ၏" 34 ဟူ၍ အသျှင်မင်းကြီးက အလွန်စိတ်ဆိုးဒေါသထွက်ကာ သူ၏အကြွီးအားလုံးကို မကျီမချင်း ထိုအမှုထမ်းကို အပြစ်ပီးရန် အကျဉ်းထောင်ထဲသို့ ပို့လိုက်၏။

35 ဤပုံပြင်ကို အဆုံးသတ်ပြီးလျှင် ယေသျှုက "သင်သည် သင့်နှလုံးသားထဲ၌ သင်၏ညီအစ်ကိုအား ခွင့်မရွှတ်လျှင် ကောင်းကင်ဘုံ၌ ဟိတော်မူသော ငါ၏အဖသည် သင့်ကို ခွင့်ရွှတ်လိမ့်မည် မဟုတ်" ဟု မိန့်တော်မူ၏။