1 आदो बिन ता़ड़ियानाक्‌ पिठा़ पोरोब सोरेना, ओने सेन पारोम पोरोबको मेताक्। 2 आर माराङ नायके आर आ़न गुरुको दो चेत्‌लेकातेको गोजेया, ओना आ़तको ञामबाड़ायेत् ताहेंकाना, एनते दिसा़म होड़को बोतोराकोकान ताहेंकाना।

3 खानगे सायतान दो ओनको गेलबारको मोदरेने ताहेंकान इसकारियोतको मेताय जिहुदा़रेये बोलोयेना, 4 आर उनि दो सेनकाते माराङ नायकेको आर सुबेदारको तुलुच्ए गालमारावकेदा चेत्‌लेकाते ओनको ठेने सोपरोतेया मेनते। 5 खानगेको रा़सका़येना, आर टाका एमायको रा़जियेना। 6 आदोए रा़जियेना आर गादेल होड़ बाङको ताहेनरे सोपरोते ला़गित्‌ आ़ते ञामबाड़ायेत् ताहेंकाना।

7 आदो बिन ता़ड़ियानाक्‌ पिठा़ रेयाक्‌ दिन सेटेरेना ओने उनरे सेन पारोम दाँड़ें तेक्‌ङगेन होयोक्। 8 आदो जिसु पातरास आर जोहान कोलकेत्‌किनतेये मेतात्‌किना, दो सेनकाते सेन पारोम भोज तेयाराबोनबेन जेमोनबोन जोम दाड़ेयाक्।

9 उनकिन दोकिन मेतादेया, ओकारेलिञ तेयारेम मेनजोङ काना?

10 आदो जिसुइ मेतात्‌किना, ञेलबेन नागराहारेबेन बोलोलेन खान दाक् कानडाय गोक्‌ इदियेत्‌कान मित् होड़ आबेन तुलुच्ए ञापामा, उनि ओका ओड़ाक्‌रेये बोलोक्आ पाँजा आदेरेबेन। 11 आर ओना ओड़ाक्‌रेन किसा़ँड़ मेतायबेन, गुरुय मेताम काना, पेड़ा कांदहा दो ओकारे मेनाक्आ, ओने ओंडे इञरेन चेलाको साँवते सेन पारोम भोज इञ जोम? 12 आर उनि दो चेतान कांदहारे मित्‌टेच् साजाव आकात् माराङ कोठाये उदुक्आबेना, ओंडेगे तेयारबेन।

13 आदोकिन चालावेना आर जिसुइ मेतात्‌किन ताहेंकान लेकागेकिन ञामकेदा, आर सेन पारोम भोजकिन तेयारकेदा।

14 आर ओकते सेटेरेन खान जोजोमे दुड़ुप्‌ एना, आर आपोसतोलको हों उनि साँवते। 15 जिसुइ मेतात्‌कोवा, गागोचते होंञ गागोच आकाना आपे साँवते नोवा सेन पारोम पोरोब रेयाक्‌ केदोक् जोम ला़गित्‌ दुक आ़उरिञ जोमरेगे। 16 एनतेञ मेतापेकाना आदो ओना ओहोगेञ जोमलेया इसोराक् राजरे ओना आ़उरि पुरा़उक् हा़बिच्।

17 आदो जिसु मित्‌टेच् बा़टि आताङकातेये गुन मानाव जोहारकेदा, आरे मेनकेदा, ने नोवा हातावकाते आपे मोदरे हा़टिञ जोङपे। 18 एनतेञ मेतापेकाना नित खोन दारखा रासा दो बा़ञ ञुया इसोराक् राज आ़उरि हिजुक् हा़बिच्।

19 आदो पिठा़इ हालाङकेदा आर गुन मानाव जोहारकातेये केचाक्‌केदा। आर एमात्‌कोतेये मेनकेदा, नोवा दो आपे ला़गित्‌ एमोगोक्‌कान इञाक् होड़मो काना, नोनकायपे इञ दिसा़ञ ला़गित्‌। 20 आर ओनकागे केदोक् तायोम बा़टि हालाङकातेये मेनकेदा, नोवा बा़टि दो नावाँ बोनदोबोस काना इञाक् माँयाँमते, ओने आपे ला़गित्‌ जोरो ओचोक्‌कान।

21 "मेनखान ञेलपे, सोपरोत एदिञिच् रेयाक्‌ ति दो इञ तुलुच् मेजरे मेनाक्आ। 22 मानवा होपोन मा निट आकात् लेकाय चालाक्‌कान, मेनखान उनि होड़ दो हाय हाय, ओने ओकोय होतेतेये सोपरोत ओचोक्।" 23 आदो आको आकोरे कुपुलिको एहोप् एना, आको मोदरे नोनकाय ला़गिदोक्‌ कानिच् दोए ओकोय काना मेनते।

24 आर ओनको तालारे एपेरहेंडे हों जानामेना आको मोदरे ओकोयटाक् माराङे लेखाक्आ मेनते। 25 जिसु दोए मेतात्‌कोवा, "जिहुदि बाहरेरेन होड़कोरेन राजाको दो ओनको चेतानरे मा़लिकिको चालावेदा, आर ओनकोरेन एकतिया़रियानको दो भा़क्‌ला़इकोको बिका़उक्‌ काना। 26 मेनखान आपे दो आलोपे ओनकाक्आ, बिचकोम आपे तालारे माराङिच् दो हुडिञिच् लेकाय होयोक्‌मा, आर आ़क्‌युरिच् दो साप्‌सोसोरिच् लेका। 27 एनते ओकोयटाक्ए माराङा, जोजोम दुड़ुप्‌ आकानिच् से साप्‌सोसोरिच्? जोजोम दुड़ुप्‌ आकानिच्‌गे बाङ? मेनखान इञ दो आपे तालारे साप्‌सोसोरिच् लेकागे मिना़ञा।"

28 "आपे दो इञाक् बिड़ाउकोरे सोङगेते ताहेंआ़गुवाकानको कानापे। 29 आर इञ दो राजोसटिञ बाँधावापे काना, चेत्‌लेका आ़पुञ इञे बाँधावादिञ, 30 जेमोन इञाक् राजोसटिरे इञाक् मेजरेपे जोम ञुय, आर सिङघा़सोनरे दुड़ुप्‌काते इसराएलरेन गेलबार खुँटकोपे बिचा़रताको।"

31 "ए सिमोन, ए सिमोन, ञेलमे, सायतान दो आच् ला़गित्‌ए खोज आकात्‌पेया जेमोन गुहुम लेकाय चालापे। 32 मेनखान इञ दो आम ला़गित्‌ इञ कोयजोङ काना जेमोन आमाक् बिसवा़स दो आलो डिगा़उक्, आर आमेम आ़चुर रुवा़ड़लेनरे हापेन आमरेन बोयहाको दिड़होकोम।"

33 पातरास दोए मेतादेया, "ए प्रोभु, आम साँवते दो हाजोतते चालाक् आर गोच् ओचोक् होंञ खाड़ागेया।"

34 आदो जिसुइ मेनकेदा, "ए पातरास, इञिञ मेताम काना, तेहेञ दो सिम सा़ंडि बाङगेये रागा इञ बाम बाडायेदिञ काना मेनते पे धाव आ़उरिम मेन हा़बिच्।"

35 आरे मेतात्‌कोवा, "बेगोर बुगलि आर खुति आर खारपा बेगोरतेञ कोललेत्‌पेरे जाहानाक्‌गेपे टोन्‌टालेना?"

मेनकेदाको "चेत् हों बाङ।" 36 आदो जिसुइ मेतात्‌कोवा, "मेनखान नितोक् दो बुगलि मेनाक्‌ताय होड़ दोए इदि तोरायमा, ओनकागे खुति हों आर ओकोयाक् तारवाड़ि बा़नुक्‌ताय, उनि दो आयाक्‌ ओयोनाक् आ़खरिञकाते किरिञजोङमा। 37 एनतेञ मेतापेकाना, नोवा ओल आकानाक् दो इञरे पुरा़उक्‌गे जा़रुड़ा, बाङमा आर उनि दो बेआ़इनिको तुलुच्ए लेखायेना, एनते इञ रेयाङाक्‌को दो पुरा़उक्आ।"

38 ओनको दोको मेनकेदा, "ए प्रोभु नोक्‌ओंय नोंडे बारया तारवाड़ि।" आदोए मेतात्‌कोवा, "इना़क्‌गे ढेरा।"

39 आदो जिसु ओडोक सेनकाते चा़लि लेका जा़इतुन बुरुतेये चालावेना, आर चेलाको होंको पाँजा केदेया। 40 आर ओना जायगाय सेटेरेन खाने मेतात्‌कोवा, "कोयजोङपे, बिडा़उरे आलो बोलोक् ला़गित्‌।"

41 आर उनि दो मित् धिरि चापात् गान ओनको खोने सायेना आर इखड़ुमकातेये कोयकेदा, 42 "ए बाबा आमेम मोनेयेत् खान, नोवा बा़टि दो इञ ठेन खोन सा इदियमे, एनरेहों इञाक् मेनजोङ लेका दो बाङ, बिचकोम आमाक् लेका बाड़े होयोक्‌मा।" 43 खानगे सेरमा खोन मित्‌टेन दुत उनि ठेन ञेल ओचोयेनतेये दाड़े ओचोकेदेया, 44 आर आलाझालारे पाड़ावेनते आरतेत् जिदकातेये कोय इदिकेदा। आर उनियाक् बालबालाव दाक् दो ओतरे जोरोक्‌कान माँयाँम ठोप लेकायेना।

45 आदो कोयजोङ खोन बेरेत्‌काते चेलाको ठेने हेच्एन खान, भाबनाते जा़पित् आकात्ए ञामकेत्‌कोवा, 46 आरे मेतात्‌कोवा, "चेदाक्‌पे जा़पित् आकादा? बेरेत्‌काते कोयजोङपे जेमोन बिडा़उरे आलोपे बोलोक्।"

47 जिसुइ रोरोड़कान ताहेंकानरेगे, ञेलपे, गादेल होड़को हेच्‌एना, आर जिहुदा़को मेताय गेलबारको मोदरेन मित् होड़ ओनको लाहा लाहातेये हिजुक्‌कान ताहेंकाना, आर जिसु ठेने सोरेना चोक्आय ला़गित्‌, 48 जिसु दो उनिये मेतादेया, "हेंदा जिहुदा़, चोक्‌ते मानवा होपोनेम सोपरोतेदे काना?"

49 खानगे जिसु बेड़हायतेनको दो होयोक्आक् ञेलकातेको मेनकेदा, "हेंदा प्रोभु, तारवाड़िले चालावा?" 50 आर ओनको मोदरेन मित् होड़ दो माराङ नायकेरेन गुति उयुक्आदेते उनियाक् जोजोम लुतुरे हेसेकेत्‌ताया।

51 मेनखान जिसुइ मेनकेदा, "इना़क्‌काक्‌पे," आर उनियाक् लुतुर जोटेत्‌कातेये बोगे केदेया।

52 आदो जिसु आच् उपा़रते हेच् आकान माराङ नायकेको आर कोयजोङ ओड़ाक्‌ पाहरा सुबेदारको आर मुरुबिकोय मेतात्‌कोवा, "मित्‌टेन डा़कु उपा़रते लेकापे ओडोक हेच् आकाना, तारवाड़ि आर मुता़कानते? 53 दिन हिलोक् आपे साँवते कोयजोङ ओड़ाक्‌रेञ ताहेंकानरे दो इञ साबेञ ला़गित्‌ ति बापे तिया़रलाक्आ, मेनखान नोवा दो आपेयाक् ओकते आर ञुत रेयाक्‌ एकतिया़रि काना।"

54 आदो जिसु साप्‌कातेको इदि केदेया आर माराङ नायकेयाक् ओड़ाक्‌तेको आदेरकेदेया। मेनखान पातरास दो आ़डि फाराक फाराकतेये पाँजा इदि केदेया। 55 आर बाखेर राचा तालारे सेङगेल जोलकातेको दुड़ुप्‌ जारवा आकानरे पातरास हों ओनको तालारेये दुड़ुप्‌ एना। 56 खानगे मित्‌टेन का़ड़मि सेङगेल मारसालरे दुड़ुप्‌ आकाने ञेल ञामकेदेते बेङगेत् उरिच् आदेतेये मेनकेदा, "नुय हों उनि साँवतेये ताहेंकाना।"

57 मेनखान उनि दो बेङगेतकेत्‌तेये मेनकेदा, "बा़ञ बाडाय आकादेया मा़इ।"

58 आदो थोड़ा घा़ड़िच्‌ तायोमते एटाक् होड़ उनि ञेलकातेये मेनकेदा, "आम हों ओनको मोदरेन कानाम।" पातरासे मेनकेदा, "एहो, इञ दोञ बाङ काना।"

59 आदो मित् घोन्‌टा गान तायोमते एटागिच् हेच्‌कातेये मेनकेदा, "सा़रि उता़रगे नुय हों उनि साँवतेये ताहेंकाना, एनते नुय दो गा़लिलरेन कानगेयाय।"

60 मेनखान पातरासे मेनकेदा, "एहो, आमेम रोड़ेत्‌आक् दो बाङगेञ बाडाया।" खान इना़ तापतेगे जिसुइ रोरोड़कान तुलुच्‌गे सिम सा़ंडिये राक् गोत्‌केदा। 61 खानगे पातरास दो प्रोभुवाक् काथा दिसा़ हेच्आदेया चेत्‌लेकाय मेतादे ताहेंकान, एन काथाय, "तेहेञ दो सिम सा़ंडि आ़उरिये रागरे पे धावेम बाङेञा।" 62 खानगे बाहरेते ओडोक चालावेनते हुँक हुँके राक्‌केदा।

63 आर जिसुको साप् दोहोवाकादे ताहेंकान होड़ दो दाल दालतेको सिड़ोगआयकान ताहेंकाना, 64 आर बेत्‌केदेतेको कुलियेदेकान ताहेंकाना, "मासे ना़बियमे ओकोये दालकेत्‌मेया?" 65 आर ढेर एटाक् काथा हेनोसताकातेको रोड़ इदियादेया।

66 आदो आङगायेन खान दिसा़म होड़कोरेन मुरुबिको आर माराङ नायकेको आर आ़न गुरुकोको जारवायेना, आर आकोवाक् बा़इसिते इदिकेदेतेको मेनकेदा,

67 "मा़सि कानाम मेनखान ला़इमे।" आदो जिसुइ मेतात्‌कोवा, "ला़इयापेरे हों ओहोपे पा़तिया़उलेना, 68 आर इञ कुलिपेरे हों ओहोपे रोड़ रुवा़ड़लिञा। 69 मेनखान नित खोन मानवा होपोन दो इसोराक् दाड़े रेयाक्‌ एतोमरे दुड़ुप्‌ आकाने ताहेना।"

70 आदो जोतो होड़को मेनकेदा, "एनडेखान आम दो इसोररेन होपोन कानाम?" उनि दोए मेतात्‌कोवा, "आपेगे चोङपे मेनेत्, इञ दो उनि कानगेयाञ।"

71 खानगेको मेनकेदा, "गोहा रेयाक्‌ आरदो चेत् जा़रुड़ाबोन काना? एनते आपनारतेगेबोन आँजोमकेदा उनियाक् मोचा खोन।"