1 खानगे ओनको जोतो गादेल होड़ बेरेत्‌काते पिला़त ठेन जिसुको इदि केदेया। 2 आदो दुसिये ला़गित्‌को एहोप्‌केदा, "नुय होड़ दोले ञाम आकादेया आले जा़तरेनको भिक्‌ङगड़ा़उकान आर का़इसा़र खाजना एमाय माक्‌नाकान, आर आच् दो मा़सि मित्‌टेन राजाय मेनोगोक्‌कान।"

3 आदो पिला़ते कुलि केदेया, "आम दो जिहुदिकोरेन राजा कानाम?" आदोए रोड़ रुवा़ड़ादेया, "आमेम मेनेदा।"

4 खानगे पिला़त दो माराङ नायकेको आर गादेल होड़कोय मेतात्‌कोवा, "चेत् दोस हों बा़ञ ञामेदा नुय होड़रे दो।"

5 मेनखान आरतेत् आझाँटतेको मेनकेदा, "नुय दो दिसा़म होड़े आ़उला़वेत्‌कोवा गा़लिल खोन एहोप्‌काते नोंडे हा़बिच् गोटा जिहुदा़रेने ला़इ चेत्आकोकानते।"

6 पिला़त दो ओना आँजोमकातेये कुलिकेत्‌कोवा, "नुय होड़ दो गा़लिलरेन कानाय?" 7 आर हेरोद टोठारेन कानाय मेनते बाडाय ञामकेत्‌ते हेरोद ठेने कोल गोत्‌कादेया। उनि हों ओनाको दिनरे जेरुसालेमरेये ताहेंकानते। 8 हेरोद दो जिसु ञेलकेदेते आ़डिये रा़सका़येना, एनते उनि रेयाङे आँजोमाकात्‌ ताहेंकानते ढेर दिन खोन उनि ञेले सानायेदे ताहेंकाना, आर उनि होतेते होयोक्‌कान जाहान चिनहा़ ञेञेले आसोक्‌कान ताहेंकाना। 9 आदो ढेर काथाय कुलि बाड़ाकेदेया, मेनखान चेत् हों बाय रोड़ रुवा़ड़ादेया। 10 आर माराङ नायकेको आर आ़न गुरुको तेङगोकाते जिसु तिरित्‌गेको दुसिकेदेया। 11 आदो हेरोद आच्‌रेन सिपा़हिको साँवतेये निहा़ँतकेदेया आरे सिड़ोगआदेया, आर ठोसोक किचरिच् होरोक्‌ आदेते पिला़त ठेने कोल रुवा़ड़ गोत्‌कादेया। 12 एनहिलोक्‌गे हेरोद आर पिला़त दोकिन गातेयेना, एनते पा़हिल दो बा़इरिकिन ताहेंकाना।

13 खानगे पिला़त दो माराङ नायकेको आर मुखिया़को आर दिसा़म होड़को होहो जारवाकातेये मेतात्‌कोवा, 14 नुय होड़पे आ़गु आकावादिञा मित्‌टेन दिसा़म होड़ भिक्‌ङगड़ा़विच् मेनकाते आर ञेलपे, "इञ दो आपे सामाङरेञ बिडा़उ आकादेया, आर नुयरे ओका दोस हों बा़ञ ञाम आकात्आ ओनेपे दुसियेदेकान दो। 15 आर हेरोद हों बाय ञामलेदा, एनते आबो ठेने कोल रुवा़ड़ आकादेया, आर ञेलपे, गोच् ओचोक् लेक दो चेत् हों बाय चेकावाकादा। 16 ओनाते चा़रना़उकातेञ आड़ाक्‌काया।" 17 पिला़त दो आयाक्‌ चा़लि लेका पोरोबरे मित् होड़े आड़ाक् आकोकान ताहेंकाना। *२३:१७ आदोम मारेयाक्‌ ओलाक्‌कोरे नोवा काथा दो बाबोन ञामा।

18 मेनखान ओनको दो जोतो मित् जोमकावतेको होहोकेदा, "नुय दो गोच् गिडिकायमे, आर बाराब्‌बा आड़ाक्‌कायमे।" 19 मित् होड़ ओने उनि नागराहारे होड़कोय भिङगड़ा़वेत्‌को इया़ते हाजोतरेये भोराव आकान ताहेंकान।

20 आदो पिला़त जिसु आड़ाक्‌गेये मेनवानते आर होंए गालमारावात्‌कोवा, 21 मेनखान ओनको दोको होहो इदिकेदा, "कुरुसकायमे, कुरुसकायमे।"

22 उनि दो तेसार धावे मेतात्‌कोवा, "चेत् एनतेये बा़ड़िच् आकादा नुय होड़ दो? गोजे रेयाक्‌ चेत् दोस हों नुयरे बा़ञ ञामआकादा, ओनाते चा़रना़उकातेञ आड़ाक्‌काया।"

23 मेनखान ओनको दो आँट आड़ाङते होहोवातेको खोजकेदा, जेमोने कुरुस ओचोक्, आर ओनकोवाक् आड़ाङगे सोरोसेनताकोवा। 24 आर पिला़त दोए हुकुमकेदा ओनकोको खोजलेत् लेका होयोक् ला़गित्‌। 25 आदो होड़कोय भिङगड़ा़वेत्‌को इया़ते हाजोतरेये भोराव आकान ताहेंकानिच्ए आड़ाक्‌कादेया ओने उनिको खोजेकान ताहेंकान, मेनखान जिसु दो ओनकोवाक् सानारेये सोपरोतकेदेया।

26 आदो जिसुको इदियेदेकान ताहेंकानरे दिहा़त खोने हिजुक्‌कान ताहेंकान कुरेनिरेन सिमोनाय मित् होड़को साप्‌ केदेया आर कुरुसको लादेयादेया जिसु तायोम तायोमते ओना गोग ला़गित्‌।

27 आरको पाँजा इदि केदेया आ़डि फा़द दिसा़म होड़ आर मायजिउको, ओने ओनको कोड़ाम चेटाक् चेटाक्आते उनि ला़गित्‌को राक्‌ होमोरेत्‌ ताहेंकान। 28 आर जिसु दो ओनको मायजिउ सेच् आ़चुरकातेये मेतात्‌कोवा, "ए जेरुसालेमरेन होपोनेराको, आलोपे रागा इञ ला़गित्‌ दो, बिचकोम आपे आर आपेरेन गिदरा़ ला़गित्‌ राक्‌जोङपे। 29 एनते ञेलपे नोनकान दिनको दाराकाना ओने उनरेको मेन, भा़गानगेयाको बा़ँजहिको आर बाङ जानामाकात्‌को कुखिको आर बाको नुनुवाकात्‌ तोवाको दो। 30 उनरे बुरुको मेताक्‌को पोरतोना, दे आले चेतानरे दासावक्‌पे, आर डुङगरिको दे दापाललेपे, 31 एनते बेरेल दारेको नोनकायेत् खान रोहोड़ाक् दो चेत् बाको चेकाया?"

32 आर बारया एटाक् होड़ हों बा़ड़िच् का़क्‌मिकिनगे, गोच्‌किन ला़गित्‌ जिसु साँवतेको इदिकेत्‌किना। 33 आदो खा़परिको मेताक्‌ जायगाको सेटेरेन खान ओंडेको कुरुस केदेया, आर उनकिन बा़ड़िच् का़क्‌मिकिन हों, मित् दो एतोम सेच्‌रे आर एटागिच् दो कोयें सेच्‌रे।

34 आदो जिसुइ मेनकेदा, "ए बाबा, इका़काकोमे, एनते बाको बाडाया चेत्‌को चेकायेदा।" आदो उनियाक् किचरिच् गुलिबाँटकातेको हा़टिञाना। 35 आर दिसा़म होड़को दो तेङगोकातेको ञेञेलकान ताहेंकाना। आर मुखिया़को दो चिगा़रिआदेतेको मेनकेदा "एटाक्‌को दोए बाञचावकेत्‌कोवा, आच्‌बाड़ेये बाञचावक्‌मा, नुय दो मा़सि इसोररेन बाछाविच्‌कानाय मेनखान।"

36 आर पालटोनको होंको सिड़ोगादेया, सेन सोरकातेे सिरका़को नेयादेते, 37 आरको मेतादेया, "जिहुदिकोरेन राजा कान खानेम, मा आमते बाड़े बाञचावक्‌मे।"

38 आर उनि बोहोक् चोटरे मित्‌टेच् ओलाक् ताहेंकाना, बाङमा, "नुय दो जिहुदिकोरेन राजा।"

39 आर आकायेन बा़ड़िच् का़क्‌मिकिन मोदरेन मित् होड़ दो हेनोसतावादेतेये मेनकेदा, आमगे बाङ मा़सि दो? "मा आम आर आ़लिञ बाञचावबोनमे।"

40 मेनखान एटागिच् दो धोमकावकेदेतेये रोड़ रुवा़ड़ादेया, "आम दो इसोर हों बाम बोतोरायकाना इना़ सा़जा़इरे मेनामरे हों? 41 आर आलाङमा हिके लेकागे, एनते लाङ का़मियाकात् लेकागे लाङ ञाम हालायेदा, मेनखान नुय दो बेठिकाक् चेत् हों बाय का़मि आकादा।" 42 आदोए मेनकेदा, "ए जिसु दिसा़ञमे बाड़े आमाक् राजरेम सेटेरलेनरे।"

43 खानगेये मेतादेया, "सा़रिगेञ मेतामकाना, तेहेञगे आम दो पारादा़इसरेम इञ तुलुजोक्आ।"

44 आर बेर दो तिकिन गेलबार बाजा आमदाज ताहेंकाना, खानगे गोटा दिसा़म ञुतेना पे बाजा हा़बिच्, 45 सिञ चाँदोए ञुतेनते, आर कोयजोङ ओड़ाक्‌ रेयाक्‌ ओरवाल दो ताला तालाते ओड़ेच्एनते बार हा़टिञेना। 46 आर जिसु आँट आड़ाङते होहोकेत्‌तेये मेनकेदा, "ए आ़पुञ आमाक् तिरे इञाक् जिविञ जिमा़येत्‌काना," आर नोवाय रोड़केत् खान जिवि ओडोकेनताया।

47 खानगे सुबेदार दो ओना होयेनाक्ए ञेलकेत् खान इसोर साबासिवादेतेये मेनकेदा, "खा़टिगे नुय होड़ दो भागेगेये ताहेंकाना।"

48 आर नोवा ञेला मेनते जारवालेन जोतो होड़ दो नोवा जोतोवाक्‌को ञेलकेत् खान कोड़ाम चेटाक् चेटाक्‌तेको रुवा़ड़ चालावेना। 49 आर उनिरेन जोतो ञेपेल ओपरोमको आर गा़लिल खोन उनि तुलुच् हेच् दारावाकान मायजिउको दो सा़ङगिञरे तेङगोकाते नोवाकोको ञेञेलकान ताहेंकाना।

50 आर ञेलपे, जोसेफ ञुतुमाय मित् होड़, ओने ओकोय माराङ बा़इसिरेन मित्‌टेन सोसोलहायिच्ए ताहेंकान, मित्‌टेन भागे आर मानोतान होड़गे। 51 उनि दो ओनकोवाक् सोलहा आर का़मिरे रा़जि दो बाय ताहेंकाना, जिहुदिकोवाक् मित्‌टेच् नागराहा आ़रिमा़थिया़रेन होड़, ओने उनि इसोराक् राजे ञेल होहोरकान ताहेंकान। 52 उनि दो पिला़त ठेन सेनकाते जिसुवाक् होड़मोये कोयकेदा। 53 आर उनि फेडकेदेते मुसना़ किचरिच्‌तेये ओयो पोटोमकेदेया आर चा़टा़इनिरे खोलावआकात् मित्‌टेच् कोबोररेये दोहोकेदेया, ओने ओनारे तिस हों ओकोय हों बाको दोहोआकात्‌को ताहेंकाना। 54 आर सापड़ावक् दिन ताहेंकाना, आर जिरा़उक् माँहाँ दो एहोबोक् ओकते ताहेंकाना।

55 आर गा़लिल खोन जिसु तुलुच्‌को हेच् दारालेन मायजिउको दो तायोम तायोमते सेनकाते कोबोर आर उनियाक् होड़मो चेत्‌लेका दोहोआकान ताहेंकान, ओनाको ञेलाना।

56 खानगे रुवा़ड़काते मोसोलाको आर मोंहोंक सुनुमकोको तेयारकेदा, आर जिरा़उक् माँहाँ हिलोक् दो हुकुम लेकाको जिरा़वेना।