Lucas 5

जिसु पा़हिल चेलाकोय होहोवाकोकान

1 आर गादेल होड़ उनिको रिडा़त्‌ चिरित्‌एदेकान आर इसोराक् काथाको आँजोमकान ताहेंकानरे, जिसु दो गेनेसारेत दोरयाँव आड़ेरेये तेङगोवाकान ताहेंकाना। 2 आदो दोरयाँव आड़ेरे जिसु दो बारया ला़उका़ तेङगो आकात् ए ञेलकेदा; केंवटाको दो फेडकाते झा़लिको आ़क्‌रुप्‌कान ताहेंकाना। 3 आदो ओनाकिन मोदरे मित्‌टेन ला़उका़रे देच्‌काते ओने ओकाटाक् सिमोनाक् ताहेंकान ढिप खोन साञोगा मेनतेये मेतादेया आर ला़उका़रे दुड़ुप्‌काते ओनको गादेल होड़े चेत्आत्‌कोवा।

4 आर जिसु दो गालमारावे थिरेन खान सिमोने मेतादेया, "मा खा़न्‌दरिञते इदिमे आर झा़लिको ला़गित्‌ जाल चाडोयतापे।"

5 सिमोने मेनकेदा, "ए गुरु, गोटा ञिंदा़ खाटावकाते चेले हों बाले ञामलेत्‌कोवा; एनहों आमाक् काथाते झा़लिञ चाडोया।" 6 आदोको ओनकाकेत् खान आ़डि उता़र हाकोको झा़लिकेत्‌कोवा, जे झा़लि दो ओड़ेजोक्‌कान ताहेंकाना। 7 ओनाते एटाक् ला़उका़रेन सोङगेतेनकोको गा़विच्आत्‌कोवा जेमोन हेच्‌कातेको गोड़ोंवाको, आदोको हेच्एना आर बानार ला़उका़ नुना़क्‌को पेरेच्‌केदा जे उनुमोक्‌कान ताहेंकाना। 8 खानगे सिमोन पातरास ओनाय ञेलकेत् खान जिसुवाक् ति जाङगारे गिडियेनतेये मेनकेदा, "इञ ठेन खोन मा फाराकोक्‌मे, एनतेञ का़इ होड़ काना, प्रोभु।"

9 उनि दो एनते थारबासाव पाड़ावादेया आर उनि साँवते जोतोको हों, उना़क् हाकोको साप्‌लेत्‌कोते। 10 आर ओनकागे साबदाय होपोन जाकोब आर जोहानता़किन होंकिन थारबासावेना, ओने उनकिन सिमोनरेन रा़सिया़किन ताहेंकान, आदो जिसु सिमोने मेतादेया, "आलोम बोतोरोक्आ, एनते नित खोन दो होड़ सासाप्इच्एम होयोक्आ।"

11 आदो ला़उका़किन ढिपतेको आ़गुकेत् खान, सानामाक् बा़गिकातेको पाँजा केदेया।