1 आर गादेल होड़ उनिको रिडा़त्‌ चिरित्‌एदेकान आर इसोराक् काथाको आँजोमकान ताहेंकानरे, जिसु दो गेनेसारेत दोरयाँव आड़ेरेये तेङगोवाकान ताहेंकाना। 2 आदो दोरयाँव आड़ेरे जिसु दो बारया ला़उका़ तेङगो आकात् ए ञेलकेदा; केंवटाको दो फेडकाते झा़लिको आ़क्‌रुप्‌कान ताहेंकाना। 3 आदो ओनाकिन मोदरे मित्‌टेन ला़उका़रे देच्‌काते ओने ओकाटाक् सिमोनाक् ताहेंकान ढिप खोन साञोगा मेनतेये मेतादेया आर ला़उका़रे दुड़ुप्‌काते ओनको गादेल होड़े चेत्आत्‌कोवा।

4 आर जिसु दो गालमारावे थिरेन खान सिमोने मेतादेया, "मा खा़न्‌दरिञते इदिमे आर झा़लिको ला़गित्‌ जाल चाडोयतापे।"ला़उका़रे दुड़ुप्‌काते हाकोको गोगोच्‌ कान

5 सिमोने मेनकेदा, "ए गुरु, गोटा ञिंदा़ खाटावकाते चेले हों बाले ञामलेत्‌कोवा; एनहों आमाक् काथाते झा़लिञ चाडोया।" 6 आदोको ओनकाकेत् खान आ़डि उता़र हाकोको झा़लिकेत्‌कोवा, जे झा़लि दो ओड़ेजोक्‌कान ताहेंकाना। 7 ओनाते एटाक् ला़उका़रेन सोङगेतेनकोको गा़विच्आत्‌कोवा जेमोन हेच्‌कातेको गोड़ोंवाको, आदोको हेच्एना आर बानार ला़उका़ नुना़क्‌को पेरेच्‌केदा जे उनुमोक्‌कान ताहेंकाना। 8 खानगे सिमोन पातरास ओनाय ञेलकेत् खान जिसुवाक् ति जाङगारे गिडियेनतेये मेनकेदा, "इञ ठेन खोन मा फाराकोक्‌मे, एनतेञ का़इ होड़ काना, प्रोभु।"

9 उनि दो एनते थारबासाव पाड़ावादेया आर उनि साँवते जोतोको हों, उना़क् हाकोको साप्‌लेत्‌कोते। 10 आर ओनकागे साबदाय होपोन जाकोब आर जोहानता़किन होंकिन थारबासावेना, ओने उनकिन सिमोनरेन रा़सिया़किन ताहेंकान, आदो जिसु सिमोने मेतादेया, "आलोम बोतोरोक्आ, एनते नित खोन दो होड़ सासाप्इच्एम होयोक्आ।"

11 आदो ला़उका़किन ढिपतेको आ़गुकेत् खान, सानामाक् बा़गिकातेको पाँजा केदेया।

12 आर मित् गोटेच् नागराहारेये ताहेंकानरे, ञेलपे, मुरहुच्‌जोमते पेरेच् मित् होड़े ताहेंकाना आर जिसु ञेलकाते ताबेरेनतेये नेहोंरादेया, "ए प्रोभु, सानालेम खानेम साफा दाड़ेयाञा।"

13 आदो जिसु ति तिया़रकातेये जोटेत्‌केदेया आरे मेतादेया, "सानाञकानगेया, मा साफाकोक्‌मे।" खान मुरहुच्‌ जोम रोग दो उनि खोन ओचोक्‌गोत् एना। 14 आरे हुकुमादेया "ओकोय हों ओना आलोय ला़इयाको, मेनखान सेनकाते नायके ठेन ञेल ओचोक्‌मे आर मोसेये हुकुम आकात्‌ लेका आमेम साफायेन रेयाक्‌ दाँड़ें सामाङमे ओनको ला़गित्‌ गोहा ञुतुमते।"✝

15 मेनखान आरतेत्‌गे उनि रेयाङ काथा दो डामडाहे इदियेना आर आ़डि गादेल होड़को हेच् जारवाक्‌कान ताहेंकाना आँजोम आर आकोवाक् रोगको खोन बोगे ओचोक् ला़गित्‌। 16 मेनखान आच् दो हाहाङकार जायगाकोते सा फाराकोक्‌तेये कोयजोङकान ताहेंकाना।

17 आर ओना जोखेच् मित् दिन जिसु दो होड़े चेत्आकोकान ताहेंकाना आर फा़रिसिको आर आ़न गुरुको गा़लिल आर जिहुदा़ रेयाक्‌ जोतो आतोको खोन आर जेरुसालेम खोन ओडोक हेच्‌कातेको दुड़ुप्‌ आकान ताहेंकाना आर होड़ बोगेको ला़गित्‌ प्रोभुवाक् दाड़े दो उनि साँवते ताहेंकाना। 18 आर ञेलपे, होड़को दो पारकोमते मित्‌टेन मित्‌काड़गोच् होड़को गोक्‌ आ़गुयेकाना आर आदेरे आर जिसु सामाङरे दोहोयेको टेस्‌टाकान ताहेंकाना। 19 आर ओनको गादेल होड़ इया़ते आदेरे होर बाको ञामलेत्‌ते छातरेको देच्एना आर खापरा ओचोक्‌काते तालारे जिसु सामाङरे पारकोम सुदहा़गेको फेड गोत्‌कादेया। 20 आदो जिसु ओनकोवाक् बिसवा़स ञेलकातेये मेनकेदा, "ए हो, आमाक् का़इको दो इका़येनतामा।"

21 खानगे आ़न गुरुको आर फा़रिसिको दो हुदिसोक् एहोप्एनतेको मेनकेदा, "नुय दोए ओकोय काना, इसोर हेनोसतावाक्ए रोरोड़कान दो? का़इ दो ओकोय इका़ दाड़ेकेया एसकार इसोर छाडा दो?"

22 जिसु दो ओनकोवाक् हुदिस बुनदिस बाडायकातेये रोड़ रुवा़ड़ात्‌कोवा, "चेत्‌पे हुदिसेत्‌काना आपेयाक् मोनरे? 23 ओकाटाक् बा़ड़ति आलगावा आमाक् का़इको इका़येनतामा मेमेन, से बेरेत्‌काते ताड़ाममे" मेमेन? 24 मेनखान जेमोनपे बाडाय मानवा होपोन दो धा़रतिरे का़इ इका़ रेयाक्‌ एकतिया़रि मेनाक्‌ताया मेनते। उनि मित्‌काड़ गोच् आकानिच्ए मेतादेया, "आमिञ मेतामकाना, मा बेरेत्‌मे आर आमाक् पारकोम कुटुङकाते ओड़ाक्‌ते चालाक्‌मे।"

25 खानगे इना़ घा़ड़िच्‌तेगे ओनको सामाङरेये बेरेत् एना आर आच्ए गितिच् लेनाक् कुटुङकाते इसोर साबासिवाते आच् ओड़ाक्‌तेये चालावेना। 26 आर जोतो होड़को ठाक चाबायेना आर इसोरको साबासिवादेया आर बोतोर चाड़हावात्‌कोतेको मेनकेदा, "तेहेञ दो हाहाड़ावाक्‌कोगेबोन ञेल आकादा।"

27 आदो नोवाको तायोम जिसुइ ओडोक चालावेना आर लेबि ञुतुमाय मित्‌टेन मा़सुल उक्‌ठा़विच् मा़सुल उक्‌ठा़उ ओड़ाक्‌ ठेन दुड़ुप्‌ आकाने ञेल केदेया आरे मेतादेया, "देला पाँजाञमे।" 28 खानगे लेवि दो जोतो बा़गियात्‌ते बेरेत्‌काते उनिये पाँजा केदेया।

29 आर लेबि दो आच् ओड़ाक्‌रे माराङ ओकोच्ए भोजआदेया जिसु आर आ़डि उता़र मा़सुल उक्‌ठा़उको आर एटाक् होड़ ओनको तुलुच् जोजोमको दुड़ुप्‌ आकान ताहेंकाना। 30 आदो फा़रिसिको आर ओनकोरेन आ़न गुरुको जिसुरेन चेलाको उपा़ररेको काराच्‌कुरुच्एना, मेनकेदाको, चाक् मा़सुल उक्‌ठा़उको आर का़इ होड़ तुलुच्‌पे जोम ञुयेत्आ?

31 जिसुइ रोड़ रुवा़ड़ात्‌कोवा, "बोगे होड़ दो रारानिच् रेयाक्‌ जा़रुड़ बा़नुक्‌ताकोवा, मेनखान दुखा़लिकोगे। 32 भागे होड़ होहोवाको ला़गित्‌ दो बा़ञ हेच् आकाना मेनखान का़इ होड़कोगे, मोन आ़चुरताको ला़गित्‌।"

33 आदो जिसुको मेतादेया, "जोहानरेन चेलाको दो आ़डि धावको उपा़सेत् आरको कोयजोङ काना आर ओनकागे फा़रिसिकोरेन हों; मेनखान आमरेन दोको जोम ञुयेत्आ।"

34 जिसुइ मेतात्‌कोवा, "सोङगेरे जाँवाँय बेटा ताहेन तुलुच् बा़रिया़तको दो बापला ओड़ाक्‌रेपे उपा़स ओचो दाड़ेकेकोवा? 35 मेनखान दिनको दाराकाना, जाँवाँयबेटा ओनको खोने रेच्‌लेनरे, उनरे ओनाको दिनरे दोको उपा़सा।"

36 जिसु मित्‌टेन फेन होंए ला़इयात्‌कोवा, बाङमा, "ओकोय हों नावाँ किचरिच् खोन मित् कुटरा़ ओड़ेच्‌काते मारे किचरिच्‌रे बाको कानथा जालादा; बाङखान नावाँनाक् होंए ओड़ेच्‌केत् आर मारेयाक्‌रे नावाँनाक् रेयाक्‌ कुटरा़ मा बाङ जुरिक्‌कान। 37 आर ओकोय हों नावाँ दारखा रासा दो मारे हारता भाजानरे बाको दुल दोहोया; बाङखान नावाँ दारखा रासाते दो कुमकोय ओड़ेजा आर ओना दो बुहेलोक्आ आर कुमको नोसटोक्आ। 38 मेनखान नावाँ दारखा रासा दो नावाँ हारता भाजानकोरे दुल दोक्‌हो होयोक्आ। 39 आर ओकोय हों मारेयाक्‌ ञुकाते नावाँनाक् दो बाय खोजा, एनतेये मेना, मारेयाक्‌गे बोगेया।"