Lucas 8

जिसु बिरबाँव होयये थिर ओचोयेत्

22 आर ओना जोखेच् मित् दिन जिसु दो मित्‌टेच् ला़उका़रेये देच्एना आर उनिरेन चेलाको हों; आरे मेतात्‌कोवा, "देलाबोन दोरयाँव ओन पारोमतेबोन चालाक्आ।" आदो ला़उका़को लाड़ावकेदा। 23 आर ला़उका़तेको चालाक्‌कान ताहेंकानरे जिसु दोए जा़पित्‌केदा। खानगे दोरयाँवरे बिरबाँव हेच्एना आर ला़उका़ दो दाक्‌ते पेरेजोक्‌कान ताहेंकानते मुहिनरेको पाड़ावेना।

24 आदो जिसु ठेन सेनकाते बेरेत्‌केदेतेको मेतादेया, "ए गुरु, ए गुरु, जोसावेनाबोन।" जिसु दो बेरेत्एनते होय आर हाबाक डाबाकोक्‌ कान दाक्ए धोमकावकेदा; खानगे थिरेनते डेलडेल निझुमेना।

25 आदोए मेतात्‌कोवा, "ओकोरतापे बिसवा़स दो?" आर बोतोर आर हाहाड़ातेको मेपेनेना, "ओकोय एनडेखान उनि दो, होय हों होय आर दाक् हों दाक्ए हुकुमाक्‌काना आर बानारकिन बातावेत्‌ताय दो?"

जिसु भुत चापाड़ होड़े बोगेयेदे

26 जिसु आर आच्‌रेन चेलाको गा़लिल ओन पारोम गेरासेनेसरेनकोवाक् टोठातेको सेटेरेना।